Tava Okuti Yehova Oku Songuila Keyovo Liocili

“Vanja sũi vocihandeleko ca kanguka, haico ci nena eyovo.”​—TIA. 1:25.

O TẼLA OKU LOMBOLOLA?

Ocihandeleko cipi ci nena eyovo liocili, kuenda velie va kuatisiwa laco?

Nye omunu a sukilila oku linga oco a kuate eyovo liocili?

Omanu vana va endela vonjila yomuenyo va lavoka oku kuata eyovo lipi?

1, 2. (a) Nye ca siata oku pita lomanu vana va sima okuti va kuete eyovo, kuenda momo lie? (b) Eyovo lipi Yehova a likuminya kafendeli vaye?

 TU KASI kotembo yimue okuti, omanu vakuepela, va tomba ovihandeleko, haivo olongangala. (2 Tim. 3:1-5) Omo liovitangi viaco, olombiali via siata oku kapa ovihandeleko vialua lakuenje velombe va pama, kuenda olomakina vi lavulula volonjo lo volokololo. Kolofeka vimue, omanu va kapa volonjo viavo okamakina kamue okuti, eci ku iya ocina cimue ci koka ohele, ka sika. Handi vali, kovimbaka violonjo vimue kua kapiwa ongumbu yolofiyu vi kuete olusu okuti, nda umue o yongola oku nyana, o fako. Vamue va yuvula oku tunda vonjo kuteke, kuenda ka va ecelela okuti, omãla vavo va papalela kosamua, ci kale kutanya,ale​—kuteke. Ovina evi vi lekisa okuti, omanu ka va kuete elianjo, kuenda ekalo lĩvi li ka amamako.

² Vocumbo Cedene, Satana wa popia hati, elianjo liocili, li tunda koku likala oku pokola ku Yehova. Pole, olondaka viaye vĩvi, kuenda vi lekisa okuti ohembi yimue yinene! Voluali luosi mue yuka ohali, momo omanu valua ka va kapeleko ovihandeleko via eciwa la Suku viatiamẽla koku kuata ovituwa viwa. Ekalo liaco, lia siatavo oku nena ohali kafendeli va Yehova. Pole, tu kuete elavoko liokuti, ovina vĩvi vina vi tunda kekandu lia Adama okuti via siata oku talisa omanu ohali, eteke limue ka vi ka kalako vali. Kuenje, tu ka sanjukila ovina Embimbiliya li tukula hati, “eyovo liulamba womãla va Suku.” (Va Rom. 8:21) Omo liaco, Yehova wa fetika ale oku pongiya afendeli vaye oco va kuate eyovo liocili. O ci linga ndati?

3. Ocihandeleko cipi Yehova a eca kolondonge via Kristu, kuenda apulilo api tu konomuisa vocipama cilo?

³ Tiago poku soneha ukanda waye, wa tukula ‘ocihandeleko ca kanguka haico ci nena eyovo.’ (Tanga Tiago 1:25.) Vambimbiliya akuavo, ondaka ya tukuiwa  vocinimbu eci, va yi pongolola hati, “ocihandeleko ci tu yovola,” kuenda “ocihandeleko ceyovo.” Omanu va siata oku tenda ovihandeleko ndocina cimue ci va tateka oku kuata elianjo. Ondaka ‘ocihandeleko ca kanguka haico ci nena eyovo,’ yi lomboloka nye? Ocihandeleko caco ci tu yovola ndati?

OCIHANDELEKO CI YOVOLA

4. ‘Ocihandeleko ca kanguka haico ci nena eyovo,’ ci lomboloka nye, kuenda velie va kuatisiwa laco?

⁴ ‘Ocihandeleko ca kanguka haico ci nena eyovo,’ ca litepa Locihandeleko ca eciwile ku Mose, cina ca kuatisa va Isareli oku limbuka okuti, vakuakandu kuenda ca tẽlisiwa vu Kristu. (Mat. 5:17; Va Gal. 3:19) Ocihandeleko cipi Tiago a tukula? Eye wa kũlĩhĩle “ocihandeleko ca Kristu” ci tukuiwa hati, “ocihandeleko cekolelo,” kuenda ‘ocihandeleko ci yovola omanu.’ (Va Gal. 6:2; Va Rom. 3:27; Tia. 2:12) ‘Vocihandeleko ca kanguka,’ mua kongela ovina viosi Yehova a tu kisika oku linga. Omo liaco, Akristão olombuavekua, kumue ‘lolomeme vikuavo,’ va kuatisiwavo locihandeleko caco.​—Yoa. 10:16.

