Agtignay kas Makipagili iti Pagarian!

“Agtignaykayo iti pamay-an a maikari iti naimbag a damag.”​—FIL. 1:27.

ANIA TI SUNGBATMO?

Siasino dagiti kualipikado a makipagili iti Pagarian?

Ania ti masapul nga aramidentayo maipapan iti pagsasao, pakasaritaan, ken linlinteg ti Pagarian?

Kasano a maipakita dagiti makipagili iti Pagarian nga ay-ayatenda dagiti pagalagadan ti Dios?

1, 2. Apay nga adda naisangsangayan a kaipapanan ti balakad ni Pablo iti kongregasion ti Filipos?

IMPAREGTA ni apostol Pablo iti kongregasion ti Filipos nga ‘agtignayda iti pamay-an a maikari iti naimbag a damag.’ (Basaen ti Filipos 1:27.) Ti Griego a sao nga inusar ni Pablo para iti ‘agtignay’ mabalin met a maipatarus nga “agtultuloy kas makipagili.” Adda naisangsangayan a kaipapanan dayta a sasao para iti kongregasion ti Filipos. Apay? Agsipud ta maysa ti Filipos kadagiti napili a siudad a naipaayan iti maysa a kita ti pannakipagili iti Roma. Dagiti umili ti Filipos ken ti intero nga Imperio ti Roma pagpannakkelda ti kina-Romanoda ken ti proteksion nga ipapaay ti linteg ti Roma.

² Adda nasaysayaat a rason nga agpannakkel dagiti kameng ti kongregasion ti Filipos. Impalagip ni Pablo kadakuada, a kas napulotan a Kristiano, ti pannakipagilida adda “iti langlangit.” (Fil. 3:20) Saanda laeng a makipagili iti maysa a natauan nga imperio no di ket iti Pagarian ti Dios. No kasta, addaanda iti kasayaatan pay laeng a proteksion ken benepisio.​—Efe. 2:19-22.

3. (a) Siasino dagiti addaan iti pribilehio nga agbalin a makipagili iti Pagarian? (b) Ania ti usigentayo iti daytoy nga artikulo?

³ Ti indagadag ni Pablo a ‘panagtultuloy kas makipagili’ ket nangnangruna nga agaplikar kadagidiay agturayto a kadua ni Kristo idiay langit. (Fil. 3:20) Ngem agaplikar met dayta kadagidiay agbalinto nga iturayan ti Pagarian ti Dios ditoy daga. Apay? Agsipud ta amin a dedikado a Kristiano ket agserserbi iti maymaysa nga Ari, ni Jehova, ken masapul nga annurotenda dagiti isu met laeng a pagalagadan. (Efe. 4:4-6) Ikagkagumaan ita dagiti tattao ti makualipikar nga agbalin nga umili ti narang-ay a pagilian. Anian nga ad-adda pay koma nga ipategtayo ti pribilehiotayo nga agbalin nga umili ti Pagarian! Tapno umuneg ti panangipategtayo iti dayta a pribilehio, usigentayo ti sumagmamano a pagpadaan dagiti makalikaguman iti  pannakipagili iti maysa a gobierno ken ti pannakipagili iti Pagarian ti Dios. Usigentayo ngarud ti tallo a banag nga aramidentayo tapno agtalinaedtayo kas makipagili iti Pagarian.

