Manugali Kayo Bilang Mibabaley na Panarian!

“Manugali kayo komon ya onnepeg ed maong a balita.”​—FIL. 1:27.

PANON MON EBATAN?

Siopa ray nayarin magmaliw a mibabaley na Panarian?

Antoy nepeg tayon gawaen nipaakar ed lenguahe, history, tan ganggan na Panarian?

Panon a nipanengneng na saray mibabaley na Panarian ya inaro da ray estandarte na Dios?

1, 2. Akin ya importantid kongregasyon ed Filipos so simbawa nen Pablo?

PINASESEG nen apostol Pablo so kongregasyon na Filipos a ‘manugali iran onnepeg ed maong a balita.’ (Basaen so Filipos 1:27.) Say Griegon salitan “manugali” ya inusar nen Pablo et nayari met a mankabaliksay “onkiwas bilang mibabaley.” Sayan balikas et walaan na importantin kabaliksan parad kongregasyon ed Filipos. Akin? Lapud nayarin inikdan na Empiryo na Roma iray taga Filipos na kanepegan a magmaliw ya mibabaley to tan proprotektaan ira na ganggan na Roma. Ipapasirayew na saray taga Filipos so pagmaliw dan mibabaley na Roma lapud saray benepisyon naawat da ya agnagagamoran na arum a totoo.

² Balet, walay mas maabig a rason pian manliket so kongregasyon na Filipos. Impanonot ed sikara nen Pablo a bilang alanaan a Kristiano, say kanepegan da bilang mibabaley et “walad tawen.” (Fil. 3:20) Sikaray mibabaley na Panarian na Dios, aliwan say gobierno na too. Kanian, panliketan day agnaparaan a proteksion tan bendisyon ya iter na Panarian na Dios.​—Efe. 2:19-22.

3. (a) Siopa ray apribilehyoan a magmaliw a mibabaley na Panarian? (b) Antoy aralen tayod sayan artikulo?

³ Say simbawa nen Pablo ya “onkiwas bilang mibabaley” et manunan onaplika ed saramay kaiba nen Kristo a manuley ed tawen. (Fil. 3:20) Balet, onaplika met itan ed saramay magmaliw a sakop Panarian na Dios diad dalin. Akin? Lapud amin a dedikadon Kristiano et manlilingkor ed saksakey ya Ari, si Jehova, tan parehon estandarte so tutumboken na amin a lingkor to. (Efe. 4:4-6) Gagawaen na totoo natan so amin a nagawaan da pian magmaliw iran mibabaley na sakey a mayaman ya bansa. Balet, mas balibalin pribilehyo so pagmaliw a mibabaley na Panarian! Pian naapresya tayon maong iyan pribilehyo, pantongtongan tayoy pigaran pamparaan na  saray kakaukolanen ed pagmaliw a mibabaley na gobiernoy too, tan ed pagmaliw a mibabaley na Panarian na Dios. Insan tayo aralen so taloran bengatla a kaukolan tayon gawaen pian mansiansia itayon mibabaley na Panarian.

SARAY KAKAUKOLANEN PIAN MAGMALIW A MIBABALEY

4. Anto so malinis a pansasalita, tan panon tayon “salitaen” itan?

⁴ Aralen so lenguahe. Diad pigaran bansa, kakaukolanen ed saray malabay a magmaliw a mibabaley so panaral na manunan lenguahe ra. Tan anggan sano mibabaley la ra, nayarin say arum et mankaukolan ni na pigaran taon antis dan nakabisado so balon lenguahe. Ompan tampol dan naaralan so grammar, balet ta nairapan iran aralen so dugan panangibalikas ed saray salita. Ontan met, kakaukolanen na Panarian na Dios ed saray mibabaley a manaral iray tatawagen na Biblia a “malinis a pansasalita.” (Basaen so Sofonias 3:9.) Anto itan a pansasalita? Satan so katuaan nipaakar ed Dios tan ed saray gagala to a walad Biblia. “Sasalitaen” tayoy malinis a pansasalita no say kondukta tayo et mitunosan ed saray ganggan tan prinsipyo na Dios. Nayarin naaralan a tampol na saray mibabaley na Panarian na Dios iray manunan bangat na Biblia tan manpabautismo. Balet, anggano abautismoan tayo la, nepeg tayon gawaey anggaay nayarian tayon “salitaen” so malinis a pansasalita. Panon? Nepeg a pansagpotan na balang sakey ed sikatayon iyaplika iray nanaaralan tayod Biblia.

