Bom Ungil el Chedal a Rengedel a Dios!

“A klengar er kemiu a kirel el mo rredemelel a Ebangkelio.”​—FILIPI 1:27.

NGMEKERANG A OMONGER?

Te rua techang a sebechir el mo chedal a Rengedel a Dios?

Kede mekerang e mesuub a omelekoi, reksi, me a llach er a Renged?

Te mekerang a rechedal a Renged e ochotii el kmo ngbetik a rengrir er a llechul a Dios?

1, 2. Ngera uchul me a uleklatk er a Paulus el mo er a Rekristiano er a Filipi a mle klou a ultutelel el kirir?

 A APOSTOL EL PAULUS a millisiich er a ongdibel er a Filipi er a ledu el kmo, “a klengar er kemiu a kirel el mo rredemelel a Ebangkelio.” (Monguiu er a Filipi 1:27.) A tekoi er a Grik el luluusbech er ngii el “klengar er kemiu” a belkul a kmo “bom ungil chad er a beluu.” Tia el tekoi a mla er ngii a ileakl el belkul el mo er a Rekristiano el ngar er a Filipi. E ngera uchul? E le Renged er a Rom a kilengei er a rechad er a Filipi el mo chad er a Rom (citizens), me bo lemukerreu er a llechul a Rom. A rechad er a Filipi a mle ungil a rengrir el chad er a Rom e le ngmlo uchul a betok el klungiolir, el ngii el klungiaol a dimlak el sebechir a rebetok el chad el ngmai.

² Engdi a Rekristiano er a Filipi a mla er ngii a lmuut el ta er a ungil el uchul e ngmle dmeu a rengrir. A Paulus a ulemeklatk er tirka el ngellitel el Kristiano el kmo: “Ngdi meral beluad a ngar a eanged.” (Filipi 3:20) Tirkang a mle chedal a Rengedel a Dios, el ngii a kuk lmuut el ngarbab er a ngii di el kabelment er a klechad. Tia el Rengedel a Dios a ulemekerreu er tir e omesterir a betok el klungiaol el diak a ngii di el kabelment el sebechel el remuul.​—Efesus 2:19-​22.

3. (a) Te rua techang a sebechir el mo chedal a Rengedel a Dios? (b) E ngera kede mo mesaod er tia el suobel?

³ A tekingel a Paulus el kmo “bom ungil chad er a beluu” a melutk el kirir tirke el mo mengedereder el ngar er a eanged el obengkel a Kristus. (Filipi 3:20) Engdi ngdirrek el sebechel el melutk el kirir tirke el mo kiei er tia el chutem el chederedall er a Rengedel a Dios. E ngera uchul? E le kid el rokui a mesiou er a di ta el King, el Jehovah, me a llechul a di osisiu el mo er a rokui el mesiungel. (Efesus 4:4-6) Chelecha el taem e a rebetok el chad a meringel el osiik a cheldechulel e mo chad er aike el merau el beluu. Engdi nglmuut  el klou a belkul a dosiik a techall el mo chedal a Rengedel a Dios. Me bo dosaod a bebil er a tekoi el kirir a rechad el meruul me bo el sebechir el mo chedal a kabelment er a klechad, e domekesiu er ngii el mo er tirke el kuk mo chedal a Rengedel a Dios, e le tiang a ngosukid el mo medengelii a belkul tia el ileakl el techall. Kede dirrek el mo mesaod a edei el tekoi el kired el meruul a lsekum ngsoad el melemolem el chedal a Rengedel a Dios.