5. Momo lie tu popela tuti, ocihandeleko ceyovo ka ci lemi?

⁵ “Ocihandeleko ca kanguka,” ca litepa lovihandeleko vina via siata oku eciwa lolombiali, kuenda ka ca tatamẽle oku ci pokola, haico ka ci lemi, momo ca kunamẽla kovisila lo kolonumbi via sunguluka. (1 Yoa. 5:3) Yesu wa popia hati: “Okanga yange ya sunguluka, locitele cange ca leluka.” (Mat. 11:29, 30) Handi vali, “ocihandeleko ca kanguka,” ka ci sukila ulala umue woku kangisa vana va lueya, momo ci vetiyiwa locisola, ci kasi vovitima viomanu, kuenda ka ca sonehiwile vevaya liewe.​—Tanga Va Heveru 8:6, 10.

NDOMO “OCIHANDELEKO CA KANGUKA” CI TU YOVOLA

6, 7. Nye tu pondola oku popia catiamẽla kolonumbi via Yehova, kuenda ocihandeleko ceyovo ci tu kuatisa oku linga nye?

⁶ Yehova wa kapa olongave vi teyuila oviluvo viaye vi kuete olondunge. Kũlĩhĩsa ongusu yendisa ovina vi kasi voluali okuti, yi sokisiwa locihandeleko. Lomue o liyeya omo lioku sima okuti, ovihandeleko viaco viu talisa ohali. Omanu va kũlĩha okuti, ovihandeleko viaco vi va kuatisa. Cimuamue haico ci pita lolonumbi via Yehova viatiamẽla koku kuata ovituwa viwa okuti, vi situlula “ocihandeleko ca kanguka” ca Kristu, cina ci kuatisa omanu.

⁷ Ocihandeleko ceyovo ci tu teyuila, cecelela oku tẽlisa olonjongole vietu via sunguluka okuti ka tu kuata ovitangi, kuenda ka tu nyõli elianjo lia vakuetu. Oco tu kuate eyovo liocili, tu sukila oku lekisa olonjongole via sunguluka vina vi litava lovisimĩlo via Yehova, kuenda olonumbi viaye. Tu sukilavo oku sola ovina Yehova a sole, kuenda oku suvuka ovina a nyãle. Pole, ocihandeleko ca kanguka, oco ci tu kuatisa oku linga ovina viaco.​—Amo. 5:15.

8, 9. Onima yipi yi tunda koku kakatela kocihandeleko ceyovo? Tukula ulandu umue.

⁸ Omo okuti ka tua lipuile, tua siata oku liyaka lolonjongole ka via sungulukile. Pole, nda tua kakatela kocihandeleko ci nena eyovo, tu kuata eyovo liocili cilo muẽle. Konomuisa ulandu owu: Umalẽhe umue o tukuiwa hati Jay, wa enda oku sipa eci a fetika oku lilongisa Embimbiliya. Eci a limbuka okuti ocituwa caye cĩvi ci sumuisa Yehova, wa fetika oku sokolola onjila a sukilile oku kuama. Wa amamako hẽ loku tẽlisa oloñeyi viaye vietimba, ale wa pokola ku Yehova? Ndaño etimba liaye lia vĩhisiwile lowule wakaya, pole, wa nõlapo oku vumba Suku. Utima waye wa kala ndati noke yoku liwekapo oku sipa? Eye wa popia hati: “Ndi kuete esanju omo nda yovoka kupika woku sipa.”

