Óusera wamá kei lílana Larúeihan Bungiu

“Houcha humá lun úaragua lan ligaburi habagaridun luma larufudahan Kristu.” (FILI. 1:27)

KABA HAMUGA HÓUNABA?

Kátaña gayarabaña lílana hamá Larúeihan Bungiu?

Ka lunbei wadügüni lau iñeñein le ayanuhóubei lidan Larúeihan Bungiu le susereelibei lidan luma lilurudun?

Ida liña harufuduni lílana Larúeihan Bungiu luagu hínsiñe lan lilurudun houn?

1, 2. Ka uagu espechali lubéi meha leweridihan Pábulu houn lílana damuriguaü Filipu?

ABÜRÜHATI apostolu Pábulu houn kristiánugu ha lídanbaña damuriguaü le meha gíribei Filipu: “Houcha humá lun úaragua lan ligaburi habagaridun luma larufudahan Kristu” (aliihoualá Filipuna 1:27). Dimurei güriegu le ásügürawagüdübei kei “ligaburi habagaridun” gayarati giñe lásügürawagüdüniwa “óusera humá kei lílana somu ageiraü”. Espechaliti meha le mini lubéi dimurei le houn lílana damuriguaü le, lugundun genegeti meha Filipu lan aban lídangiñe aban sétanu uburugu súdiniti ani rúatu meha gárada rómana houn lílana uburugu burí ligía. Pántatiña meha filipuna hama sun lílana ageiraü le lábugiñebei lagumadihan Roma lau gagaradan hamá to rómana, lugundun ibihatiña meha fiú irichaü le líchugubei lúrudu rómana hóunrügü gürigia ha gagaradanbaña.

² Gama lumoun, gébunatimatiña meha lílana damuriguaü le Filipubei lun hapantahan. Haritaguagüda lumutiña Pábulu luagu “siéluna” hamá ladüga kristiánugu hamá ha anuadirúaañabaña (Fili. 3:20). Le linarün katei, lílana meha Larúeihan Bungiu, mama meha lílana arúeihani ubouaguna. Ligíati, óunigiruatiña meha ani resibitiña meha buiti le móubawati (Efe. 2:19-22).

3. a) Kátaña ibihubaña chansi lun lílana hamá Larúeihan Bungiu? b) Kaba wakutiha lidan arütíkulu le?

³ Adundehani le líchugubei Pábulu lun wóuserun keisi lílana Larúeihan Bungiu, furumiñe hounti ha lúnbaña harúeihan sielu luma Kristu (Fili. 3:20). Gama lumoun, súdiniti giñe houn ha lúnbaña hawinwandun lábugiñe Larúeihan Bungiu ubouagu. Ka uagu? Ladüga sun kristiánugu ha derege hamaalibei habagari lun Bungiu seriwitiña lun ligiaméme Urúei, Heowá, ani mosu giñe hagunfuliruni ligiaméme lúrudu (Efe. 4:4-6). Uguñe weyu, adügatiña saragu gürigia lanarime burí sákürifisiu lun lílana hamá aban ageiraü le awanseti. Lunti gebegitima lan woun chansi le wámabei lánina lílana wamá Larúeihan Bungiu. Lun gayara lan laganwoundun eteingiruni le wasandirubei  luagu lubuidun chansi le, ariha wamá ka lan idan genegegua lan le amuriahóubei hamá gürigia lun lílana hamá somu ageiraü luma le amuriahóubei lun lílana wamá Larúeihan Bungiu. Lárigiñeme wakutihaba ǘrüwa katei le lunbei wadügüni lun meferidirun wamani chansi lánina lílana wamá Larúeihan Bungiu.

