Arataki a Iehova ia Koe ki te tu Rangatira Mou
Arataki a Iehova ia Koe ki te tu Rangatira Mou
‘Akara ki roto i te ture tika rava o te tu rangatira.’—IAKO. 1:25.
KA RAUKA AINEI IA KOE TE AKATAKA?
Eaa te ture te taki atura ki te tu rangatira mou, e koai ma te ka puapingaia mei taua ture ra?
Eaa te taviri kia rauka mai te tu rangatira mou?
Eaa te tu rangatira te tapapaia atura e te katoatoa te ka noo tamou ki runga i te mataara o te ora?
1, 2. (a) Eaa te tupu ra ki te tu rangatira o teianei ao, e no teaa ra? (e) Eaa te tu rangatira tei mua i te au tavini o Iehova?
TE NOO nei tatou i te tuatau te maata atura te noinoi, te akangateitei kore anga i te ture e te ta tangata. (2 Timo. 3:1-5) No te reira tu, kua akamaata atu te kavamani i te au ture, kua akaketaketa atu i te pupu akava, e kua tamou aere i te au nenei kia kiteaia atu eaa ta te au tangata e rave ra. I roto i tetai au enua, kua akamaata atu te tangata i te au apinga paruru anga na te tamou anga i te au aramu ki roto i to ratou are, e tetai au roka e te au aua niuniu uira. E maata kare e aere ana ki vao i te po me kore kare e tuku ana i ta ratou tamariki kia kanga ki vao ko ratou anake ua. Taka ua ra e te iti atura te tu rangatira, e kare e meitaki atu te au turanga.
2 I roto i te kainga i Edene, kua karanga a Satani e ko te ravenga e rauka mai ei te tu rangatira mou ko te akatakake mai anga mei ia Iehova. E pikikaa kino tikai te reira! E tika, te maata atu ta te au tangata ka rave i ta ratou e inangaro ra kare i ta te Atua, maata atu te kino ka tupu ki te au tangata. Te tupu katoa nei teia kino kia tatou te au tavini o Iehova. Inara, e manakonakoanga to tatou e ka kite tatou i te openga o te tuikaa anga o te au tangata i roto i te ara e te kino e te rauka mai anga ta te Pipiria e kapiki ra e ko ‘te tu rangatira meitaki o te tamariki a te Atua.’ (Roma 8:21) Te tikaanga, kua akapapa ke ana a Iehova i tona au tavini no taua tu rangatira ra. Na roto i teea tu?
3. Eaa te ture ta Iehova i oronga ki te au pipi a Karaiti, e eaa te au uianga ta tatou ka uriuri?
3 Tei roto te pauanga i ta te tangata tata Pipiria ko Iakobo e karanga ra e ko ‘te ture tika rava o te tu rangatira.’ (E tatau ia Iakobo 1:25.) Kua taiku tetai uri anga Pipiria i teia e ko “te ture tei akamatara mai ia tatou” (The New English Bible). Mei tei matauia, e manako ana te au tangata i te ture ei mea arairai anga, kare e oronga maira i te tu rangatira. Eaa i reira ‘te ture tika rava o te tu rangatira’? E akapeea te ture te akarangatira anga ia tatou?
TE TURE TEI AKARANGATIRAIA
4. Eaa ‘te ture tika rava o te tu rangatira,’ e koai ma te ka puapingaia mei te reira?
4 Kare ‘te ture tika rava o te tu rangatira’ i te Ture a Mose, no te mea te akaari maira te reira ture i te au tu ara e kua akatupuia te reira i roto ia Karaiti. (Mata. 5:17; Gala. 3:19) Eaa i reira te ture ta Iakobo e tuatua ra? Te manako ra aia i “te ture a te Mesia,” tei kapiki katoaia e ko “te ture akarongo” e ‘te ture rangatira o te au tangata ra.’ (Gala. 6:2; Roma 3:27; Iako. 2:12) Te o maira ki roto i “te ture tika rava” te au mea ravarai ta Iehova e umuumu maira ia tatou kia rave. Te puapingaia ra te au Kerititiano akatainuia e te au “mamoe ke atu” mei te reira.—Ioa. 10:16.
