“Wak kuidadosamente den e lei perfekto ku ta trese libertat.”—SANT. 1:25.

1, 2. (a) Kon bini hende ta sinti ku kada dia nan tin ménos libertat? (b) Ki libertat sirbidónan di Yehova lo disfrutá di dje den futuro?

NOS ta bibando den un tempu masha krítiko, i dia pa dia hende ta bira mas golos, violento i malbado. (2 Tim. 3:1-5) P’esei, gobièrnunan ta introdusí mas lei, fortifiká nan kuerpo polisial i instalá kámaranan di vigilansia. Den algun pais, siudadanonan ta pone alarma na nan kas, èkstra lòk i koriente na nan kurá pa nan por sinti nan mas safe. Ademas, hopi hende no ta sali anochi mas ni no ta laga nan yunan hunga pafó nan so—ni di dia ni anochi. Ta bisto anto ku kada dia ku pasa hende tin ménos libertat pa hasi loke nan ta deseá. I ta parse ku e situashon akí lo no mehorá.

² Hopi tempu pasá, den e hòfi di Edén, Satanas a insinuá ku hende por disfrutá di pleno libertat si nan ta independiente di Yehova. Esei sí tabata un mentira flagrante! Dikon? Pasobra mas hende ignorá e Palabra di Dios i biba manera nan ke, mas humanidat ta sufri. I e situashon akí ta afektá Yehova su sirbidónan tambe. Ma nos tin e speransa ku un dia hende lo ta liber di piká i di un kurpa ku ta kaba na nada i ku nos lo disfrutá di loke Beibel ta yama “e glorioso libertat di e yunan di Dios.” (Rom. 8:21) De echo, Yehova a kuminsá prepará su sirbidónan kaba pa e libertat ei. Kon asina?

3. Ki lei Yehova a duna siguidónan di Kristu, i ki preguntanan nos lo kontestá den e artíkulo akí?

³ Pa prepará nos, Yehova a duna nos loke disipel Santiago a yama “e lei perfekto ku ta trese libertat.” (Lesa Santiago 1:25.) Otro vershonnan di Beibel, manera por ehèmpel The New English Bible, ta tradusí e frase akí komo “e lei ku ta hasi nos liber,” i Beibel Santu ta tradusié komo “e lei perfekto, e lei di libertat.” Normalmente,  ora hende tende e palabra “lei,” nan ta pensa riba restrikshon i no libertat. Kiko anto ta “e lei perfekto ku ta trese libertat”? I kon e ta hasi nos liber?

E LEI KU TA HASI NOS LIBER

4. Kiko ta “e lei perfekto ku ta trese libertat,” i ken ta benefisiá di dje?

⁴ “E lei perfekto ku ta trese libertat” no ta e Lei di Moises. Dikon nò? Pasobra e propósito di e Lei di Moises tabata pa mustra e israelitanan ku nan tabata pekadó. Ademas, loke e Lei a prefigurá a bira realidat den Kristu. (Mat. 5:17; Gal. 3:19) Ta na kua lei Santiago tabata referí anto? Wèl, loke e tabatin na mente ta e “lei di Kristu,” ku Beibel ta yama tambe e “lei di fe” i “e lei di un pueblo liber.” (Gal. 6:2; Rom. 3:27; Sant. 2:12) Pues, “e lei perfekto” ta enserá tur loke Yehova ta rekerí di nos. I tantu e kristiannan ungí komo e ‘otro karnénan’ ta benefisiá di e lei akí.—Huan 10:16.

5. Dikon e lei di libertat no ta pisá?

⁵ Distinto for di e leinan di hopi pais, “e lei perfekto” no ta kompliká ni pisá; mas bien, e ta konsistí di mandamentunan simpel i prinsipionan básiko. (1 Huan 5:3) Hesus a bisa: “Mi yugo ta suave, i mi karga no ta pisá.” (Mat. 11:29, 30) Ademas, ora nos ta sigui “e lei perfekto,” nos no mester di un lista largu di regla òf di kastigu, pasobra e lei ta basá riba amor i ta grabá den nos mente i kurason i no riba tabla di piedra manera tabata e kaso ku e Lei di Moises.—Lesa Hebreonan 8:6, 10.

KON “E LEI PERFEKTO” TA HASI NOS LIBER?

6, 7. Kiko nos por bisa di e leinan di Yehova, i kiko e lei di libertat ta permití nos hasi?