A TEKOI EL KIREL EL RUOLL ME BO DECHEDAL A RENGED

4. Ngerang a bliochel el omelekoi? Ngera belkul a bo dolekoi er tia el omelekoi?

⁴ Mosuub er a omelekoi er a Rengedel a Dios. A bebil el beluu a ngar er ngii a llechul el ngii di el chad el soal mo chedal ngii el beluu a kirel el mesuub el mo melekoi a tekoi er ngii el beluu. A rebebil a meringel el mesuub er tia el beches el omelekoi el betok el rak el mo lmuut er a bla bo lechedal tia el beluu. Alta e te mereched el suub a omelekoi er sel beluu engdi te dirk ousbech er a klou el taem el mo ungil el melekoi er ngii el omelekoi. Me a Rengedel a Dios a dirrek el mengelechel er tirke el sorir el mo chedal el kmo ngkirir el mo mesuub er a beches el omelekoi. A Biblia omekedong er ngii el kmo “bliochel el omelekoi.” * (Sefania 3:9, NW) Me tiang ngera el omelekoi? Tiang a klemerang el tekoi el Biblia a olisechakl er ngii el kirel a Dios me a moktek er ngii. Me a lsoad el mo melekoi er tia el omelekoi e ngbelkul a kmo kede mo olengesenges a llechul a Dios. Me kid el chedal a Rengedel a Dios a sebeched el mereched el mesuub aike el meklou a ultutelel el osisechakl er a Biblia e mo metecholb. Me a uriul er a demetecholb, e ngkired el melemolem el mesuub el mo melekoi er tia el bliochel el omelekoi. El mekerang? Kede rokui el kired el melasem el oltaut er a klengar er kid aike el tekoi el desuub er a Biblia.

5. Ngera uchul me ngkired el mesuub er a reksi er a cheldebechelel a Jehovah?

⁵ Mosuub er a reksi. A chad el soal el mo chedal a ta er a beluu a kirel el mesuub er a reksi er a kabelment er isei el beluu. Me kid el soad el mo chedal a Rengedel a Dios a kired el mesuub el kirel ngii el renged. Ngkired el oukerebai er a rengelekel a Kora el milsiou er a Jehovah er a beluu er a Israel. Ngkmal mle betik a rengrir er a Jerusalem me sel blil omengull er ngii, e dirrek el mle sorir el mesaod er a reksi er ngii el mats el diak el klebekelel a uchul, e ngbai ngii el mle “belual a ngarbab el king.” A rechad a mlo er ngii el blil a omengull er a Jerusalem e mesuub a Llechul a Jehovah e dirrek el mengull er ngii. Me a Jehovah a mle betik a rengul e kilengei er tirke el mle chederedall er a King er a Jerusalem. (Monguiu er a Psalm 48:1, 2, 9, 12, 13.) Me kau  ke dirrek el semeriar el mesuub e ouchais er a rebebil el kirel a reksi er a cheldebechelel a Jehovah? A cherengel a taem el dosuub el kirir a rechedal a Jehovah me sel rolel e ngolengeseu er tir, e ngrullii tia el Rengedel a Dios el mo mera el tekoi er a rengud. E tiang a smisichid el lmuut el mo soad el omerk er a ungil el chais el kirel ngii el Renged.​—Jeremia 9:24; Lukas 4:43.

6. Ngera uchul me kede medengei el kmo a Jehovah a soal a dosuub e doltirakl a llechul?

⁶ Mo medengei a llach. A kabelment er a klechad a soal a rechad er a beluu a bo losuub e loltirakl a llechul a beluu. Me a Jehovah a dirrek el soal a rokui el chedal a Rengedel a bo losuub e loltirakl a llechul. (Isaia 2:3; Johanes 15:10; 1 Johanes 5:3) A llechul a klechad a diak el cherrungel e dirrek el diak el tabesul. Engdi a “llechul a RUBAK a cherrungel.” (Psalm 19:7) Me kau, ngdmeu a rengum el menguiu er a Biblia er a bek el sils e mesuub a llechul a Dios? (Psalm 1:1, 2) Ngkired el rokui el mo blak a rengud el mesuub a llechul a Dios, e le ngdiak a chad el sebechel el meruul er ngii el kired.