MAKALIKAGUMAN KADAGITI MAKIPAGILI

4. Ania ti nasin-aw a pagsasao, ken kasano a ‘makapagsaotayo’ iti kasta?

⁴ Sursuruen ti lenguahe. Adda dagiti gobierno a mangikalikagum kadagidiay mayat nga agbalin a makipagili nga adalenda ti kangrunaan a lenguahe dayta a pagilian. Uray pay no nagbalinen ti maysa kas makipagili (citizen), mabalin nga aglabas pay ti tawtawen sakbay a nasayud ti panagsaona iti dayta a baro a lenguahe. Nalabit alisto laeng a masursurona ti gramatika ngem nabaybayag ti panagsursurona nga agbalikas. Kasta met laeng ti Pagarian ti Dios, kalikagumanna kadagiti umilina a sursuruenda ti aw-awagan ti Biblia iti “nasin-aw a pagsasao.” (Basaen ti Sofonias 3:9.) Ania dayta a lenguahe? Isu ti kinapudno maipapan iti Dios ken iti pangpanggepna a masarakan iti Biblia. “Agsasaotayo” iti nasin-aw a pagsasao no agtigtignaytayo maitunos kadagiti linteg ken prinsipio ti Dios. Kas makipagili iti Pagarian ti Dios, mabalin a nalakatayo a nasursuro dagiti pamunganayan a sursuro ti Biblia sa nabautisarantayo. Ngem uray no bautisadotayon, masapul a pasayaatentayo ti “panagsaotayo” iti nasin-aw a pagsasao. Kasano? Babaen ti panangikagumaantayo a mangyaplikar kadagiti maad-adaltayo a prinsipio ti Biblia.

5. Apay a masapul nga adalentayo ti pakasaritaan ti organisasion ni Jehova?

⁵ Adalen ti pakasaritaan. Ti tao a mayat nga agbalin a makipagili iti maysa a gobierno masapul nga adalenna ti pakasaritaan dayta a gobierno. Umasping iti dayta, dagidiay agtarigagay nga agbalin a makipagili iti Pagarian nasken met nga adalenda ti maipapan iti Pagarian ti Dios. Usigem ti ulidan dagiti annak ni Kore a nagserbi idi tiempo ti nagkauna nga Israel. Impategda ti Jerusalem ken ti lugar a pagdaydayawan sadiay kasta met ti pakasaritaan dayta a siudad. Saan a dagiti bato ken argamasa ti nagsidsiddaawanda no di ket ti irepresentar ti siudad ken ti lugar a pagdaydayawan. Ti Jerusalem isu ti “ili ti Naindaklan nga Ari” a ni Jehova, ta dayta ti ayan ti nasin-aw a panagdayaw. Sadiay idi ti pakaisuruan ti Linteg ni Jehova. Dagidiay iturturayan ti Ari ti Jerusalem ti nangipakitaan ni Jehova iti naayat a kinamanangngaasina. (Basaen ti Salmo 48:1, 2, 9, 12, 13.) Kas kadakuada, tartarigagayam kadi nga adalen ken lagipen ti pakasaritaan ti naindagaan a paset ti organisasion ni Jehova? No ad-adu ti maadalmo maipapan iti organisasion ti Dios ken no kasano a supsuportaranna ti ilina, ad-adda met a napaypayso kenka ti Pagarian ti Dios. Gapu iti dayta, rumayray met ti tarigagaymo a mangikasaba iti naimbag a damag ti Pagarian.​—Jer. 9:24; Luc. 4:43.

6. Apay a maiparbeng a kalikaguman ni Jehova a sursuruen ken pagtulnogantayo dagiti linteg ken prinsipiona?

 ⁶ Ammuen dagiti linteg. Kalikaguman dagiti gobierno a sursuruen ken pagtulnogan dagiti iturayanda ti linlinteg ti pagilian. Maiparbeng laeng ngarud a namnamaen ni Jehova a sursuruen ken pagtulnogantayo dagiti linteg ken prinsipio a rumbeng nga annuroten ti amin a makipagili iti Pagarian. (Isa. 2:3; Juan 15:10; 1 Juan 5:3) Masansan nga adu ti pagkurangan ti linteg ti tao ken mabalin nga adda idumdumana. Ngem perpekto ti “linteg ni Jehova.” (Sal. 19:7) Maragsakantayo kadi iti linteg ti Dios ken basbasaentayo ti Saona iti inaldaw? (Sal. 1:1, 2) Masursurotayo laeng ti linteg ti Dios no mismo nga adalentayo dayta. Awan ti makaaramid iti dayta para kadatayo.