⁶ E leinan ku Yehova a stipulá pa su kriaturanan inteligente ta pa nan mes bon i protekshon. Pensa riba e leinan di naturalesa ku ta goberná universo, manera por ehèmpel e lei di gravedat. Bo sa tende hende keha i bisa ku e leinan akí ta pisá? Al kontrario, nos ta kontentu ku e leinan ei ta eksistí, pasobra nos sa ku nan ta pa nos bienestar. Di igual manera, Yehova su normanan moral i spiritual, ku ta ser reflehá den “e lei perfekto” di Kristu, ta pa nos benefisio.

⁷ Ademas di protehá nos, e lei di libertat ta permití nos satisfasé nos deseonan sin ku nos ta perhudiká nos mes òf trapa derechi, òf kita libertat, di otro hende. Pues, kiko ta e klave pa disfrutá di berdadero libertat, esta, pa hasi loke nos ke? Nos deseonan mester ta korekto i na armonia ku Yehova su boluntat. Sí, nos mester siña stima loke Yehova ta stima i odia loke e ta odia. I e lei di libertat ta yuda nos hasi esei.—Ámos 5:15.

8, 9. Kon obedensia na e lei di libertat ta benefisiá nos? Duna un ehèmpel.

⁸ Komo ku nos ta hende imperfekto, nos tin ku lucha pa dominá deseo robes. No opstante, for di awor nos ta disfrutá di un sierto grado di libertat segun ku nos ta hasi esfuerso pa kumpli ku e lei di libertat. Den ki sentido? Laga nos usa e kaso di Jay komo ehèmpel. Jay tabata adikto na tabaku. Ora el a kuminsá studia Beibel, el a komprondé ku su bisio tabata algu desagradabel den bista di Dios i ku e mester a tuma un desishon: Sea e ta laga su deseo di karni sigui domin’é òf e ta someté su mes na Yehova su normanan. Jay a tuma e desishon sabí di sirbi Yehova i a stòp di huma aunke esei no tabata fásil p’e, pasobra su kurpa tabata sigui pidi nikotina. Awor, kon el a sintié despues ku el a stòp ku e bisio ei? El a bisa: “Mi a sinti mi liber i masha kontentu.”

⁹ Jay su eksperensia a siñ’é un lès masha importante: E libertat ku mundu ta ofresé, ku ta permití hende ‘fiha nan mente riba karni,’ en realidat ta hasi hende esklabo di piká. En kambio, ora nos ta hasi esfuerso  pa kumpli ku Dios su lei di libertat, nos ‘ta fihá nos mente riba spiritu’ i esei ta hasi nos liber; nos lo tin “bida i pas.” (Rom. 8:5, 6) Awor, ta ku ken su forsa Jay por a stòp ku su bisio? Wèl, el a vense ku yudansa di Yehova i no riba su mes forsa. El a bisa: “Regularmente mi tabata studia Beibel, resa pidi Dios su spiritu santu i mi a aseptá e yudansa amoroso ku e kongregashon a ofresé mi.” Meskos ku e provishonnan akí a yuda Jay, nan por yuda nos tur haña berdadero libertat. Laga nos ban wak kon.

WAK KUIDADOSAMENTE DEN E PALABRA DI DIOS

10. Kiko ke men “wak kuidadosamente” den e lei di Dios?

¹⁰ Santiago 1:25 ta bisa en parte: ‘Esun ku ta wak kuidadosamente den e lei perfekto ku ta trese libertat i ta persistí den hasi esei lo ta felis.’ E palabra griego original tradusí komo “wak kuidadosamente” ta nifiká “bùig pa investigá algu,” loke ta eksigí esfuerso i konsentrashon. Pues, si nos ke pa e lei di libertat influensiá nos mente i kurason, nos mester hasi nos parti; nos mester hasi esfuerso pa studia Beibel diligentemente i meditá profundamente riba loke nos ta lesa.—1 Tim. 4:15.

11, 12. (a) Kon Hesus a mustra ku nos tin ku biba na armonia ku e bèrdat? (b) Ki peliger hóbennan spesialmente mester evitá?

¹¹ Loke nos mester hasi tambe ta “persistí,” esta, perseverá den apliká e Palabra di Dios. Ku otro palabra, nos mester biba na armonia ku e bèrdat. Hesus a ekspresá un pensamentu similar ora el a bisa algun hende ku a pone fe den dje: “Si boso keda fiel  na mi palabranan, boso realmente ta mi disipelnan, i boso lo konosé e bèrdat, i e bèrdat lo hasi boso liber.” (Huan 8:31, 32) Den e kaso akí, e verbo “konosé” ta enserá tambe komprondé ki importansia loke nos sa mester tin den nos bida. Pues, ta ora nos ta hasi esfuerso pa biba na armonia ku e bèrdat, nos por bisa ku realmente nos “konosé” e bèrdat. Ta e ora ei nos por bisa korektamente ku “e palabra di Dios” ta “obra” den nos, esta, ku e ta yuda nos reflehá e personalidat di nos Tata selestial lo mihó ku nos por.—1 Tes. 2:13.

