Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Unsa nga gingharian ang gisaad kang Jesus?

Ang Diyos nagsaad nga usa ka kaliwat ni Haring David ang molingkod sa Iyang trono hangtod sa panahong walay tino. Kanang gitagna nga kaliwat mao si Jesus, ug karon nagmando na siya sa langit ingong Hari sa Gingharian sa Diyos.—Basaha ang Salmo 89:4; Lucas 1:32, 33.

Sa bata pa si David, si Jehova nga Diyos nagpili kaniya nga mahimong hari sa Iyang katawhan, ang Israel. Sa dihang namatay si David, si Solomon, kinsa gipili ni Jehova, milingkod sa “trono ni Jehova.” (1 Cronicas 28:4, 5; 29:23) Human sa kamatayon ni Solomon, daghang hari ang nagmando sa Jerusalem, apan kadaghanan nila dili matinumanon. Sa kataposan, gitugotan ni Jehova ang kasundalohan sa Babilonya sa paglaglag sa Jerusalem ug pagtangtang sa hari niini. Nahitabo kana sa 607 B.C.E. Sukad niana, wala nay hari sa kaliwat ni David ang nagmando sa literal nga siyudad sa Jerusalem.—Basaha ang Ezequiel 21:27.

2. Unsa ka dugay nga walay nagrepresentar sa Gingharian sa Diyos sa yuta?

Wala madugay human malaglag ang Jerusalem, giingnan ni Jehova ang iyang propetang si Daniel nga Siya magpilig hari nga magmando sa langit. Kanus-a magsugod ang iyang pagmando?—Basaha ang Daniel 7:13, 14.

Gihubad ni Daniel ang panan-awon diin ang Diyos nagsugo nga putlon ang dako kaayong kahoy, ingon sa gisugo sa Diyos nga ang gingharian sa Jerusalem pagaputlon ug pagalaglagon. Apan ang tuod niini ipabilin sa yuta aron kini motubo pag-usab human sa “pito ka panahon.” Gipakita sa Bibliya nga ang tulo ug tunga sa “panahon” katumbas sa 1,260 ka adlaw, busa ang “pito ka panahon” katumbas sa 2,520 ka adlaw. (Pinadayag 12:6, 14) Sa tagna sa Bibliya, ang mga adlaw sagad nagrepresentar sa mga tuig. (Numeros 14:34) Busa, walay magrepresentar sa Gingharian sa Diyos sulod sa 2,520 ka tuig.—Basaha ang Daniel 4:10-17.

  3. Kanus-a nahimong Hari si Jesus?

Ang Diyos nag-entrono kang Jesus ingong Hari sa langit niadtong 1914, eksaktong 2,520 ka tuig human malaglag ang Jerusalem. Ang unang gibuhat ni Jesus ingong Hari mao ang pagpalagpot kang Satanas ug sa iyang mga demonyo gikan sa langit. (Pinadayag 12:7-10) Kana nga hitabo wala makita sa mga tawo, apan miresulta sa dayag nga kaalaotan sa katawhan. (Pinadayag 12:12) Ang mga panghitabo sukad sa 1914 nagpamatuod nga si Jesus nahimong Hari nianang tuiga.—Basaha ang Mateo 24:14; Lucas 21:10, 11, 31.

4. Unsang kaayohan ang ikahatag kanimo sa pagkahari ni Jesus?

Ang katumanan sa mga tagna bahin sa pagkahari ni Jesus nagpamatuod nga makasalig ka sa Pulong sa Diyos. Sa dili madugay, gamiton ni Jesus ang iyang harianong gahom aron sa pagwagtang sa tanang pag-antos sa tawo.—Basaha ang Salmo 72:8, 12, 13; Daniel 2:44.

Alang sa dugang impormasyon, tan-awa ang panid 215-218 niining libroha, Unsay Tinuod nga Gitudlo sa Bibliya?, nga gipatik sa mga Saksi ni Jehova.

[Chart sa mga panid 16, 17]

(Alang sa aktuwal nga pagkahan-ay, tan-awa ang publikasyon)

Oktubre

607 B.C.E. ← 2,520 ka tuig → 1914 C.E.

1000 B.C.E. | 1 B.C.E. | 1 C.E. | 1000 C.E. | 2000 C.E.

← 606.25 ka tuig →← 1,913.75 ka tuig →

Ang gingharian sa Jerusalem gilaglag

Gamita ang imong calculator: 606.25 + 1,913.75 = 2,520

Ang Diyos naghimo kang Jesus nga Hari ibabaw sa kanasoran