Tyindei Omuenyo Ulekesa Okuti Muvatyitua Tyilongo Vouhamba!

“Tyindei omuenyo ngovatyitua tyilongo.” —FILIPENSES 1:27, okatoi.

OÑGENI MOKUMBULULA?

Ovalie vapondola okukala ovanatyilongo Vouhamba wa Huku?

Oityi tyihangununa okulilongesa elaka Liouhamba, nehipululo, novitumino?

Oñgeni ovanatyilongo Vouhamba valekesa okuti vehole ovitumino via Huku?

1, 2. Omokonda yatyi elondolo Paulu aavelele ewaneno mo Filipu ankho velii nawa?

 APOSTOLU Paulu wapamekele ewaneno mo Filipu opo “vakale novituwa oviwa vielikuata no nondaka onongwa.” (Tanga Filipenses 1:27.) Ondaka yo Gregu “vakale” Paulu aundapesa, tupu ipondola okupitiyua okuti “tyindei omuenyo ngovatyitua tyilongo.” Onondaka ombo ankho mbuiwe nawa Novakristau vewaneno mo Filipu. Mokonda yatyi? Omokonda Outumini wo Roma ankho uyeka ova Filipu vakale ngatyina vatyitua mo Roma, nokuamenua novitumino vio Roma. Ova Filipu ankho velimphanda mokonda yokukala ovatyitua tyilongo mo Roma iya otyo ankho tyivekuatesako okuamenua novitumino vio Roma.

² Ovakristau mewaneno lio Filipu ankho vena ehunga enene liokulimphanda. Mahi, Paulu wevehinangelesa okuti mokonda Ovakristau ovalembulwa, otyilongo tyavo tyikahi “keulu.” (Filipenses 3:20) Ovo kavekahi konthele youtumini wovanthu, mahi vekahi konthele Youhamba wa Huku. Ouhamba wa Huku uveamena, nokuveavela ouwa vahapondola okupewa noutumini omukuavo.—Efésios 2:19-22.

3. (a) Olie upondola okukala omutyitwa tyilongo Wouhamba? (b) Oityi matulilongesa monthele ino?

³ Elondolo lia Paulu “liokutyinda omuenyo ngovatyitua tyilongo,” haunene opala vana mavakatumina na Kristu keulu. (Filipenses 3:20) Mahi, tupu lipondola okulandulwa na vana mavakatuminwa Nouhamba wa Huku pano pohi. Omokonda yatyi? Omokonda Ovakristau aveho velipakula, vaumbila Ohamba Jeova, iya vena okulandula ovitumino vike vala. (Efésios 4:4-6) Hono, ovanthu valinga ononkhono ononene opo vakale ovanatyilongo votyilongo tyina olumono olunyingi. Mahi, omphitilo yokukala ovatyitwa tyilongo Vouhamba yakolela vali. Opo tupande unene elao olio, tutalei  ovipuka vimwe vielifwa, konthele yetyi tyiitwa opo omunthu akale omutyitwa tyilongo wotyilongo tyimwe, nomutyitwa tyilongo Wouhamba wa Huku. Matulilongesa ovipuka vitatu tuna okulinga inkha tuhanda okutualako okukala ovana tyilongo Mouhamba wa Huku.

OVITUMINO VIITWA MOTYILONGO

4. Elaka liasukuka oityi, iya oñgeni “tupopia” elaka olio?

⁴ Okulilongesa elaka. Ovatumini vamwe vaita okuti vana vahanda okuya motyilongo vena okupopia nawa elaka liotyilongo tyavo. Ovanthu vamwe valinga ononkhono ononene omanima omanyingi opo vapopie nawa elaka epe, namphila vetaveluale okukala motyilongo. Vapondola okunoñgonoka liwa-liwa onondaka ononyingi, mahi vesukisa vali omuvo opo vembupopie nawa. Tupu, vana vahanda okukala konthele Youhamba wa Huku vesukisa okulilongesa etyi Ombimbiliya iihana okuti “elaka liasukuka.” (Tanga Sofonias 3:9.) Elaka olio oityi? Otyili konthele ya Huku, nevangelo liae livasiwa Mombimbiliya. “Tupopia” elaka liasukuka tyina ovituwa vietu vilikuata novitumino via Huku. Ovatyitwa tyilongo Vouhamba wa Huku vapondola okunoñgonoka liwa-liwa omalongeso otete Ombimbiliya, avambatisalwa. Mahi, konyima yombatisimu yavo, vena okulinga ononkhono mbokutualako “okupopia” vali nawa elaka liasukuka. Oñgeni matutyilingi? Kese umwe puonthue wesukisa okutualako okulinga ononkhono mbokutyinda omuenyo welikuata netyi tuelilongesa Mombimbiliya.

