Li Jeovae kolemutik yuʼun ta melel
Li Jeovae kolemutik yuʼun ta melel
«Li bochʼo mu xchʼay ta yoʼnton cʼusi chaʼye, ti jaʼ te oy o ta yoʼnton li lequil mantal ti jaʼ chacʼ colcutique.» (SANT. 1:25)
¿KʼUSI CHATAKʼ?
¿Kʼusi mantalil chchapanutik sventa kolemukutik ta melel, xchiʼuk buchʼutik tstabeik sbalil?
¿Kʼusi skʼan jpastik ta melel sventa lek kolemukutike?
¿Kʼusi kolel tstaik li buchʼutik te oyik-o li ta sbelel kuxlejale?
1, 2. 1) ¿Kʼusi yakal chkʼot ta pasel ta sventa li skolebal krixchanoetike, xchiʼuk kʼu yuʼun? 2) ¿Kʼusi kolebal jmalaojtik li yajtunelutik Jeovae?
LI AVIE kuxulutik ta jun kʼakʼal ti nojem ta pichʼ-oʼontonal, ta jpʼaj mantaletik xchiʼuk majbail (2 Tim. 3:1-5). Sventa mu jechuk xkʼot ta pasele, li ajvaliletike chakʼik mas mantaletik, polisiaetik xchiʼuk chakʼik mas kʼusitik xuʼ xchabiutik. Li jnaklejetik ta yantik epal lumetike chchabi lek snaik, jaʼ yuʼun chakʼik alarmaetik, chakʼbeik to yan skandadoal o tsjoyik lek ta maya ti tsakal ta lus yuʼunike. Ep li jnaklejetik xtoke, muʼyuk chlokʼik ta snaik kʼalal akʼobaltik xaʼoxe xchiʼuk muʼyuk chakʼik tajinikuk ta kaye yalab xnichʼnabik, akʼo mi ta kʼakʼaltik. Li kʼusi yakal chkʼot ta pasele jaʼ ti muʼyuk xa mas kolem chaʼi sbaik li krixchanoetike xchiʼuk lek xvinaj ti muʼyuk chlekub batel li kʼusitik oy avie.
2 Jaʼ yuʼun chaʼa, ¿kʼusi skʼan jpastik sventa jtatik li melel kolele? Li ta nichimaltik Edene, li Satanase laj yal ti jaʼ la mas lek ti jchʼak jbatik ta stojolal li Jeovae. Pe li kʼusi kʼotemik xa ta pasele, chakʼ ta ilel ti mu jechuk li kʼusi laj yale. Ta melel, kʼalal mas chnamajik ta stojolal mantaletik ta sventa li talelaletike xchiʼuk li kʼusi yaloj Diose, mas me chil svokol li krixchanoetike. Li kʼusitik chkʼotanuk ta pasel taje, ta me xakʼ jvokoltik ek. Pe li voʼotike, ta me xkilbetik slajeb li mulile xchiʼuk li kʼusitik chopole, vaʼun xuʼ jtatik li «slequilal yutsilal ti [«skolebal», NM] xnichʼnabtac ti Diose» ti jaʼ jech chal li Vivliae (Rom. 8:21, Ch). Yuʼun li Jeovae yakal xa me chchapan ti kʼuxi chakʼbe skoleb li yajtuneltake. ¿Kʼuxi yakal tspas taje?
3. ¿Kʼusi mantaletik yakʼojbe Jeova li yajtsʼaklomtak Cristoe, xchiʼuk kʼusitik ta jtakʼtik?
3 Sventa jchapan jbatik ta sventa li kolel ta jtatik ta mas jelavele, li Jeovae yakʼojbutik li kʼusi laj yal Santiago liʼe: «Lequil mantal ti jaʼ chacʼ colcutique» (kʼelo Santiago 1:25). Kʼalal chaʼiik ta sventa mantaletik li krixchanoetike, maʼuk tsnopik ti kolemike, kʼajomal noʼox chtal ta sjolik ti mu xa kʼusi stakʼ spasike. Vaʼun chaʼa, ¿kʼusi jaʼ li «lequil mantal ti jaʼ chacʼ colcutique»? ¿Kʼuxi ti chakʼ jkoleltike?
MANTAL TI CHAKʼ JKOLELTIKE
4. ¿Kʼusi jaʼ li «lequil mantal ti jaʼ chacʼ colcutique», xchiʼuk buchʼutik tstabeik sbalil?
