Nukala se Nkangu a Kintinu!
Nukala se Nkangu a Kintinu!
“Nuyambula nkal’eno yafwana nsangu zambote.”—FILI. 1:27.
NKIA MVUTU OVANA?
Aki nani balenda vwa kisi nsi muna Kintinu?
Adieyi tufwete vanga muna zaya ndinga, lusansu ye nsiku mia Kintinu kia Nzambi?
Nkangu a Kintinu aweyi balenda songela vo nkanikinu mia Nzambi bezolanga?
1, 2. Ekuma luludiku lwa Paulu lwakadila mfunu muna nkutakani a Filipi?
PAULU wa ntumwa wakasakesa ampangi muna nkutakani a Filipi vo “nuyambula nkal’eno yafwana nsangu zambote.” (Tanga Filipi 1:27.) O mvovo wa Kingerekia kasekola Paulo vo ‘nkala’ ulenda sekolwa mpe ‘kala mwisi nsi.’ E mvovo miami mfunu kikilu miakala kwa Akristu muna nkutakani a Filipi. Ekuma? Kadi esi Filipi bavewa nswa watambula kisi nsi kia Roma. Awana bavewa kisi nsi kia Roma muna Filipi yamuna Kintinu kiawonso kia Roma, bakisananga yo taninwa muna nsiku mia luyalu lwa Roma.
2 Ampangi muna nkutakani a Filipi, kuma kiambote bakala kiau muna kuyisana. Paulu wabasungamesa vo wau vo Akristu a kuswa, kisi nsi kiau “kun’ezulu kina.” (Fili. 3:20) Nkangu a Kintinu kia Nzambi bakala, ke nkangu a kintinu kia wantu ko. Muna kuma kiaki, Kintinu kia Nzambi kiabataninanga yo kubasambula ke mu luyalu lwa nza ko.—Ef. 2:19-22.
3. (a) Aki nani bena y’elau dia vwa kisi nsi muna Kintinu kia Nzambi? (b) Nkia mambu tubadika mun’elongi diadi?
3 Luludiku lwa Paulu vo “nuyambula nkal’eno yafwana nsangu zambote,” lusadilwanga musungula kw’Akristu akuswa beyala kumosi yo Kristu kun’e zulu. (Fili. 3:20) Kansi, lulenda mpe sadilwa kw’awana bezinga ova ntoto muna Kintinu kia Nzambi. Ekuma? Kadi, Akristu awonso bakiyekola Yave wa Ntinu mosi kaka besadilanga yo landa nkanikinu mimosi. (Ef. 4:4-6) O unu, wantu befuntukanga muna vwa kisi nsi muna nsi za vwama. Kansi, elau dia kala se nkangu a Kintinu kia Nzambi disundidi. Muna toma bakula yo yangalela elau diadi, yambula twabadika mambu mevavwanga mu vwa kisi nsi muna luyalu lwa wantu. O mambu mama betela mena ye mana mevavwanga muna vwa kisi nsi muna Kintinu kia Nzambi. I bosi tubadika mambu matatu tufwete vanga muna tatidila elau dia kala se nkangu a Kintinu.
OMA MEVAVWANGA MU VWA KISI NSI
4. Nki i ndinga yavelela? Aweyi tulenda yo ‘vovela’?
4 Longoka ndinga. Ayadi akaka belombanga kwa ndiona zolele kituka mwisi nsi kalongoka e ndinga ya nsi yayina. Kana nkutu baveno kisi nsi, akaka mvu miayingi bevanganga muna longoka nding’ampa. Kanele vo balongokele nzaki e mpila ivovelwanga, kolo kiayingi divavanga muna toma yo vova. Diau adimosi, awana bazolele vwa kisi nsi muna Kintinu kia Nzambi, bafwete longoka ndinga ina yiyikilwanga muna Nkand’a Nzambi vo ‘ndinga yavelela.’ (Tanga Sefaniya 3:9.) Nki i ndinga yavelela? I ludi mu kuma kia Nzambi ye makani mandi masonama mu Nkand’a Nzambi. O ‘vova’ ndinga yavelela divavanga vo twasia zingu kieto ngwizani ye nsiku ye nkanikinu mia Nzambi. Awana bazolele vwa kisi nsi muna Kintinu kia Nzambi, bafwete zaya malongi masina ma Nkand’a Nzambi yo vubwa. Vava bevubwa, bafwete sia ngolo mu kwamanana longoka yo ‘vova’ ndinga yavelela. Mu nkia mpila? Konso muntu mu yeto kafwete sia ngolo za sadila mana kelongokanga muna Nkand’a Nzambi.