DAGITI MAKIPAGILI ITI PAGARIAN AYATENDA DAGITI PAGALAGADAN TI DIOS

7. Ania a natantan-ok a pagalagadan ti an-annuroten dagiti makipagili iti Pagarian?

⁷ Tapno agtalinaedtayo a makipagili iti Pagarian, saantay laeng nga ammuen dagiti pagalagadan ti Dios no di ket ayatentay met dagita. Ibagbaga ti adu a makipagili nga umanamongda iti linlinteg ken pagalagadan ti pagilian a pagnanaedanda ngem salungasingenda met dagita no marigatanda nga agtungpal ken no awan ti makakitkita kadakuada. Masansan a kayatda laeng nga ay-ayuen dagiti tattao. (Col. 3:22) Natantan-ok ngem iti dayta ti pagalagadan nga an-annuroten dagiti makipagili iti Pagarian. Siraragsak nga agtulnogtayo kadagiti linteg ti Dios, uray no awan ti tao a makakitkita kadatayo. Apay? Agsipud ta ay-ayatentayo daydiay Manangted-paglintegan.​—Isa. 33:22; basaen ti Lucas 10:27.

8, 9. Kasano a maammuam no pudpudno nga ay-ayatem dagiti linteg ti Dios?

⁸ Kasano a maammuam no pudpudno nga ay-ayatem dagiti linteg ti Dios? Usigem ti reaksionmo no mabalakadanka maipapan iti banag nga ipagarupmo a personal laeng​—kas iti panagkawkawes ken panaglanglanga. Sakbay a nagbalinka a makipagili iti Pagarian, mabalin a paggugustom dagiti naalas wenno makagargari a kawes. Ngem bayat nga umun-uneg ti ayatmo iti Dios, nasursuromon ti agkawes iti wagas a pakaidayawanna. (1 Tim. 2:9, 10; 1 Ped. 3:3, 4) Pagarupem a nanakman itan ti panagkawkawesmo. Ngem kasanon no ibaga ti maysa a panglakayen a makaitibkol iti dadduma a kakabsat ti panagkawkawesmo? Ikalintegam kadi ti bagim, agsakit ti nakemmo, wenno dimo ikankano ti balakad? Makalikaguman iti amin a makipagili iti Pagarian ti Dios a tuladenda ni Kristo. (1 Ped. 2:21) Insurat ni apostol Pablo maipapan iti ulidan ni Jesus: “Tunggal maysa kadatayo ay-aywenna koma ti padana a tao iti naimbag a maipaay a pakapabilganna. Ta uray ti Kristo saanna nga inay-ayo ti bagina.” (Roma 15:2, 3) Tapno agtalinaed ti talna ti kongregasion, sidadaan nga agpabus-oy ti nataengan a Kristiano kas panangikabilanganna iti konsiensia ti sabsabali.​—Roma 14:19-21.

⁹ Usigentayo met ti rumbeng a panangmatmattayo iti sekso ken iti panagasawa. Dagidiay saan pay a nagbalin a makipagili iti Pagarian ti Dios mabalin a panuynoyanda ti homoseksualidad, ibilangda nga awan pagdaksan ti pornograpia, ken panunotenda a personal a banag ti pannakikamalala ken pannakidiborsio. Inwaksin dagiti makipagili iti Pagarian ti kakasta a di nainsiriban ken managimbubukodan a kababalin. Nupay adu a Kristiano ti sigud nga imoral ti biagda, matmatanda itan ti sekso ken panagasawa kas sagut ti Dios. Pagraemanda dagiti nangato a pagalagadan ni Jehova ken naimpusuan nga umanamongda a di maikari nga agbalin a makipagili iti Pagarian dagidiay agtultuloy nga agaramid iti imoralidad. (1 Cor. 6:9-11) Ngem bigbigenda met a nagulib ti puso. (Jer. 17:9) Isu nga ipangagda dagiti espesipiko a pakdaar a makatulong iti panangannurotda kadagiti nangato a moral a pagalagadan.

 DAGITI MAKIPAGILI ITI PAGARIAN APRESIARENDA DAGITI PAKDAAR

10, 11. Ania dagiti naintiempuan a pakdaar nga impaay ti Pagarian ti Dios, ken ania ti makunam iti kakasta a pakdaar?