5. Akin a kaukolan tayon aralen so amin a nayarian tayo nipaakar ed history na organisasyon nen Jehova?

⁵ Aralen so history. Say sakey a manaaplay parad citizenship ed sakey a bansa et kaukolan a walay amta to nipaakar ed history na gobierno na bansan laen to. Ontan met, lapud labay tayoy magmaliw a mibabaley na Panarian, kaukolan tayon aralen so amin a nayarian tayo nipaakar ed Panarian na Dios. Nepeg tayon aligen iray anak nen Kora a nanlingkor ed Israel nensaman. Inad-aro day Jerusalem tan say pasen a panagdayewan, tan labalabay dan itongtong so history na satan a syudad, aliwan lapud marakdakep itan noagta lapud satan so “syudad na balbaleg ya Ari,” si Jehova. Diad satan a pasen nibabangat iray totoo nipaakar ed Ganggan nen Jehova tan ditan met ira mandadayew ed sikato. Saray totoon uuleyan na Ari na Jerusalem so pangipapanengnengan nen Jehova na maaron-kaabigan to. (Basaen so Salmo 48:1, 2, 9, 12, 13.) Singa sikara, kasin labalabay mon aralen tan istoryaen so history na organisasyon nen Jehova diad dalin? No kapigan ondarakel so nanaaralan mod organisasyon nen Jehova tan no panon ton susuportaan so totoo to, mas magmaliw a tua ed sika so Panarian to. Saya so mamakiwas ed sikan ipulong so maong a balita na Panarian.​—Jer. 9:24; Luc. 4:43.

6. Akin a duga labat ya ilaloan nen Jehova ya aralen tan unoren tayo ray ganggan tan prinsipyo to?

 ⁶ Amtaen iray ganggan. Diad saray gobierno na too, kakaukolanen dad saray sakop da ya amtaen tan unoren so ley na bansa. Kanian, makatunongan labat sirin ya ilaloan nen Jehova ya aralen tan unoren na amin ya mibabaley na Panarian to iray ganggan tan prinsipyo to. (Isa. 2:3; Juan 15:10; 1 Juan 5:3) Mabetbet ya aliwan perpekto tan aliwan patas iray ganggan na too. Balet, “say ganggan nen Jehova et ayadyari.” (Sal. 19:7, NW) Kasin panliliketan tayoy ganggan na Dios tan babasaen so Salita to ya inagew-agew? (Sal. 1:1, 2) Kaukolan tayon pansagpotan ya aralen a mismo so ganggan na Dios ta anggapoy arum a makagawa ed saya parad sikatayo.

AAROEN NA SARAY MIBABALEY IRAY ESTANDARTE NA DIOS

7. Akin ya uunoren na saray mibabaley na Panarian iray ganggan na Dios?

⁷ Pian mansiansia tayon mibabaley na Panarian, agtayo labat kaukolan ya amtaen iray estandarte na Dios, noagta nepeg tayo met ya aroen iratan. Dakel a mibabaley na gobiernoy too so mangibabagan onaabobon irad saray ganggan tan estandarte na bansan panaayaman da. Balet, no mairap odino anggapoy makakanengneng, susumlangen day ganggan. Maslak ed sikara et “managpaliket [labat] ed totoo.” (Col. 3:22) Balet saray mibabaley na Panarian et manbibilay unong ed mas atagtagey ya estandarte. Uunoren tayoy ganggan na Dios, anggano anggapoy arum a toon makakanengneng. Akin? Lapud inaro tayoy Manangiter na ganggan.​—Isa. 33:22; basaen so Lucas 10:27.

8, 9. Panon mon nipanengneng a talagan aaroen mo ray ganggan na Dios?

⁸ Panon mon nipanengneng a talagan aaroen moy ganggan na Dios? Nonot mo pay reaksion mo sano makakaawat kay simbawa a mangapektad personal iran panlabayan mo​—singa bilang, say panangawes tan panag-ayos. Nayarin antis kan nagmaliw a mibabaley na Panarian, say labay mo ran kawes et saramay akulastay odino aliwan masimpit. Balet legan ya oneelet so panangarom ed Dios, naaralan moy mangawes ed paraan ya mangigalang ed sikato. (1 Tim. 2:9, 10; 1 Ped. 3:3, 4) Nayarin iisipen mon masimpit lay panangawes mo natan. Balet panon to no walay elder ya mangibagad sikan wala ray agagi ed kongregasyon yon nagagapol ed panangawes mo? Antoy reaksion mo? Kasin manrason, ombarong, odino ibaliwalam so simbawa tod sika? Sakey ed sankaimportantian ya ganggan a kaukolan ya unoren na saray mibabaley na Panarian et say pangalig ed Kristo. (1 Ped. 2:21) Nipaakar ed ehemplo nen Jesus, oniay inkuan nen Pablo: “Komon ta paliketen na kada sakey ed sikatayo so kapara ton too ed no anto so maong, salanti, samay makapabiskeg ed sikato. Ta anggan say Kristo et agto pinaliket so inkasikato.” (Roma 15:2, 3) Pian niwalay kareenan ed kongregasyon, kaukolan ya arawian na sakey a maespiritual a Kristiano iray bengatlan makagapol ed arum.​—Roma 14:19-21.

