Jehová xlikana kinkalakgmaxtuyan
Jehová xlikana kinkalakgmaxtuyan
«Tiku liwana akxilha xaʼakgstitum xlimapakgsin Dios nema masta lakgtaxtut.» (SANT. 1:25, NM)
¿TLAN XLICHUWINANTI?
¿Tuku limapakgsin kinkamakgtayayan xlakata xlikana nalakgtaxtuyaw chu tiku nakgalhikgo uma lakgtaxtut?
¿Tuku kinkamaxkiyan xaxlikana lakgtaxtut?
¿Tukuya lakgtaxtut nakgalhikgo tiku kgalhakgaxmatkgo Jehová?
1, 2. 1) ¿Tuku xlakata lu pekuankgo latamanin? 2) ¿Tukuya lakgtaxtut kgalhkgalhimaw xlakskujnin Jehová?
LAMAW kkakilhtamaku niku tlakg talhuwima tiku tlakg lhuwa tuku lakaskinkgo, tiku ni kgalhakgaxmatkgo limapakgsin chu tiku tlawa tuku nitlan (2 Tim. 3:1-5). Wa xlakata mapakgsinanin tlawakgo lhuwa limapakgsin chu tlakg kgalhikgo policías, chu wilikgo cámaras xlakata nalikuentajtlawakgo latamanin. Kmakgapitsi kachikinin kxchikkan wilikgo alarmas, wilikgo lhuwa candados chu wilinikgo corriente tuku lipakanankgo. Lhuwa ni taxtuputunkgo katsisni chu ni mastakgo talakaskin pi xkamanankan nakgamanankgo ktiji maski kakuwani. Liwana tasiya pi latamanin putum kilhtamaku pekuankgo chu tlakg talhuwima tuku nitlan.
2 Pero ¿tuku talakaskin xlakata tlan nalatamayaw? Kjardín xaʼEdén, Satanás wa pi latamanin ni xtapakgsinikgolh Jehová. Pero tuku lanit limasiya pi kaj lanka taʼakgsanin. Akxni latamanin ni latamakgo la xlilat chu ni tlawakgo tuku Dios lakaskin tlakg lhuwa patinankgo. Chu xlakskujni Jehová na lipatinanaw uma tuku lama. Pero akinin kgalhiyaw takgalhkgalhin pi namin kilhtamaku akxni nakinkalakgmaxtukanan ktalakgalhin chu tuku nitlan chu namakgamakglhtinanaw tuku Biblia wan «natalipaxuwakgoy xlakgskgatan Dios wa yuma lilakgatit ntalakgtaxtun» (Rom. 8:21). La uku Jehová kamasiyanima xlakskujni tuku xlitlawatkan xlakata nalakgtaxtukgo. ¿La tlawama?
3. ¿Tukuya limapakgsin kamaxkinit Jehová xlakskujnin chu tukuya takgalhskinin nakgalhtiyaw?
3 Kamasiyanima xlakskujni, lakgtaxtut nema nakgalhikgo, Jehová kinkamaxkinitan, tuku Santiago wanilh «xaʼakgstitum xlimapakgsin Dios nema masta lakgtaxtut» o la matitaxtikgo amakgapitsi biblias «limapakgsin nema kinkaliminiyan lakgtaxtut» o «xatanks limapakgsin nema lakgmaxtunan» (kalikgalhtawakga Santiago 1:25; Dios habla hoy; La Biblia Latinoamérica). Akxni wi tiku kgaxmata tachuwin limapakgsin, ni lakpuwan pi tlan natlawa tuku lakaskin wata lakpuwan pi nialhla tuku natlawa. Wa xlakata, ¿tuku uma «xaʼakgstitum xlimapakgsin Dios nema masta lakgtaxtut»? Chu ¿la kinkalakgmaxtuyan?
LIMAPAKGSIN NEMA KINKALAKGMAXTUYAN
4. ¿Tuku uma «xaʼakgstitum xlimapakgsin Dios nema masta lakgtaxtut» chu tiku litamakgtayakgo?