A RECHEDAL A RENGED A BETIK A RENGRIR ER A LLECHUL

7. Ngera uchul me a rechedal a Rengedel a Dios a oltirakl a llechul?

⁷ A lsoad el melemolem el chedal a Rengedel a Dios, e ngkired el mo medengei a llechul e mo betik a rengud er ngii el llach. A rebetok el chedal a kabelment er a klechad a melekoi el kmo te kongei a llechul a beluu. Engdi a lsekum ngdiak el sorir a ta er aika el llach, e diak a chad el meseterir, e te melemall ngii el llach. Oumesingd el taem e ngsorir el oltirakl a llach el di meruul a ues. (Kolose 3:22) Engdi kid el chedal a Rengedel a Jehovah a betik a rengud er ngii a uchul me kede oltirakl a llechul el mo lmuut er a taem el diak a rechad el mesekid.​—Isaia 33:22; monguiu er a Lukas 10:27.

8, 9. Ke mekerang e medengei el kmo ngbetik a rengum er a llechul a Dios?

⁸ Ke mekerang e medengei el kmo ngmera el betik a rengum er a llechul a Dios? Morriter er a uldesuem er a taem el mnguu a uleklatk el kirel a tekoi el molilt el meruul, el ua sel rolel a omoubail. A uchei er a obo modengelii a klemerang, e nglocha dimlak mungil el oubail, me a lechub e a bilem a rirelleterir a rechad el mo ngodech a uldesuir el kirem. Ngdi chelecha el bla bo lebetik a rengum er a Dios, e ke mla mo ungil el oubail el mengebkall er ngii. (1 Timothy 2:9, 10; 1 Petrus 3:3, 4) Me chelechang e ke locha omdasu el kmo ngdi ungilbesul a rolel a omoubail. Engdi ngmo uangerang a uldesuem a lsekum a ta er a remechuodel a subedau el kmo a rebetok el ngar er a ongdibel a omes er a rolel a omoubail el diak el ungil? Ke mo kesib a rengum e betok a tekingem, e diak mkengei el mo melodech a blekerdelem? A ta er a kot el ngarbab el llechul a Rengedel a Dios a kmo a rechedal a kirir el mo oukerebai er a Kristus. (1 Petrus 2:21) A Paulus a dilu el kmo, a “Kristus a dimlak di loruul a ungil er ngii,” me ngkired el oukerebai er ngii el “meruul er a rengul a tar kid el oltirakl er a ungil er ngii.” (Rom 15:2, 3) Me kid el meklou el chad el Kristiano a lsekum ngsoad el meleketek a budech er a chelsel a ongdibel, e ngkired el kerekikl me ngdiak dolibas er a rebebil.​—Rom 14:19-​21.

⁹ Ngua ngerang a osengem el kirel a durs me a chebechiil? Tirke el diak el chedal a Rengedel a Dios a sebechir el mo omdasu el kmo ngdi ungil a dertel a chebechiil, laokreng, mengolchotaor, me a osengel a siasing er a remeau. Engdi a rechedal a Dios a mla suubii el kmo aika el tekoi a sebechel el mo uchul a telemellir, tir me a rebebil. Ngbetok er tir a mle mekngit a rolel a klengar er tir er a uchei er a bo lodengelii a klemerang, engdi chelechang e te mla mo medengei el kmo a durs me a chebechiil a sengk el mla er a Dios el mei. Ngbetik a rengrir er a llechul a Jehovah, e medengei el kmo tirke el oleiit aika el llach a diak el sebechir el mo chedal a Rengedel a Dios. (1 Korinth 6:9-​11) Te dirrek el medengei el kmo a lak el kerekikl e te mo meruul  a klengit. (Jeremia 17:9) Me ngdmeu a rengrir er chouaika el uleklatk el ngii a ngosuterir el melemolem el olengesenges a llechul a Dios.

A RECHEDAL A RENGED A KONGEI A ULEKRAEL

10, 11. Ngera el meklou a ultutelel el uleklatk a lomeskid a Rengedel a Dios? E uangera uldesuem el kirel aika el uleklatk?