LE WEMEGEIRUBEI LUN LÍLANA WAMÁ LARÚEIHAN BUNGIU

4. Katei san iñeñeinbei harumati, ani ida liña “wayanuhani”?

⁴ Lafurendeirúniwa iñeñein. Anihein ageiraü le ñein lubéi hamuriaha gumadimatiña hama ha busenbaña habihin gárada lun lílana hamá ageiraü ligía lunti lan hadimurehani iñeñein létima ayanuhóubei ñein. Añahein fiú gürigia barütiña saragu irumu lubaragiñe hayanuhani iñeñein ligía buidu, íbini lárigiñe ibiha hamaaru lan gárada. Másiñati fureseti lan hafurendeiruni lúrudu lánina labürüdǘn luma layanuhóun iñeñein ligía, gama lumoun, hénrenguti houn híriduni dimurei buidu. Ítarameme, amuriahati Larúeihan Bungiu hámagiñe lílana lun hafurendeiruni le unbei tagúara Bíbülia “iñeñein harumati”. Ariñagati Sofoníasi 3:9, NM: “Nasansirubei hererun néchani lun hayanuhan aban iñeñein harumati, lun hagúaruni súngubei hagía liri Heowá seriwi hagíame lun lidan aban”. Káteiti iñeñein le? Ligía inarüni luagu Bungiu luma luagu lisuuni, ani darí wamuti tidan Bíbülia. “Wayanuhani” iñeñein le harumati mini lan gaganbadi wamá lun lilurudun luma ladundehan Bungiu. Másiñati hafurendeiruni lílana Larúeihan Bungiu inarüni méiniti tídangiñeti Bíbülia lau lóufudagun. Gama lumoun, íbini lárigiñe habadiseirun mosu háfaagun súngubei lun buídutima lan “hayanuhani” iñeñein harumati. Ida? Lunti úaratima lan le wadügübei luma le subudi wamaalibei luagu lúrudu luma adundehani le tídanbei Bíbülia.

5. Ka uagu lunti lubéi wafurendeiruni sun le wayaraati luagu le susereelibei lidan lóundarun Heowá?

⁵ Laturiahóuniwa le susereelibei lidan ageiraü. Másiñati mosu lan hafurendeirun gürigia ha busenbaña habihin gárada lun lílana hamá somu ageiraü somu katei lídangiñe le susereelibei lidan ageiraü ligía. Ítarameme, ha busenbaña lílana hamá Larúeihan Bungiu lunti hafurendeiruni sun le hayaraati luagu Larúeihan Bungiu. Samina wamá luagu aban hénpulu le híchugubei binadu ísüraelina. Hínsiñeti meha uburugu Herusalén luma fulasu le ñein lubéi láhudurawagua lun Heowá houn ladügawagun Koré, ani wéiriti meha línsiñe houn hayanuhan luagu le meha susereelibei lidan uburugu ligía. Mama meha luenden lariawagún Herusalén hínsiñetimabei houn, lubaragiñe lira, le meha mini lubéi uburugu luma le mini lubéi fulasu le ñein lubéi láhudurawagua lun Heowá hínsiñetimabei houn. Herusalén meha “luburugutebei [Heowá] Bungiu le urúei”, ladüga ñein meha ladügǘwa áhuduraguni inarüniti. Ñein meha giñe larufudahóua Lilurudun Bungiu. Houn meha gürigia ha lábugiñebaña lagumadihan Urúei Herusalénna larufudei Heowá línsiñehabu (aliihoualá Sálumu 48:1, 2, 9, 12, 13). Ítara kei meha ladügawagun Koré, ayumahatün san haturiahani luma habahüdahani le susereelibei lun fánreinti le ubouagubei lídangiñe lóundarun  Heowá? Eibume hafurendeirun luagu lóundarun Bungiu luma luagu ídemuei le líchugubei Heowá houn lumutuniña, inarünitimabei harihini Larúeihan Bungiu ani wéiritimabei hayumahan hapurichihani uganu buiti luáguti Arúeihani le (Her. 9:24; Luk. 4:43).

6. Ka uagu gadüna lubéi lagurabahan Heowá lun wafurendeiruni luma lun gaganbadi wamá lun lúrudu luma adundehani le lunbei hafalaruni lílana Larúeihan?

⁶ Lasubudirúniwa lúrudu. Amuriahatiña gumadimatiña ubouaguna hama lílana hageira lun hasubudiruni luma lun gaganbadi hamá lun lilurudun ageiraü le ñein lubéi hawinwanda. Ligíati, gadünati lagurabahan Heowá lun wafurendeiruni luma lun gaganbadi wamá lun lúrudu luma adundehani le lunbei hafalaruni lílana Larúeihan (Isa. 2:3; Huan 15:10; 1 Huan 5:3). Libe-agei dan, úati huu lan lúrudu le hadügübei gürigia ani úati giñe richá lan. Ánheinti lilurudun Heowá “suruti” (Sal. 19:7). Hínsiñeti san lilurudun Bungiu hun ani aliiha humutu san Bíbülia sagü weyu? (Sal. 1:1, 2.) Waturiahani lilurudun Bungiu kada aban wádangiñe ligíarügüñein manera lun wafurendeiruni. Úati gayarati ladügüni wawagu.