4 Li «lequil mantal ti jaʼ chacʼ colcutique» maʼuk li Smantal Moisese, yuʼun «jaʼ sventa acʼo quiltic ti jbajmantalutique» xchiʼuk jaʼ tal yakʼ kʼotuk ta pasel li Cristoe (Mat. 5:17; Gál. 3:19). Ta melel, li Santiagoe jaʼ la skʼan laj yal «smantal li Cristoe», ti jech chichʼ alel xtok «ta sventa ta jchʼuntic li Cajvaltique» xchiʼuk «li mantal ti laj yacʼ colem lijcʼote» (Gál. 6:2; Rom. 3:27; Sant. 2:12). Jaʼ yuʼun, li lekil mantal taje, jaʼ li kʼusi tskʼan ta jpastik li Jeovae. Taje ta me stabeik sbalil li buchʼutik tʼujbil chbatik ta vinajele xchiʼuk li yan chijetike (Juan 10:16).
5. ¿Kʼu yuʼun mu tsotsuk ta pasel li «mantal ti jaʼ chacʼ colcutique»?
5 Li mantaletik ta epal lumetike, toj tsotsik ta chʼunel xchiʼuk toj vokol ta pasel. Pe li «lequil mantal[e]» yichʼoj talel beiltaseletik xchiʼuk mantaletik ti kʼunik noʼox ta chʼunele (1 Juan 5:3). Xi onoʼox laj yal li Jesuse: «Yuʼun li abtel cuʼune, muʼyuc tsots ta pasel, li icatsil cuʼune, muʼyuc ol ta cuchel» (Mat. 11:29, 30). Jech xtok, li «lequil mantal[e]» muʼyuk yichʼoj slistailtak li kʼusitik ta jpastike. Yuʼun li lekil mantal taje jaʼ tstsak ta venta li kʼanelale xchiʼuk te akʼbil ta joltik xchiʼuk ta koʼontontik, maʼuk tsʼibabil ta jpech ton (kʼelo Hebreos 8:6, 10).
KʼUXI CHIJKOL YUʼUN LI «LEQUIL MANTAL[E]»
6, 7. 1) ¿Kʼusi xuʼ xkaltik ta sventa li smantaltak Jeovae? 2) ¿Kʼuxi ti chakʼ jkoleltik li «lequil mantal[e]»?
6 Li kʼusitik yakʼojbutik Jeova ta sventa ti oy noʼox spajeb li kʼusitik stakʼ jpastike, jaʼ sventa jtabetik sbalil xchiʼuk sventa chchabiutik. Kalbetik skʼoplal li mantaletik ti ch-abtej ta sventa vinajelbalumil ti tspas ta mantal li kʼusitik oye, jech kʼuchaʼal li yip Balumile. ¿Buchʼu van xuʼ chal ti chmakvan li mantaletik taje? Muʼyuk, yuʼun jkotoltik oy sbalil chkiltik xchiʼuk kakʼojtik venta ti jaʼ sventa jlekilaltike. Jech xtok, li mantaletik sventa jtalelaltik xchiʼuk li kʼusitik yakʼoj Jeova ti te chvinaj li ta «lequil mantal» yuʼun Cristoe, jaʼ noʼox sventa jlekilaltik.
7 Taje maʼuk noʼox ti chchabiutike, yuʼun li mantal ti jaʼ chakʼ xijkole chakʼ ti akʼo jpastik li kʼusi ta jkʼantike, pe muʼyuk ta jta jvokoltik yuʼun xchiʼuk muʼyuk ta jpojbetik sderechoik li yantike xchiʼuk ti kolemuk chaʼi sbaike. Li kʼusi skʼan jpastik sventa kolemuk chkaʼi jbatik ta melele, jaʼ xkaltik, sventa jpastik li kʼusi xal koʼontontike, jech skʼan xkakʼtik ta ilel kʼuchaʼal chal mantaletik xchiʼuk li ta stalelaltak Jeovae. Taje jaʼ skʼan xal ti skʼan jkontraintik li kʼusitik chopole xchiʼuk jaʼ jkʼantik li kʼusitik leke. Taje jaʼ me li kʼusi chchanubtasutik li «mantal ti jaʼ chacʼ colcutique» (Amós 5:15).
8, 9. ¿Kʼusi sbalil ta jtabetik mi la jchʼuntik li «mantal ti jaʼ chacʼ colcutique»? Albo junuk skoʼoltasobil.