¹⁰ A kabelment er a klechad a dirrek el omeklatk er a rechad er a beluu el kirel a bebil el kall me a kar. Ngdiak el rokui el kall me a kar a mekngit, engdi a lsekum e ngngar er ngii a bo letemellii, e ngngerechelel a kabelment el mo omekerreu er a rechedal el oltobed a ulekrael el kirel ngii el tekoi. Me ngdi osisiu, a Rengedel a Dios a dirrek el omekrael er a rechedal. Ngomeklatk er kid er a tekoi el sebechel el mo uchul a temellel a deleuill er kid me a Dios. El ua tiang, a rebetok el chad a ousbech a Internet el mengedecheduch er a rebebil, e mesuub, e dirrek el mengelaod er tir. Me a cheldebechelel a Dios a dirrek el ousbech a Internet el meruul a betok el ungil el tekoi. Engdi ngbetok el tekoi el ngar er a chelsel a kmal kdekudel el sebechel tomellii a uldesuel a chad el soal el meruul a llemalt. Aike el web site el olecholt a siasing er a remeau a kmal kdekudel. E mla mo betok el rak el blak a rengul el mesiou a omeklatk er kid el kirel aika el tekoi, me kede kmal oba omereng el saul el kirel!

¹¹ Ngdirrek el ngar er ngii a beches el tekoi el betok el chad a ousbech er ngii er chelechang. E aikang a social networking Web sites. Ngklou a klungiolel, engdi ngdirrek el kmal klou a telemellel. Me ngkired el kerekikl a lsekum kede ousbech er ngii, e le ngklou a techelled el mo mengedecheduch er a rechad el tir a mekngit el klausechelei. (1 Korinth 15:33) Sei a uchul me a blak a rengul el mesiou a olisechakl er kid el mo tabesul a usbechelled er aika el tekoi. A cellphone a dirrek el ngosukid a lsekum kede ousbech er ngii er a ungil el rolel. Me ke mla chemuiu a rokui el suobel el motobed el kirel a usbechel a social networking site me a cellphone? Ngkdekudel el tekoi a lsekum ngdiak momuchel el menguiu aika el suobel er a uchei er a obo mousbech aika el tekoi. * Tia el omeruul a di ua omolim er a kar el dirkak mchiuii a uleklatk el ngar a blil a kar.

12. Ngera uchul me ngklebelung a lak dolengesenges a uleklatk?

¹² Tirke el diak loltirakl a ulekrael er a blak a rengul el mesiou a di tir el tomelleterir, tir me a rebetik er a rengrir. A rebebil a mla mo smau el omes a siasing er a remeau me a lechub e te mla ruebet er a deleboes e omdasu el kmo a Jehovah a diak leues a omerellir. Ngkmal klebelung a domdasu el kmo, ngsebeched el mart a omerelled er a Jehovah! (Osisechakl 15:3; monguiu er a Hebru 4:13.) A Jehovah a diak el kengei er tirke el mengemikr a llechul me bo lechedal a Rengedel, el di ua kabelment er a klechad el diak el kengei er a rechad el melemall a bebil el llach me lolemolem el chedal ngii el beluu. * (1 Korinth 5:11-​13) Engdi a Jehovah a kmal chubechubechad me ngousbech er a remechuodel el olengeseu er tirke el ruebet er a klengit. (Galatia 6:1) Me tirke el obult er a kngterir a sebechir el lmuut el mo sechelil a Jehovah, e melemolem el chedal a Rengedel. (2 Korinth 2:5-8) Ngkmal klou el techall a dobang el mesiou er a betik a rengul el King!