HÍNSIÑETI LILURUDUN BUNGIU HOUN LÍLANA LARÚEIHAN

7. Ka lúrudu wéirigutimaati hafalarubei lílana Larúeihan Bungiu?

⁷ Lun gayara lan wasigirun keisi lílana Larúeihan Bungiu, úati buídurügü lan wasubudiruni lilurudun Bungiu, lunti giñe línsiñedun woun. Lidan ubóu, gíbetiña gürigia ariñagutiña anha hamá lun lilurudun ageiraü le ñein lubéi hawinwanda. Gama lumoun, dan le mabuidunbei lan houn ani afiñetiña úati lan arihitiña, aba hadüraaguni lúrudu. Lúnrügüñein “herederun buidu hagibugiñe” amu gürigia hadügei katei (Kol. 3:22). Gama lumoun, wagía le lílana Larúeihan Bungiu íñugutimati lúrudu le adundehabalin wabagari. Lau sun wagundan gaganbaditiwa lun lilurudun Bungiu íbini marihin hamaniwa gürigia. Ka uagu? Ladüga hínsiñe lan Bungiu le íchugubalin lúrudu ligía woun (Isa. 33:22; aliihoualá Lúkasi 10:27).

8, 9. Ida luba hasubudiruni anhein hínsiñe lubéi lilurudun Bungiu hun lau sun hinarün?

⁸ Ida luba hasubudiruni anhein hínsiñe lubéi lilurudun Bungiu hun lau sun hinarün? Samina humá ida liña lan hóunabun dan le lichugún eweridihani hun luáguti katei le lunti hugía lan desidírei, kéiburi ligaburi hasansiragun luma haranseragun hungua. Lubaragiñe meha lílana humá Larúeihan Bungiu, háfuga himei humá meha hasansiragun lau mechebeni o tau daüguaü to adügüboun lun hawamadun houn amu. Gama lumoun, eibu laganwoundun ínsiñeni le hasandirubei luagu Bungiu, aba hagumeserun asansiragua lidan aban igaburi le barüti uéiriguni lun liri Bungiu (1 Tim. 2:9, 10; 1 Fe. 3:3, 4). Háfuga genegeti hun luagu buidu lan ligaburi hasansiragun. Gama lumoun, anhein hamuga ariñaga aban wéiyaali lidan afiñeni hun luagu adüga lan ligaburi hasansiragun lun hasandiragun saragu íbirigu houngua wuriba lidan damuriguaü, kaba hamuga san hadüga? Hageindaguña hamuga san luagu hufulesein? Hagañiduña hamuga san ani hasigiruña hamuga lau lidere haganbun? Háyeihani Kristu, ligía aban lúrudu méiniti le lunbei hafalaruni sun lílana Larúeihan Bungiu (1 Fe. 2:21). Libügürü katei le, abürühati apostolu Pábulu: “Kada aban wádangiñe, lunti lagundaaragüdüni gürigia líledi lau le buídubei lun gürigia ligía, luma lau le gayaraati laganwoundagüdüni lafiñen. Ni Kristu, míchugunti ugundani lúniwagua” (Rom. 15:2, 3). Lun lídehan lun ñein lan darangilaü lidan damuriguaü, aranseñu liña kristiánu le derebugubei lidan lafiñen lun lasansiruni ligaburi lisaminan luéi hasandiragun ha híbiri houngua wuriba (Rom. 14:19-21).

⁹ Guentó ariha wamá biama katei súdiniti libügürü le: ligaburi warihini agamariduni luma ligaburi warihini maríei. Gürigia ha mámabaña lílana Larúeihan Bungiu gayarati ánhatiña lan lun lagamaridun aban wügüri wügüri líledi o würi würi tíledi, o hasaminarun aban lan isebáhari le maribanti tariawagúniwa iyawaü lánina agamariduni, ani samina hagía aban lan katei le lunti desidírülani kada gürigia agabarahani luma ígiraguni. Ánheinti, lílana Larúeihan Bungiu ígira hamaali saminaü burí le, ladüga gürigiarügüñanu ha úabei furangu lan harihin hama ha hawouguounrügübei haritagua asaminarubaña ítara. Íbini meha lidan lan magíaguni hawinwanda saragu hádangiñe lílana Larúeihan Bungiu lubaragiñe kristiánugu hamá,  guentó gunfuranda hamaali aban lan idewesei lúmagiñeti Heowá agamariduni luma maríei. Gebegiti lilurudun Bungiu le íñuburibei houn ani gunfuranda hamuti buidu madüna hamá gürigia ha adügübaña magíaguni lun lílana hamá Larúeihan Bungiu (1 Ko. 6:9-11). Gama lumoun, gunfuranda hamuti giñe luagu geyeedaguadi tan anigi (Her. 17:9). Ligía teinki habalin sun eweridihani furanguti le heresibirubei le íderagubaliña afalarei lúrudu íñuburiti le adundehabalin habagari.

