Twiendejei bu Bana ba Kibundi ba Bulopwe!
Twiendejei bu Bana ba Kibundi ba Bulopwe!
“Wenu muswelo wa mwikadilo wikale mufwaninwe myanda-miyampe.”—FID. 1:27.
USA KULONDOLOLA NAMANI?
Le i bāni babwanya kwikala bana ba kibundi ba Bulopwe?
Le i bika byotufwaninwe kulonga pa mwanda utala ludimi lwa Bulopwe, mānga ne bijila?
Le bana ba kibundi ba Bulopwe balombolanga namani amba basenswe misoñanya ya Leza?
1, 2. Mwanda waka madingi a Polo ku kipwilo kya Fidipai ādi na shintulwilo ya pa bula?
MUTUMIBWA Polo wākankamikile kipwilo kya Fidipai amba “wenu muswelo wa mwikadilo wikale mufwaninwe myanda-miyampe.” (Tanga Fidipai 1:27.) Kishima kya Kingidiki kingidije Polo bu “muswelo wa mwikadilo” kibwanya kushintulula ne bu “kwiendeja bu bana ba kibundi.” Uno musemwa wādi na shintulwilo ya pa bula ku kipwilo kya Fidipai. Mwanda waka? Mwanda bimweka amba Fidipai kyādi kibundi kyādi kibadilwa mu bibundi bitongwe mwādi bekadi bāpelwe kiyukeno kya bu mwanā kibundi wa Loma. Bana ba kibundi ba Loma bādi mu Fidipai ne kujokoloka Umbikalo onso wa Loma bādi beanya pangala pa kyepelo kyabo ne kulamwa mu muswelo wa pa bula na bijila bya Loma.
2 Bantu ba mu kipwilo kya Fidipai bādi na bubinga bukatampe bwa kwianinya. Polo wēbavulwije amba byobādi Bene Kidishitu bashingwe māni, bu bana ba kibundi bwabo bwādi “mūlu.” (Fid. 3:20) Bādi bana ba kibundi, ke ba umbikalo wa muntupo mhm, ino i ba Bulopwe bwa Leza. Mu uno muswelo, bādi balamwe ne kweselwa mu muswelo keudingakanibwapo.—Ef. 2:19-22.
3. (a) Lelo i bāni badi na mukenga wa kwikala bu bana ba kibundi ba Bulopwe? (b) Lelo i bika byotusa kubandaula mu kino kishinte?
3 Musoñanya wa Polo wa kwikala ‘bana ba kibundi’ utala nakampata boba bakabikala na Kidishitu mūlu. (Fid. 3:20) Ino, kumutamba mukwabo, ubwanya kutala ne boba bakekala bu babikalwa ba Bulopwe bwa Leza pano panshi. Mwanda waka? Mwanda Bene Kidishitu bonso bepāne bengidilanga Mulopwe umo Yehova, kadi balondanga misoñanya imo yonka. (Ef. 4:4-6) Dyalelo bantu baloñanga bukomo pa kubwanya bisakibwa bya kwikala bana ba kibundi mu ntanda ya ntundubuko. Mwene batwe bo bene bafwaninwe kukwata na mutyika mukenga wa kwikala bu bana ba kibundi ba Bulopwe! Pa kwivwanija ne pa mfulo dino dyese, tubandaulei kukwatañana kumo-kumo kudi pa bukata bwa kwikala mwanā kibundi wa umbikalo wa muntu ne bu mwanā kibundi wa Bulopwe bwa Leza. Kupwa tusa kubandaula bintu bisatu byotufwaninwe kulonga shi tusaka kulama bulēme bwetu bwa kwikala bu bana ba kibundi ba Bulopwe.
