Maggawi Subong Banwahanon sang Ginharian!

“Maggawi kamo sa paagi nga takus sa maayong balita.”—FIL. 1:27.

ANO ANG IMO SABAT?

Sin-o ang mangin banwahanon sang Ginharian?

Ano ang dapat naton himuon tuhoy sa lenguahe, kasaysayan, kag kasuguan sang Ginharian?

Paano mapakita sang mga banwahanon sang Ginharian nga ginahigugma nila ang mga talaksan sang Dios?

1, 2. Ngaa may pinasahi nga kahulugan ang laygay ni Pablo sa kongregasyon sa Filipos?

GINPALIG-ON ni apostol Pablo ang kongregasyon sang Filipos nga “maggawi . . . sa paagi nga takus sa maayong balita.” (Basaha ang Filipos 1:27.) Ang Griego nga ekspresyon nga gingamit ni Pablo para sa tinaga nga “maggawi” mahimo man magakahulugan nga maggawi subong mga banwahanon. May pinasahi ini nga kahulugan para sa kongregasyon sang Filipos. Ngaa? Bangod ang Filipos mahimo nga isa sa mga pinili nga siudad diin ang mga pumuluyo ginhatagan sing pribilehiyo nga mangin banwahanon sang Roma. Ginapabugal gid sang mga banwahanon sang Roma sa Filipos kag sa bug-os nga Emperyo ini nga pribilehiyo kag ginaamligan sila sang kasuguan sang Roma.

² Ang mga miembro sang kongregasyon sa Filipos may daku pa gid nga rason sa pagpabugal. Ginpahanumdom sila ni Pablo nga subong hinaplas nga mga Cristiano, ang ila pagkabanwahanon “didto sa langit.” (Fil. 3:20) Mga banwahanon sila, indi sang emperyo sang tawo, kundi sang Ginharian sang Dios. Bangod sini, nakatigayon sila sing wala tupong nga proteksion kag mga pagpakamaayo.—Efe. 2:19-22.

3. (a) Sin-o ang may kahigayunan nga mangin banwahanon sang Ginharian? (b) Ano ang binagbinagon naton sa sini nga artikulo?

³ Ang laygay ni Pablo nga maggawi subong mga banwahanon panguna nga naaplikar sa mga magagahom kaupod ni Cristo sa langit. (Fil. 3:20) Pero maaplikar man ini sa mga katawhan nga mangin sakop sa duta sang Ginharian sang Dios. Ngaa? Bangod ang tanan nga dedikado nga Cristiano nagaalagad sa isa lang ka Hari, si Jehova, kag nagasunod sa pareho lang nga talaksan. (Efe. 4:4-6) Sa karon, ginatinguhaan sang mga tawo nga makalipikar subong banwahanon sang isa ka manggaranon nga pungsod. Gani, indi bala nga mas pabaloran naton  ang pribilehiyo nga mangin banwahanon sang Ginharian? Agod mahimo ini, binagbinagon naton ang pila ka pagkaanggid sang mga ginapatuman sang gobierno sang tawo kag sang Ginharian sang Dios para ang isa mangin banwahanon. Dayon, usisaon naton ang tatlo ka butang nga dapat himuon agod magpabilin nga banwahanon sang Ginharian.

MGA GINAPATUMAN PARA MANGIN BANWAHANON

4. Ano ang putli nga lenguahe, kag paano naton ini “ginahambal”?

⁴ Tun-i ang lenguahe. Ginapatuman sang pila ka gobierno nga ang mga nagaaplay para mangin banwahanon dapat makahibalo maghambal sang panguna nga lenguahe sang pungsod. Bisan pa naaprobahan na ang isa nga mangin banwahanon, mahimo mga tinuig pa antes niya ini makabisado. Mahimo matun-an niya dayon ang gramatika pero madugay pa antes niya mamitlang sing husto ang mga tinaga. Sing kaanggid, ginapatuman sang Ginharian sang Dios nga ang mga banwahanon sini magtuon sang ginatawag sang Biblia nga “putli nga bibig,” ukon lenguahe. (Basaha ang Sofonias 3:9.) Ano ina nga lenguahe? Amo ini ang kamatuoran parte sa Dios kag sa iya katuyuan nga mabasa sa Biblia. “Ginahambal” naton ang putli nga lenguahe kon ang aton paggawi nahisuno sa mga kasuguan kag prinsipio sang Dios. Ang mga banwahanon sang Ginharian mahimo dayon makatuon sang panguna nga mga panudlo sang Biblia kag magpabawtismo. Pero bisan nabawtismuhan na sila, dapat gihapon nila tinguhaan nga makabisado ang paghambal sing putli nga lenguahe. Paano? Dapat tinguhaan sang kada isa sa aton nga iaplikar ang mga prinsipio nga aton natun-an sa Biblia.