5. Eaa ra te ture o te tu rangatira kare e teiaa ana?
5 Kare e ngata ana e e teiaa ana “te ture tika rava” mei te au ture rai a te au enua, mari ra te o maira te au akauenga mama ua e te au kaveinga puapinga. (1 Ioa. 5:3) “Te maru nei taku amo, e te māmā nei taku apainga,” i karanga ai a Iesu. (Mata. 11:29, 30) Pera katoa, kare “te ture tika rava” e anoanoia ra kia maata atu te au ture, no te mea kua akatumuia te reira ki runga i te aroa, e kare i tataia ki runga i te papa toka, mari ra ki roto i te au manako e te au ngakau.—E tatau ia Ebera 8:6, 10.
AKARANGATIRA “TE TURE TIKA RAVA” IA TATOU
6, 7. Eaa te tuatuaia ra no runga i ta Iehova au umuumuanga, e eaa ta te ture o te tu rangatira e akatika ra ia tatou kia rave?
6 Te riro ra te au turanga kotingaia ta Iehova i akanoo no tona iti tangata ei mea puapinga e ei paruru anga ia ratou. Ei akaraanga, te ture natura e akaaere ra i te au mea takapini ia tatou. Kare te au tangata e kopekope ana e te taomiia ra ratou e taua au ture ra. Mari ra, te ariki ra ratou i te reira, te kite anga e e mea meitaki te au ture natura no to tatou oraanga. Te akaari katoa maira ta Iehova au umuumuanga i “te ture tika rava” a te Karaiti, e e mea puapinga te reira no te tangata.
7 Te paruru ra te ture o te tu rangatira ia tatou e te akamerengo ra i to tatou au anoano tau, e kare e takino ana ia tatou e te au tikaanga e te au tu rangatira o tetai ke. Te taviri no te tu akarangatira tikai anga—te rave anga i ta tatou e inangaro ra—ko te akatupu anga i te au tu anoano tau te rotai ra ki to Iehova au tu e tona au turanga. Koia oki, ka apii tatou kia inangaro i ta Iehova e inangaro ra e kia rikarika i tana e rikarika ra, e te tauturu maira te ture o te tu rangatira ia tatou kia rave i te reira.—Amo. 5:15.
8, 9. Eaa te au mea puapinga ka rauka i te aronga te aru ra i te ture o te tu rangatira? Akatutu mai.
8 No to tatou tu apa, kare e rauka ana ia tatou i te akatere i to tatou au anoano tarevake. Inara, me aru tiratiratu tatou i te ture o te tu rangatira, ka rauka ia tatou taua tu rangatira ra i teianei. Ei akatutuanga: I kai maata ana tetai tangata apii Pipiria ko Jay tona ingoa i te avaava. Te kite anga aia e kare te Atua e mareka ana i tana e rave ra, ka anoanoia aia kia rave i tetai ikianga. Ka aru ainei aia i tona au anoano o te kopapa me kore ka akarongo ainei aia kia Iehova? Kua iki aia i te tavini i te Atua, noatu e inangaro maata tona i te kai avaava. Eaa tona manako te akamutu anga aia i teia peu? “Kua mataora tikai au e kua rauka iaku te tu rangatira,” i karanga ai aia i muri mai.
9 Kua kite mai a Jay e ko te tu rangatira o teianei ao e akatika ra i te au tangata kia ‘akono i ta te kopapa’ te riro ra ei tuikaa anga ki te ara, inara ko te tu rangatira a Iehova, ‘te akono ra i ta te vaerua’ te ka akarangatira e ka oronga mai ‘i te ora e te au.’ (Roma 8:5, 6) Noea mai te maroiroi o Jay i rauka ai iaia i te akamutu i te kai avaava? Kare no ko mai iaia uaorai, mari ra no ko mai i te Atua. “Kua apii putuputu au i te Pipiria, kua pure no te vaerua tapu e kua ariki i te tauturu aroa ta te putuputuanga Kerititiano i oronga mai kiaku,” i karanga ai aia. Ka tauturu mai taua au mea ra ia tatou katoatoa kia rauka te tu rangatira mou. Akara ana tatou e akapeea ra.