¹² P’esei, puntra bo mes: ‘Realmente mi konosé e bèrdat? Mi ta biba na armonia ku e bèrdat? Òf ainda mi ta deseá e supuesto libertat ku mundu ta ofresé?’ Un ruman muhé kende su mayornan a lant’é den e bèrdat a skirbi: ‘Ora bo lanta den e bèrdat, bo ta kere ku Yehova ta eksistí. Pero ami nunka a siña konos’é di bèrdat. Nunka mi a siña odia loke e ta odia. Nunka mi a pensa ku loke mi tabata hasi tin efekto riba dje. I ora mi tabatin problema, nunka mi tabata aserk’é den orashon. Semper mi a dependé riba mi mes komprondementu. Awor mi sa ku esei tabata apsurdo pasobra mi no tabata sa nada.’ Afortunadamente, e ruman muhé akí a realisá despues ku su manera di pensa tabata robes, i el a hasi kambionan grandi. El a asta kuminsá traha komo pionero regular.

SPIRITU SANTU POR YUDA HASI BO LIBER

13. Kon e spiritu santu di Dios ta yuda hasi nos liber?

¹³ Na 2 Korintionan 3:17, nos ta lesa: “Kaminda e spiritu santu di Yehova ta, ei tin libertat.” Awor, kon spiritu santu ta yuda hasi nos liber? Wèl, e ta yuda nos kultivá kualidatnan, manera “amor, goso, pas, pasenshi, amabilidat, bondat, fe, suavedat, dominio propio.” (Gal. 5:22, 23) Sin e kualidatnan akí, foral amor, ningun hende no por ta berdaderamente liber. I esaki ta bisto den e mundu djawe. Ta interesante pa nota ku despues ku Pablo a menshoná e aspektonan di e fruta di spiritu, el a bisa: “Kontra e tipo di kosnan ei no tin lei.” Kiko Pablo tabata ke men? Wèl, ku no tin ningun lei ku por stroba un persona di kultivá i desplegá e fruta di Dios su spiritu. (Gal. 5:18) Asta si tabatin un lei asina, lo e no tabatin ningun sentido. Dikon nò? Pasobra Yehova su boluntat ta pa nos sigui kultivá e kualidatnan akí mas i mas i desplegá nan pa semper.

14. Den ki manera e spiritu di mundu ta hasi hende esklabo?

¹⁴ En kambio, hende dominá pa e spiritu di mundu i ku ta satisfasé nan deseo di karni libremente ta kere ku nan ta liber. (Lesa 2 Pedro 2:18, 19.) Pero en realidat, nan ta esklabo. Dikon? Pasobra tin sentenáres di regla i lei ku gobernantenan ta stipulá pa tene e hendenan akí bou di kontrol. Apòstel Pablo a bisa: “No ta pa hende hustu ta dekretá lei, sino pa esnan sin lei i rebelde, ku ta malbado i pekadó, desleal.” (1 Tim. 1:9, 10) Ademas, nan ta esklabo tambe pasobra nan ta ‘hasi loke nan karni ta deseá,’ i nos karni ta un doño kruel. (Efe. 2:1-3) Hendenan asina ta manera insekto ku ta bai den un pòchi di honing pa satisfasé nan mes i ta keda atrapá. Sí, e hendenan akí ta sigui nan deseonan robes i ta bira esklabo di piká.—Sant. 1:14, 15.

E KONGREGASHON KRISTIAN TA YUDA HASI BO LIBER

15, 16. Dikon ta importante pa nos asosiá ku e kongregashon kristian, i kon nos ta sinti nos den kongregashon?