8 Ta skoj ti jpasmulilutike, tsots me chkaʼitik spajesel jbatik ta spasel li kʼusitik chopole. Pe mi tukʼ chkakʼ jbatik xchiʼuk mi ta jchʼuntik li «mantal ti jaʼ chacʼ colcutique», xuʼ me kolem chkaʼi jbatik li avie. Jaʼ jech chakʼ ta ilel Jay, jun vinik ti lik xchan Vivlia kʼalal lek toʼox xaʼi sbutsʼel sikʼolale. Kʼalal laj yakʼ venta ti chopol chil Dios li sikʼolajele, oy kʼusi tsots la snop tspas: ¿mi jaʼ van mosoinbil chkom yuʼun li sikʼolajele, o mi jaʼ tspas li kʼusi tskʼan Jeovae? Toj lek li kʼusi kʼot ta nopel yuʼune, yuʼun la snop chtun ta stojolal Dios xchiʼuk laj yikta li sikʼolajele. ¿Kʼu yelan laj yaʼi sba kʼalal laj yikta li sikʼolajele? Xi laj yale: «Solel toj labal sba laj kaʼi; ximuyubaj tajek xchiʼuk kolemun laj kaʼi jba».
9 Oy kʼusi la xchan li Jaye: ti lek xa kolem chkaʼi jbatik yuʼun li balumil ti jaʼ noʼox «batem yoʼnton snopel li cʼusi tscʼan sbecʼtale», ta melel kʼajomal noʼox tsmosoinutik. Pe li kolel chakʼbutik Jeova ti jaʼ skʼan xal «li bochʼo jaʼ chbat yoʼnton snopel cʼusi tscʼan li Chʼul Espiritue», «jaʼ sventa [chijkuxi], xchiʼuc sventa tspas ta jun [koʼontontik]» (Rom. 8:5, 6). ¿Bu la sta yip sventa xikta sikʼolajel li Jaye? Maʼuk ta yip stuk, yuʼun jaʼ ta yip Jeova. Xi chal li Jaye: «Ta jchanilan li Vivliae, ta jkʼanilanbe xchʼul espiritu Dios xchiʼuk la jchʼam li koltael laj yakʼbeikun li ermanoetik ta tsobobbaile». Jkʼeltik batel kʼuxi xuʼ tskoltautik ek sventa jtatik li melel kolele.
JCHANTIK LEK LI SKʼOP DIOSE
10. ¿Kʼusi skʼan xal ti ta jchanbetik skʼoplal li smantal Diose?
10 Xi chalbutik li ta Santiago 1:25: «Li bochʼo mu xchʼay ta yoʼnton cʼusi chaʼye, ti jaʼ te oy o ta yoʼnton li lequil mantal ti jaʼ chacʼ colcutique, xchiʼuc ti chchʼun o li cʼusi chale, xcuxet noʼox yoʼnton yuʼun li cʼusi ta spase» o kʼalal chakʼ ta xkuxlejale. Li jpʼel kʼop ta Griego ti chal «mu xchʼay ta yoʼnton» xie, jaʼ skʼan xal «ti chniji ta skʼelele», taje skʼan xichʼ akʼel persa xchiʼuk ti lek xichʼ kʼelele. Jaʼ yuʼun, sventa x-och ta koʼontontik xchiʼuk ta jnopbentik li mantal ti jaʼ chakʼ kolkutike, skʼan me jchanilantik lek li Skʼop Diose xchiʼuk ti jnopilanbetik skʼoplal ta orasion li kʼusi ta jkʼeltike (1 Tim. 4:15).
11, 12. 1) ¿Kʼuxi laj yal Jesús ti chkakʼtik ta ilel ta jkuxlejaltik li kʼusi melele? 2) Jech kʼuchaʼal chvinaj li ta lokʼol liʼe, ¿kʼusi skʼan skʼel-o sbaik li kerem tsebetike?