5. Ngaa dapat naton tun-an ang kasaysayan sang dutan-on nga bahin sang organisasyon ni Jehova?

⁵ Tun-i ang kasaysayan. Ang luyag mangin banwahanon sang isa ka gobierno mahimo man magtuon parte sa kasaysayan sina nga gobierno. Sing kaanggid, dapat tinguhaan nga tun-an sang mga nagahandum nga mangin banwahanon sang Ginharian ang tanan nga butang parte sa Ginharian sang Dios. Binagbinaga ang halimbawa sang mga anak ni Kora, nga nagaalagad sa Israel sadto. Nalipay gid sila sa Jerusalem kag sa duog sang pagsimba sini kag sa pagtuon sa kasaysayan sang siudad. Ang gindayaw gid nila indi ang mga bato kag palitada sang siudad kag ang duog sang pagsimba kundi ang ginarepresentar sini. Ang Jerusalem amo “ang banwa sang dakung Hari,” nga si Jehova, kay sentro ini sang putli nga pagsimba. Didto ginatudlo ang Kasuguan ni Jehova. Sa mga katawhan man nga ginadumalahan sang Hari sang Jerusalem nagpakita si Jehova sing kaayo. (Basaha ang Salmo 48:1, 2, 9, 12, 13.) Kaangay nila, ginatinguhaan mo man bala nga tun-an kag usisaon ang kasaysayan sang  dutan-on nga bahin sang organisasyon ni Jehova? Kon ginatun-an mo pirme ang organisasyon ni Jehova kag kon paano niya ginasakdag ang iya katawhan, mangin matuod pa gid sa imo ang Ginharian sang Dios. Magadugang ang imo handum nga magbantala sing maayong balita sang Ginharian.—Jer. 9:24; Luc. 4:43.

6. Ngaa nagakaigo lang nga paabuton ni Jehova nga tun-an naton kag sundon ang mga kasuguan kag prinsipio sang Ginharian?

⁶ Tun-i ang mga kasuguan. Ginapatuman sang mga gobierno nga ang ila mga sakop dapat magtuon kag magsunod sa kasuguan sang pungsod. Gani nagakaigo lang nga paabuton ni Jehova nga tun-an naton kag sundon ang mga kasuguan kag prinsipio nga nagagiya sa tanan nga banwahanon sang Ginharian. (Isa. 2:3; Juan 15:10; 1 Juan 5:3) Ang mga kasuguan sang tawo masami nga may depekto kag may ginadampigan. Pero “ang kasogoan sang GINOO himpit.” (Sal. 19:7) Nalipay bala kita sa kasuguan sang Dios kag ginabasa ang iya Pulong kada adlaw? (Sal. 1:1, 2) Ang lamang nga paagi nga matun-an naton ang kasuguan sang Dios amo ang personal nga pagtuon sini. Indi puede nga iban ang magtuon para sa aton.

GINAHIGUGMA NILA ANG MGA TALAKSAN SANG DIOS

7. Anong mataas nga talaksan ang ginasunod sang mga banwahanon sang Ginharian?

⁷ Agod magpabilin nga banwahanon sang Ginharian, indi lamang naton dapat tun-an ang mga talaksan sang Dios, kundi dapat man naton ini higugmaon. Madamo nga banwahanon ang nagasiling nga nagaugyon sila sa mga kasuguan kag talaksan sang ila pungsod. Pero kon nabudlayan sila sa pagsunod sa kasuguan kag wala man sing nagatan-aw, ginalapas nila ini. Sa masami ‘ginapahamut-an nila ang mga tawo.’ (Col. 3:22) Ang mga banwahanon sang Ginharian nagasunod sa mataas nga talaksan. Ginasunod naton ang kasuguan sang Dios bisan wala sing tawo nga nagatan-aw. Ngaa? Bangod ginahigugma naton ang Manughimo sang Kasuguan.—Isa. 33:22; basaha ang Lucas 10:27.

8, 9. Paano mo mahibaluan nga ginahigugma mo gid ang mga kasuguan sang Dios?

⁸ Paano mo mahibaluan kon ginahigugma mo gid ang mga kasuguan sang Dios? Binagbinaga kon ano ang imo reaksion kon laygayan ka parte sa imo mga naluyagan—halimbawa, sa pamayo kag pamustura. Antes ka nangin banwahanon sang Ginharian, mahimo nga baraghal ukon seksi ka mamayo. Samtang nagatubo ang imo gugma sa Dios, ang imo pamayo nangin maugdang na kag nagapadungog sa iya. (1 Tim. 2:9, 10; 1 Ped. 3:3, 4) Pero ano abi kon hambalon ka sang isa ka gulang nga ang imo ginasuksok makapasandad sa pila ka kauturan? Ano ang imo reaksion? Marason ka pa bala, maakig, ukon magpakatig-a? Ang isa sa pinakaimportante nga kasuguan sang Ginharian sang Dios amo nga ang tanan nga banwahanon sini mag-ilog kay Cristo. (1 Ped. 2:21) Parte kay Jesus, si apostol Pablo nagsulat: “Pahamut-an sang kada isa sa aton ang iya isigkatawo sa kon ano ang maayo sa pagpabakod sa iya. Kay bisan ang Cristo wala magpahamuot sa iya kaugalingon.” (Roma 15:2, 3) Para sa paghidait sang kongregasyon, ang isa ka hamtong nga Cristiano dapat handa nga maglikaw sa mga butang nga makapasandad sa iban.—Roma 14:19-21.