5. Ekuma tufwete longokela mawonso tulenda mu kuma kia lusansu lwa nkubik’a Yave ova ntoto?
5 Longoka lusansu. Ayadi a nsi zakaka bekanikinanga vo awana bazolele kituka esi nsi au bazaya lusansu lwa luyalu lwau. Diau a dimosi mpe, awana bazolele vwa kisi nsi muna Kintinu kia Nzambi, bafwete longoka mawonso balenda mu kuma kia Kintinu kia Nzambi. Badika mbandu ambote basisa wan’a Kora ana basadilanga Nzambi muna Isaele yankulu. Batoma yangalelanga mbanz’a Yerusaleme ye fulu kiandi kia nsambila yo zingula lusansu lwa mbanza yayina kw’akaka. Wan’a Kora ke matadi ye bilikisi ko bayangalelanga, kansi nsas’a mbanza ye fulu kiandi kia nsambila bayangalelanga. Yerusaleme yakala se “mbanz’a [Yave wa] Ntinu anene” ye lumbu lwa nsambila yavelela. I kuna kwalongelwanga Nsiku mia Yave. Yave watonda yo zola nkangu wakala muna wisa kia Ntinu a Yerusaleme. (Tanga Nkunga 48:1, 2, 9, 12, 13.) O unu, Yave ovwidi nkubika kesadilanga ova ntoto. Nga una ye luzolo lwa longoka yo zingula lusansu lwa nkubika yayi nze wan’a Kora? Avo ozeye mayingi mu kuma kia nkubik’a Nzambi ye una Yave kesadisilanga nkangu andi, otoma zaya vo Kintinu kia Nzambi kiakieleka kwa ngeye. Luzolo lwaku lwa samuna nsangu zambote za Kintinu luwokela.—Yer. 9:24; Luka 4:43.
6. Ekuma Yave kevavilanga vo twalongoka yo lemvokela nsiku ye nkanikinu miandi?
6 Zaya nsiku. Ayadi a nza belombanga vo nkangu wazaya yo lemvokela nsiku mia nsi zau. Diau adimosi mpe, muna vwa kisi nsi muna Kintinu kia Nzambi, Yave ovavanga vo twalongoka yo lemvokela nsiku ye nkanikinu miandi. (Yes. 2:3; Yoa. 15:10; 1 Yoa. 5:3) E nsiku mia wantu ke mialunga ko ye milenda funga. Nswaswani ye nsiku mia wantu, “o nsiku a Yave walunga.” (Nku. 19:7) Nga tuyangalelanga nsiku mia Nzambi yo tanga Diambu diandi lumbu yawonso? (Nku. 1:1, 2) Muna zaya nsiku mia Nzambi tufwete mio longokanga. Ka vena muntu ko olenda longokela vana fulu kieto.
NKANGU A KINTINU NKANIKINU MIA NZAMBI BEZOLANGA
7. Ekuma nkangu a Kintinu bafwete lemvokelanga nsiku mia Nzambi?
7 Muna vwa kisi nsi muna Kintinu kia Nzambi, tufwete zaya yo zola nkanikinu mia Nzambi. Wantu ayingi, bevovanga vo betondanga nsiku mia tuyalu twa nsi zina bezingilanga. Kansi, vava bemonanga vo o nsiku ulenda kubatwasila mfwilu ye kavena muntu ko una kubamona, bekululanga wo. Nkumbu miayingi, wantu awaya bekalanga nze “mingyangidika-wantu.” (Kol. 3:22) Nkangu a Kintinu kia Nzambi bezingilanga ngwizani ye nkanikinu miansongi mia Nzambi. Yeto tulemvokelanga nkanikinu mia Nzambi kuna mvevo, kana nkutu ka vena muntu ko okutumonanga. Ekuma? E kuma kadi tuzolanga Yave wa Nkubiki a nsiku.—Yes. 33:22; tanga Luka 10:27.
