Aʻoaʻoga a le Tusi Paia

O Anafea na Avea ai Iesu ma Tupu?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. O le ā le Malo na folafola atu iā Iesu?

Na folafola mai e le Atua o le a avea se tasi e tupuga mai i le tupu o Tavita ma Tupu e faavavau. O ia lenā o Iesu, ma ua nofotupu nei o ia i le lagi e fai ma Tupu o le Malo o le Atua.—Faitau le Salamo 89:4; Luka 1:32, 33.

Sa filifilia e le Atua Tavita e fai ma tupu i Lona nuu o Isaraelu. Ina ua maliu o ia, sa filifilia loa e Ieova Solomona, ina ia nofoia Lona “nofoālii”. (1 Nofoaiga Tupu 28:4, 5; 29:23) Ae ina ua maliu Solomona, e toʻatele tupu na soloaʻi ane i le nofoālii, peitaʻi o le toʻatele e leʻi faamaoni. Mulimuli ane, na faataga e Ieova ʻautau a Papelonia e faaumatia Ierusalema ma aveesea lē na fai ma tupu. Na tupu lenā mea i le 607 T.L.M., ma talu mai lenā taimi, e leʻi iai se tasi na tupuga mai i le aiga o Tavita na toe pule i Ierusalema.—Faitau le Esekielu 21:27.

2. O le ā le umi na lē toe iai se tupu e fai ma sui o le Malo o le Atua i le lalolagi?

E leʻi leva talu ona mavae le faaumatiaga o Ierusalema, ae faailoa atu loa e Ieova i lana perofeta o Tanielu o le a Ia filifilia se tupu e pule mai i le lagi. O āfea o le a amata ai lana pulega?—Faitau le Tanielu 7:13, 14.

Na faamatala e Tanielu se faaaliga lea na faatonu ai e le Atua le tuuina i lalo o se laau telē, e faaāta mai ai le faaumatiaina o le malo o Ierusalema. Peitaʻi, sa tuu ai pea i le eleele le tagutugutu o le pogati o le laau, seʻia mavae “taimi e fitu” ona toe tupu mai ai lea. Ua taʻua i le Tusi Paia e faapea o le tolu ma le ʻafa “taimi” e tutusa ma le 1,260 aso, o lona uiga la, o “taimi e fitu” e tutusa ma le 2,520 aso. (Faaaliga 12:6, 14) I valoga o le Tusi Paia, e masani ona faasino atu aso i tausaga. (Numera 14:34) O lona uiga la, e 2,520 tausaga e leʻi toe iai se tupu e fai ma sui o le Malo o le Atua i le lalolagi.—Faitau le Tanielu 4:10-17.

 3. O anafea na avea ai Iesu ma Tupu?

Na tofia e le Atua Iesu e fai ma Tupu i le lagi i le 1914, o le taimi tonu lenā ua 2,520 tausaga talu ona mavae le faaumatiaga o Ierusalema. O le gaoioiga muamua na faia e Iesu o se Tupu, o le tuliesea lea o Satani ma ana temoni mai i le lagi. (Faaaliga 12:7-10) E ui e leʻi vaaia e tagata lenā mea, peitaʻi ua faamaonia i puapuaga ua tatou vaaia. (Faaaliga 12:12) O mea na tutupu talu mai le 1914, ua faamaonia ai o le tausaga lenā na avea ai Iesu ma Tupu.—Faitau le Mataio 24:14; Luka 21: 10, 11, 31.

4. O le ā le uiga o le avea o Iesu ma tupu iā te oe?

O le faataunuuina o valoaga e faatatau i le avea o Iesu ma tupu, ua faamaonia ai e mafai ona e maufaatuatuaina le Afioga a le Atua. Ua lē o toe umi ona faaaogā lea e Iesu lona mana tautupu, ina ia tafiesea ai mafatiaga uma o tagata.—Faitau le Salamo 72:8, 12, 13; Tanielu 2:44.

Mo nisi faamatalaga, tagaʻi i le itulau e 215-218 o lenei tusi, O Ā Aʻoaʻoga Moni A le Tusi Paia? lomia e Molimau a Ieova.

[Siata i le itulau 16, 17]

(Tagaʻi i le lomiga mo le ata atoa)

Oketopa

607 T.L.M. ← 2,520 tausaga → 1914 T.A.

1000 T.L.M. | 1 T.L.M. | 1 T.A. | 1000 T.A. | 2000 T.A.

← 606 tausaga, 3 masina →← 1,913 tausaga, 9 masina →

Faaumatia le malo o Ierusalema

Faaopoopo fuainumera nei: 606.25 + 1,913.75 = 2,520

Tofia e Ieova Iesu e fai ma tupu ma tuu atu le mana e pule ai i atunuu uma