GAGANBADITIÑA LÍLANA LARÚEIHAN BUNGIU LUN EWERIDIHANI

10, 11. Ka eweridihani súdiniti líchugubei Larúeihan Bungiu, ani ka hisaminabei luagu?

¹⁰ Gíchigaditiña arúeihatiña ubouaguna eweridihani luáguti átuadi lun hawisahan luagu somu éigini o árani le peliguruti. Subudiwati mama lan sun árani ni sun éigini lun peliguru lan. Gama lumoun, anhein peliguru lubéi aban lídangiñe, eweridihatiña gumadimatiña lau duari lun hóunigiruniña lílana hageira. Lun hamuga madügün hamani gadurunñanu hamuga ladüga meberesenhabu hamá. Ítarameme, sagü dan líchuguña Larúeihan Bungiu eweridihani woun luagu somu katei le gayarabei lanügüniwa lidoun peliguru lun weferidiruni wamadagua luma Heowá. Aban hénpulu, barühali musu úaraguati saragu irumu íchiga eweridihani luagu páhina lani Internet le ñein lubéi tarihúa iyawaü lánina agamariduni, ladüga aban lan peliguru katei le lun hafiñen lílana Larúeihan Bungiu. Ma lueirin eteingiruni le wasandirubei luagu eweridihani burí le!

¹¹ Fiú irumu guentó lúmagiñe kamanitimahali lan páhina lani Internet le gayarati hu lan anhein ayusurúa lau saragu duari. Wayanuhaña luagu páhina le ñein lubéi hadügǘwa umadagu le gayarati gani lan aban luriban efekütu, ladüga adügati lun hadügün ha ayusurubalin umadaguaü hama hagübüri gürigia ha moun lumuti ladügǘniwa umadaguaü hama (1 Ko. 15:33). Ligía maweiridun tubéi wanigi lau líchugun lóundarun Heowá lubuidun eweridihani woun luagu páhina burí le. Aliiha humaali san sun burí lagumuhóun ariñahani le lagumeiraguagüdübei musu úaraguati ani gunfurandati luagu páhina lun hadügǘn umadagu lidan Internet? Webelurun lidoun páhina burí le sin waliihani ariñahani le, ítara liña hamuga kei watun árani héreti sin waliihani eweridihani le luágubei furumiñe. *

12. Ka uagu aban lubéi lueirin libidiounigan aau maganbadi wamá lun eweridihani?

¹² Gürigia ha maganbadibaña lun eweridihani le líchugubei musu úaraguati adügatiña dañu hóuniwagua luma giñe houn haduheñu. Añahein hagía aba hárügüdüni bisiu le lánina taríawagun iyawaü to lánina agamariduni o héiguadun lidoun magíaguni ani charatiña lau hasaminarun marihin lániña Heowá. Ma lueirin libidiounigan aau lasaminarúniwa gayara lan laramudúniwa le adügǘbei luéi Heowá! (Ari. 15:3; aliihoualá Ebüréu 4:13.) Ítara kei gayara lan hagidarunu agumadihatiña gárada luéi somu gürigia le adügübei somu katei le adüraagubalin lúrudu, gayarati giñe lagidaruni Heowá chansi hawéi somu gürigia lun lílana hamá Larúeihan ladüga hadüraaguni lilurudun ani masakürihantiña (1 Ko. 5:11-13). * Gama lumoun kei weiri lubéi lugudemehabu busenti líderaguniña gürigia ha, ani lun gayara lan ladügüni yusu lumutiña gürigia ha adimurehabaña lidan liri ya ubouagu (Gal. 6:1). Ma lubuidun gayara lan harandarun gürigia ha asakürihabaña ani sansi haméi hóuserun luma Bungiu ani gayara ligía hasigirun keisi lílana Larúeihan Bungiu (2 Ko. 2:5-8). Ma lubuidun gayara lan weseriwidun lun aban Urúei hínsiñehabuti!