AKARA KI ROTO I TE TUATUA A TE ATUA
10. Eaa te aiteanga kia “akara” ki roto i te ture a te Atua?
10 Te tatau ra tetai tuanga o Iakobo 1:25 e: ‘Ko te akara ra ki roto i te ture tika rava o te tu rangatira ra, ma te tamou tikai, ka akameitakiia aia no te rave anga i te reira.’ Te aiteanga o te kupu tuatua Ereni mua tei uriia no te “akara” ko te “piko anga i te akara ki roto,” koia oki te akara matatio anga. Ae, me ka inangaro tatou i te ture o te tu rangatira kia akakeu i to tatou manako e te ngakau, ka apii maroiroi tatou i te Pipiria e te akamanako oonu anga ma te pure i ta tatou i tatau ana.—1 Timo. 4:15.
11, 12. (a) Akapeea a Iesu te akakite mai anga e ka anoanoia tatou kia akariro i te tuatua mou ei akaaere i to tatou oraanga? (e) Mei tei akaariia mai i runga akenei, eaa te tu kino ta te au mapu ka kopae?
11 I taua taime rai, kia “tamou tikai” tatou i te taangaanga i te Tuatua a te Atua, te akariro anga i te tuatua mou ei akaaere i to tatou oraanga. Kua akakite katoa a Iesu i taua manako ra ki tetai aronga tei irinaki iaia e: “I tāpu tika kotou i taku tuatua, e pipi tikai kotou naku i reira: Ka kite ïa kotou i te tuatua-mou, e na te tuatua-mou kotou e akarangatira.” (Ioa. 8:31, 32) Te karanga ra tetai tataanga e ko te aiteanga katoa o te tuatua “kite” ko te maramaanga, no te mea e puapinga tikai “tei ‘kiteaia’ e te tangata tei kite i te reira.” No reira, kua “kite” pu tikai tatou i te tuatua mou na roto i te tu e te tuku ra tatou i te reira ei akaaere i to tatou oraanga. Ka rauka i reira ia tatou i te tuatua e te ‘angaanga maroiroi ra’ te ‘tuatua a te Atua’ i roto ia tatou, te taui anga i to tatou tu kia rauka ia tatou i te aru meitaki i te tu o to tatou Metua i te rangi.—1 Tesa. 2:13.
12 E ui kia koe uaorai e, ‘Kua kite tikai ainei au i te tuatua mou? Kua akariro ainei au i te reira ei mea puapinga i roto i toku oraanga? Me kore te inangaro ra ainei au i tetai “au tu rangatira” o teianei ao?’ Te akamaara anga i tona tuatau i mapu ana, kua tata tetai tuaine tei utuutuia mai ana e tetai nga metua Kerititiano e: “Me mamaata mai koe i roto i te tuatua mou, te vaitata ua ra a Iehova ki te pae ia koe. I roto ra i toku turanga, kare rava au i kite tikai iaia. Kare rava au i rikarika ana i tana i rikarika ana. Kare au i irinaki ana e te puapinga ra taku e rave ra kiaia. E kare rava au i pure ana kiaia me o au ki roto i te manamanata. Kua irinaki au ki runga i taku uaorai e marama ra, taku i kite mai i teianei e e mea neneva tikai no te mea kare aku apinga i kite.” Mea mataora ra, kua kite mai te tuaine i muri mai e e tarevake tona manako, e kua rave aia i tetai au tauianga maata. Kua akamata katoa aia i te painia tamou.
