‘UMI tetã ruvicha oiporu vai ipuʼaka ombyai hag̃ua hapichápe’ (Eclesiastés 8:9, ÑÑB). Ojapómaramo jepe tres mil áño rasa ojehai hague ko ñeʼẽ, umi mbaʼe oikóvare koʼág̃a rupi jahechakuaa oñekumpliha ko téysto. Añetehápe yvypóra michĩmínte jepe oguerekóramo podér omanda hag̃ua, oiporu vaíma. Ko mbaʼe ningo oñekumpli tahaʼe haʼéva pe tapicha omandáva térã toiko oikohápe. Ñambyasýramo jepe, umi ohasa asýva koʼãva káusa apytépe oĩ hetave mitã tyreʼỹ ha viúda. ¿Mbaʼéichapa Ñandejára Jehová oñeñandu ohechávo koʼã mbaʼe? Proféta Ezequiel ohaivaʼekue ombohovái upéva. (Elee Ezequiel 22:6, 7, 31.)

Pe Léi Ñandejára omeʼẽvaʼekue tetã Israélpe heʼi avave ndoiporuvairivaʼerãha pe podér térã autorida oguerekóva. Umi isrraelíta imbaʼeporã ha otrata porãramo umi ikangy ha imboriahumívape, Jehová ohovasáta chupekuéra (Deuteronomio 27:19; 28:15, 45). Péro proféta Ezequiel tiémpope, umi trívu omoakãva oikóva Jerusalén ha Judápe oiporu vai pe podér oguerekóva. ¿Mbaʼépa ojaporakaʼe hikuái?

La Biblia heʼi umi mburuvicha Israelgua ‘oiporuha ipokatu oporojuka hag̃ua’ (versíkulo 6). Ko téystope “ipokatu” heʼise podér térã autorida. Umi orekóva ipópe ojapo hag̃ua opa mbaʼe hekópe ha omoĩ hag̃ua hustísia, ndojapói mbaʼeve. Upéva rangue oporombohasa asy. ¡Ajépa ñambyasyete!

Oiméne proféta Ezequiel ndahaʼéi umi mburuvichápe añónte heʼíva ojapoha mbaʼe vai, síno entéro omoirũvape chupekuéra, upéi osegi heʼi: ‘Nomombaʼéi hikuái itúva ni isýpe’ (versíkulo 7, ÑÑB). Ndorrespetáivo isy ha itúvape, umi Israelgua ombyai hogapy, pe omopyendáva upe tetã (Éxodo 20:12).

Koʼã isrraelíta ombohasa asyeterei umi ikangyvévape. Péicha naiñeʼẽrendúi jave Ñandejárape ohechauka hikuái nomombaʼeiha ni michĩmi pe Léi ohechaukáva chupekuéra oporotratavaʼerãha mborayhúpe. Pór ehémplo, pe Léi heʼi umi isrraelítape imbaʼeporãvaʼerãha umi tapicha tetã ambueguándi oikóva ijapytepekuéra (Éxodo 22:21; 23:9; Levítico 19:33, 34). Péro ótra kosaite ojapo, otrata vai ha “omonda hikuái” hapichakuérape (versíkulo 7, ÑÑB).

Otrata vai avei hikuái umi ‘ityreʼỹva ha viúdape’ (versíkulo 7, ÑÑB). Péro Jehová ohechapaite mbaʼéichapa oñembohasa asy hína koʼã tapichápe. Upévare haʼe heʼi ojechataha hendive umi oporombohasa asýva (Éxodo 22:22-24).

Koʼã mbaʼe ohechauka mbaʼéichapa Ezequiel tiémpope umi isrraelíta ndojapói Ñandejára Léi heʼíva ha ndohechaukái oporohayhuha. ¿Mbaʼépa ojapo Jehová? ¿Opytátantepa omaña umi mbaʼe oikóvare? Nahaniriete katu. Haʼe heʼi porã voi: ‘Añohẽta hiʼarikuéra che pochy’ (versíkulo 31, ÑÑB). Ha upeichaite oiko, áño 607-pe, Jesús ou mboyve, umi Babiloniaygua ohundi Jerusalén ha umi Israelgua hembývape ogueraha hikuái hetãme hembiguairã.

Ko mbaʼe oikovaʼekuégui ñaaprende mokõi mbaʼe: primero, Jehovápe ndogustaieteha umi inhustísia; segundo, oiporiahuverekoha umi ohasa asývape. Ñandejára ningo arakaʼeve nokambiái (Malaquías 3:6). Haʼe opromete koʼẽrõitéma oipeʼapataha umi inhustísia oĩva ha ohunditaha umi ojapóvape inhustísia (Proverbios 2:21, 22). ¿Rehechakuaápa iporãha reikuaave pe Ñandejára ‘ohayhúvape hustísia’ ha reñemoag̃ui hese? (Salmo 37:28, ÑÑB.)

[Komentário oĩva páhina 18-pe]

Pe Léi Ñandejára omeʼẽvaʼekue tetã Israélpe heʼi avave ndoiporuvairivaʼerãha pe podér térã autorida oguerekóva