 A RECHEDAL A RENGED A SORIR A OMESUUB

13. Te mekerang a rechedal a Dios e ochotii el kmo ngsorir el mesuub?

¹³ A betok el kabelment a meringel el oureor el olisechakl er a rechad er a beluu. Te omekedechor a skuul me bo el sebechir a rechad el mesuub a tekoi. A rechedal a Rengedel a Dios a kmal dmeu a rengrir el kirel aika el skuul e le ngmo sebechir el menguiu, meluches, e dirrek el mesuub el mo meduch el oureor. Me ngblak a rengrir el mesuub me bo lengai a klungiolir er aika el skuul. Engdi te oba lmuut el klou el omereng el saul el kirel a skuul el Jehovah a omesterir el okiu a cheldebechelel. El ua tiang, a cheldebechelel a melisiich er kid el mo blechoel el menguiu. Ngdirrek el melisiich er a ruungalek el mo olisechakl er a rengelekir el menguiu. Bek el buil, e a blak a rengul el mesiou a oltobed a Ongkerongel el babier. Me a lsekum ke menguiu er a ta el llel er a bek el sils, e ngsebechem el choiuii el rokir er a chelsel a ta el buil. Ngoeak tiaikid el rolel, e ke melemolem el mosisechakl er a Jehovah.

14. (a) Kede mekerang e mosisechakl er a Dios? (b) Ke mla ousbech a ngera el ulekrael el kirel a Omengull el Ongalek?

¹⁴ Bek el sandei, e a rechedal a Rengedel a Dios a mosisechakl el ngar er aike el miting er tir. El ua tiang, ngmla mo betok er a 60 el rak el Skuul el kirel a Urerel a Dios a olisechakl er a rechad el mo ungil el olisechakl el ousbech er a Biblia. Me kau, ke teloi er tia el skuul? Me a blak a rengul el mesiou a dirrek el mla omeklatk el kirel a klungel a ultutelel a Omengull el Ongalek er a bek el sandei. Tia el omesuub a melisiich a kltarreng er a chelsel a telungalek. Kom mla omuchel el ousbech aike el ulekrael el kirel a Omengull el Ongalek el ngar er a babilenged? *

15. Ngera el ileakl el techall a dobang?

¹⁵ A rebetok el chedal a kabelment er a klechad a melasem el melisiich er a rechad el mo sengkio er a ta er a chad. E a rebebil a merael a obliil el mengedecheduch el oldubech er ngii el chad. A rechedal a Renged el meliuekl er a beluulechad a bleketakl el melisiich er a Rengedel a Dios el okiu sel lomerk er a klumech el ngar er a rael me a bek el obliil. El ua tiang, a moktek er A Ongkerongel a ouchais el kirel a Rengedel a Jehovah. El ua losaod sel uleakuchei el suobel, A Ongkerongel a sel kot el klou a omerusel el babier el ngar er tia el chutem! Me kid a oba ileakl el techall el mo ouchais er a rebebil el kirel a Rengedel a Dios. Me kau, ngblak a rengum el teloi er tia el ureor?​—Mateus 28:19, 20.

16. Ke mekerang e ochotii el kmo ke ungil el chedal a Rengedel a Dios?

¹⁶ Ngdi kmedung e a Rengedel a Dios a di mo chimo el kabelment el mengedereder er a beluulechad. Me a llechul ngii el Renged a di mo ta el llach el omekrael er a rechad. Me kau, ke mo oltirakl a llechul tia el Rengedel a Dios er sel taem? Chelechang e ngtaem el mochotii el okiu a omerellem er a bek el sils. Moruul a rokui el tekoi el kirel a odanges el mo er a Jehovah, me lobeketakl el kmo ke ungil el chedal a Rengedel a Dios.​—1 Korinth 10:31.

[Aike el Footnote]

[Aike el Ker er a Suobel]

[Blurb el ngar er a 21 el llel]

Kau ke oltirakl a uleklatk el kirel a Internet?

[Siasing el ngar er a 19 el llel]

Kau ke ua rengelekel a Kora, el betik a rengum er a bliochel el omengull me a omesodel a reksi er ngii?

[Siasing el ngar er a 22 el llel]

A temel a Omengull el Ongalek a melisiich er kau me a rebetik er a rengum el mo ungil el chedal a Renged