Guutip naalagaaffiani innuttaalluartuugitsi!

“Kristusip iivangkiiliuanut naleqquttumik inuuneqaannassaasi.” — FILIPPIMIUT 1:27.

QANOQ AKISSAVIT?

Kikkut Guutip naalagaaffiani innuttanngorsinnaappat?

Guutip naalagaaffiani innuttaagatta oqaatsinik, oqaluttuarisaanermik inatsisinillu ilinniarnissarput qanoq paasisariaqarpa?

Guutip naalagaaffiani innuttaasut Guutip inatsisaanik nuannarinninnertik qanoq ersersissinnaavaat?

1, 2. Sooq Paulusip kajumissaarutaa ilagiinnut Filippimiittunut immikkorluinnaq pingaaruteqarpa?

APUSTILIP Paulusip ilagiit Filippimiittut kajumissaarpai ‘Kristusip iivangkiiliuanut naleqquttumik inuuneqaqqullugit’. (Atuaruk Filippimiut 1:27). Oqariartaaseq grækerisooq Paulusip matumani atugaa ‘inuuneqassaasi’ aamma ‘innuttaasutut naammassisassanik isumaginninnermik’ nutserneqarsinnaavoq. Oqaatsit taakku ilagiinnut Filippimiittunut immikkorluinnaq pingaaruteqarput. Sooq? Romamiut naalagaaffiata Filippimiut Romamiutut innuttaassuseqartinnguatsiarlugillu Romamiut inatsisaannit illersorneqartippaat. Filippimiut taamanikkut inuit amerlanngitsut immikkut pisinnaatitaaffigisaannik pisinnaatitaaffeqaramik Romamiutut innuttaassuseqarnertik tulluusimaarutigaat.

² Filippimi ilagiinniittut tulluusimaarnissamut suli pissutissaqarnerupput. Paulusip kristumiut tanitat taakku qilammi innuttaassuseqarnerannik eqqaasippai. (Filippimiut 3:20) Tassami taakku nunamiinnaanngitsoq innuttaassuseqarput, Guutimmi naalagaaffiani innuttaapput! Taamaattumik immikkut illersorneqartarlutillu asseqanngilluinnartunik pisinnaatitaaffeqarput. — Efesosimiut 2:19-22.

3. (a) Kikkut Guutip naalagaaffiani innuttanngorsinnaappat? (b) Allaaserisami matumani suut sammissavavut?

³ Paulusip ‘innuttaasutut naammassisassanik isumaginninnissamik’ siunnersuutaa pingaarnerusumik Kristusip qilammi kunngioqatissaanut tunngavoq. (Filippimiut 3:20) Tamannali aamma Guutip naalagaaffianut naalatsigitittut nunarsuarmi inuusussat iluaqutigisinnaavaat. Sooq taamatut oqartoqarsinnaava? Kristumiut tunniulluinnarsimasut tamarmik Jehovamik kunngeqarmata taassumalu piumasaqaatai kiffaanut tamanut atuummata. (Efesosimiut 4:4-6) Ullumikkut inuppassuit nunamut pigissaarfiusumut innuttanngorumallutik ilungersortarput. Guutilli naalagaaffiani innuttanngorsinnaanissaq pingaaruteqarnerungaarpoq. Tamatuma immikkut pisinnaatitaaffiunera paasilluarnerujumallugu  nunamut aalajangersimasumut innuttanngorniarnermi naalakkersuisunit piumasaqaatigineqartut Guutillu naalagaaffiani innuttanngorniarnermi piumasaqaatit assigiissuteqarneri sammeriartigit. Taavalu Guutip naalagaaffiani innuttaajuarumalluta iliuuserisariaqakkavut pingasut misissussavavut.

