“ANG tawo nagmando sa tawo alang sa iyang kadaotan.” (Ecclesiastes 8:9) Kanang mga pulonga, nga nasulat mga 3,000 ka tuig kanhi, tukmang naghubit sa kalibotan karon. Ang mga tawo may tendensiyang moabuso sa ilang gahom, bisag kinsa man sila o asa sila magpuyo. Sagad ilang biktimahon ang mga huyang ug makaluluoy. Unsay pagbati ni Jehova sa maong mga inhustisya? Atong makita ang tubag sa Ezequiel 22:6, 7, 31.—Basaha.

Sa iyang Balaod sa Israel, tin-awng gipakita ni Jehova nga kadtong anaa sa awtoridad kinahanglang dili gayod mag-abuso sa ilang gahom. Iya lamang panalanginan ang nasod kon ang mga nangulo magpakitag kaayo ug konsiderasyon sa mga timawa ug kabos. (Deuteronomio 27:19; 28:15, 45) Apan sa panahon ni Ezequiel, ang mga pangulo sa Jerusalem ug sa Juda nag-abuso sa ilang gahom sa daotan kaayong paagi. Unsa may nahitabo?

Gigamit sa mga pangulo ang ilang “bukton aron sa pag-ula ug dugo.” (Bersikulo 6) Ang terminong “bukton” nagsimbolo sa gahom o awtoridad. Busa ang laing hubad nag-ingon: “Ang mga prinsipe sa Israel . . . naggamit sa ilang gahom aron sa pag-ula ug dugo.” Unsaon pagkab-ot sa hustisya kon ang mga lider nga mao untay magpatunhay ug magpatuman sa balaod mag-abuso sa ilang gahom ug mopatay ug inosenteng mga tawo?

Human niini, dayag nga giakusar ni Ezequiel dili lang ang mga lider kondili kadtong minunot usab nila sa pagsupak sa Balaod ni Jehova. “Ang amahan ug inahan ilang gitamay.” (Bersikulo 7) Kay wala ilha ang katungod sa mga ginikanan, gibungkag sa mga tawo ang patukoranan sa nasod—ang pamilya.—Exodo 20:12.

Gipahimuslan sa mga limbongan ang mga huyang. Sa matag pagsupak nila sa balaod, ilang gisalikway ang mahigugmaong espiritu nga nagpaluyo sa Balaod sa Diyos sa Israel. Pananglitan, ang Balaod nagsugo sa mga Israelitas sa pagpakitag linaing konsiderasyon sa mga dili-Israelitas nga nagpuyo sa ilang taliwala. (Exodo 22:21; 23:9; Levitico 19:33, 34) Apan ang mga tawo “nanikas” sa langyawng mga pumoluyo.—Bersikulo 7.

Gidaogdaog usab sa mga tawo kadtong walay mahimo—ang “bata nga ilo-sa-amahan ug ang babayeng balo.” (Bersikulo 7) Si Jehova mahunahunaon gayod sa panginahanglan niadtong namatyag ginikanan o kapikas. Ang Diyos nanumpa nga iyang hukman kadtong nagsakit sa bata nga walay mahimo o sa babayeng balo.—Exodo 22:22-24.

Niini ug sa uban pang paagi, ang mga Israelitas sa adlaw ni Ezequiel nagsupak ug nagyatak sa Balaod sa Diyos nga gipasukad sa gugma. Unsay himoon ni Jehova? “Ibubo ko ang akong mahukmanong pagsaway kanila,” siya nanumpa. (Bersikulo 31) Tuod man, iyang gitugotan ang mga Babilonyanhon sa paglaglag sa Jerusalem ug sa pagbihag sa katawhan niini niadtong 607 B.C.E.

Ang mga pulong ni Ezequiel nagtudlo kanato niining duha ka leksiyon bahin kang Jehova ug sa inhustisya: Una, iya kining gidumtan; ikaduha, siya may pagbati sa inosenteng mga biktima niini. Ang Diyos wala mausab. (Malaquias 3:6) Siya nagsaad nga sa dili madugay iyang wagtangon ang inhustisya ug ang nagpahinabo niini. (Proverbio 2:21, 22) Nganong dili ka mokat-og dugang bahin sa Diyos nga “mahigugmaon sa hustisya” ug kon sa unsang paagi mas masuod pa kaniya?—Salmo 37:28.

Sugyot nga pagbasa sa Bibliya sa Agosto:

▪ Ezequiel 21–38

[Blurb sa panid 27]

Tin-awng gipakita ni Jehova nga kadtong anaa sa awtoridad kinahanglang dili gayod mag-abuso sa ilang gahom