Dọnsẹpọ Jiwheyẹwhe

Jehovah Gbẹwanna Whẹdida Mawadodo

“MẸDE to gandu do omẹ awetọ ji . . . na awugble etọn.” (Yẹwhehodọtọ 8:9) Hogbe enẹlẹ, he yin kinkan to nudi owhe 3 000 die, basi zẹẹmẹ aihọn he mẹ mí to gbẹnọ te tọn to aliho he sọgbe mẹ. Gbẹtọvi lẹ tindo mẹwhinwhàn lọ nado nọ ṣì huhlọn yetọn zan mahopọnna mẹhe yé yin kavi fie yé nọ nọ̀. Yé nọ saba tafu mẹhe ma tindo alọgọtọ po agbátọnọ lẹ po. Etẹwẹ yin numọtolanmẹ Jehovah tọn gando whẹdida mawadodo mọnkọtọn lẹ go? Mí mọ gblọndo lọ to Ezekiẹli 22:6, 7, 31 mẹ.—Hia.

To Osẹ́n he Jehovah na Islaelivi lẹ mẹ, e hẹn ẹn họnwun dọ mẹhe tin to otẹn aṣẹpipa tọn mẹ lẹ ma dona ṣì huhlọn yetọn zan. Ewọ na dona akọta lọ kiki eyin nukọntọ lẹ nọ yí homẹdagbe po mẹtọnhopọn po do yinuwa hẹ agbátọnọ lẹ po wamọnọ lẹ po. (Deutelonomi 27:19; 28:15, 45) Ṣigba, to azán Ezekiẹli tọn gbè, ahọvi he tin to Jelusalẹm po Juda po lẹ nọ ṣì huhlọn yetọn zan to aliho okà tọn mẹ. Etẹwẹ yé to wiwà?

Ahọvi lẹ nọ yí ‘awà yetọn zan nado kọ̀n ohùn dai.’ (Wefọ 6) Hogbe lọ “awà” nọtena huhlọn kavi aṣẹpipa. Abajọ lẹdogbedevomẹ devo do dọmọ: “Ahọvi Islaeli tọn lẹ . . . ko yí huhlọn yetọn zan nado kọ̀n ohùn dai.” Nawẹ whẹdida dodo na tin gbọn to whenue nukọntọ he dona nọ setonuna osẹ́n bo na tuli mẹdevo lẹ nado wàmọ lẹ to huhlọn yetọn ṣì zan bosọ to homẹvọnọ lẹ hù?

To enẹgodo, Ezekiẹli gblewhẹdo nukọntọ lọ lẹ po mẹhe nọ hodo apajlẹ yetọn to Osẹ́n Jehovah tọn gbigbà mẹ lẹ po dọmọ: “Yé ma ko hò otọ́ po onọ̀ po pọ́n.” (Wefọ 7) Na yé yí nukunpẹvi do pọ́n otẹn he mẹ Jehovah ze mẹjitọ lẹ do wutu, gbẹtọ lọ lẹ gbà whẹndo lẹ, yèdọ dodonu he ji akọta lọ yin awuwlena do.—Eksọdusi 20:12.

Gbẹtọ he gblezọn enẹlẹ nọ tafu agbátọnọ he tin to ṣẹnṣẹn yetọn lẹ. Whedepopenu he yé yinuwa jẹagọdo Osẹ́n lọ, yé nọ do pinpẹn-nutọn-mayọnẹn hia na gbigbọ owanyi tọn he nọ zọnpọ hẹ Osẹ́n he Jiwheyẹwhe na Islaelivi lẹ. Di apajlẹ, Osẹ́n Jiwheyẹwhe tọn dọ dọ Islaelivi lẹ dona nọ do mẹtọnhopọn vonọtaun hia mẹhe ma yin Islaelivi he tin to ṣẹnṣẹn yetọn lẹ. (Eksọdusi 22:21; 23:9; Levitiku 19:33, 34) Ṣigba omẹ lọ lẹ nọ yinuwa hẹ jonọ lẹ “gbọn awusinyẹnnamẹ dali.”—Wefọ 7.

Omẹ lọ lẹ sọ yinuwa hẹ “tọṣiọvi po asuṣiọsi po” to aliho agọ̀ mẹ. (Wefọ 7) Onú mẹhe hẹn mẹjitọ kavi alọwlemẹ de bu to okú mẹ lẹ tọn nọ duahunmẹna Jehovah taun. Jiwheyẹwhe dopagbe dọ emi lọsu wẹ na hẹn whẹdida ṣẹ do mẹhe nọ sayana ovi kavi asuṣiọsi he ma tindo alọgọtọ lẹ ji.—Eksọdusi 22:22-24.

To aliho ehelẹ po devo lẹ po mẹ, Islaelivi azán Ezekiẹli tọn gbè tọn lẹ nọ gbà Osẹ́n Jiwheyẹwhe tọn bo nọ yí nukunpẹ vi do pọ́n gbigbọ owanyi tọn he nọ zọnpọ hẹ ẹ. Etẹwẹ Jehovah na wà? E dopagbe dọmọ: “Yẹn [na] kọ̀n homẹgble ṣie jẹgbonu do yé ji.” (Wefọ 31) E jotẹnna Babilọninu lẹ nado và Jelusalẹm sudo bo bẹ omẹ etọn lẹ yì kanlinmọgbenu to 607 J.W.M. dile e ko dọ do.

Hogbe Ezekiẹli tọn lẹ plọn mí onú awe ehelẹ gando Jehovah po whẹdida mawadodo po go: Tintan, Jehovah gbẹwanna whẹdida mawadodo; awetọ, e nọ do awuvẹmẹ hia homẹvọnọ he jiya whẹdida mawadodo tọn lẹ. Jiwheyẹwhe ma ko diọ gba. (Malaki 3:6) E dopagbe dọ to madẹnmẹ, emi na de whẹdida mawadodo po mẹhe nọ doalọ to e mẹ lẹ po sẹ̀. (Howhinwhẹn lẹ 2:21, 22) Naegbọn hiẹ ma na plọn nususu dogọ gando Jiwheyẹwhe he “yiwanna whẹdida” po lehe hiẹ sọgan dọnsẹpọ ewọ dogọ po go?—Psalm 37:28.

[Nudọnamẹ tangan lẹ to weda 27]

Jehovah hẹn ẹn họnwun dọ mẹhe tin to otẹn aṣẹpipa tọn mẹ lẹ ma dona ṣì huhlọn yetọn zan