11 Jech xtok, skʼan xkakʼtik persa sventa xkakʼ ta jkuxlejaltik li kʼusi chal Skʼop Diose, kʼalal jech ta jpastike chkakʼtik ta ilel ta jkuxlejaltik li kʼusi melele. Li Jesús eke jech laj yalbe li yajtsʼaklomtake: «Me jʼechʼel chachʼunic o li cʼusi laj calboxuque, ta melel voʼoxuc mero jchʼunolajeloxuc cuʼun chacʼotic. Jech chavotquinic o li cʼusi melele. Ta sventa li cʼusi melele chaloqʼuic o ta mozoil» (Juan 8:31, 32). Jlik livro ti chalbe skʼoplal li jpʼel kʼop «chavotquinic o» xie, jaʼ chakʼ ta aʼyel «kʼanbil», yuʼun «li buchʼutik xojtikinik xae ep sbalil chilik xchiʼuk tsots skʼoplal chilik». Sventa xkojtikintik lek tajeke, skʼan jkʼantik xchiʼuk xkakʼ ta jkuxlejaltik, jaʼ xkaltik, ti akʼo jkuxlebintik li kʼusi melele. Mi jaʼ jech ta jpastike xuʼ me xkaltik ta melel ti jaʼ «scʼop Dios» ti yakal «ch-abtej o» ta koʼontontike. Taje jaʼ tskoltautik sventa tsjel jtalelaltik, vaʼun jech xa jtalelaltik kʼuchaʼal li Jtotik ta vinajele (1 Tes. 2:13).
12 Toj lek me ti xi jakʼbe jbatike: «¿Mi ta melel xkojtikin kʼusi jaʼ li melele? ¿Mi jech yakal ta jpas ta jkuxlejal? ¿O mi jaʼ to ta jkʼan ti kolemun chkaʼi jba ta alel yuʼun li balumil liʼe?». Jun ermana ti chʼi talel ta jun utsʼ alalil ti jaʼ yajrextikotak Jeovae, xi chal li kʼusi kʼot ta stojolal kʼalal chex tseb toʼoxe: «Kʼalal te chachʼi ta slumal Jeovae te oy-o ta atojolal xkaltik li Jeovae. Pe li voʼone muʼyuk onoʼox bu laj kojtikin ta melel. Muʼyuk laj kontrain li kʼusitik muʼyuk lek chile, kaloje mu sventauk li kʼusitik ta jpase xchiʼuk muʼyuk la jkʼanbe koltael kʼalal jaʼo oy jvokole. Kaloje jnaʼoj xa skotol, pe taje jecheʼ, yuʼun muʼyuk kʼusi jnaʼ ta melel». Jaʼ jun muyubajel, yuʼun ta tsʼakale laj yakʼ venta li kʼusi la spase, vaʼun oy kʼusitik la sjel ta xkuxlejal. Maʼuk noʼox taje, yuʼun och ta prekursora regular.
LI CHʼUL ESPIRITUE CHKOLTAVAN YOʼ KOLEMUKUTIK
13. ¿Kʼuxi chkoltavan li chʼul espiritu sventa kolemukutike?
13 Li ta 2 Corintios 3:17 xi chale: «Ti bu chventainvan li Chʼul Espíritu yuʼun Cajvaltique oy coltael». ¿Kʼuxi chkoltavan li chʼul espiritu sventa kolemukutike? Ta yan xtoke, chchʼi talelaletik kuʼuntik ti toj tsots skʼoplal sventa kolemuk xkaʼi jbatike, jech kʼuchaʼal «ta jcʼanan jbatic, xcuxet noʼox coʼntontic, jun noʼox coʼnton jcotoltic, oy smucʼul coʼntontic, lec noʼox chijcʼopojutic, oy slequil coʼntontic, oy xchʼunojel coʼntontic, mu jtoybauticuc [xchiʼuk] jnaʼtic spajesel jbatic» (Gál. 5:22, 23). Li ta balumil kuxulutik avie, lek chakʼ ta ilel ti muʼyuk buchʼu xuʼ kolem chaʼi sba ti chʼabaluk li talelaletik taje, mas to li kʼanelale. Kʼalal laj xaʼox yalbe skʼoplal skotol talelaletik li jtakbol Pabloe, xi to laj yale: «Li bochʼo jech tspase muʼyuc smul ta sventa li mantaletique». Ta melel, muʼyuk yan mantaletik ti xuʼ tsmak ta be yabtel li xchʼul espiritu Diose (Gál. 5:18). ¿Kʼusi la skʼan laj yal taje? Li kʼusi oy ta yoʼonton Jeovae jaʼ ti jchʼiestik li talelaletik taje, ti muʼyukuk kʼusi smakutik ta spasel xchiʼuk ti jechuk-o ta sbatel osile.
14. ¿Kʼuxi tsmosoinat li buchʼutik chakʼ sbaik ta ventainel yuʼun li kʼusitik oy ta balumile?