⁹ Pantongtongan tayo ni duaran importantin punto: say panmoria tayod sekso tan panangasawa. Saramay agni mibabaley na Panarian na Dios et nayarin mangonsentid homoseksualidad, manisip ya anggapoy uges na pornograpiya, tan ipasen dan say pikakalugoran tan diborsyo et personal a desisyon. Balet saratan ya agmakatunongan tan makasarilin ugali et binenegan la na saray mibabaley na Panarian. Anggaman dakel ed saray Kristiano et datin walaan na imoral a panagbilay, ipapasen da la natan so sekso tan panangasawa bilang regalon nanlapud Dios. Aaroen day atagey ya estandarte nen Jehova tan amta dan saramay tuloytuloy a manggagawa na imoralidad et agmakanepegan a magmaliw a mibabaley na Panarian. (1 Cor. 6:9-11) Ingen, bibidbiren da met a say  puso et manamalingo. (Jer. 17:9) Kanian, aapresyaen day makaawat na saray pasakbay ya ontulong ed sikaran napansiansiay atagey ya estandarte ed moral.

PAPABLIEN NA SARAY MIBABALEY NA PANARIAN IRAY PASAKBAY

10, 11. Anto ran nipanpanaon a pasakbay so iiter na Panarian na Dios, tan antoy reaksion mod saraya?

¹⁰ Nayarin pasakbayan na saray gobiernoy too iray mibabaley da nipaakar ed sakit, makasamal a naakan odino tambal. Siempre, aliwan amin ya naakan tan tambal et makasamal. Balet no walay produkton delikado, pasakbayan na gobierno iray mibabaley to pian naprotektaan ira. Responsabilidad na gobierno so pangiter na sarayan pasakbay. Ontan met, mangiiter so Panarian na Dios na saray pasakbay ed saray mibabaley to. Papasakbayan to itayod saray bengatlan managyat ed sikatayon sumlangen iray ganggan to tan maneral na relasyon tayod sikato. Singa bilang, uusaren na dakel so Internet parad komunikasyon, edukasyon, tan panligliwaan. Uusaren na organisasyon na Dios so Internet pian makapanggawa na dakel a maabig iran bengatla. Anggaman ontan, dakel ya site ed Internet so mapeligro ed saramay malabay a manggaway duga. Saray web site ya mangipapanengneng na pornograpiya et talagan mapeligro. Diad loob na dakel lan taon et papasakbayan itayo na matoor ya aripen a klase ed sarayan site tan talagan misalsalamat tayod sarayan pasakbay!

¹¹ Diad agano ni labat, sananey a klase na site so nagmaliw a popular. Sarayan site a kabkabat ya social networking Web sites et mausausar, balet ta mapeligro met iraya. Nayarin makapilimog tayod saray mauges ya kaulop. (1 Cor. 15:33) Agtayo la sirin pankelawan no akin a say organisasyon na Dios et mangitatarya na saray balansin pasakbay diad pangusar ed sarayan site. Kasin abasam la so amin a balon publikasyon ya in-publish na say matoor ya aripen nipaakar ed sarayan social networking site? Talagan mapeligro no lukasan tayo irayan site ya agtayo ni abasa irayan publikasyon! * Singa itan pantumar na mabiskeg a tambal ya agni binasay pasakbay a walad botelya.

12. Akin ya aliwan makabat so pangibaliwalad saray pasakbay?

¹² Saramay mangibabaliwala ed saratan a pasakbay a nanlapud matoor ya aripen et seguradon mangipepeligro ed sarili da tan ed saray inad-aro ra. Say arum et naadik lad pambabantay day pornograpiya odino akagaway imoral, tan iisipen dan agnanenengneng nen Jehova so gagawaen da. Agaylan inkamakulangkulang so panisip a niyamot tayod si Jehova iray gagawaen tayo! (Uli. 15:3; basaen so Hebreos 4:13.) No panon a saray gobierno na too et kakanselaen day citizenship na sakey ya akagaway krimen, ekalen met nen Jehova bilang mibabaley to iramay agmagbabawin nankasalanan. * (1 Cor. 5:11-13) Balet mapangasi si Jehova tan uusaren to ray elder pian tulongan iramay akapankasalanan. (Gal. 6:1) Nipawil lamet na saramay magbabawi tan manguman so maapit a relasyon dad si Jehova tan makapansiansian mibabaley na Panarian. (2 Cor. 2:5-8) Talagan pribilehyo tayo so panlingkor ed ontan a maaron Ari!