5. Omokonda yatyi tuesukisila okulilongesa atyiho konthele yehipululo lieongano lia Jeova?

⁵ Okulilongesa ehipululo. Omunthu uhanda okukala omunatyilongo, una okulilongesa omahipululo amwe konthele yovatumini votyilongo otyo. Tupu, vana vahanda okukala ovanatyilongo Vouhamba, vesukisa okulilongesa atyiho konthele Youhamba wa Huku. Tala ongeleka yovana va Koraa, ankho vaundapa momphangu yefendelo mo Isilayeli kohale. Ankho vehole o Jelusalei, nomphangu yefendelo nokupopia konthele yomahipululo epundaumbo, ha mokonda vala ankho ongwa, mahi omokonda ankho “epundaumbo lio Hamba omunene,” Jeova. Ankho omo mulongesilwa Ovitumino via Jeova. Vana vatuminwa Nohamba yo Jelusalei ankho ovanthu vapandwa nokuholwe na Jeova. (Tanga Salmo 48:1, 2, 9, 12, 13.) Ngovana va Koraa, nove uhanda okulilongesa, nokuhipulula konthele yeongano lia Jeova likahi pano pohi? Tyina ulilongesa vali konthele yeongano lia Huku, noñgeni Jeova avatela ovanthu vae, Ouhamba wa Huku maukala vali wotyotyili kuove. Ehando liove liokuivisa onondaka onongwa Mbouhamba maliliyawisa vali.—Jeremias 9:24; Lucas 4:43.

6. Omokonda yatyi tyaviuka okukevelela Jeova etuite tulilongese nokutavela ovitumino viae?

 ⁶ Okunoñgonoka ovitumino. Ovatumini vahanda vana veya okukala motyilongo tyavo velilongese nokutavela ovitumino viotyilongo. Tupu tyaviuka okukevelela Jeova aite ku aveho vahanda okukala ovanatyilongo Vouhamba wae velilongese, nokutavela ovitumino viae. (Isaías 2:3; João 15:10; 1 João 5:3) Ovitumino viovanthu kaviafuilepo iya vipondola okuponya. Mahi, “ovitumino via Jeova viafuapo.” (Salmo 19:7) Okuti tuhambukilwa ovitumino via Huku, nokutanga apeho Ondaka yae? (Salmo 1:1, 2) Kese umwe puonthue alinge ononkhono mbokulilongesa ovitumino via Huku. Nawike upondola okutulingilako.

OVANATYILONGO VOUHAMBA VEHOLE OVITUMINO VIA HUKU

7. Omokonda yatyi ovanatyilongo Vouhamba vetavelela ovitumino via Huku?

⁷ Opo tutualeko okukala ovanatyilongo Vouhamba, tuesukisa okunoñgonoka ovitumino via Huku, nokukala nohole navio. Ovatyitwa tyilongo ovanyingi vapopia okuti vetavela ovitumino viomotyilongo vakala. Mahi, tyina vahahande okutavela otyitumino tyimwe iya avasoko okuti nawike uveete, vetyitauluka. Pamwe, vetavela vala ovitumino opo “vahambukiswe ovanthu.” (Colossenses 3:22) Ovanatyilongo Vouhamba vetavela ovitumino via Huku. Tuhambukilwa okutavela ovitumino via Huku namphila pehena ou utuete. Mokonda yatyi? Omokonda tuhole Jeova, Omuavi Wovitumino.—Isaías 33:22; tanga Lucas 10:27.

8, 9. Oñgeni monoñgonoka inkha tyilityili uhole ovitumino via Huku?