14 Li buchʼutik yakʼoj sbaik ta ventainel yuʼun li balumil liʼe, xuʼ van kolem chaʼi sbaik, yuʼun tspasik skotol li kʼusitik tskʼan noʼox stukike (kʼelo 2 Pedro 2:18, 19). Pe li kʼusi melele, jaʼ ti mosoinbilike. Baʼyele, oy epal mantaletik xchiʼuk kʼusitik xuʼ spasik yoʼ oyuk noʼox smelolal li kʼusi oy ta yoʼontonik spasele xchiʼuk ta sventa li stalelalike. Jech kʼuchaʼal laj yal Pablo liʼe: «Li mantaletique maʼuc acʼbil ta sventa li bochʼo lequique. Jaʼ acʼbil ta sventa li jtoybaetique, li jbajmantaletique» (1 Tim. 1:9, 10). Jech xtok, ta skoj ti jaʼ chakʼ sbaik ta stojolal «li cʼusitic lec chaʼay [sbekʼtalike]», jaʼ mosoinbilik yuʼun li mulil ti toj chopol tajeke (Efe. 2:1-3). Xkaltike, xkoʼolajik kʼuchaʼal vovetik ti loʼlabil chbatik li ta kʼusitik chiʼik jech kʼuchaʼal pome: li kʼusi tskʼan yoʼontonike jaʼ ch-ikʼatik-o batel ti bu oy li petsʼ ti chchamik-oe (Sant. 1:14, 15).
KOLEMUTIK YUʼUN LI TSOBOBBAILE
15, 16. ¿Kʼu yuʼun toj tsots skʼoplal ti teuk oyutik li ta tsobobbaile, xchiʼuk kʼusi kolebal ta jkʼupintik te?
15 Mi te oyutik li ta tsobobbaile, maʼuk ti la jkʼan jtuktike, jech kʼuchaʼal ti tstsak sbiik sventa ch-ochik ta jun tsobajel li buchʼutik yamigo sbaike, moʼoj yuʼun jaʼ laj yikʼutik tal stuk li Jeovae (Juan 6:44). ¿Kʼu yuʼun jech la spas li Jeovae? ¿Mi yuʼun jaʼ ta skoj ti tukʼotik xa onoʼox xchiʼuk ti chkichʼtik xa onoʼox ta mukʼ li Diose? Ta melel moʼoj. Vaʼun chaʼa, ¿kʼusi laj yil Jeova ta jtojolaltik? Laj yil ti oy kʼusi lek ta koʼontontike, laj yakʼ venta xtok ti ta slekil koʼontontik ta jchʼamtik li beiltasel chakʼbutike xchiʼuk ti ta jchʼamtik li «mantal ti jaʼ chacʼ colcutique». Kʼalal te xaʼox oyutik li ta tsobobbaile, la smakʼlinutik ta mantal li Jeovae, la skoltautik lokʼel ta sjutel kʼop xchiʼuk li kʼusitik jecheʼ xchʼunojik li jecheʼ relijionetike, xchiʼuk laj yalbutik kʼuxi xuʼ jchanbetik stalelal li Cristoe (kʼelo Efesios 4:22-24). Koliyal taje, xuʼ te oyutik li ta jtsop krixchanoetik ta balumil ti «colem [chij]cʼote» (Sant. 2:12).
16 Kʼalal te jchiʼuktik li buchʼutik skʼanojik ta sjunul yoʼontonik li Jeovae, ¿mi mu meleluk ti muʼyuk chijxiʼe? ¿Mi mu meleluk ti mu skotoluk velta ta jchabi jpat jxokontike? Kʼalal jaʼo chachiʼin ta loʼil ermanoetik ta Salon sventa Tsobobbaile, ¿mi mu jechuk ti muʼyuk chavul avoʼonton ti xelkʼanboxuk li kʼusitik oy avuʼune? ¡Moʼoj kʼuxi un! Muʼyuk kʼusi chijxiʼo xchiʼuk kolem chkaʼi jbatik. ¡Solel jelel tajek kʼalal maʼuk te oyutik ta salone! Li kʼusi mas lek tajeke, jaʼ ti kʼalal kolem chkaʼi jbatik avi li ta slumal Diose, jaʼ noʼox jun yuni kʼelobil li kʼusi ta jkʼupintik ta jelavele.
SLEKIL YUTSILAL LI SKOLEBAL XNICHʼNABTAK DIOSE
17. ¿Kʼuxi te snitojbe sba skʼoplal li svinajeb xnichʼnabtak Dios xchiʼuk li kolel chichʼik li krixchanoetike?