4 «Xaʼakgstitum xlimapakgsin Dios nema masta lakgtaxtut» ni wa Limapakgsin nema maxkika Moisés, Jehová kamaxkilh «xpalakata nalitasiyuy [...] ntalakgalhin» pero Cristo masputulh uma limapakgsin (Mat. 5:17; Gál. 3:19). Pero Santiago xlichuwinama «xlimapakgsin nCristo», na wanikan «limapakgsin [...] ntakanajla» chu «limapakgsin wantu xakstu nkuinta ntu xlitlawalh» latamanin (Gál. 6:2; Rom. 3:27; Sant. 2:12). Uma xaʼakgstitum xlimapakgsin kilhchanima putum tuku Jehová lakaskin natlawayaw. Uma limapakgsin litamakgtayakgo kstalaninanin Cristo tiku kalaksakkanit naʼankgo kʼakgapun chu «amakgapitsi borregos» (Juan 10:16, NM).
5. ¿Tuku xlakata ni tuwa makgantaxtikan xaʼakgstitum xlimapakgsin Dios nema masta lakgtaxtut?
5 Lhuwa países kgalhikgo laktuwa limapakgsin chu tuwa makgantaxtikan. Pero «xaʼakgstitum xlimapakgsin» Dios ni laktuwa (1 Juan 5:3). Jesús wa: «Nkimukiwi, lu[...] ni tuwa liyankan, chu wa nkintakuka, skapaka [o ni tsinka]» (Mat. 11:29, 30). Nachuna, «xaʼakgstitum xlimapakgsin» ni lhuwa tuku kinkamalakgaxokgeyan xlakata takilhti ktapaxkit chu wi kkintalakapastaknikan, kkinakujkan chu ni anta tatsokgnit kchiwix (kalikgalhtawakga Hebreos 8:6, 10).
LA KINKALAKGMAXTUYAN «XAʼAKGSTITUM XLIMAPAKGSIN»
6, 7. 1) ¿Tuku tlan nawanaw xlakata tuku kinkaskiniyan Jehová? 2) ¿La kinkamakgtayayan uma «xaʼakgstitum xlimapakgsin»?
6 Jehová lakkaxwilinit pi wi tuku ni natlawayaw, kaj kilitlankan chu kinkamakgtayayan. Akgtum liʼakxilhtit, pulaktum tuku tlawanit Jehová akgtum litliwakga nema wanikan gravedad nema tlawa pi tuku anan natapatasta, o natamakgosa, chu anta natamakgxtakgkgo tutsu chu ni kaʼunin natawakgakgo. Ni xlikana pi niti lakpuwan ¿pi umakgolh limapakgsin ni kinkamatlawiyan tuku lakaskinaw? Wata paxtikatsiniyaw xlakata uma limapakgsin kinkamakgtayakgoyan. Nachuna limapakgsin nema Jehová masta xlakata la nalinaw kilatamatkan chu xlakata la nakakninaniyaw tasiyakgo «xaʼakgstitum xlimapakgsin» Cristo chu kinkamakgtayayan.
7 Limapakgsin nema kinkalakgmaxtuyan, kinkamakgtayayan natlawayaw putum tuku lakaskinaw chu ni nakamaʼakgtujuyaw amakgapitsin. Tlan natlawayaw tuku akinin lakaskinaw pero kajwatiya natlawayaw akxni ni lakatsala tuku wan xtamapakgsin chu la lakgati Jehová. Uma wamputun napaxkiyaw tuku paxki Jehová chu ni naʼakxilhputunaw tuku ni akxilhputun. Wa tuku kinkamasiyaniyan limapakgsin (Amós 5:15).
8, 9. ¿La kinkamakgtayayan akxni kgalhakgaxmataw xlimapakgsin Dios nema masta lakgtaxtut? Kalichuwinanti akgtum liʼakxilhtit.
8 Xlakata kgalhiyaw talakgalhin, lu tuwa namachokgoyaw tuku nitlan tlawaputunaw. Pero komo ni namakgxtakgaw chu kgalhakgaxmataw uma limapakgsin, tlan nakinkalakgmaxtuyan la uku. Akgtum liʼakxilhtit, chatum chixku tiku wanikan Jay tsukulh likgalhtawakga Biblia, chu lhuwa kxkuli. Akxni katsilh pi uma talismanin Dios ni lakgati, lu tuwa tuku xʼama laksaka: ¿Chuntiyaku xʼama xkuli o xʼama kgalhakgaxmata Jehová? Laksakli naskujni Jehová, maski xmakni kskinijku naxkuli. ¿La makgkatsilh akxni xmakgxtakgnitta uma talismanin? Xla wan: «Pi lu xpaxuwa chu xlikana xlakgtaxtunit».