BISAKIBWA PA KWIKALA BU MWANĀ KIBUNDI
4. Lelo ludimi lutōka i bika ne ‘twisambanga’lo’ namani?
4 Kwifunda ludimi. Maludiki amo a bantu alombanga boba basaka kwikala bu bana ba kibundi befunde ludimi lwa ntanda. Nansha ke pa kupwa kwitabijibwa bu bana ba kibundi, bantu bafwaninwe kulonga bukomo mu bula bwa myaka pa kuyuka ludimi lweni. Babwanya kuyuka bukidibukidi bijila bya ngalamele, ino bikebalomba kitatyi kilampe pa kuyuka kutela bishima senene. Mu muswelo umo onka, Bulopwe bwa Leza bulombanga bana ba kibundi babo befunde byobya bitela Bible bu “ludimi lutōka.” (Tanga Zefenia 3:9.) Le luno ludimi i ludimi’ka? I bubinebine butala padi Leza ne pa mpango yandi, butanwa mu Bible. ‘Twisambanga’ ludimi lutōka kitatyi kyotwiendeja mungya bijila ne misoñanya ya Leza. Bana ba kibundi ba Bulopwe bwa Leza babwanya kwifunda bukidibukidi bufundiji bwa kyalwilo bwa mu Bible ne kubatyijibwa. Inoko nansha shi abapu kubatyijibwa, bafwaninwe kulonga bukomo bwa ‘kwisamba’ biyampe shē ludimi lutōka. Muswelo’ka? Batwe bonso tufwaninwe kwingidija mu būmi bwetu misoñanya ya mu Bible yotwifunda.
5. Mwanda waka tufwaninwe kwifunda byonso byotubwanya pa mānga ya bulongolodi bwa Yehova?
5 Kwifunda mānga. Muntu usaka kwikala bu mwanā kibundi mu buludiki bwa muntu, ufwaninwe kwifunda mānga imoimo itala buludiki’bwa. E monka ne boba basaka kwikala bu bana ba kibundi ba Bulopwe, bafwaninwe kwifunda byonso byobabwanya bitala pa Bulopwe bwa Leza. Bandaula kimfwa kishile bana ba Kola bādi bengila mu Isalela wa kala. Bādi baloadilwe bininge kibundi kya Yelusalema ne kifuko kya kutōtela’mo kyādi’mo, kadi bādi basenswe kubanga mānga ya kibundi. Byēbatulumwine mpata i bine byādi byelekeja kibundi ne kifuko kya kutōtela’mo, ke buyapo bwa mabwe ne biloba. Yelusalema kyādi “kibundi kya Mulopwe mukatampe,” Yehova, mwanda kyādi kitako kya mutōtelo utōka. Kyādi kibundi mwādi mufundijibwa Bijila bya Yehova. Yehova wālombwele kanye kandi ka lusa ku bantu bādi babikelwe na Mulopwe wa Yelusalema. (Tanga Mitōto 48:1, 2, 9, 12, 13.) Pamo bwa abo, le nobe usakanga kwifunda ne kwisambila pa mānga itala kipindi kya pano panshi kya bulongolodi bwa Yehova? Kitatyi kyonso kyowifunda myanda itala bulongolodi bwa Yehova ne muswelo ukwatakanya Yehova bantu bandi, ukamona amba Bulopwe bwa Leza budi’ko binebine. Mutyima obe wa kusapula myanda miyampe ya Bulopwe ukatamina’ko.—Yel. 9:24; Luka 4:43.
6. Mwanda waka i kyendele’mo shi Yehova witusakila twifunde ne kukōkela bijila bya Bulopwe ne misoñanya?
6 Kuyuka bijila. Maludiki a bantu alombanga babikalwa babo befunde ne kukōkela bijila bya ntanda. O mwanda i kyendele’mo shi Yehova witusakila twifunde ne kukōkela bijila ne misoñanya ya buludiki buludika bana bonso ba kibundi ba Bulopwe. (Is. 2:3; Yoa. 15:10; 1 Yoa. 5:3) Bijila bya muntu bikalanga nyeke na bilubo kadi byampikwa koloka. Kwishila na kino, “mukanda-wabijila wa Yehova i mubwanininye.” (Mit. 19:7) Le tuloelelwanga mu bijila bya Leza ne kutanga Kinenwa kyandi difuku ne difuku? (Mit. 1:1, 2) Muswelo umo’tu otukokeja kuyuka bijila bya Leza i na kwifunda’byo batwe bene. Ke kudipo muntu nansha umo ubwanya kwifunda’byo pa kyetu kyaba.