⁹ Manji Jay wa lilongisa okuti, elianjo lioluali, li vetiya omanu oku tiamisila “ovisimĩlo viutima koloñeyi vietimba,” kuenje, va linga apika voloñeyi viaco. Pole, elianjo lieciwa la Yehova, li kuatisa omanu oku ‘tiamisila  ovisimĩlo viutima kovina viespiritu,’ kuenda li va nenela ‘ekalo liwa lombembua.’ (Va Rom. 8:5, 6) Pi manji Jay a sanga ongusu yoku liwekapo oku sipa? Ka ci lingile longusu yaye muẽle, pole, wa kuatisiwa la Suku. Noke, wa popia hati: “Nda kuatisiwa lelilongiso Liembimbiliya, loku pinga espiritu sandu volohutililo, kuenda ocisola ca vamanji vekongelo.” Oku linga ovina viaco, ci tu nenela eyovo liocili. Omo liaco, tu konomuisi ndomo tu pondola oku ci linga.

VANJA SŨI VONDAKA YA SUKU

10. Ondaka oku ‘vanja sũi’ vocihandeleko ca Suku yi lomboloka nye?

¹⁰ Elivulu lia Tiago 1:25, li popia ndoco: ‘U o vanja vanja sũi vocihandeleko ca kanguka, haico ci nena eyovo, kuenje, ka liwekapo oku vanja, nda wa ci linga, o sumũlũha.’ Kelimi lio Helasi, ondaka ‘oku vanja sũi,’ yi lomboloka “oku tala ocina cimue lutate” okuti, oko lika omunu a tiamisila utima. Nda tu yongola okuti ocihandeleko ceyovo ci songuila ovisimĩlo viutima wetu, tu sukila oku kuata ombili yoku lilongisa Embimbiliya, loku likutilila oco tu sokolole ovina tua tanga.​—1 Tim. 4:15.

11, 12. (a) Yesu wa lekisa ndati esilivilo lioku kapako ocili komuenyo wetu? (b) Ndomo ca lekisiwa vulandu wa tukuiwa ndeti, ovina vipi vi koka ohele amalẽhe va sukila oku yuvula?

¹¹ Olonjanja vimue, tu sukila ‘oku lipilika,’ loku likolisilako oku kapako ovina tua tanga, oco Ondaka ya Suku yi tu songuile. Yesu wa lekisa ovisimĩlo vimuamue eci a sapela lomanu vamue va tavele kokuaye,  kuenje wa va sapuila hati: “Nda vu pandikisa oku pokola kolondaka viange, vu londonge viange, . . . kuenje, vu kũlĩha ocili, kuenda ocili cu yovola.” (Yoa. 8:31, 32) Elivulu limue li popia hati, ondaka oku “kũlĩha” ya tukuiwa ndeti, yi lomboloka oku sola, ocina cimue tua kũlĩha okuti, ci kuete esilivilo lia velapo.” Tu popia lika okuti tua “kũlĩha” ocili, nda tua ecelela oku songuiwa lolonumbi Viembimbiliya. Kuenje, tu popia tuti, “Ondaka ya Suku,” yi kasi oku “talavaya” vovitima vietu, yi pengulula ovituwa vietu, kuenda yi tu kuatisa oku setukula Isietu wokilu.​—1 Va Tes. 2:13.

¹² Lipula ndoco: ‘Anga hẽ nda kũlĩha ocili? Ocili caco ci kasi hẽ oku vetiya ovituwa viange? Ale nda kakatela ‘kelianjo’ lioluali lulo?’ Manji umue ukãi okuti olonjali viaye Akristão, ivaluka ndomo a yapuisiwa eci a kala umalẽhe, kuenje, wa popia hati: “Nda omunu o kasi oku endela vocili, Yehova u kuatisa. Pole, kefetikilo sia kuatele ukũlĩhĩso wa Yehova. Sia lilongisile oku suvuka ovina Yehova a nyãle. Eci nda kala omõla, sia tavele okuti Yehova wa kapeleko ovina ndaenda oku linga. Kuenje, eci ndi kuata ovitangi, si pingi ekuatiso kokuaye. Nda kolelele lika kolondunge viange, pole, cilo nda limbuka okuti ovina viaco, ka vi kuete esilivilo, momo sia kuatele ukũlĩhĩso.” Eci manji yaco a limbuka okuti wa kuata ovisimĩlo ka via sungulukile, wa linga apongoloko. Kuenje, wa iñila kupange wakundi vavelapo.

