Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Hi wihi mfumo lowu Yesu a wu tshembiseke?

Xikwembu xi tshembise leswaku ntukulu wa Hosi Davhida a a ta tshama exiluvelweni xa xona hilaha ku nga riki na makumu. Ntukulu yoloye loyi ku profetiweke ha yena i Yesu naswona sweswi u fuma etilweni tanihi Hosi eMfun’weni wa Xikwembu.—Hlaya Pisalema 89:4; Luka 1:32, 33.

Loko Davhida a ha ri jaha, Xikwembu xi n’wi hlawule leswaku a va hosi ya vanhu va xona, ku nga Vaisrayele. Loko Davhida a fa, Solomoni loyi Yehovha a n’wi hlawuleke, u tshame “exiluvelweni xa Yehovha.” (1 Tikronika 28:4, 5; 29:23) Endzhaku ka loko Solomoni a file, ku fume tihosi to tala eYerusalema kambe to tala ta tona a ti nga tshembekanga. Eku heteleleni, Yehovha u pfumelele mavuthu ya Babilona leswaku ma lovisa Yerusalema ni leswaku ma susa hosi leyi a yi fuma. Sweswo swi endleke hi lembe ra 607 B.C.E. Ku sukela hi nkarhi wolowo, ku hava hosi endyangwini wa Davhida leyi fumeke emutini wa Yerusalema wa xiviri.—Hlaya Ezekiyele 21:27.

2. Ku hundze nkarhi wo tanihi kwihi vuhosi lebyi a byi yimeriwa hi Davhida ni muti wa Yerusalema swi yimisiwe ku fuma laha misaveni?

Endzhakunyana ka loko muti wa Yerusalema wu lovisiwile, Yehovha u byele muprofeta wakwe Daniyele leswaku Xikwembu a xi ta hlawula hosi leyi nga ta fuma etilweni. Xana ku fuma ka yona a ku ta sungula rini?—Hlaya Daniyele 7:13, 14.

Daniyele u hlamusele xivono lexi eka xona Xikwembu xi leriseke leswaku murhi lowukulu wu tsemiwa, hilaha Xikwembu xi leriseke hakona leswaku mfumo lowu nga eYerusalema wu tsemiwa ni ku lovisiwa. Kambe xikundzu xa murhi a xi fanele xi tshikiwa ehansi leswaku endzhaku ka “minkarhi ya nkombo” wu ta tlhela wu kula nakambe. Bibele yi kombisa leswaku “minkarhi” yinharhu ni hafu yi ringana ni masiku ya 1 260, kutani “minkarhi ya nkombo” yi ringana ni masiku ya 2 520. (Nhlavutelo 12:6, 14) Eka vuprofeta bya le Bibeleni, masiku hakanyingi ma yimela malembe. (Tinhlayo 14:34) Kutani Mfumo wa Xikwembu a wu ta yima ku fuma ku ringana malembe ya 2 520.—Hlaya Daniyele 4:10-17.

  3. Xana Yesu u ve Hosi rini?

Xikwembu xi veke Yesu ku va Hosi etilweni hi 1914, kahle-kahle endzhaku ka malembe ya 2 520 muti wa Yerusalema wu lovisiwile. Leswi Yesu a swi endleke ro sungula tanihi Hosi a ku ri ku hlongola Sathana ni madimona yakwe etilweni. (Nhlavutelo 12:7-10) Xiendlakalo xexo a xi nga vonaki eka matihlo ya munhu, kambe vuyelo bya kona bya vonaka. (Nhlavutelo 12:12) Swiendlakalo leswi veke kona hi 1914 swi tiyisekisa leswaku Yesu u ve Hosi hi lembe rero.—Hlaya Matewu 24:14; Luka 21:10, 11, 31.

4. Xana vuhosi bya Yesu byi vula yini eka wena?

Ku hetiseka ka vuprofeta malunghana ni vuhosi bya Yesu swi kombisa leswaku u nga titshega hi Rito ra Xikwembu. Ku nga ri khale, Yesu u ta tirhisa matimba ya vuhosi byakwe leswaku a ntshunxa vanhu eka ku xaniseka hinkwako.—Hlaya Pisalema 72:8, 12, 13; Daniyele 2:44.

Leswaku u kuma rungula leri engetelekeke, vona matluka 215-218 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.

[Chati leyi nga eka matluka 16, 17]

(Leswaku u vona rungula leri hleriweke hi ku helela, vona nkandziyiso wa kona)

October October

607 B.C.E. 1914 C.E.

← 2 520 wa malembe →

1000 B.C.E. 1 B.C.E. 1 C.E. 1000 C.E. 2000 C.E.

← 606.25 wa malembe →← 1 913.75 wa malembe →

Mfumo Tirhisa khalikhuleta ya wena: Xikwembu xi hlawule

Yerusalema 606.25 Yesu leswaku a va Hosi

wa le wu + 1,913.75 leyi nga ni matimba

lovisiwile = 2 520 ehenhla ka matiko