KA TAUTURU TE VAERUA TAPU I TE AKARANGATIRA IA KOE
13. Akapeea te vaerua tapu o te Atua te akarangatira anga ia tatou?
13 Ka tatau tatou i roto ia 2 Korinetia 3:17 e: “Te ngai e vai ei te vaerua o Iehova, tei reira te tu rangatira.” (NW) Akapeea te vaerua tapu te tauturu anga ia tatou kia akarangatiraia? Te akatupu ra te reira i te au tu puapinga no te tu rangatira ki roto ia tatou: “Te aroa, te rekareka, te au, te akakoromakianga roa, te takinga meitaki, te meitaki, te akarongo, te maru, te akatere-uaorai.” (Gala. 5:22, 23, NW) Me kare teia au tu, te aroa tikai, kare te au tangata e akarangatiraia—mei tei kiteaia i roto i teianei ao i teia tuatau. Mea umere ra, muri ake te papa mai anga a Paulo i te au ua o te vaerua, kua akakite katoa mai aia e: “Kare ua e ture e akakore i te reira.” Eaa te aiteanga o tana tuatua? Koia oki, kare e rauka i tetai ture i te arai i te akatupu anga i te au ua o te vaerua o te Atua. (Gala. 5:18) Me koia ia, eaa te puapinga o taua ture ra? Te anoano ra a Iehova kia akatupu tatou i te au tu o Karaiti e tuatau ua atu e kia akaari ua rai i te reira.
14. Na teea au mataara te akatuikaa ra te vaerua o teianei ao i te aronga e aru ra i te reira?
14 Penei ka manako te aronga e akatereia ra e te vaerua o teianei ao e e tu rangatira to ratou, no te mea te akamerengo ra ratou i to ratou au anoano o te kopapa. (E tatau ia 2 Petero 2:18, 19.) Te tikaanga tikai kare ratou e kite ra e te tuikaa ra ratou i teianei ao. No reira te au kavamani i akamaata ai i te au ture kia akaiti mai i te au tu kino o te tangata. Kua akakite mai a Paulo e ‘kare te ture i akonoia no te tangata tuatua-tika, no te aronga akaapa ture ra e te akongata.’ (1 Timo. 1:9, 10) Te riro katoa ra ratou ei tuikaa no te ara, “te akatupu anga i ta te kopapa,” te pu kino tikai. (Ephe. 2:1-3) I tetai tua, mei te au manumanu rai taua aronga ra e totoro ra ki roto i tetai kapu meri. Kua akakeuia ratou e to ratou au anoano tau kore, e kare i roa ana kua marei ia ratou.—Iako. 1:14, 15.
AKARANGATIRAIA I ROTO I TE PUTUPUTUANGA KERITITIANO
15, 16. Eaa te puapinga o to tatou piri anga ki te putuputuanga, e eaa te tu rangatira ta tatou e mataora ana?
15 Te riro anga koe ei mema no te putuputuanga kare koe i tomo mai ei mema ua, kua tomo mai ra koe no te mea na Iehova i arataki mai ia koe ki roto. (Ioa. 6:44) Eaa tei akakeu iaia kia rave i te reira? Kua kite mai ainei aia i tetai tangata tuatua tika e te mataku Atua? Penei ka karanga koe e, “Kare rava!” Eaa i reira ta te Atua i kite mai? Kua kite mai aia i tetai ngakau te ka akarongo ki tana ture akarangatiraia, e ka ariki i tana aratakianga maru. Kua akono a Iehova ia koe i roto i te putuputuanga na te angai anga ia koe i te pae vaerua, te akamatara mai anga ia koe mei te au akonoanga pikikaa e te purepure, e te apii anga ia koe kia akatupu i te au tu o Karaiti. (E tatau ia Ephesia 4:22-24.) Tei tupu mai, kua rauka ia koe te tikaanga ngateitei kia piri atu ki te iti tangata anake ua i roto i teianei ao tei tau kia kapikiia ei ‘aronga akarangatiraia.’—Iako. 2:12.
16 Akamanako ana i teia: E mataku ana ainei koe me piri atu koe ki te aronga te inangaro ngakau katoa ra ia Iehova? Te kite ra ainei koe ia koe e akarakara putuputu ra ki muri? Ia koe e pukapuka ra ki toou taeake me kore tuaine i roto i te Are Uipaanga Patireia, te mou piri ra ainei koe i taau kiri e ua ake ka ngaro te reira? Kare! No te mea te kite ra koe e e ngai meitaki te reira. Ka manako akapera ainei koe i roto i tetai ngai o teianei ao? Kare! Tei maata atu, ko te tu rangatira taau e mataora ra i rotopu i te iti tangata o te Atua, e akaari ua anga te reira i te tu rangatira tikai ka tupu mai a te tuatau ki mua.