9 Jay katsinilh pi lakgtaxtut nema kakilhtamaku masta wa «lakapastaka[n] wa ntu xtatlawaputu nkiliwakan» nema tlawa pi xlakskujni talakgalhin nalitaxtuyaw; pero lakgtaxtut nema Jehová kinkamaxkiyan wamputun «lakapastaka[n] wa ntu lakaskin spiritu», kinkalakgmaxtuyan chu «latamat nkitaxtu[...], chu ntatanksni» (Rom. 8:5, 6). ¿Tuku makgtayalh Jay xlakata nialh kxkulilh? Ni xakstu chuna tlawalh, Jehová makgtayalh. Xla wan: «Chali chali xaklikgalhtawakga Biblia, xakskini espíritu santo Dios chu xakmakglhtinan tamakgtay nema xkimaxkikgo natalan kcongregación». Kaʼakxilhwi la kinkamakgtayayan xlakata nakgalhiyaw xaxlikana lakgtaxtut.
LIWANA KALIKGALHTAWAKGAW XTACHUWIN DIOS
10. ¿Tuku wamputun tachuwin liwana akxilha xlimapakgsin Dios?
10 Anta kSantiago 1:25 kinkawaniyan: «Tiku liwana akxilha xaʼakgstitum xlimapakgsin Dios nema masta lakgtaxtut, chu chuntiya makgantaxti, [...] lipaxuwa akxni makgantaxti». Tachuwin xagriego nema tamatitaxti xatotonaco «liwana akxilha» kilhchanima, «natapunksaw xlakata wi tuku naʼakxilhaw» akxni chuna tlawayaw talakaskin naliskujaw chu liwana nalakapastakaw. Komo lakaskinaw pi xaʼakgstitum xlimapakgsin nema masta lakgtaxtut natawila kkiʼakgxakgakan chu kkinakujkan, lu xlakaskinka naliskujaw: nalikgalhtawakgayaw Biblia chu natlawayaw oración akxni nalilakapastakaw tuku nalikgalhtawakgayaw (1 Tim. 4:15).
11, 12. 1) ¿La limasiyalh Jesús pi talakaskin nalilatamayaw tuku xaxlikana? 2) Chuna la wi dibujo xla página 9, ¿tuku tlakg kuenta xlitlawatkan lakgkgawasan?
11 Nachuna talakaskin pi natlawayaw tuku wan xTachuwin Dios, chu nalilatamayaw. Jesús na lichuwinalh tuku wamputun nakanajlaniyaw akxni wa: «Lapi xtapalhinitit nkintachuwin, lu[...] kilimakgalhtawakget nawanatit; na nalakgapasatit ntalulokgtat, cha na wa ntalulokgtat, nakamalakgtaxtiyan» (Juan 8:31, 32). Chuna la wan maktum libro tachuwin «nalakgapasatit» wamputun «xlakaskinka naʼakxilhkan», xlakata «tuku lakgapasaw lu xlakaskinka akxilhaw». Xlakata tlakg nalakgapasaw xaxlikana, talakaskin nalilatamayaw. Kajwatiya chuna tlan nawanaw pi «xtachuwin Dios» “skujma”, xlakata nalikatsiyaw la likatsi kinTlatkan xalak akgapun (1 Tes. 2:13).
12 Akstu tlan nakinkatlawanikanan uma takgalhskinin: «¿Xlikana kkatsi tuku xaxlikana? ¿Kmakgantaxtima kkilatamat? ¿O na klatamaputun chuna la lamakgolh xalak kakilhtamaku?». Chatum tala tsumat tiku xnatlatni xtatayananin Jehová, uma tuku wan xlakata akxni aktsujku xwanit: «Akxni staka niku kakninanikan Jehová, tlan wanaw pi putum kilhtamaku anta wi. Pero akit nikxni xlikana klakgapasli. Nikxni kxkajnilh tuku xla xkajni, nikxni kkanajlalh pi lu xlakaskinka xakxilha tuku xaktlawa chu nikxni kputsalh akxni xakkgalhi taʼakglhuwit. Xaklakpuwan pi putum xakkatsi, pero nitu xakkatsi». Alistalh uma tala katsilh pi nitlan la xlakpuwan chu lakgpalilh xlatamat. Chu asta tsukulh liskuja la precursora regular.
ESPÍRITU SANTO MAKGTAYANAN XLAKATA NALAKGTAXTUYAW
13. ¿La kinkamakgtayayan espíritu santo xlakata nalakgtaxtuyaw?