¹⁰ Mabalin a mangted dagiti gobierno iti pakdaar mainaig iti taraon ken agas. Nalawag a saan nga amin a taraon ken agas ket dakes. Ngem no adda pagdaksan ti maysa a produkto, mabalin a mangted ti gobierno iti nainkalintegan a pakdaar tapno masalakniban dagiti umili. Manungsungbat ti gobierno no saanna nga aramiden dayta. Kasta met, mangmangted ti Pagarian ti Dios kadagiti naintiempuan a pakdaar maipapan kadagiti espesipiko a moral ken naespirituan a peggad. Kas pagarigan, adu ti agus-usar iti Internet para iti komunikasion, edukasion, ken paglinglingayan. Us-usaren met dayta ti organisasion ti Dios ken adu ti maar-aramidanna gapu iti dayta. Ngem adu a web site iti Internet ti makadadael iti moral ken espiritualidad dagiti makipagili iti Pagarian, kas kadagiti site a nainaig iti pornograpia. Adun a tawen nga ipakpakdaar ti klase matalek nga adipen a napeggad dagita a site. Anian a yamantayo kadagitoy a pakdaar!

¹¹ Iti napalabas a tawtawen, nagbalin a popular ti sabali a kita ti site, a pagaammo kas social network. Nupay adda pagimbagan dagitoy a site, mabalin nga agpeggadtayo no saantay a naannad. Mabalin a makalangen iti dayta dagiti dakes a kakadua. (1 Cor. 15:33) Di ngarud pakasdaawan a nangipaay ti organisasion ti Dios kadagiti nainkalintegan a pakdaar mainaig iti panagusar kadagiti social network. Nabasam kadin ti amin a kaudian nga artikulo nga impablaak ti matalek nga adipen maipapan iti panagusar kadagita a site? Anian a kinamaag no usarem dagita a site a dimo binasa dagidiay nga artikulo! * Mayarig dayta iti panagtomar iti napigsa nga agas a dimo man la binasa ti pakdaar iti botelia.

12. Apay a minamaag ti di panangikankano kadagiti pakdaar?

¹² Dagidiay di mangikankano kadagiti pakdaar ti matalek nga adipen dangdangranda ti bagbagida ken dagiti dungdungnguenda. Naadikton ti dadduma iti panagbuya iti pornograpia wenno nakaaramidda iti imoralidad ket pampanunotendan a saan a makitkita ni Jehova ti ar-aramidenda. Anian a kinamaag no ipapantayo a mailemmengtayo ken Jehova ti ar-aramidentayo! (Prov. 15:3; basaen ti Hebreo 4:13.) Kayat ti Dios a tulongan dagita nga indibidual ken tigtignayenna dagiti naindagaan a pannakabagina a mangtulong kadakuada. (Gal. 6:1) Nupay kasta, no kasano a mabalin a waswasen dagiti gobierno ti pannakipagili ti maysa a tao a nangsalungasing iti linteg, waswasento met ni Jehova ti pannakipagili dagidiay di agbabawi a mangsalsalungasing kadagiti pagalagadanna. * (1 Cor. 5:11-13) Ngem naasi ti Dios. Dagidiay agbabawi ken mangbalbaliw iti kababalinda mapasublida ti nasayaat a takderda iti imatang ni Jehova ken agtalinaedda kas makipagili iti Pagarian. (2 Cor. 2:5-8) Anian a nagsayaat a pribilehio ti agserbi iti kasta a naayat nga Ari!