BANA BA KIBUNDI BA BULOPWE BASENSWE MISOÑANYA YA LEZA
7. Lelo i musoñanya’ka wa peulu ulondanga bana ba kibundi ba Bulopwe?
7 Pa kwikala nyeke bana ba kibundi ba Bulopwe, ketufwaninwepo enka kuyuka misoñanya ya Leza, ino tufwaninwe ne kwiisanswa. Bana ba kibundi bavule ba mu maludiki a bantu banenanga amba betabije bijila ne misoñanya ya ntanda yobashikete’mo. Inoko, kitatyi kyobamona amba kijila kampanda kekidipo na mvubu ne amba kekudipo muntu nansha umo ulondeja’kyo, batyumunanga kijila’kya. Divule, bano bantu ‘basakanga kutōkeja bantu pa mityima.’ (Kol. 3:22) Bana ba kibundi ba Bulopwe balondanga musoñanya wa peulu. Tukōkelanga bijila bya Leza na nsangaji, nansha shi kekudipo muntu nansha umo ulondeja’byo. Mwanda waka? Mwanda tusenswe Mujidiki wa Bijila.—Is. 33:22; tanga Luka 10:27.
8, 9. Le i muswelo’ka okayuka shi usenswe na bubine bijila bya Leza?
8 Lelo i muswelo’ka okayuka shi usenswe na bubine bijila bya Leza? Bandaula molongelanga kitatyi kyobakupa madingi pa bintu bikutala’nka abe mwine—kimfwa, pa mwanda utala muvwadilo ne mwidyangwilo. Kumeso kwa kwikala mwanā kibundi wa Bulopwe, wadi padi uvwala bya nkenga nansha mu muswelo ulangula masenda. Kitatyi kyadi kyenda kitama buswe boswele Leza, wefundile kuvwala mu muswelo umupeja bulēme. (1 Tem. 2:9, 10; 1 Pet. 3:3, 4) Ubwanya kumona amba pano kovwalanga pa mvwadilo. Ino, le ukalonga namani shi mukulumpe wakulombola amba muvwadilo obe ukukajanga bininge basapudi bavule pa kipwilo? Le ukalonga’po namani? Lelo ukakimba kwibingija, kukalabala nansha kūmija mutyima? Kijila kya kyalwilo kya Bulopwe bwa Leza i kya’mba, bana ba kibundi bonso beule Kidishitu. (1 Pet. 2:21) Polo wāsonekele pangala pa kimfwa kya Yesu amba: “Bātwe bonso, twikale kwitōkeja, au ku mutyima wa mukwabo, ne bintu biyampe mwakwitamijija. Ke-muntu aye Kidishitu kētōkejepo aye mwine.” (Loma 15:2, 3) Pa mwanda wa kulama ndoe ya kipwilo, mwine Kidishitu mutame ku mushipiditu ufwaninwe kulonga bintu kwampikwa kusanshija mityima ya mundamunda ya bakwabo.—Loma 14:19-21.
9 Tubandaule’ko myanda mikwabo ibidi ya kuta’ko mutyima bininge: muswelo otumona kusambakena pamo ne busongi. Boba kebaikele bu bana ba kibundi ba Bulopwe bwa Leza, babwanya kwitabija kusambakena pamo kwa bantu ba ngitu imo, ne kulanga’mba kutala bifwatulo bya bantu badi mutaka kekudipo na kyaka ne amba makoji ne dilubu i myanda itala muntu mwine. Bana ba kibundi ba Bulopwe ibaleke uno mumweno mubi ne ngikadila ya kwisakila. Nansha Bene Kidishitu bavule byobādi balonga bya bulongelonge pa kala, ino pano bamwene kusambakena pamo ne busongi bu kyabuntu kitambile kudi Leza. Basenswe misoñanya ya peulu ya Yehova ne kwitabija na mutyima umo amba, boba bendelela kwiendeja mu ngikadilo ya busekese kebafwaninwepo kwikala bu bana ba kibundi ba Bulopwe. (1 Kod. 6:9-11) Ino bayukile kadi amba mutyima i ndimbañani. (Yel. 17:9) O mwanda basangedile kupebwa bidyumu bipotoloke bibakwasha bendelele kulama misoñanya ya peulu ya mu mwikadilo.
BANA BA KIBUNDI BA BULOPWE BASANGELANGA BIDYUMU
10, 11. Lelo i bidyumu’ka biletwanga kitatyi ne kitatyi na Bulopwe bwa Leza, ne uloñanga namani pa bino bidyumu?