ESPIRITU SANDU LI KU KUATISA OKU YOVOKA

13. Espiritu sandu lia Suku li tu kuatisa ndati oku kuata eyovo liocili?

¹³ Kelivulu lia 2 Va Korindo 3:17, NW, tu tangako ndoco: “Oku kuli espiritu lia Yehova, kuli eyovo.” Espiritu sandu li tu kuatisa ndati oku yovoka? Li tu kuatisa oku lekisa ovituwa viwa ndeci: “Ocisola, esanju, ombembua, epandi, unu, esunga, ekolelo, umbombe, [kuenda] esuluviko.” (Va Gal. 5:22, 23) Nda omanu ka va lekisa ovituwa viaco ndeci, ocisola, ka va pondola oku tetulula ovitangi vi kasi voluali. Eci upostolo Paulu a mala oku tukula ovituwa via kongela vepako liespiritu, wa amisako hati: “Ka kuli ocihandeleko ci patãla ovina evi.” Nye a yonguile oku popia lolondaka evi? Eye, wa yonguile oku lekisa okuti, ka kuli ocihandeleko cimue ci tateka epako liespiritu lia Suku oku lekisa ovituwa viaco. (Va Gal. 5:18) Etosi lipi lia velapo liatiamẽla kocihandeleko caco? Yehova o yongola okuti, tu lekisa ovituwa viaco otembo yosi okuti, lacimue ci tu tateka oku ci linga.

14. Omanu vana va siata oku kuama espiritu lioluali, va linga ndati apika?

¹⁴ Vana va kasi oku songuiwa lespiritu lioluali, pamue va sima okuti va yovoka omo va siata oku tẽlisa olonjongole viavo vietimba. (Tanga 2 Petulu 2:18, 19.) Pole, ovisimĩlo viaco viesanda. Momo, ovihandeleko vialua, vi kasi ndongave ya kapiwila oku tateka omanu oco ka va ka linge ovina vĩvi vi koka ovitangi. Paulu wa popia hati: “Ovihandeleko ka via [kapiwilile] vakuesunga, te vakuakutomba ovihandeleko, kuenda vakuemande.” (1 Tim. 1:9, 10) Omo ‘lioku tiamisila utima kolonjongole vietimba,’ omanu vaco, va linga apika vekandu kuenje, olonjongole viavo, vi linga ndacime umue ongangala. (Va Efe. 2:1-3) Ovo, va sokisiwa lolonjinji vi lupukila pelonga liowiki. Omo lioku pepa kuowiki, vi wila pelonga kuenje, vi fa.​—Tia. 1:14, 15.

KUATA EYOVO VEKONGELO LIAKRISTÃO VOCILI

15, 16. Ukamba wetu la vamanji u kuete esilivilo lie, kuenda elianjo lipi tu kuete?

¹⁵ Eci wa fetika oku endaenda kolohongele, wa limbuka okuti kua likongelele locisoko cimue coluali. Pole, weya vekongelo, omo wa kokiwa la Yehova. (Yoa. 6:44) Nye ca vetiya Yehova oku ku koka? Anga hẽ wa mola okuti ove ukuesunga, kuenda wo sumbila? Pamue, o tambulula hati, “Sio!” Nye Yehova a mola kokuove? Eye wa limbuka okuti, utima wove u pondola oku tava kocihandeleko ceyovo, kuenda wecelela oku songuiwa locihandeleko caco. Yehova wa siata oku ku tekula lokulia kuespiritu vekongelo, oco o yovuiwe kalongiso etavo liesanda, kovihilahila violuali, kuenda oku longisa ndomo o kuata ovituwa Viakristão vocili. (Tanga Va Efeso 4:22-24.) Omo liaco, o kuete esumũlũho lioku kala pokati komanu vana va tukuiwa okuti, ovo lika ‘va kuete eyovo liocili.’​—Tia. 2:12.