⁹ Binagbinagon naton ang duha pa ka importante nga butang: ang aton pagtamod sa sekso kag pag-asawahay. Kon ang isa indi pa banwahanon sang Ginharian sang Dios, mahimo kunsintihon niya ang homoseksuwalidad, kabigon ang pornograpiya nga kalingawan lang, kag tamdon ang pagpanghilahi kag pagbulagay subong personal nga mga butang. Dapat isikway sang mga banwahanon sang Ginharian ining makitid ukon maiyaiyahon nga panghunahuna. Madamo ang imoral sang una antes nangin Cristiano, pero ginakabig na nila karon ang sekso kag  pag-asawahay nga regalo sang Dios. Ginapabaloran nila ang mataas nga talaksan ni Jehova kag kumbinsido sila nga ang padayon nga nagahimo sing seksuwal nga imoralidad indi takus nga mangin banwahanon sang Ginharian. (1 Cor. 6:9-11) Ginabaton man nila nga ang tagipusuon malimbungon. (Jer. 17:9) Gani, ginapabaloran nila ang mga paandam nga nagabulig sa ila nga mahuptan ang mataas nga mga talaksan sa moral.

GINAAPRESYAR NILA ANG MGA PAANDAM

10, 11. Ano ang suno sa tion nga mga paandam sang Ginharian sang Dios, kag ano ang ginabatyag mo tuhoy sini?

¹⁰ Ang mga gobierno sang tawo mahimo maghatag sing mga paandam parte sa mga pagkaon kag bulong. Siempre pa, indi malain ang tanan nga pagkaon kag bulong. Pero kon ang isa ka produkto makahalit sa lawas, magapaandam ang gobierno para proteksionan ang mga banwahanon sini. Kon indi nila ini paghimuon, mangin mapatumbayaon sila. Sing kaanggid, ang Ginharian sang Dios nagapaandam man parte sa mga katalagman sa moral kag espirituwal. Halimbawa, ang Internet mapuslanon para sa komunikasyon, edukasyon, kag kalingawan. Ginagamit ini sang organisasyon sang Dios kag daku ang nabulig sini. Pero, madamo sing site sa Internet ang makahalit sa moral kag espirituwal. Ang mga Web site nga nagapasanyog sang pornograpiya makahalit gid sa espirituwalidad sang mga banwahanon sang Ginharian. Madugay na nga nagapaandam sa aton ang matutom nga ulipon parte sa sini nga mga site. Nagapasalamat gid kita sa sini nga mga paandam!

¹¹ Sining karon lang, nangin popular ang isa pa ka sahi sang site nga mapuslanon kon gamiton sing mahalungon. Apang mahimo man ini makahalit. Ini nga mga site ginatawag nga social networking Web site. Mahimo sini impluwensiahan ang isa sang malain nga mga kaupdanan. (1 Cor. 15:33) Gani nagpaandam ang organisasyon parte sa sini nga mga site. Nabasa mo na bala ang tanan nga artikulo sining karon lang nga ginbalhag sang matutom nga ulipon parte sa paggamit sini? Indi gid maalamon nga gamiton mo ini nga mga site kon wala mo pa nabasa ini nga mga artikulo! * Daw kaangay ini sa pag-inom sing mabaskog nga bulong nga wala anay ginabasa ang direksion.

12. Ngaa kabuangan gid nga balewalaon ang mga paandam?

¹² Ang mga wala nagasapak sa mga paandam sang matutom nga ulipon nagahalit sa ila kaugalingon kag sa ila mga hinigugma. Ang pila naadik sa pornograpiya ukon nakahimo sing imoralidad, dayon nagahunahuna sila nga indi makita ni Jehova ang ila ginahimo. Kabuangan gid ang pagpati nga matago naton kay Jehova ang aton ginahimo! (Hulu. 15:3; basaha ang Hebreo 4:13.) Gusto sang Dios nga buligan sila kag ginagamit niya ang iya mga representante sa duta para tadlungon sila. (Gal. 6:1) Sa gobierno sang tawo, mahimo bawion ang pagkabanwahanon sang isa nga nakasala. Sing kaanggid, mahimo man bawion ni Jehova ang pagkabanwahanon sang indi mahinulsulon nga nagalapas sa iya mga talaksan. * (1 Cor. 5:11-13) Pero maluluy-on si Jehova. Ang mga naghinulsol kag nagbag-o, mahimo makatigayon liwat sing maayo nga tindog sa iya atubangan kag makapabilin nga banwahanon sang Ginharian. (2 Cor. 2:5-8) Isa gid ka kadungganan nga alagaron naton ining mahigugmaon nga Hari!