8, 9. Aweyi olenda zayila vo nsiku mia Nzambi ozolanga?
8 Aweyi olenda zayila vo nsiku mia Nzambi kieleka ozolanga? Badika dina ovanganga kele vo oveno elongi muna diambu otoma zolanga, nze vwata ye kuyikubika. Una kukitukidi ko se mosi muna nkangu a Kintinu, nanga wazolanga vwata mvwatu miavwalangana ye misonganga nitu. Ekolo o zola kwaku muna Nzambi kwawokela, wabakula vo ofwete vwatilanga mu mpila ifwete kembelela Yave. (1 Tim. 2:9, 10; 1 Pet. 3:3, 4) Nanga owau omonanga vo otoma vwatanga mu mpila yambote. Kansi, adieyi ovanga kele vo nkuluntu uvovese vo e mvwat’aku ateleki ayingi itesesanga e sakuba muna nkutakani? Nga ovava kuyitanina, funga makasi ovo ofila mpaka? O tanginina mbandu a Kristu i dimosi muna mambu mevavwanga muna vwa kisi nsi muna Kintinu kia Nzambi. (1 Pet. 2:21) Paulu wa ntumwa wasoneka mu kuma kia mbandu a Kristu vo: “Konso muntu vava twina, mbula kayangidika nkw’andi mun’ewete diandi, muna vangamesa. Kadi o Kristu kayiyangidika ko.” (Roma 15:2, 3) Muna tatidila luvuvamu muna nkutakani, o Nkristu wazikuka ovenganga konso diambu dilenda tokanesa ntona z’akaka.—Roma 14:19-21.
9 Badika mambu mole mamfunu tufwete silanga sungididi: Una tubadikilanga diambu dia vukana yo longo. Awana ke bena ye kisi nsi ko muna Kintinu kia Nzambi, balenda yambulwila evangu dia yakala olekanga ye nkw’andi eyakala. Balenda yindula vo o tala mavangu ma zumba, nsaka zambote kwandi, tá zumba yo vonda longo i mambu kafwete bakila nzengo konso muntu. Awana bena ye kisi nsi muna Kintinu kia Nzambi, ke betondanga ngindu zazi za uzowa ko ye fu ki’eloko. Kana una vo ayingi una ke bakitukidi Akristu ko zingu kia usafu bakala kiau, owau bebadikilanga diambu dia vukana yo longo nze lukau lwatuka kwa Nzambi. Beyangalelanga nkanikinu miansongi mia Yave yo kwikila vo awana bekolamenanga nsiku mia Nzambi mu kuma kia vukana yo longo, ke balendi vwa kisi nsi ko muna Kintinu kia Nzambi. (1 Kor. 6:9-11) Kansi, besungamenanga mpe vo o ntima usundidi mawonso o tekama. (Yer. 17:9) Muna kuma kiaki, beyangalelanga tambula lulukisu lulenda kubasadisa mu tatidila nsiku mia nkal’ambote.
NKANGU A KINTUNU BELEMVOKELANGA LULUKISU
10, 11. Nkia lulukisu lwamfunu tuvewanga muna nkubik’a Kintinu kia Nzambi? Aweyi obadikilanga lulukisu lwalu?