 GEBEGITI FURENDEI HOUN LÍLANA LARÚEIHAN BUNGIU

13. Ida liña harufuduni lílana Larúeihan Bungiu luagu gebegi lan furendei houn?

¹³ Áfaaguatiña saragu gumadimatiña habihin lílana hageira furendei. Aban hénpulu, adügatiña leskuela lun harufudahan aliiha luma abürüha lun gayara lan hanuriagun gürigia houngua. Gebegiti arufudahani le houn kristiánugu ani adüga hamuti sun hayaraati lun hasagarun buiti lídangiñe, gama lumoun, gebegitimati houn furendei le heresibirubei keisi lílana Larúeihan Bungiu. Yusu lumuti Heowá damuriguaü hani kristiánugu lun línchahaniña gürigia aliiha. Agübürigu amisuraha wamutün aliiha agumeiraguagüdüni kéiburi Niliburun lánina abahüdaguni tídangiñeti Bíbülia houn hisaanigu ha ñǘbürigiña. Ani sagü hati agumeiraguagüdati musu úaraguati kéiburi saragu páhina lau ariñahani tídangiñeti Bíbülia tidan burí Garüdia Atalaya tuma ¡Despertad! Ánhadün aliiha fiú páhina sagü weyu, madarasaragunbei haliihanu garüdia burí súdinitu to layusuruboun Bungiu lun larufudahan woun.

14. a) Ka arufudahani weresibirubei? b) Ka burí adundehani lun Áhuduraguni lidan Familia adüga humaalibei?

¹⁴ Sagü dimaasu arufudahóuati houn lílana Larúeihan Bungiu lidan burí adamuridaguni le adügǘbei lidan damuriguaü. Aban hénpulu, barüharu Leskuela Kristiánu lánina Apurichihani lóugiñe ǘrüwa-wein irumu íderaguaña aturiahatiña lun máisturugu hamá buítiña lidan tarufudahóuniwa Lererun Bungiu. Bürǘ waadün san tidan leskuela to? Lidan burí lagumuhóun irumu, ariñagaali musu úaraguati ani gunfuranda ligía saragu wéiyaasu luagu súdini lan ladügǘniwa Áhuduraguni lidan Familia. Adügati programa lánina áhuduraguni le lun lidan hamá aban lílana familia. Adüga humaali san le ariñawagúbei luagu tema le tidan burí wani agumeiraguagüdüni? *

15. Katei san chansi le wéiritimabei wama?

¹⁵ Saragu gürigia ha lábugiñebaña lagumadihan somu arúeihani ru hamuti hídehan lun somu óundaruni lánina polítika, ñüdün hagía muna tuagu muna amuriaha hama gürigia lun habuduhan. Wéiritimati ídemuei le híchugubei lílana Larúeihan Bungiu lun Arúeihani le, dandu ǘmada kei hábiñe gürigia ani adüga hamuti lau ubebeni. Ítara kei warihini lidan arütíkulu le lubaragiñebei le, Garüdia Atalaya tugíatima afanreihóuaboun lidan sun ubóu, ani tasubudiragüdüni Larúeihan Heowá tisuunibei. Wadimurehan luagu Larúeihan Bungiu houn amu gürigia ligía aban lídangiñe chansi le wéiritimabei wama. Ídehatün san lau ubebeni lidan wadagimanu lánina apurichihani le? (Mat. 28:19, 20.)

16. Ida liña warufuduni lílana wamá Larúeihan Bungiu ha buítiña?

¹⁶ Yarafa madise, Larúeihanrügübei Bungiu agumadiha ubouagu. Ladundehabadiwa lidan sun wabagari dandu lidan wáhuduragun luma lidan amu katei. Lílanabadiwa san Larúeihan Bungiu ha buítiña lídanme dan ligía? Anihán lidaani warufuduni. Lidan sun le desidírü wabéi sagü weyu, adüga waméi sun katei lun wíchugun uériguni lun Heowá luma lun warufuduni luagu wóuseruña lan kei lílana Larúeihan Bungiu ha buítiña (1 Ko. 10:31).

[Abürüdǘni burí]

[Álügüdahani lánina aturiahani]

[Ariñahani lidan létüra wéinamuti lidan páhina 21]

Falá humuti san eweridihani tídangiñeti Bíbülia le heresibirubei luáguti layusurún Internet?

[Iyawaü to lídanboun páhina 19]

Hínsiñeti giñe san áhuduraguni inarüniti hun luma abahüdaguni luáguti le susereelibei lidan ítara kei meha línsiñe houn ladügawagun Koré?

[Iyawaü to lídanboun páhina 22]

Áhuduraguni lidan Familia líderagubadün íderagua láñame hiduheñu lun hóuserun kei lílana Larúeihan Bungiu ha buítiña