DAGITI MAKIPAGILI ITI PAGARIAN IPATEGDA TI EDUKASION

13. Kasano nga ipakpakita dagiti makipagili iti Pagarian a tagtagipatgenda ti edukasion?

¹³ Ikagkagumaan ti adu a gobierno nga  edukaran dagiti umilida. Nangorganisarda kadagiti eskuelaan a mangisuro iti panagbasa, panagsurat, ken praktikal a trabaho. Apresiaren dagiti makipagili iti Pagarian dagitoy a sekular nga eskuelaan ken sipapasnek nga agsursuroda nga agbasa, agsurat, ken no kasano a masuportaranda ti pinansial a kasapulanda. Ngem napatpateg pay kadakuada ti edukasion nga aw-awatenda kas makipagili iti Pagarian ti Dios. Babaen iti kongregasion Kristiano, iparparegta ni Jehova ti panagbasa ken panagsurat. Maparegta dagiti nagannak nga ibasaanda dagiti ubbingda. Iti kada bulan, mangipabpablaak ti matalek nga adipen kadagiti naibatay-Biblia nga artikulo iti Pagwanawanan ken Agriingkayo! No dua a panid ti basaem iti tunggal aldaw, mabasam amin dagita iti uneg ti makabulan. No kasta ti aramidem, agtultuloy a magunggonaanka iti edukasion nga ipapaay ti Pagarian.

14. (a) Ania a pannakasanay ti maipapaay kadatayo? (b) Ania dagiti singasing para iti Panagdaydayaw ti Pamilia nga iyap-aplikaryon?

¹⁴ Tunggal lawas, masansanay dagiti makipagili iti Pagarian kadagiti gimong ti kongregasion. Kas pagarigan, nasuroken nga innem a pulo a tawen a tultulongan ti Teokratiko nga Eskuelaan ti Panagministro dagiti estudiante tapno agbalin nga epektibo ti panangisuroda iti Sao ti Dios. Maysaka kadi nga estudiante iti daytoy nga eskuelaan? Iti napalabas a tawtawen, inyunay-unay ti matalek nga adipen ti kinapateg ti linawas a Panagdaydayaw ti Pamilia. Daytoy ti mangpabileg iti espiritualidad ti intero a pamilia. Pinadasyo kadin nga inaramid dagiti singasing manipud kadagiti literaturatayo? *

15. Ania ti maysa kadagiti kadakkelan a pribilehiotayo?

¹⁵ Dagiti makipagili kadagiti gobierno sipapanayag nga ipakitada ti suportada iti maysa a napolitikaan a partido, nga ikamkampaniada pay ketdi iti binalaybalay. Ad-adu a panagregget ti ar-aramiden dagiti makipagili iti Pagarian iti panangsuportada iti Pagarian ti Dios agpadpada iti lansangan ken iti binalaybalay. Kinapudnona, kas nadakamat iti napalabas nga artikulo, ti magasin a Pagwanawanan, a mangibumbunannag iti Pagarian ni Jehova, ti kasaknapan a maiwarwaras a pagiwarnak iti intero a lubong! Maysa kadagiti kadakkelan a pribilehiotayo ti panangikasaba iti Pagarian ti Dios. Naregtaka kadi iti trabaho a panangasaba?​—Mat. 28:19, 20.

16. Kasano a maipakitam a maysaka a nasayaat a makipagili iti Pagarian ti Dios?

¹⁶ Din agbayag, ti laeng Pagarian ti Dios ti kakaisuna a gobierno nga agturay ditoy daga. Daytanto ti mangtarawidwid iti amin nga aspeto ti inaldaw a panagbiag. Maysakanto kadi a nasayaat a makipagili iti Pagarian ti Dios iti dayta a tiempo? Itan ti gundawaymo a mangpaneknek iti dayta. Iti tunggal desisionmo iti inaldaw, aramidem ti amin a banag agpaay a pakaidayawan ti Dios ken paneknekam nga agtigtignayka kas nasayaat a makipagili iti Pagarian ti Dios.​—1 Cor. 10:31.

[Footnotes]

[Salsaludsod]

[Blurb iti panid 14]

Ipangpangagmo kadi dagiti naibatay-Biblia a pakdaar maipapan iti Internet?

[Ladawan iti panid 12]

Kas kadagiti annak ni Kore, maragragsakanka kadi met iti nasin-aw a panagdayaw ken iti pakasaritaanna?

[Ladawan iti panid 15]

Dakkel ti maitulong ti Panagdaydayaw ti Pamiliayo tapno agbalinka ken ti pamiliam kas nasayaat a makipagili iti Pagarian