Chanubtaseletik ta Skʼop Dios

¿Bakʼin lik ajvalilajuk li Jesuse?

Li mantal liʼe tskoltaot sventa xasabe stakʼobil ta Avivlia atuk jlom sjakʼobiltak ti xuʼ van oy jech ajakʼojbe abae. Li sjakʼobiltak liʼe xuʼ xachan xchiʼuk junuk yajrextiko Jeova mi jech chakʼane.

1. ¿Kʼusi ajvalilal akʼbat li Jesuse?

Li Diose laj yalbe ta melel David ti oy jun snitilul ti jaʼ ch-och ta ajvalil li ta Ajvalilal yuʼun Dios ta sbatel osile. Li nitilulal taje jaʼ li Jesuse, yuʼun li avie jaʼ xa Ajvalil te ta vinajel. (Kʼelo Salmo 89:4 xchiʼuk Lucas 1:32, 33.)

Akʼo mi toj kerem toʼox li Davide, tʼujat yuʼun Jeova sventa x-ajvalilaj li ta jteklum Israele. Ta mas tsʼakale, li Jeovae la stʼuj Salomón sventa x-och ta ajvalil ta xkʼexol stot, te laj yakʼ ta «xchotleb» Jeova, taje te ta Jerusalén (1 Crónicas 28:4, 5; 29:23). Kʼalal chamem xaʼox li Salomone, ep ajvaliletik ajvalilajik li ta Jerusalene, pe mu skotolikuk la xchʼunbeik smantal li Diose. Jaʼ yuʼun li Jeovae laj yakʼ ti akʼo bat slajesik Jerusalén li soltaroetik ta Babilonia xchiʼuk ti slokʼesbeik li ajvalilal yuʼunike, taje kʼot ta pasel ta sjabilal 607 kʼalal maʼuk toʼox jkʼakʼaliltike (kʼ.m.jkʼ.). Li vaʼ kʼakʼal taje, muʼyuk xa junuk snitilulal David ajvalilaj li ta Jerusalene. (Kʼelo Ezequiel 21:27.)

2. ¿Kʼu van sjalil ti muʼyuk buchʼu tspas mantal li ta Ajvalilal yuʼun Diose?

Kʼalal laj xaʼox yichʼ lajesel li Jerusalene, li Jeovae laj yalbe j-alkʼop Daniel ti tstʼuj yan ajvalil sventa te ch-ajvalilaj tal ta vinajel. Pe ¿bakʼin chlik ajvalilajuk? (Kʼelo Daniel 7:13, 14.)

Li stakʼobil taje, te chichʼ tael li ta kʼusi laj yal j-alkʼop Daniel ti akʼbat yil yuʼun Diose. Jech kʼuchaʼal laj yal Dios ti chichʼ lajesel ta j-echʼel li ajvalilal ta Jerusalene, jaʼ jech ek li mukʼta teʼ akʼbat yil yuʼun Dios li Daniele ta xichʼ tuchʼel. Xchiʼuk ta mas tsʼakale, laj yal ti ta xjalij «vucub jabil» sventa xchʼi yan velta li xchumanile. Li ta Vivliae ta xalbutik ti oxib jabil xchiʼuk oʼlole, jaʼ 1,260 kʼakʼal, jaʼ yuʼun chaʼa, li vukub jabile chjalij: 2,520 kʼakʼal (Apocalipsis 12:6, 14, Ch). Li epal albilkʼopetike, ta xal ti jun kʼakʼale, xkoʼolaj kʼuchaʼal jun jabil (Números 14:34). Jaʼ yuʼun chaʼa, li ta Ajvalilal yuʼun Diose ta to xjalij 2,520 jabiletik sventa x-och jun ajvalil. (Kʼelo Daniel 4:10-17.)

  3. ¿Bakʼin lik ajvalilajuk li Jesuse?

Li ta 1914, li Diose la svaʼan ta Ajvalil Jesús te ta vinajel kʼalal echʼem xaʼox lek li 2,520 jabil ti laj yichʼ lajesel li Jerusalene. Li kʼusi baʼyel la spas kʼalal Ajvalil xaʼoxe, jaʼ ti la snuts lokʼel ta vinajel li Satanás xchiʼuk li spukujtake (Apocalipsis 12:7-10). Manchuk mi muʼyuk laj kiltik li kʼusi kʼot ta pasel taje, pe kilojtik li kʼusitik kʼotem ta pasel yuʼun liʼ ta Balumile (Apocalipsis 12:12). Li kʼusitik kʼotem ta pasel leʼ xa ta 1914, lek jamal ta kʼelel ti jaʼo te lik ajvalilajuk li Jesuse. (Kʼelo Mateo 24:14 xchiʼuk Lucas 21:10, 11, 31.)

4. ¿Kʼuxi xuʼ xatabe sbalil ti jaʼ xa Ajvalil li Jesuse?

Kʼalal chavil ti kʼotemik xa ta pasel li albilkʼopetike, chapat avoʼonton li ta Skʼop Diose xchiʼuk ti poʼot xa chakʼbe slajeb svokoltak krixchanoetik li Jesuse, ta skoj ti jaʼ xa Ajvalile. (Kʼelo Salmo 72:8, 12, 13 xchiʼuk Daniel 2:44.)

Mi chakʼanbe to mas yaʼyejale, kʼelo li ta pajina 215 kʼalal ta 218 ta livro ¿Kʼusi chchanubtasvan ta melel li Vivliae?, ti jaʼ pasbil yuʼun yajrextikotak Jeovae.

[Tavla ta pajina 17]

(Sventa xakʼel kʼuyelan pasbil liʼe, saʼo li vune)

Oktuvre

607 kʼ.m.jkʼ. ← 2,520 jabil → 1914 t.jkʼ.

1000 kʼ.m.jkʼ. | 1 kʼ.m.jkʼ. | 1 t.jkʼ. | 1000 t.jkʼ. | 2000 t.jkʼ.

← 606 jabil xchiʼuk 3 u →← 1,913 jabil xchiʼuk 9 u →

Slajeb ajvalil ta Jerusalén

Chapo liʼe: 606 jabil xchiʼuk 3 u + 1,913 jabil xchiʼuk 9 u 2,519 jabil xchiʼuk 12 u = 2,520 jabil

Li Diose tsvaʼan ta Ajvalil te ta vinajel li Jesuse