Te ui nei teia atikara i te au uianga penei i ui ana koe, e te akaari maira i te ngai ka rauka ia koe i te tatau i te au pauanga i roto i taau Pipiria. Ka rekareka te Au Kite o Iehova i te uriuri i teia au pauanga kia koe.

1. Eaa te Patireia tei taputouia kia Iesu?

Kua taputou te Atua e ka noo tetai uanga o te Ariki ko Davida ki runga i Tona terono e tuatau ua atu. Ko Iesu taua uanga tei totouia mai, e tei runga aia i te rangi i teianei e tutara maira ei Ariki no te Patireia o te Atua.—E tatau ia Salamo 89:4; Luka 1:32, 33.

To Davida meangitianga, kua iki te Atua iaia ei ariki i rungao ia Iseraela, te iti tangata o Iehova. Te mate anga a Davida, ko Solomona ta Iehova i iki, kia noo ki runga i “te terono a Iehova.” (1 Paraleipomeno 28:4, 5; 29:23) Muri ake i to Solomona matenga, e manganui te au ariki tei tutara i Ierusalema, inara te maataanga kare ratou i tiratiratu ana. Te openga iora, kua akatika a Iehova i te au vaeau o Babulonia kia takore ia Ierusalema e kia akaatea i te ariki e tutara ra. Tupu te reira i te mataiti 607 M.T.N. Mei te reira tuatau mai, kare e ariki i roto i te kopu o Davida i tutara ana i te oire tikai o Ierusalema.​—E tatau ia Ezekiela 21:27.

2. Eaa te roa i te Patireia o te Atua ta Davida e ta Ierusalema i akatutu mai, i te vai ua anga kare e tutara?

Muri poto ua ake te takoreia anga a Ierusalema, kua akakite a Iehova ki tana peroveta ko Daniela e ka iki Aia [te Atua] i tetai ariki te ka tutara mai mei te rangi. Aea ra teia tutaraanga e akamata ai?—E tatau ia Daniela 7:13, 14.

Kua uri a Daniela i te aiteanga o tetai orama tei akaue te Atua kia tipuia tetai pu rakau maatamaata ki raro, mei ta te Atua rai i akaue kia tipu keia te patireia i Ierusalema e kia takoreia. Inara kia akarukeia te tumu e tona aka ki roto i te one, e kia “itu ua atu tuatau” i muri ake, ka tupu akaou mai ei te reira. Te akakite maira te Pipiria e ko te toru e te apa “tuatau,” e 1,260 ra, e ko te “itu ua atu tuatau” e 2,520 ra. (Apokalupo 12:6, 14) I roto i te totou Pipiria, maata te taime e akatutuia ana te au ra ei au mataiti. (Numero 14:34) No reira, ka vai ua te Patireia o te Atua kare e tutara no tetai 2,520 mataiti.—E tatau ia Daniela 4:10-17.

  3. Inaea a Iesu i riro mai ei ei Ariki?

Kua akaterono te Atua ia Iesu ei Ariki i te rangi i te mataiti 1914, e 2,520 mataiti tikai i muri ake i te takoreia anga a Ierusalema. Ta Iesu angaanga mua i rave ei Ariki, kua akaatea aia ia Satani e tana au temoni mei te rangi mai. (Apokalupo 12:7-10) Kare te reira angaanga e kiteaia e te mata tangata, inara kua kite te tangata i te au kino tei tupu no te reira. (Apokalupo 12:12) Te au mea tei tupu mei te mataiti 1914 mai, te akapapu maira e kua riro a Iesu ei Ariki i taua mataiti ra.—E tatau ia Mataio 24:14; Luka 21: 10, 11, 31.

4. Eaa te aiteanga o to Iesu taoonga ariki noou?

Te akapapu maira te au totou tei akatupuia no runga i to Iesu taoonga ariki e ka rauka ia koe i te irinaki i te Tuatua a te Atua. Kare e roa atu ana, ka taangaanga a Iesu i tona mana ariki ei takore i te mamae o te tangata.​—E tatau ia Salamo 72:8, 12, 13; Daniela 2:44.

No tetai akakiteanga maata atu, akara i te kapi 215-218 o teia puka, Eaa Tikai ta te Pipiria e Apii Maira?, tei neneiia e te Au Kite o Iehova.

[Tutu i te kapi 26, 27]

(No runga i teia, akara i te puka)

Okotopa

607 M.T.N. ← 2,520 mataiti → 1914 T.N.

1000 M.T.N. | 1 M.T.N. | 1 T.N. | 1000 T.N. | 2000 T.N.

← 606.25 mataiti →← 1,913.75 mataiti →

Takoreia te patireia i Ierusalema

Taangaanga i te apinga tare numero aau: 606.25 + 1,913.75 = 2,520

Akamana te Atua ia Iesu ei Ariki ki rungao i te au pa enua