 GINAPABALORAN NILA ANG PAGTUDLO

13. Paano mapakita sang mga banwahanon sang Ginharian nga ginapabaloran nila ang edukasyon?

¹³ Madamo nga gobierno ang nagatinguha nga tudluan ang ila mga banwahanon. Nagapatindog sila sang mga eskwelahan para tudluan ang mga tawo nga magbasa kag magsulat kag hanason sa pagtrabaho. Ang mga banwahanon sang Ginharian nagapasalamat gid sa sini nga mga eskwelahan, kag nagatuon gid sa pagbasa, pagsulat, kag pagsuporta sa ila kaugalingon. Pero subong mga banwahanon sang Ginharian sang Dios, mas ginapabaloran nila ang pagtudlo sa ila ni Jehova paagi sa Cristianong kongregasyon. Ginapalig-on man ang mga ginikanan nga basahan ang ila kabataan. Kada bulan, ang matutom nga ulipon nagabalhag sing pila ka pahina nga impormasyon nga base sa Biblia sa Ang Lalantawan kag Magmata! Kon magbasa ka sing mga duha ka pahina kada adlaw sa sulod sang isa ka bulan, makabenepisyo ka pirme sa pagtudlo sang Ginharian.

14. (a) Ano nga mga paghanas ang aton natigayon? (b) Ano nga mga suhestyon para sa Pangpamilya nga Pagsimba ang inyo ginasunod?

¹⁴ Kada semana, ang mga banwahanon sang Ginharian ginahanas sa mga miting sa kongregasyon. Halimbawa, ang Teokratikong Eskwelahan Para sa Ministeryo nagabulig sa mga estudyante nga mangin epektibo nga manunudlo sang Pulong sang Dios sa sulod na sang sobra anom ka dekada. Nakapalista ka na bala sa sini nga eskwelahan? Sining karon lang, ginpalig-on sang matutom nga ulipon ang paghiwat sang Pangpamilya nga Pagsimba kada semana. Ini nga kahimusan nagapabakod sa pamilya. Natilawan mo na bala nga sundon ang mga suhestyon sa aton mga publikasyon? *

15. Ano ang isa sa pinakadaku naton nga pribilehiyo?

¹⁵ Ang mga banwahanon sang gobierno mahimo mangampanya para sa isa ka partido pulitika, kag magpamalaybalay pa gani para mahimo ini. Sa bug-os nga kalibutan, ang mga banwahanon sang Ginharian nagasuporta man sa Ginharian sang Dios paagi sa pagbantala sini sa mga dalan kag sa mga balay. Subong ginsambit sang nagligad nga artikulo, Ang Lalantawan, nga nagabantala sang Ginharian ni Jehova, amo na subong ang pinakalapnag nga napanagtag nga balasahon sa bug-os nga kalibutan! Ang isa sa pinakadaku naton nga pribilehiyo amo ang pagsugid sa iban parte sa Ginharian sang Dios. Mapisan ka bala nga nagabantala?—Mat. 28:19, 20.

16. Paano mo mapamatud-an nga nagagawi ka subong maayo nga banwahanon sang Ginharian?

¹⁶ Sa indi madugay, ang Ginharian sang Dios amo lamang ang gobierno nga magagahom sa duta. Dumalahan sini ang tanan nga bahin sang aton pagkabuhi, indi lamang sa espirituwal kundi pati man sa sekular. Mangin maayo ka bala nga banwahanon sang Ginharian sa sina nga tion? Karon na ang tion para pamatud-an mo ini. Sa imo mga desisyon kada adlaw, himua ang tanan nga butang sa kahimayaan ni Jehova. Sa amo, mapamatud-an mo nga nagagawi ka subong maayo nga banwahanon sang Ginharian.—1 Cor. 10:31.

[Mga Nota]

[Mga Pamangkot sa Pagtinuon]

[Blurb sa pahina 14]

Ginapamatian mo bala ang base sa Biblia nga mga paandam parte sa Internet?

[Retrato sa pahina 12]

Kaangay sang mga anak ni Kora, nalipay ka bala sa putli nga pagsimba kag sa pagtuon sa kasaysayan sini?

[Retrato sa pahina 15]

Ang Pangpamilya nga Pagsimba makabulig sa imo kag sa imo pamilya nga mangin maayo nga banwahanon sang Ginharian