INNUTTANNGORNIARTUNUT PIUMASAQAATIT

4. Oqaatsit minguitsut suuppat, taakkulu atorlugit qanoq “oqaluttarpugut”?

⁴ Oqaatsinik ilinniarit. Nunat ilaanni innuttanngorumalluni oqaatsit nunami tassani atorneqarnerpaat ilinniarneqarnissaat piumasaqaataasarpoq. Inuit ilaat innuttanngoreeraluarlutik oqallorissiniarlutik ukiorpassuarni ilinniarniarsarisarput. Grammatikki ilikkappallassinnaasarpaat oqallorissiniarlutilli piffissangaatsiaq atortariaqartarlugu. Aamma Guutip naalagaaffiani innuttanngorniarluni oqaatsinik allanik ilinniarnissamik piumasaqaateqarpoq. Biibilimi oqaatsit taakku “oqaatsinik minguitsunik” taaneqarput. (Atuaruk Sefania 3:9, NW). * Oqaatsit taakku tassaapput Guuti taassumalu siunertai pillugit sallusuissutit Biibilimi ajoqersuutigineqartut. Guutip inatsisaanik najoqqutassiaanillu maleruaanitsigut oqaatsit minguitsut atorlugit “oqaluttarpugut”. Guutip naalagaaffiani innuttanngorniartut Biibilimi ajoqersuutigineqartut pingaarnerit ilikkappallassinnaasarpaat kuisillutillu. Kuisinnittali kingorna oqaatsit minguitsut atorlugit “oqallorinnerujartuinnarumalluta” iliuuseqarniartuartariaqartarpugut. Qanoq “oqallorinnerulersinnaagatta”? Tamatta ilikkakkavut Biibilimeersut malillugit inuuniartuartariaqarpugut.

5. Sooq Jehovap nalitsinni innuttai pillugit sapinngisarput tamaat paasiniaasariaqarpugut?

⁵ Oqaluttuarisaanermik atuaqqissaarit. Inuk nunami allami innuttanngorniartoq nunami tassani naalakkersuisut nunallu oqaluttuarisaanera pillugit misissuisariaqarsinnaasarpoq. Uagut Guutip naalagaaffiani innuttanngorusukkatta naalagaaffik taanna pillugu sapinngisarput tamaat paasiniaasariaqarpugut. Korap ernerisa itsaq Israelimi kiffartortuusut maligassiaat ilaartariaqarparput. Taakkua Jerusalemi Guutimillu pallorfiginnittarfik illoqarfimmi tassaniittoq nuannaraat, illoqarfiullu oqaluttuarisaanera oqaluttuarissallugu nuannarisupilussuuaat kusanarnera piinnarnagu ‘kunngersuulli’ Jehovap ‘illoqarfigimmagu’. Pallorfiginninnermut ilumoortumut qitiusumi Jerusalemimiittumi Jehovap inatsisaanik ilinniartitsisoqartarpoq. Jehovamut Jerusalemimi kunngiusumut naalatsigitittut taassumannga iluarineqarlutillu asaneqarput. (Atuakkit Tussiaat 48:2, 3, 10, 13, 14). Illit Guutip innuttaasa oqaluttuarisaanerannik atuaqqissaartarnikkut inunnullu allanut oqaluttuarnikkut Korap erneri ilaartarpigit? Jehovap innuttai aamma qanoq taakku ikiortarnerai pillugit paasisaqarnerujartortilluta Guutip naalagaaffia piviusutut isiginerujartuinnassavarput.  Guutillu naalagaaffia pillugu nutaarsiassamik nuannersumik oqaluusserusussuseqarnerulissaagut. — Jeremia 9:23; Lukasi 4:43.

6. Sooq Jehovap inatsisiminik najoqqutassiaminillu ilisimasaqarlutalu maleruaanissarput piumasarimmagu pissusissamisuuinnarpa?

⁶ Inatsisit ilisimakkit. Nunami inatsisaasunik ilisimasaqarnissaq maleruaanissarlu innuttaasunut piumasaqaataasarpoq. Taamaattumik Jehovap naalagaaffimmini innuttaasut inatsisiminik najoqqutassiaminillu ilisimasaqarlutillu maleruaanissaat piumasarimmagu pissusissamisuuinnarpoq. (Esaja 2:3; Johannesi 15:10; 1 Johannesi 5:3) Inuit inatsisaat amigartarlutillu naapertuilluanngitsuusinnaasarput. Jehovalli “inatsisai innarluitsuupput”. (Tussiaat 19:8) Ullut tamaasa Biibilimik atuartarnikkut Guutip inatsisaanik najoqqutassiaanillu ilinniartarnerit nuannaraajuk? (Tussiaat 1:1, 2) Tamatta immikkut nammineq Guutip inatsisaanik atuaqqissaartarnissarput piffissaqarfigisariaqarparput. Allammi uagut sinnerluta taamaaliorsinnaanngillat.