17 Li Pabloe jaʼ laj yalbe skʼoplal li kolel laj yakʼbe slumal Jeova ta Balumile, jaʼ yuʼun xi laj yale: «Ti cʼusitic meltsanbile, mu xa malabaj ta xaʼiic ti vinajuc xchʼa ta jʼechʼel ti voʼotic xnichʼnabotic ti Diose». Xi to laj yal xtoke: «Ta sta yorail ti ta xpaj ti svocolic ti jech ta xcʼaʼe, ti jech ta soque. Yuʼun ta xichʼ slequilalic ec ti cʼalal jaʼ o ta xichʼ slequilal yutsilal ti [«skolebal», NM] xnichʼnabtac ti Diose» (Rom. 8:19-21, Ch). Li versikulo laj yal «ti cʼusitic meltsanbile», jaʼ skʼoplal skotol li krixchanoetik ti chkuxiik sbatel osil liʼ ta Balumile. Li krixchanoetik taje tstabeik sbalil kʼalal chvinaj li xnichʼnabtak ti tʼujbilik yuʼun Diose, kʼalal te xaʼox oyik ta vinajel xchiʼuk Cristo li buchʼutik liʼ toʼox oyik ta Balumile, jaʼo chlik yakʼbeik slajeb li chopol krixchanoetike, vaʼun chikʼik batel «epal cristianoetic» li ta achʼ balumile (Apo. 7:9, 14).
18. ¿Kʼuxi ta kʼunkʼun tstaik batel kolel li krixchanoetik ti lek xchʼunik mantale, xchiʼuk kʼusi kolel ta skʼupinik?
18 Li krixchanoetike jaʼ to me te tstaik li kolebal ti muʼyuk jech xilik-oe, yuʼun kolem xa chkomik ta stojolal li kʼusitik tstunes Satanás xchiʼuk spukujtake (Apo. 20:1-3). ¡Jaʼ jun lekilal maʼ taje! Mi laje, li 144,000 ajvaliletik xchiʼuk li paleetik ti jmoj chtunik xchiʼuk Cristoe ta me x-och stunesik li matanal laj yakʼ Cristo sventa jtabetik sbalil ta kʼunkʼun jaʼ to mi kolemutik xaʼox lek ta stojolal li mulil ti jkuchojtik tale xchiʼuk ti muʼyuk jtukʼiltike (Apo. 5:9, 10). Kʼalal mi laj xaʼox yichʼ akʼel ta preva li xchʼunel koʼontontike, li krixchanoetike ta me staik li kolel laj yalbe slumal Jeova ti chakʼbee, jech, tsta slekil yutsilal li skolebal xnichʼnabtak Diose. ¿Mi xnop kuʼuntik taje? Muʼyuk xa me chkil jvokoltik yuʼun li kʼusitik chopol oy ta koʼontontike, yuʼun tukʼil krixchanoutik xaʼox xchiʼuk li jtalelaltike jech xaʼox me kʼuchaʼal li stalelal Diose.
19. ¿Kʼusi skʼan jpastik mi ta jkʼan ta jtatik li melel kolele?
19 ¿Mi solel oy ta avoʼonton stael li slekil yutsilal li skolebal xnichʼnabtak Diose? Mi jech taje, skʼan me xavakʼ ti akʼo x-och ta anopben xchiʼuk ta avoʼonton li «lequil mantal ti jaʼ chacʼ colcutique». Kʼelilano lek jujun kʼakʼal li Vivliae. Akʼo ta akuxlejal li kʼusi melele. Kʼanbo xchʼul espiritu Jeova. Teuk noʼox nopol oyan li ta tsobobbail yuʼun yajtsʼaklomtak Cristoe xchiʼuk kʼupino li veʼlil ta mantal chakʼ Jeovae. Mu me jechuk xapas kʼuchaʼal la spas li Evae, ti laj yakʼ sba ta loʼlael ta stojolal li Satanase xchiʼuk ti la snop ti toj tsotsik li mantal laj yakʼ Diose. Melel onoʼox ti toj manya li Satanase. Pe jech kʼuchaʼal ta jchantik li ta yan xchanobile, xuʼ me jtsaltik komel, «yuʼun jnaʼojtic xa li cʼusi oy ta yoʼnton tspase» (2 Cor. 2:11).
[Sjakʼobiltak sventa xchanobil]
[Lokʼol ta pajina 9]
¿Mi ta jkʼan ti kolemun chkaʼi jba ta alel yuʼun li balumil liʼe?
[Lokʼol ta pajina 9]
¿Mi jech yakal ta jpas ta jkuxlejal?