13 Anta 2 Corintios 3:17, wan: «Anta ntani anan kspiritu nkimPuchinakan, kiʼakstu nkuintajkan ntu natlawaputunaw». ¿La kinkamakgtayayan espíritu santo xlakata nalakgtaxtuyaw? Kinkamakgtayayan xlakata nakgalhiyaw tlan tayat la «tapaxkit, tapaxuwan, takaksni, lu kgalhkgalhinan, tlawakan tuku tlan, tlan talikatsit, takanajla, ni lakapala sitsikan, [chu] machokgo tuku nitlan tlawaputun» (Gál. 5:22, 23, NM). Kkakilhtamaku niku lamaw akxilhaw pi nila tlan nalakgtaxtuyaw komo ni nakgalhiyaw umakgolh tayat, la tapaxkit. Akxni apóstol Pablo xlichuwinanita xlakata xtatlaw espíritu santo, na tsokgli: «Ni anan limapakgsin nema namachokgo umakgolh». Xlikana, ni anan chu ni katiʼanalh limapakgsin nema namachokgo xtatlaw xʼespíritu santo Dios (Gál. 5:18). ¿Tuku xlitaxtulh uma limapakgsin? Jehová lakaskin pi tlakg nalimasiyayaw uma laktlan tayat chu xliputum kilhtamaku.
14. ¿Tuku kamatlawi latamanin xʼespíritu kakilhtamaku?
14 Tiku mastakgo talakaskin kakapulalilh xʼespíritu kakilhtamaku chu tlawakgo tuku xlakan lakaskinkgo max lakpuwankgo pi tlan tlawakgo tuku lakaskinkgo (kalikgalhtawakga 2 Pedro 2:18, 19). Pero xlakan ni katsikgo pi la uku la skujnin litaxtukgo. Latamanin tlawakgonit lhuwa limapakgsin xlakata namakaksakgo tuku tlawaputunkgo chu xtayatkan. Chuna la wa Pablo: «Limapakgsin ni wa liwilinikgokanit wa nti xakgstitum, wampi wa liwilinikgokanit wanti ni tlan katsikgoy, chu wa nti lakgachixkuwimakganankgoy» (1 Tim. 1:9, 10). Chu la xlakskujni talakgalhin litaxtukgo xlakata tlawakgo «wa ntu xtatlawaputu nkintiyatliwakan» nema lu nitlan (Efe. 2:1-3). Litaxtukgo la laktsu kuxta nema taslamatawakakgo ksakgsi: kaj xwayamputunkgo chu nialhla taktakgo (Sant. 1:14, 15).
LAKGTAXTUYAW AKXNI TAWILAYAW KCONGREGACIÓN
15, 16. ¿Tuku xlakata lu xlakaskinka namakgtapakgsiyaw kcongregación xla kstalaninanin Cristo chu tukuya lakgtaxtut kgalhiyaw?
15 Anaw ktamakxtumit xla kstalaninanin Cristo, ni xlakata akinin skinitaw, anaw xlakata Jehová lakaskin pi anta natawilayaw (Juan 6:44). ¿Tuku xlakata chuna tlawalh? ¿Xlakata akxilhli pi tlan xlikatsiyaw chu xpekuaniyaw Dios? Max ni chuna. Wa xlakata, ¿tuku akxilhli Jehová? Dios akxilhli pi xkgalhiyaw tlan naku, chu xatapaxuwan xʼamaw kgalhakgaxmataw xlimapakgsin chu xʼamaw mastayaw talakaskin nakinkapulalinan. Akxni makgtapakgsiw kcongregación, Jehová kuentajtlawalh kintakanajlakan, kinkalakgmaxtun ktaʼakgsanin xla nixaxlikana takanajla chu na kinkamasiyanin nalikatsiyaw la Jesús (kalikgalhtawakga Efesios 4:22-24). Chu la uku kgalhiya lanka talakgalhaman pi namakgtapakgsiya kachikin nema xlikana lakgtaxtukgonit chu ni anankgo atanu (Sant. 2:12).
16 Akxni katalalinaw tiku xliputum xnakujkan paxkikgo Jehová, ¿wi tuku makgapekuanan? ¿Ni kajwatiya kuentajtlawamaw xlakata nitu nakinkatlawanikanan? ¿Ni xlikana pi akxni wilaw kPukgalhtawakga xla xTatayananin Jehová, ni lakpuwanaw wi tuku nakinkamakgkgalhankanan? ¡Nichuna lakpuwanaw! Tlan makgkatsiyaw chu nitu lipekuanaw. ¡Ni chuna xmakgkatsi komo xtatawila atanu latamanin! Chu tuku tlakg tlan lakgtaxtut nema kgalhiya la uku kxkachikin Jehová kaj limasiya lakgtaxtut nema nakgalhiyaw alistalh.