⁸ Oñgeni monoñgonoka inkha tyilityili uhole ovitumino via Huku? Tala oñgeni ukala tyina upewa elondolo konthele yomuvalo wove nokulifiwiswa. Etyi nkhele uhenelilongese otyili, hamwe ankho uvala monkhalelo yahaviukile ine ovikutu viokulihandesa. Puetyi ohole yove na Huku yeliyawisa, welilongesa okuvala monkhalelo imuhivilika. (1 Timóteo 2:9, 10; 1 Pedro 3:3, 4) Ove hamwe usoka okuti pahe uvala monkhalelo yaviuka. Mahi inkha omukulu weuaneno ukutolela okuti ovanyingi mewaneno vasoka okuti onkhalelo uvala kayaviukile, molingi ñgeni? Monumana, motatesila mutyimwe, ine moanye okulinga omapiluluko? Otyitumino tyimwe tyavilapo ovanatyilongo Vouhamba vena okutavela, okuhetekela Kristu. (1 Pedro 2:21) Apostolu Paulu wahoneka konthele yongeleka ya Jesus, okuti: “Kese umwe puonthue ahambukiswe mukuavo ku tyina tyaviuka pala epameko liae. Mokonda alo umwe Kristu kelihambukisilwe oe muene.” (Romanos 15:2, 3) Opo mewaneno mutualeko nombembwa, Omukristau walongoka wesukisa okukala apeho nehando liokulityilika okulinga ovipuka vihahambukiswa vakuavo.—Romanos 14:19-21.

⁹ Pahe soka konthele yoñgeni utala otyihola, notyinepo. Vana vehenekale ovanatyilongo Vouhamba wa Huku vasoka okuti katyapengele ovalume ine ovakai okulala poyavo, okutala omikanda no nosinema mbovanthu vahavalele, oumbalehi, nokulihenga. Mahi, ovanatyilongo Vouhamba vayekapo ovituwa ovio. Namphila Ovakristau ovanyingi ankho vatyinda omuenyo wasila, pahe vatala otyihola notyinepo ngatyina otyiawa tya Huku. Vehole ovitumino viavilapo via Jeova nokutavela nomutima auho okuti vana vatualako okulinga ovipuka ovio, kavatokalele okukala ovanatyilongo Vouhamba. (1 Coríntios 6:9-11) Mahi, tupu vanoñgonoka okuti omutima  omukengeleli. (Jeremias 17:9) Moluotyo, vahambukwa tyina vapewa onondonga mbuvekuatesako okutualako okuendela movitumino via Huku.

OVANATYILONGO VOUHAMBA VETAVELA OMALONDOLO

10, 11. Omalondolo patyi akolela tupewa Nouhamba wa Huku? Oñgeni utala omalondolo oo?

¹⁰ Ovatumini vapondola okupopila ovanthu veliyunge konthele yovikulia vimwe novihemba. Tyotyili, otyo katyilekesa okuti ovikulia aviho novihemba kavisilivila. Mahi inkha pena etyi tyihekahi nawa, ovatumini vapondola okulondola ovanthu opo veliamene. Otyo otyilinga tyovatumini. Tupu, Ouhamba wa Huku, pamwe ulondola konthele yovipuka vipondola okunyona ovituwa vietu noupanga wetu na Jeova. Mongeleka, o Internete ipondola okutukuatesako okutomphola, nokulilongesa, nokunyana. Eongano lia Huku, liundapesa o Internete opo valinge ovipuka oviwa. Mahi, ono site ononyingi mo Internete mbuna ovipuka vipondola okunyona ovituwa vietu noupanga wetu na Jeova. Ono site mbulekesa ovanthu vahavalele, mbupondola okunyona mopaspilitu ovanatyilongo Vouhamba. Mokueenda kuomanima omanyingi, omupika wekolelo ukahi nokutulondola konthele yono site ombo, iya tupandula unene omalondolo oo!

¹¹ Hono, ovanyingi vekahi nokuundapesa o site onkhuavo. Ono site ombo mbuihanwa okuti redes sociais. Mbupondola okutukuatesako, mahi tupu mbunyona. Mbupondola okutukalesa nomapanga omavi. (1 Coríntios 15:33) Otyo eongano lia Huku lituavelela omalondolo aviuka konthele yokuundapesa ono site ombo. Okuti watangale ononthele ambuho mbalingwa nomupika wekolelo mbupopia konthele yoñgeni tuna okuundapesa ono site mbono redes sociais? Tyotyili, okuundapesa ono site ombo, ohatange ononthele ombo owova! a Otyo tyelifwa nokunwa ovihemba vina ononkhono ononene, ohatange onondonga mbukahi popapelo uvasa mokati.