10 Ayadi balenda vana lulukisu lwambote mu kuma kia madia ye nlongo. Dialudi vo, madia ye nlongo miakaka ke miambote ko. Muna kuma kiaki, ayadi balenda vana lulukisu mu kuma kia maka madia yovo nlongo milenda sia mavimpi ma wantu mu vonza. Avo ayadi ke bavangidi wo ko balenda kala ye ngyelele. Diau adimosi mpe, nkubik’a Kintinu kia Nzambi yivaikisanga malongi muna ntangw’andi mu lukisa nkangu mu kuma kia mambu malenda sia kimwanda kiau mu vonza. Kasikil’owu, ndonga besadilanga Internet muna mokena y’akaka, longoka yo sakana. E nkubik’a Nzambi isadilanga Internet muna sala e salu yayingi yambote. Kansi, fulu yayingi muna Internet yilenda sia kimwanda ye nkal’eto mu vonza. O mavangu ma zumba mesongwanga muna Internet, malenda sia kimwanda ki’awana bazolele kota muna Kintinu kia Nzambi mu vonza. Tuka kolo, buka kia ntaudi akwikizi okutulukisanga mu kuma kia fulu yayi. Kieleka, tuvutulanga matondo mu kuma kia lulukisu lwalu lwa mwanda.
11 O unu, vena ye nzila zitoma sadilwanga muna Internet. Avo zisadilu mu mpila yambote, zilenda twasa nluta. E nzila zazi ziyikilwanga vo nzila za vangila kikundi (redes sociais). E nzila zazi zilenda twasa nluta yovo vonza kiampwena. Zilenda fila muntu muna yikundi yambi. (1 Kor. 15:33) Muna kuma kiaki, o ntaudi akwikizi yo lulungalalu okutulukisanga twakala ye tezo muna sadila nzila zazi. Nga otanganga malongi mavaikiswa kwa ntaudi a kwikizi mu kuma kia nzila zazi? Dia uzowa mu sadila nzila zazi lembi teka tanga malongi mama. * Dilenda kala nze muntu onuini nlongo miangolo lembi tanga luludiku lwasonama vana bungwa kia nlongo.
12. Ekuma dinina dia uzowa o veza lulukisu?
12 Awana bevezanga malongi ma ntaudi akwikizi, mu mpasi bekuyisianga kumosi ye azolw’au. Akaka bakituka se abundu muna tala mavangu ma zumba yovo tá zumba, beyindulanga vo Yave ke monanga mavangu mau ko. Dia uzowa kikilu mu yindula vo tulenda sweka mavangu meto vana meso ma Yave. (Nga. 15:3; tanga Ayibere 4:13.) Wau vo Nzambi ozolele sadisa wantu awaya, ofilanga akunzi andi ova ntoto muna kubasadisa. (Ngal. 6:1) Kansi, nze una ayadi a nza balenda katulwila kisi nsi kw’awana bekululanga nsiku mia nsi au, Yave ke yambula ko vo awana besumukanga lembi viluka ntima bavwa kisi nsi muna Kintinu kiandi. * (1 Kor. 5:11-13) Kansi, Yave nkwa nkenda. Awana bevilukanga ntima yo soba mpila zingu kiau, balenda vwa dienga dia Yave yo kwamanana kala nkangu a Kintinu. (2 Kor. 2:5-8) Ekwe nsambu za sadila Ntinu ndioyo wa nzodi!
NKANGU A KINTINU BEYANGALELANGA LONGWA
13. Awana bena ye kisi nsi muna Kintinu kia Nzambi aweyi besongelanga vo betoma yangalelanga longwa?
13 Ayadi ayingi a nza befuntukanga muna longa nkangu manu nsi zau. Bekubikanga sikola muna longa wantu mu zaya tanga yo soneka yo longa ndekwa za sadila salu ya moko. Nkangu a Kintinu beyangalelanga longwa muna sikola zozo yo sia ngolo mu zaya tanga ye soneka. Ediadi dikubasadisanga mu lenda kuyilunga-lunga. Kansi, betoma yangalelanga mu kuma kia malongi betambulanga muna vwa kisi nsi muna Kintinu kia Nzambi. Muna nkutakani ya Kikristu, Yave okubikanga sikola za longoka tanga ye soneka. Amase bekasakeswanga mu sadisa wan’au bazaya o tanga. Konso ngonde ntaudi akwikizi ovaikisanga ma Eyingidilu mole ye Despertai! imosi. Malongi mayingi ma Nkand’a Nzambi mekalanga muna yinkanda-nkanda yayi. Avo tangidi malongi mole konso lumbu, muna ngonde mosi olenda tanga yinkanda-nkanda yayi yawonso. Muna mpila yayi, okwamanana vwa nluta mia longwa muna nkubik’a Kintinu kia Nzambi.