10 Maludiki a bantu akokeja kuleta bidyumu bya mwa kwikadila na bukomo bwa ngitu bitala pa bidibwa ne bundapi. I bimweke patōka amba, bidibwa ne bundapi bonso ke bubipo. Ino shi lawa kampanda ileta kyaka, buludiki bukokeja kuleta bidyumu na bujalale mwanda wa kukinga bana ba kibundi. Shi buludiki kebulongelepo namino, bukalambikwa amba budi na kalengwa. Mo monka ne Bulopwe bwa Leza nabo buletanga pa kitatyi kifwaninwe bidyumu bitala pa mwikadila kampanda ne pa byaka bya ku mushipiditu. Kimfwa, pano Entelenete ibaikala bu dishinda dingidijibwa mwanda wa kwisamba, kufunda ne kwipwija mukose. Bulongolodi bwa Leza bwingidijanga Entelenete ne kulonga nayo bintu bivule biyampe. Inoko, mateba mavule a Entelenete aletanga kyaka mu mwikadilo ne ku mushipiditu. Mateba a web alombolanga bifwatulo bya bantu badi mutaka, onanga bininge būmi bwa ku mushipiditu bwa bana ba kibundi ba Bulopwe. Mu makumi na makumi a myaka, kabumbo ka umpika wa binebine ketudyumunanga’nka kwitudyumuna pangala pa ano mateba. Bine tufwijanga’ko pangala pa bino bidyumu bitala būmi bwa ku mushipiditu!
11 Mu ino myaka, kudi diteba dikwabo dya Entelenete pendanga bantu bavule—dine dikokeja kukwasha shi dingidijibwa na budyumuku. Inoko, ano mateba, ayukene bu mateba a web a bantu bonso, nao adi na bukomo bukatampe bwa konakanya. Akokeja kutweja muntu mu kipwano kibi. (1 Kod. 15:33) Nanshi ke kya kutulumukapo shi bulongolodi bwa Leza buleta bidyumu na bujalale pa mwanda utala kwingidija ano mateba. Lelo kodi mutange myanda ya panopano ilupwilwe na umpika wa binebine udi na manwa itala pa kwingidija mateba a kyungwija? Bine kebifwaninwepo kwingidija ano mateba kwakubulwa kutanga ino myanda! * Kulonga namino kudi pamo bwa kutoma lawa ya bukomo pakubulwa kutanga bidyumu bilembelwe pa mukomba.
12. Mwanda waka kusūla bidyumu i bulembakane?
12 Boba basūlanga bidyumu biletwa na umpika wa binebine kebatunyangapo kwisanshija abo bene ne baswe babo. Bamo bamunwanga na kutala bifwatulo bya bantu badi mutaka nansha kulonga busekese, kupwa beongola abo bene na kulanga amba Yehova kabwanyapo kumona byobya byobalonga. Bine kulanga amba tubwanya kufya bilongwa byetu kudi Leza i bulembakane! (Nk. 15:3; tanga Bahebelu 4:13.) Leza usakanga kukwasha bano bantu kadi utumanga bukidibukidi bantunguluji bandi ba pano panshi mwanda wa kwibakwasha. (Ngat. 6:1) Inoko, monka kemubwaninyapo maludiki a bantu kwitabija muntu bu mwanā kibundi ulonga bilongwa kampanda, Yehova nandi kaketabijapo boba batyumuna misoñanya yandi pampikwa kwisāsa bu bana ba kibundi. * (1 Kod. 5:11-13) Shako, aye i wa lusa. Boba besāsa ne kushinta mwiendelejo wabo babwanya kujokeja kipwano kilumbuluke na Yehova ne kwikala nyeke bu bana ba kibundi ba Bulopwe. (2 Kod. 2:5-8) Bine twi balēme’po kashā pa kwingidila uno Mulopwe wa buswe!
BANA BA KIBUNDI BA BULOPWE BAKWETE MASOMO NA MUTYIKA
13. I muswelo’ka ulombolanga bana ba kibundi ba Bulopwe amba bakwete bufundiji na mutyika?
13 Maludiki a bantu mavule aloñanga bukomo bwa kufundija bana ba kibundi. Ateakanyanga’ko masomo a kufundija kutanga ne kulemba ne kufundija mingilo ya busendwe. Bana ba kibundi ba Bulopwe basangelanga ano masomo a ntanda ne kwifunda na kininga kutanga, kulemba, ne kwifutyila abo bene. Byobadi bana ba kibundi ba Bulopwe bwa Leza, bakwete na mutyika bufundiji bobafundijibwa. Yehova wibafundijanga kutanga ne kulemba kupityila ku kipwilo kya bwine Kidishitu. Bambutwile i bakankamikwe kutangila babo bana bankasampe. Umpika wa binebine ulupulanga Kweji ne Kweji buvule kampanda bwa mapaje adi na myanda imanine pa Bible, mu Kiteba kya Mulami ne Réveillez-vous ! Shi utange mapaje 2 difuku ne difuku, ukamwena nyeke mu dino dishinda dya bufundiji bwa Bulopwe.