¹⁵ E kongregashon kristian no ta un klup ku bo tin ku inskribí pa bira miembro di dje; mas bien, bo ta forma parti di e kongregashon kristian pasobra Yehova a  hala bo. (Huan 6:44) Awor, kiko a motivá Yehova pa hasi esei? Akaso bo tabata un persona hustu ku ta teme Dios? Kisas bo ta pensa: “Esei sigur ku nò.” Kiko a motivá Dios anto? Wèl, el a mira den bo kurason ku bo ta un persona dispuesto pa sigui su guia amoroso i obedesé su lei di libertat. I mediante e kongregashon kristian, Yehova ta alimentá bo spiritualmente, libra bo for di siñansa falsu i di superstishon i ta siña bo kon pa imitá Kristu su personalidat. (Lesa Efesionan 4:22-24.) Komo resultado di esei, bo tin e privilegio di ta entre e úniko hendenan na mundu ku realmente por ser yamá “un pueblo liber.”—Sant. 2:12.

¹⁶ Pensa awor riba esaki: Bo ta sinti miedu ora bo ta den kompania di hende ku ta stima Yehova di henter nan kurason? Bo ta haña bo ta wak patras kada bes? Ora bo ta kòmbersá ku e rumannan na Salòn, bo ta tene bo tas duru pa hende no hòrta bo? Al kontrario, bo ta sinti bo trankil i liber! Ta asina bo ta sinti bo ora bo ta na un aktividat di mundu? Probablemente ku nò! E libertat ku bo ta disfrutá di dje awor den e pueblo di Dios ta djis un ñapa di e libertat ku nos lo disfrutá di dje den futuro.

“E GLORIOSO LIBERTAT DI E YUNAN DI DIOS”

17. Kiko e “revelashon di e yunan di Dios” tin di haber ku berdadero libertat pa humanidat?

¹⁷ Relashoná ku e libertat ku Yehova lo duna su sirbidónan riba tera, apòstel Pablo a bisa: “Kreashon ta spera ku gran ekspektativa riba revelashon di e gloria di e yunan di Dios.” Kaba el a bisa: “Kreashon mes tambe lo ser librá di sklabitut na un kurpa ku ta kaba na nada i lo tin e glorioso libertat di e yunan di Dios.” (Rom. 8:19-21) Aki, “kreashon” ta referí na hende ku tin e speransa di biba pa semper riba tera i ku lo benefisiá di e “revelashon” di Dios su yunan ungí ku spiritu santu. E revelashon ei lo kuminsá ora e “yunan” ungí ku ta den shelu yuda Kristu eliminá tur maldat for di riba tera i preservá “un multitut grandi” pa drenta e mundu nobo.—Rev. 7:9, 14.

18. Kon humanidat lo haña mas libertat gradualmente, i ki libertat nan lo disfrutá di dje finalmente?

¹⁸ Despues di esei, hende lo por disfrutá di un libertat masha spesial. Nan lo ta liber di e influensia di Satanas i su demoñonan. (Rev. 20:1-3) Ki un alivio esei lo ta! Di e tempu ei padilanti, e 144.000 rei- i saserdotenan lo usa e sakrifisio di reskate na benefisio di humanidat te ora tur hende bira kompletamente liber di e piká di Adam i di imperfekshon. (Rev. 5:9, 10) Finalmente, despues ku humanidat pasa e prueba final, esnan ku keda fiel lo haña e berdadero libertat ku Yehova tabatin pa nan for di prinsipio, esta, “e glorioso libertat di e yunan di Dios.” Bo por imaginá bo esei? Lo bo no tin ku lucha mas pa hasi loke ta korekto den bista di Dios. Dikon nò? Pasobra bo kurpa, mente i kurason lo ta perfekto, i lo bo por imitá Dios su kualidatnan perfektamente.

19. Kiko nos mester sigui hasi pa por keda riba e kaminda ku ta hiba na berdadero libertat?

¹⁹ Abo ke tin “e glorioso libertat di e yunan di Dios”? Si ta asina, laga “e lei perfekto ku ta trese libertat” sigui guia bo mente i kurason. Sí, sigui studia Dios su Palabra diligentemente. Sigui biba na armonia ku e bèrdat. Pidi Dios su spiritu santu i sigui benefisiá plenamente di e kongregashon kristian i di e kuminda spiritual ku Yehova ta proveé. I no laga Satanas gaña bo manera el a gaña Eva i pone bo pensa ku Yehova su mandamentunan ta muchu estrikto. Anto kòrda, Diabel ta masha astuto. Pero manera e siguiente artíkulo lo mustra, nos por vens’é, pasobra “su trikinan no ta deskonosí pa nos.”—2 Kor. 2:11.

[Preguntanan di Estudio]

[Plachi na página 14]

Ainda mi ta deseá e supuesto libertat ku mundu ta ofresé?

[Plachi na página 14]

Mi ta biba na armonia ku e bèrdat?