¹⁶ Kũlĩhĩsa ndoco: Eci o kala pokati komanu vana va sole Yehova lutima wosi, o kuata hẽ usumba? Ku sanjuka hẽ oku kala pokati komanu vaco? Osimbu o kasi oku sapela Vonjango Yusoma, o lavulula hẽ ovina viove oco ka vi ka nyelele? Sio, ku kuata ovisimĩlo viaco! Pole, o lianja lavo. Anga hẽ eci o kala kumue lomanu vakualuali wa siatavo oku kuata elianjo liaco? Sio, ku kuata! Pole, elianjo o kuete pokati kafendeli va Suku, li ka amamako voluali luokaliye otembo ka yi pui.

“EYOVO LIULAMBA WOMÃLA VA SUKU”

17. Ndamupi eyovo liomanu li kuete elitokeko ‘letukuluko liomãla va Suku’?

¹⁷ Paulu poku lombolola eyovo Yehova a likuminya kafendeli vaye va ka kala palo posi, wa soneha ndoco: “Ovilulikilo viosi vi tãilili oku mola etukuluko liomãla va Suku.” Noke, wa amisako hati: “Eteke limue ovina via lulikiwa vi panduluiwa kupika wenyõleho ha vi moli eyovo liulamba womãla va Suku.” (Va Rom. 8:19-21) “Ovina via lulikiwa,” via tukuiwa vocinimbu eci, vi lomboloka omanu va kuete elavoko lioku kala palo posi okuti, va ka kuatisiwa ‘letukuluko’ liomãla va Suku, olombuavekua. Etukuluko liaco, lia fetika eci “omãla” va Suku vana va ka viala kumue la Kristu kilu, va fetika oku pinduiwa latimba espiritu. Kuenje, va ka yelisa ilu lieve, loku teyuila “owiñi wakahandangala,” poku u songuila voluali luokaliye palo posi.​—Esit. 7:9, 14.

18. Eyovo liomanu vakuepokolo li ka amamako toke pi, kuenda li ka kala ndati?

¹⁸ Omanu vakuepokolo, va ka kuata eyovo liokaliye hailio liocili okuti, ka li ka nyõliwa la Satana kumue lolondele viaye. (Esit. 20:1-3) Eyovo liaco, li ka nena ekavuluko liocili komanu! Omo liaco, ci soka 144.000 kolosoma lovitunda, vi ka amamako oku kuatisa omanu locisembi toke eci ekandu lekambo lioku lipua tua piñala ku Adama li imũha. (Esit. 5:9, 10) Noke yoku pita voseteko ya sulako, omanu va ka lipua, kuenda va ka kuata eyovo Yehova a likuminya, kuenje, va ka mola​—“eyovo liulamba womãla va Suku.” Sokolola ndomo omanu va ka kala! Lacimue ci ka ku tateka oku linga ovina via sunguluka kovaso a Suku, momo etimba liove liosi li ka lipua, kuenda o ka kuata ovisimĩlo viokaliye okuti, vi ka pongoluiwa vesetahãlo lia Suku.

19. Nye tu sukila oku linga oco tu amameko oku endela vonjila yi tuala keyovo liocili?

¹⁹ Ove hẽ o yongola oku kuata “eyovo liulamba womãla va Suku”? Nda o yongola, ecelela okuti utima lolondunge viove, vi songuiwa ‘locihandeleko ca kanguka haico ci nena eyovo.’ Omo liaco, o sukila oku konomuisa lutate Embimbiliya, loku kapako ovina wa lilongisa. Pinga espiritu sandu vohutililo. Litekula lokulia kuespiritu kua siata oku eciwa kolohongele, kuenda ovina vikuavo Yehova a tu pongiyila. Ku ka ecelele okuti Satana o nyõla ekalo liove, ndeci a yapuisa Heva poku u vetiya oku sima okuti, olonjila via Suku ka via sungulukile. Ivaluka okuti, Eliapu li kuete atutu alua. Pole, ndomo tu ka konomuisa vocipama ci kuãimo, tu sukila oku likolisilako oco ka ‘tu ka yapuisiwe la Satana, momo ka tu kasi vonumbi yatutu aye.’​—2 Va Kor. 2:11.

[Apulilo Elilongiso]

[Alitalatu kemẽla 9]

Nda kakatela hẽ ‘kelianjo’ lioluali lulo?

[Alitalatu kemẽla 9]

Nda kapako hẽ ovina nda siata oku lilongisa?