14. (a) Le i bufundiji’ka botufundijibwanga? (b) Le i madingi’ka atala pa Butōtyi bwa Kisaka bwa kyolwa osa kwingidija?
14 Bana ba kibundi ba Bulopwe bafundijibwanga yenga ne yenga ku kupwila kwa pa kipwilo. Kimfwa, Masomo a Mwingilo wa Kiteokratike, i makwashe bana ba masomo mu bula bwa myaka makumi asamba ne musubu, bekale bafundiji bafike’po ba Kinenwa kya Leza. Le kodi mwilembeje ku ano masomo? Mu ino myaka, umpika wa binebine imutūle’ko Butōtyi bwa Kisaka bwa kyolwa bwa yenga ne yenga. Ino mpangiko iningishanga bumo bwa kisaka. Lelo ubulwe’po kwingidija madingi alupwilwe mu mabuku etu? *
15. Le i dyese’ka dikatampe dyotudi nadyo?
15 Bana ba kibundi ba maludiki a bantu batompanga kukwatakanya patōkelela kitango kya politike, enka ne kwenda ku njibo ne njibo mwanda wa kutonona bantu balonge uno muswelo. Bana ba kibundi ba Bulopwe nabo bakwatakanyanga na bukankamane Bulopwe bwa Leza mu bipito ne ku njibo ne njibo mu muswelo kewamwekele kashā. Na bubine, enka na mokilombwedilwe mu kishinte kibadikile, Kiteba kya Mulami, kine kisapula Bulopwe bwa Yehova, i dipepala dyabanibwa bininge dyalelo pano pa ntanda! Dyese dikatampe dyotudi nadyo i dya kusapwila bakwetu myanda ya Bulopwe bwa Leza. Lelo utambilanga mu mwingilo wa busapudi na bupyasakane?—Mat. 28:19, 20.
16. I muswelo’ka okelombola bu mwanā kibundi muyampe wa Bulopwe bwa Leza?
16 Pano pano ponka, Bulopwe bwa Leza busa kwikala umbikalo umo kete usa kuludika ino ntanda. Busa kutala myanda yonso ya mu būmi bwa bukile bukya, ke enkapo būmi bwa ku mushipiditu ino i ne bwa ku ngitu. Lelo ukekala mwanā kibundi muyampe wa Bulopwe bwa Leza mu kine kitatyi’kya? Kino kyo kitatyi kya kulombola amba, ukekala bu mwanā kibundi muyampe. Mu butyibi bonso bokwata difuku ne difuku, longela bintu byonso mu ntumbo ya Yehova; ne kadi kulonga namino kukalombola amba udi nyeke mwanā kibundi muyampe wa Bulopwe bwa Leza.—1 Kod. 10:31.
[Kunshi kwa dyani]
^ Kimfwa, tala Réveillez-vous ! wa Kweji 7, 2011, paje 24-27; Kweji 8, 2011, paje 10-13; ne Kweji 2, 2012, paje 3-9.
^ Tala Kiteba kya Mulami kya Falanse kya 15 Kweji 3, 2012, paje 30-31.
^ Tala Kiteba kya Mulami kya Falanse kya 15 Kweji 8, 2011, paje 6-7 ne Mwingilo Wetu wa Bulopwe wa Kweji 1, 2011, paje 3-6.
[Bipangujo bya Kifundwa]
[Bushintuludi pa paje 21]
Lelo utele mutyima ku bidyumu bimanine pa Bible bitala Entelenete?
[Kifwatulo pa paje 19]
Lelo uloelelwe mutōtelo utōka ne mānga yao pamo bwa bana ba Kola?
[Kifwatulo pa paje 22]
Butōtyi bwa Kisaka bwa kyolwa bukokeja kukukwasha abe ne baswe bobe mwikale bana ba kibundi bayampe ba Bulopwe