14. (a) Aweyi tulongelwanga? (b) Nkia luludiku lwa Fuku wa Nsambila ya Esi Nzo otoma sadilanga?
14 Konso lumingu, awana bena ye kisi nsi muna Kintinu kia Nzambi belongwanga muna nkutakani zau. Kasikil’owu, e Sikola ya Salu kia Kimfumu, ivangamanga mu kolo kia mvu makumasambanu, isadisanga alongoki mu kituka se alongi ambote a Diambu dia Nzambi. Nga wakisonekese kala muna sikola yayi? Ke kolo ko, ntaudi akwikizi yo lulungalalu wasikidisa Fuku wa Nsambila ya Esi Nzo muna konso lumingu. E nkubika yayi yisadisanga esi nzo mu kumika ungudi wau. Nga osadilanga malongi mevaikiswanga muna nkanda mieto? *
15. Nki’elau diampwena tuna diau?
15 O wantu muna tuyalu twa nza, bevavanga fila akaka bayikama e bundu diau dia mbumba. Akaka bekwendanga nkutu muna nzo ye nzo mu vava ana balenda kubayikama. Muna nza yawonso, nkangu a Kintinu kia Nzambi muna songa vo beyikamanga Kintinu, besamunanga nsangu zambote kw’awonso muna mpambu za nzila yamuna nzo ye nzo. Nze una uyikilu mun’elongi divitidi, Eyingidilu disamunanga Kintinu kia Yave i nkanda ulutidi kaywa mu nza yawonso. O samuna nsangu za Kintinu kia Nzambi kw’akaka i’lau diampwena tuna diau. Nga osalanga salu kia umbangi yo vema kwawonso?—Mat. 28:19, 20.
16. Aweyi olenda songela vo u muntu ambote olenda kota muna Kintinu kia Nzambi?
16 Ke kolo ko, Kintinu kia Nzambi kaka kiyala nza yawonso. Wantu awonso nsiku mia Kintinu kia Nzambi kaka bakala lemvokela. Nga u muntu ambote olenda kota muna Kintinu kia Nzambi? Eyayi i ntangwa ofwete songa vo u muntu ambote okala. Muna nzengo obakanga konso lumbu, vangilanga mawonso muna nkembo a Yave muna songa vo u muntu ambote okala muna Kintinu kia Nzambi.—1 Kor. 10:31.
[Mvovo Vana Yand’a lukaya]
^ tini. 11 Kasikil’owu, tala Despertai! dia Yuli 2011, lukaya lwa 24-27; Agositu 2011, lukaya lwa 10-13; ye Fevelelo 2012, lukaya lwa 3-9.
^ tini. 12 Tala Eyingidilu dia 15 kia ngonde Malusu 2012 lukaya lwa 30-31.
^ tini. 14 Tala Eyingidilu dia 15 kia Agositu, 2011, lukaya lwa 6-7 ye Salu Kieto kia Kintinu kia Yanuali 2011, lukaya lwa 3-6.
[Yuvu ya Longoka]
[Mvovo mia Sina muna lukaya lwa 14]
Nga olemvokelanga luludiku lwa Nkand’a Nzambi mu kuma kia Internet?
[Foto ina muna lukaya lwa 12]
Nga oyangalelanga nsambil’avelela yo lusansu lwandi nze wan’a Kora?
[Foto ina muna lukaya lwa 15]
Fuku wa Nsambila ya Esi Nzo ulenda kusadisa y’azolw’aku mu vwa kisi nsi muna Kintinu kia Nzambi