GUUTIP NAALAGAAFFIANI INNUTTAASUT GUUTIP INATSISAI NUANNARAAT

7. Sooq Guutip naalagaaffiani innuttaasut Guutip inatsisai maleruartarpaat?

⁷ Guutip naalagaaffiani innuttaajuarumalluta Guutip inatsisaanik ilisimasaqartariaqarlutalu nuannarinnittariaqarpugut. Inuppassuaqarpoq oqartartunik nunaminni inatsisaasut isumaqatigalugit. Taakkuali inatsit aalajangersimasoq maleruaruminaatsikkaangamikku isigineqarsorinngikkaangamillu inatsit unioqqutittarpaat. Amerlanertigut ‘inunnut iluareqqusaaginnarlutik’ inatsisit maleruartarpaat. (Kolossemiut 3:22) Guutip naalagaaffiani innuttaasut allamik pissuteqarlutik Guutip inatsisai maleruartarpaat. Jehova asagatsigu nuannaarluta inatsisai maleruartarpavut, aamma kisimiikkaangatta. — Esaja 33:22; atuaruk Lukasi 10:27.

8, 9. Illit qanoq paasisinnaaviuk Guutip inatsisai ilumut nuannarigitit?

⁸ Taava qanoq paasisinnaaviuk Guutip inatsisai ilumut nuannarigitit? Assersuutigalugu illit isummat malillugu inuup nammineq aalajangigassaanut — soorlu atisalersoriaatsimut pikisarnermullu — tunngatillugu siunersorneqaruit qanoq periaassanerlutit eqqarsaatigeriaruk. Immaqa Guutip naalagaaffiani innuttanngunngikkallaravit peqqusaarpasissumik imaluunniit talakkappasissumik atisalersorusunnerusarputit. Jehovali asanerujartortillugu taassumunnga ataqqinaataasumik atisalersortalerputit. (1 Timotheusi 2:9, 10; 1 Petrusi 3:3, 4) Immaqa isumaqarputit maannakkut ippinnanngitsumik atisalersortarlutit. Utoqqaanertalli oqarfigisuuppatit atisalersoriaatsit ilagiinniittunit arlalinnit mamiasuutigineqartoq qanoq pissagaluarpit? Imminut illersornialissavit, kamalissavit imaluunniit malartaaserlutit allannguiumanngilluinnassavit? Kristusimik ilaarsinissaq Guutip naalagaaffiani innuttaasunut inatsisit tunngaviusut pingaarnerpaat ilaagaat. (1 Petrusi 2:21) Jiisusip maligassiaanut tunngatillugu Paulusi ima allappoq: “Tamatta immikkut eqqarsaatigissavavut tullitta iluaqutissaat ineriartornissaallu. Kristusiluunniimmi imminut eqqarsaatiginngilaq.” (Romamiut 15:2, 3) Ilagiinniittut eqqisseqatigiittuarnissaat siunertaralugu kristumiu inersimalluartoq allat mamiatsaatigisaannik iliuuseqarumanavianngilaq. — Romamiut 14:19-21.

⁹ Maannakkut illit atoqatigiinnermut aappariinnermullu isiginnittaatsit eqqarsaatigeriaruk. Guutip naalagaaffiani innuttaanngitsut isumaqarsinnaapput angutit anguteqatiminnik arnallu arnaqatiminnik atoqateqartarnerat, pornografii, allasiorneq avinnerlu eqqunngitsuliornerunngitsut. Guutilli naalagaaffiani innuttaasut iliuutsimik kinguneri aamma iliuutsimik allanut qanoq sunniuteqarsinnaaneri eqqarsaatigisarpaat. Inuppassuit kristumiunngunnginnerminni kinguaassiuutitigut inuunerluttuusimapput. Maannakkut taakkua aappariinneq atoqatigiinnerlu Guutimit tunissutisiatut isigaat. Jehovap inatsisai pingaartippaat, nalunngilaallu Guutip inatsisaanik atoqatigiinnermut aappariinnermullu tunngatillugu unioqqutitsiuartut Guutip naalagaaffiani innuttanngorsinnaanngitsut. (1 Korinthimiut 6:9-11) Aammali nalunngilaat uummat tatigisassaanngitsuusoq.  (Jeremia 17:9) Taamaattumillu aalajangersimasunut tunngatillugu mianersoqquneqartarnertik Guutip inatsisaanik maleruaajuarnissaminnut iluaqutigigamikku qujamasuutigaat.

GUUTIP NAALAGAAFFIANI INNUTTAASUT MIANERSOQQUSSUTIT PINGAARTIPPAAT

10, 11. Sunik pingaarutilinnik Guutip naalagaaffia mianersoqqussuteqartarpa, mianersoqqussutillu tamakku illit qanoq isumaqarfigaagit?