«NATALIPAXUWAKGOY XLAKGSKGATAN DIOS WA YUMA LILAKGATIT NTALAKGTAXTUN»
17. ¿Tuku xtachuna «malakatanksakgokan xlakgskgatan Dios» chu kalakgmaxtukan latamanin?
17 Pablo tsokgli xlakata lakgtaxtut nema Jehová nakamaxki xkachikin unu kkatiyatni, xla wa «kgalhkgalhitimakgo akxni naʼakgtum malakatanksakgokan wa lantla lu[...] chuna xliwanat xlakgskgatan Dios». Chu alistalh na wa: «Ntamalakatsukun nalakgtaxtunikgoy yuma ntu ntliwakglh kgalhikgoy lantla ankgalhin sputtilhay, lakimpi makxtum natalipaxuwakgoy xlakgskgatan Dios wa yuma lilakgatit ntalakgtaxtun ntu namin» (Rom. 8:19-21). Kʼuma texto, «ntamalakatsukun» kilhchanima latamanin tiku kgalhkgalhimakgolh xliputum kilhtamaku nalatamakgo kKatiyatni. Xlakan nalitamakgtayakgo akxni «malakatanksakgokan» xlakgskgatan Dios tiku kalaksakkanit, uma natsuku akxni tiku kalaksakkanit kamakgtayakgo Cristo xlakata nakamasputukgo putum latamanin tiku nitlan likatsikgo chu nakatamaknukgo «lhuwa tachixkuwitat» o lhuwa latamanin kxasasti kakilhtamaku (Apo. 7:9, 14).
18. ¿La nakalakgmaxtukan latamanin tiku kgalhakgaxmatnankgo, chu tukuya lakgtaxtut nakgalhikgo alistalh?
18 Latamanin nakgalhikgo akgtum lu tlan lakgtaxtut, xlakata nialhtu nakatlawanikgo Satanás chu xdemonios (Apo. 20:1-3). ¡Lu tlan namakgkatsiyaw! Ama kilhtamaku 144,000 mapakgsinanin chu sacerdotes tiku akxtum natamapakgsinankgo Cristo nalitamakgtayakgo xtamakamastan xlakata nalakgtaxtunikgo talakgalhin nema makgamakglhtinankgonit (Apo. 5:9, 10). Akxni limasiyakgonita nawan xtakanajlakan, tiku kgalhakgaxmatnankgo nalakgtaxtukgo chuna la Jehová xlakaskin xapulana, wa uma «xlakgskgatan Dios wa yuma lilakgatit ntalakgtaxtun ntu namin». ¡Kaj kalakpuwanti! Nialh nalakgatiyaw tuku nitlan, nialh nakgalhiyaw talakgalhin chu tlan nalikatsiyaw chuna la Dios.
19. ¿Tuku natlawayaw xlakata tlan nakgalhiyaw xaxlikana lakgtaxtut?
19 ¿Na makgkatsiputuna la «natalipaxuwakgoy xlakgskgatan Dios wa yuma lilakgatit ntalakgtaxtun ntu namin»? Komo chuna, chuntiya kalilatapa la wan «xaʼakgstitum xlimapakgsin Dios nema masta lakgtaxtut». Putum kilhtamaku kalikgalhtawakga Biblia. Kalilatapa tuku xaxlikana. Kaskini espíritu santo Jehová. Kapit ktamakxtumit chu kalitamakgtaya likgalhtawakga nema masta Jehová. Chu Satanás ni katiʼakgskgawin chuna la akgskgawilh Éva, xla lakpuwa pi xlimapakgsin Dios nitu masta talakaskin natlawayaw. Xlikana pi Akgskgawini lu skgalala. Pero chuna la naʼakxilhaw kʼartículo nema aku mima, tlan tlajayaw, xlakata «katsiyaw xtakgskgawimin» (2 Cor. 2:11).
[Takgalhskinin]
[Dibujo xla página 9]
¿Na ktlawaputun tuku tlawakgokan kkakilhtamaku?
[Dibujo xla página 9]
¿Klilatama tuku xaxlikana?