12. Omokonda yatyi okutomba omalondolo owova?

¹² Vana vatomba omalondolo omupika wekolelo velinyona ovo muene, navana vehole. Vamwe vetyiliya okutala omikanda no nosinema mbovanthu vahavalele ine okulinga oundalelapo iya avasoko okuti Jeova kapondola okumona etyi vekahi nokulinga. Owova okusoka okuti tupondola okuholeka ku Jeova ovipuka tulinga! (Provérbios 15:3; tanga Hebreus 4:13.) Huku uhanda okukuatesako kese umwe puonthue, moluotyo utuavela ovakulu vewaneno opo vetukuateseko. (Gálatas 6:1) Jeova kamayeke vana vatualako okutomba ovitumino viae vakale ovanatyilongo Vouhamba wae, ngetyi ovatumini vahayeke motyilongo mukale onongangala. b (1 Coríntios 5:11-13) Mahi Jeova omukuankhenda. Vana velivela avayekepo okulinga ovivi, vapondola okukala vali omapanga a Jeova nokutualako okukala ovanatyilongo Vouhamba. (2 Coríntios 2:5-8) Elao  limwe enene okuumbila Ohamba ngoyo ina oluembia!

OVANATYILONGO VOUHAMBA VAPANDA OKULONGESWA

13. Oñgeni ovanatyilongo Vouhamba valekesa okuti vapanda okulongeswa?

¹³ Ovatumini ovanyingi valinga ononkhono ononene mbokulongesa ovanthu votyilongo tyavo. Vatunga onosikola opo ovanthu velilongesilemo. Ovanthu va Huku vapanda onosikola ombo, mokonda omo velilongesila okutanga, nokuhoneka, nounongo vesukisa opo vavase ovilinga. Mahi, vapanda vali unene elongeso vapewa Mouhamba wa Huku. Jeova uundapesa ewaneno lio Vakristau opo alongese ovanthu vae. Ovohe vaavelwa ondundo opo vatangele ovana vavo ovatutu. Kese hanyi, omupika wekolelo ulinga omikanda ominyingi vio Mutala Womulavi no Despertai! Moluotyo, inkha utanga omafo evali kese nthiki mohanyi, motualako okupola ouwa kelongeso Jeova etuavela.

14. (a) Elongeso patyi tupewa? (b) Onondonga patyi konthele Yelilongeso Liombimbiliya Mombunga ove ulandula?

¹⁴ Kese simano, ovanthu va Huku valongwa momaliongiyo avo ewaneno. Mongeleka, mokueenda kuomanima 60, Osikola Yovilinga via Huku ikahi nokukuatesako ovalongwa okukala ovalongesi ovanongo Vondaka ya Huku. Okuti welihonekesale mosikola oyo? Tupu omupika wekolelo watoneka okupopia okuti tyesukisa okulinga Elilongeso Liombimbiliya Mombunga kese simano. Otyo tyikuatesako ombunga okukala tyeliwaneka. Okuti ukahi nokuundapesa onondonga mbukahi momikanda vietu konthele yotyo? c

15. Elao patyi enene tuna?

¹⁵ Ovanatyilongo vovatumini valunda vakuavo opo vayembe koutumini umwe wopulitika, alo umwe okuenda umbo na umbo. Ovanatyilongo Vouhamba wa Huku mouye auho, valekesa okuti vayemba Kouhamba oo pokuivisa umbo na umbo no momatapalo. Ngetyi tyalekesa onthele yokualamba, Omutala Womulavi, wivisa Ouhamba wa Jeova, hono omukanda ukahi nokuyandyaneswa vali mouye auho! Tuna elao enene liokupopila vakuetu konthele Youhamba wa Huku. Okuti ove ukahi nokuundapa nombili movilinga viokuivisa?—Mateus 28:19, 20.

16. Oñgeni molekesa okuti umunatyilongo omuwa Wouhamba wa Huku?

¹⁶ Apa katutu Ouhamba wa Huku oo vala maukatumina oohi aiho. Ovanthu mavahongolelwa vala novitumino Viouhamba. Okuti momuvo oo, mokakala omunatyilongo omuwa Wouhamba wa Huku? Ou omuvo wokutyilekesa. Kese nthiki, tyina ulinga omatokolo, linga ovipuka aviho pala okunkhimaneka Jeova, nokulekesa okuti ukahi konthele Youhamba wa Huku.—1 Coríntios 10:31.

[Onondaka Poutoi]

[Omapuko Elongeso]

[Onondaka Mbavilapo pefo 21]

Okuti utavela omalondolo Ombimbiliya konthele yo Internete?

[Olutalatu pefo 19]

Ngovana va Koraa, nove uhambukilwa efendelo liotyotyili nehipululo liefendelo?

[Olutalatu pefo 22]

Elilongeso Liombimbiliya Mombunga, lipondola okukuatesako ove nombunga yove okukala ovanatyilongo ovawa Vouhamba