¹⁰ Imaassinnaavoq naalakkersuisut nerisassanut nakorsaatinulluunniit aalajangersimasunut tunngatillugu mianersoqqussuteqartut. Soorunami imaanngilaq nerisassat nakorsaatillu tamarmik ajortuusut. Nioqqutissarli aalajangersimasoq peqqissutsimut ajoqutaasinnaappat naalakkersuisut akisussaaffimminnik eqqortitsiniarlutik innuttaasunik mianersoqqusisariaqarput. Aamma Guutip naalagaaffiata innuttani taakkua anersaakkut peqqissusiannik ajoqusiisinnaasunut mianersoqqusarpai. Internetti assersuutigeriartigu. Inuppassuit attaveqaatitut, ilinniagaqarnerminni aliikkutaqarnerminnilu atortarpaat. Aamma Guutip peqatigiissortaasa internetti iluaqutigisaqaat. Internettimili nittartakkat ilarpassui eqqortuliortuarusuttunut naviarnarsinnaapput. Internettimi alakkartakkat tiingasulersaarutitallit navianartuupput, ukiorpassuarnilu inussiap aalajaatsup internettimi alakkartakkat tamakku mianersoqqussutigisarsimavai. Mianersoqqussutit tamakku qujamasuutigeqaavut!

¹¹ Ullutsinni internettimi alakkartakkat allat, tassa internettikkut attaveqaqatigiiffiusartut, nuannarineqaqaat. Iluaqutaasinnaallutillu ajoqutaasinnaammata mianersuutigisussaavavut. Ikinngutipalaaqaleriaannaasinnaavugummi. (1 Korinthimiut 15:33) Kiffap aalajaatsup alakkartakkanut taakkununnga eqqortumik isiginnittaaseqaqqulluta mianersoqqusarpaatigut. Illit allaaserisat internettikkut attaveqaqatigiiffiusartut pillugit kiffap aalajaatsup qanittukkut saqqummersitai tamaasa atuarpigit? Allaaserisat taakku atuaqqaarnagit internettimi alakkartakkanik tamakkuninnga atuineq silatusaarnerussanngilaq. * Taamaaliornerummi assigiinnassagaluarpaa iisartakkamik kimittoorujussuarmik allagartaa atuaqqaarnagu iisineq.

12. Sooq mianersoqqussutinik sumiginnaaneq sianiilliornerua?

¹² Kiffap aalajaatsup mianersoqqussutaanik sumiginnaasut imminnut ajoqusissallutillu asasatik ajoqusissavaat. Inuit ilaat pornografiimik isiginnaanngitsoorsinnaajunnaarsimallutilluunniit kinguaassiuutitigut inuunerlussimapput eqqarsarlutillu iliuuserisatik Jehovamit takuneqarsinnaanngitsut. Sianiilliornerungaassaarli eqqarsarutta iliuutsivut Jehovamut isertorsinnaallutigit! (Ussatit 15:3; atuaruk Hebræerit 4:13). Jehova taamatut eqqarsartunik ikiuerusukkami utoqqaanertat kajumissaarpai taakku sapinngisartik tamaat ikioqqullugit. (Galatiamiut 6:1) Kisianni soorlu naalakkersuisut nunami inatsisaasunik aalajangersimasunik unioqqutitsiuartunik innuttaajunnaarsitsisinnaasartut taamatuttaaq Jehovap peqqussutiminik peqqissiminatik unioqqutitsiuartut Naalagaaffimmini innuttaajunnaarsittarpai. * (1 Korinthimiut 5:11-13) Jehovali nallittuingaartuummat allamik isumataarlutillu iliuuserisartakkaminnik iliuuseqartarunnaartut Jehovamut attaveqarluaqqilersinnaallutillu taassuma naalagaaffiani innuttaajuarsinnaapput. (2 Korinthimiut 2:5-8) Kunngimut taama asannitsigisumut kiffartorsinnaatitaaneq ilumut ataqqinaataangaarpoq!