“RANGATIRA MEITAKI O TE TAMARIKI A TE ATUA”
17. Akapeea ‘te akakiteia mai anga o te tamariki akatainuia a te Atua’ te tauturu anga i te au tangata kia akarangatiraia?
17 Te uriuri anga i te tu rangatira ta Iehova e akanoo ra no tona au tavini i te enua nei, kua tata a Paulo e: ‘Te anoano maata o te au mea angaia nei ma te arōrō, te tatari nei ïa i te akakite angaia mai o te tamariki akatainuia a te Atua.’ Kua akakite katoa mai aia e: ‘Ka akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua ra.’ (Roma 8:19-21) Te taikuia maira “te au mea angaia nei” ki te au tangata e manakonakoanga to ratou no te enua nei, te ka puapingaia me ‘akakiteia mai’ te au tamariki a te Atua tei akatainuia ki te vaerua tapu. Ka akamata mai taua akakite anga ra me piri atu te aronga tei akatainuia kia Karaiti i te tama anga i te au kino i te enua nei e te akaora anga i te “aronga maata rava” ki roto i te akatereanga ou.—Apo. 7:9, 14.
18. Akapeea e maata atu ei te tu rangatira o te au tangata akarongo, e eaa te tu rangatira ka rauka ia ratou i te openga?
18 Ka kite mai te au tangata tei akaoraia mai i tetai tu rangatira ou takiri—kare e taomi akaouia e Satani e tana au temoni. (Apo. 20:1-3) E nuti mataora tikai teia! Aru mai, ka taangaanga te ui ariki e te kau taunga o te 144,000 o te au taeake o Karaiti i te atinga oko kia puapingaia te au tangata, e takore takiriia atu ei te ara e te tu apa ta Adamu i akatupu mai. (Apo. 5:9, 10) Me vai akarongo mou ratou i raro ake i te timataanga, ka rauka i te au tangata te tu rangatira mou ta Iehova i akakoro ana no ratou—koia oki te ‘tu rangatira meitaki o te tamariki a te Atua.’ Akamanako ana! Kare rava e ngata ia koe i te rave i te au mea tika i roto i te nga mata o te Atua, no te mea ka apa kore toou kopapa, ngakau, e te manako e ka rauka ia koe i te aru i to te Atua au tu apa kore.
19. Eaa ta tatou ka rave ua rai i teia tuatau kia noo tamou ki runga i te mataara o te tu rangatira mou?
19 Te inangaro tikai ra ainei koe i te ‘tu rangatira meitaki o te tamariki a te Atua’? Me koia ia, e tuku i toou manako e toou ngakau kia akaaereia e ‘te ture tika rava o te tu rangatira ra.’ Ae, e apii maroiroi i te au Tuatua Tapu. Akariro i te tuatua mou ei mea puapinga i roto i toou oraanga. E pure no te vaerua tapu. Taangaanga pu i te au mea i roto i te putuputuanga Kerititiano e te au kai pae vaerua ta Iehova e oronga maira. Auraka e tuku ia Satani kia akavare ia koe, mei tana rai i akavare ia Eva kia manako e e pakari rava te au ture a te Atua. Papu e e tu kikite tikai to te Tiaporo. Inara mei ta tatou ka kite mai i roto i te atikara ka aru mai, kare tatou e ‘rauka ia Satani e kare tatou i te kite kore i tana au ravenga.’—2 Kori. 2:11.
[Au Uianga Apii]
[Au Tutu i te kapi 9]
Te inangaro ra ainei au i tetai au ‘tu rangatira’ o teianei ao?
[Au Tutu i te kapi 9]
Te akariro ra ainei au i te tuatua mou ei mea puapinga i roto i toku oraanga?