 PAPABLIEN NA SARAY MIBABALEY NA PANARIAN SO EDUKASYON

13. Panon a nipapatnag na saray mibabaley na Panarian a papablien day panangibangat nen Jehova?

¹³ Mansasagpot iray gobiernoy too pian ibangat iray mibabaley da. Mangipapaalagey iray eskuelaan pian bangatan iray totoo. Papablien met na saray mibabaley na Panarian irayan sekular ya eskuelaan tan maanos iran manaaral a manbasa, mansulat, tan suportaay pinansyal a pankaukolan da. Balet mas papablien day edukasyon ya naaawat dad organisasyon nen Jehova. Ibabangat itayo nen Jehova panamegley na Kristianon kongregasyon. Singa bilang, ipapaseseg na organisasyon ya iyaralan na atateng iray angkelag nin anak da. Kada bulan et mangipa-publish so matoor ya aripen na nibase ed Biblia iran publikasyon diad Say Panag-bantayan tan Awake! No makabasa tayo na pigaran pahina ed kada agew, nabasa tayo iratan ya amin ed loob na sakey bulan. No gawaen tayo itan, nagunggonaan itayo ed panangibangat ya itatarya nen Jehova.

14. (a) Anton panangipasal so naaawat tayo? (b) Anto ran suhestion parad Panagdayew na Pamilya so gagawaen yo la?

¹⁴ Kada simba, makakaawat na panangipasal iray mibabaley na Panarian diad saray miting dad kongregasyon. Singa bilang, anemiran dekada lan ontutulong so Teokratikon Eskuelaan Parad Ministeryo ed saray estudyante pian magmaliw ya epektibon managbangat na Salita na Dios. Kasin aka-enroll ka la ed satan ya eskuelaan? Ontan met, diad agano ni ran taon et impaseseg na matoor ya aripen so sinimban Panagdayew na Pamilya. Sayan uksoyan et mamaelet ed ulopan na pamilya. Kasin gagawaen yo la iray suhestion a walad literatura tayo nipaakar ed Panagdayew na Pamilya? *

15. Anton baleg a pribilehyo so walad sikatayo?

¹⁵ Manra-rally iray mibabaley na gobiernoy too pian ipanengneng so suporta rad sakey a partido na politika. Wala ni ra ingey oonlad kaabungan pian gawaen itan. Ontan met, ipapanengneng na saray mibabaley na Panarian ed interon mundo so suporta rad Panarian na Dios panamegley na pampupulong dad totoo diad karsada tan kaabungan. Diad tua, unong ed abitla lad akaunan artikulo, Say Panag-bantayan a mangipapalapag na Panarian nen Jehova so sankalaknaban lan nibubunog a magasin ed interon mundo! Talagan baleg a pribilehyo so pangipulong tayod arum nipaakar ed Panarian na Dios. Kasin maseseg kan mibibiang ed sayan panagpulong a kimey?​—Mat. 28:19, 20.

16. Panon mon paneknekan ya maong kan mibabaley na Panarian na Dios?

¹⁶ Magano lan say Panarian na Dios labat so manuley ed interon mundo. Saray ganggan na Panarian so alenleneg lan mangigiya ed amin a totoo. Kasin diad satan a panaon et magmaliw kan maong a mibabaley na Panarian na Dios? Natan la so panaon pian paneknekan itan. Diad amin a desisyon mod kada agew, gawam iraya diad kigloriaan nen Jehova tan paneknekan mon manuugali ka bilang mibabaley na Panarian na Dios.​—1 Cor. 10:31.

[Saray paimano ed leksab]

[Tepetepet Parad Panagaral]

[Blurb ed pahina 14]

Kasin uunoren mo ray nibase ed Biblian pasakbay nipaakar ed Internet?

[Litrato ed pahina 12]

Singa saray anak nen Kora, kasin panliliketan moy dugan panagdayew tan say history na satan?

[Litrato ed pahina 15]

Makatulong so Panagdayew na Pamilya pian sika tan saray inad-arom et magmaliw a maong a mibabaley na Panarian