 GUUTIP NAALAGAAFFIANI INNUTTAASUT ILINNIAGAQARNEQ PINGAARTIPPAAT

13. Guutip naalagaaffiani innuttaasut ilinniagaqarnermik pingaartitsinertik qanoq ersersittarpaat?

¹³ Naalakkersuisut amerlaqisut innuttaasut ilinniagaqaqqullugit iliuuseqangaatsiartarput. Atuarfinnik sanaartortarput inuit tunngaviusumik ilinniagaqarsinnaaniassammata. Guutip naalagaaffiani innuttaasut taamatut ilinniartitsinerit atorluarusuttarpaat atuarnermut allannermullu pikkorinnerulerniassagamik imminnullu pilersorsinnaaniassagamik. Sulili pingaartinneruaat Jehovap peqatigiissortani aqqutigalugit ilinniartitsinera. Assersuutigalugu peqatigiissortaanit kajumissaarneqartarpugut atuffarissartarnissatsinnik. Angajoqqaat kajumissaarneqarput meeqqatik atuffattaqqullugit. Kiffap aalajaatsup atuagassanik Biibilimut tunngasorpassuarnik isumassortarpaatigut. Assersuutigalugu kalaallisut qaammammut Napasuliaq Alapernaarsuiffik saqqummersinneqartarpoq. Ullormut quppernialunnguit atuartarukkit Guutip naalagaaffiani innuttaasunut paasissutissat pingaarutillit malinnaaffigisinnaavatit.

14. (a) Qanoq ilinniartinneqartarpugut? (b) Ilaqutariittut atuaqqissaaqatigiinnissamut siunnersuutit sorliit atortarpigit?

¹⁴ Guutip naalagaaffiani innuttaasut sapaatit-akunneri tamaasa ilagiit ataatsimiinnerini ilinniartinneqartarput. Assersuutigalugu ukiut 60-it sinnerlugit Teokratiimik Ilinniarfimmi ilinniartut Guutip oqaasia atorlugu ilinniartitsillaqqinnerulernissamut ikiorneqarsimapput. Teokratiimik Ilinniarfimmut ilaavit? Aamma inussiap aalajaatsup sapaatip-akunneranoortumik ilaqutariittut atuaqqissaaqatigiinnerup pingaaruteqassusia erseqqissaatigiuartarsimavaa. Taamatut atuaqqissaaqatigiittarneq ilaqutariit ataasiussuseqarnerulernissamut iluaqutigisarpaat. Atuagassiaatitsinni ilaqutariittut atuaqqissaaqatigiinnissamut siunnersuutigineqartut atortarpigit? *

15. Pisinnaatitaaffik angingaartoq suna pisinnaatitaaffigaarput?

¹⁵ Nunani arlalippassuarni innuttaasut partiimik aalajangersimasumik tapersersuisarput, allaallu ilaat immaqa tapersersortissarsiortarput matumiit matumut agguaallutik. Nunarsuaq tamakkerlugu Guutip naalagaaffiani innuttaasut naalagaaffia tapersersortarpaat aqqusinermi aamma illumiit illumut aallussilluarlutik oqaluussinermikkut. Soorlu allaaserisami atuaqqissaaqatigiissutissami matuma siuliani eqqaaneqartoq Napasuliaq Alapernaarsuiffik, Jehovap naalagaaffianik tusarliussisoq, atuagassiaavoq nunarsuaq tamakkerlugu siammarsimanerpaaq. Guutip naalagaaffia pillugu allanut oqaluussissutiginninneq pisinnaatitaaffiuvoq angingaartoq. Illimmi, tamatuminnga oqaluussissutiginninnermi aallussilluartuuit? — Matthæusi 28:19, 20.

16. Qanoq Guutip naalagaaffiani innuttaalluartuullutit uppernarsarsinnaaviuk?

¹⁶ Qanittukkut Guutip naalagaaffia kisiartaalluni nunarsuarmut aqutsilissaaq. Inuiaat Guutip naalagaaffiani inatsisaasut kisiisa najoqqutariumaarpaat. Taamanikkussamut illit Guutip naalagaaffiani innuttaalluartuussavit? Maannakkut illit tamanna uppernarsartussaavat. Guutip naalagaaffiani innuttaalluartutut pissuseqartutit uppernarsaruk ullut tamaasa aalajangertakkatit tamaasa Jehovamut ataqqinaataatillugit. — 1 Korinthimiut 10:31.

[Quppernerup ataani ilanngussat]

[Atuaqqissaarnermi apeqqutit]

[Qupp. 21-mi Issuagaq]

Internettimut tunngatillugu inussiamit aalajaatsumit mianersoqqussutigineqartut eqqumaffigisarpigit?

[Qupp. 19-mi assiliartaq]

Korap ernerisut illit pallorfiginninneq ilumoortoq tamatumalu oqaluttuarisaanera nuannaraagit?

[Qupp. 22-mi assiliartaq]

Ilaqutariittut atuaqqissaaqatigiittarneq illit asasatillu Guutip naalagaaffiani innuttaalluartunngornissamut iluaqutigisinnaavarsi