Kawotettaa Dere Asadan Deˈite!

“Wonggeliyaayyo bessiya de7uwaa de7ite.”—PILI. 1:27.

WOYGADA ZAARUUTII?

Xoossaa Kawotettaa dere asa gidana danddayiyaageeti oonee?

Xoossaa Kawotettaa qaalaa, taarikiyaanne higgiyaa xeelliyaagan nuuni ay oottana koshshii?

Kawotettaa dere asay Xoossay kessido maaraa dosiyoogaa ayba ogiyan bessii?

1, 2. PHauloosa zoree Piliphisiyuusa gubaaˈiyan deˈiyaageeti loytti akeekiyooba gididoy aybissee?

 KIITETTIDA PHauloosi Piliphisiyuusa gubaaˈiyaa asay “wonggeliyaayyo bessiya de7uwaa” deˈanaadan zoriis. (Piliphphisiyuusa 1:27 nabbaba.) “De7ite” geetettida, PHauloosi goˈettido Giriiketto qaalay “dere asadan deˈite” geetettanakka danddayees. He qofay Piliphisiyuusa gubaaˈiyan deˈiya asay loytti akeekiyooba. Aybissi giikko, Piliphisiyuusa katamay, asaayyo Roome dere asa gidiyo maatay imettido katamatuppe issuwaa gidennan aggenna. Piliphisiyuusaaninne Roome Kawotettan ubbasan deˈiyaageeti Roome dere asa gidiyoogan keehippe ceeqettoosona, qassi Roome higgee eta qohiyaabaappe naagiis.

² Piliphisiyuusa gubaaˈiyan deˈiyaageeti ceeqettanaadan oottiya, hegaappe aadhiya gaasoy deˈees. Ayyaanan tiyettida Kiristtaaneta gidiyoogaadan, eta “biittai saluwaana” gidiyoogaa PHauloosi eta akeekissiis. (Pili. 3:20) Eti asa kawotettaa dere asa gidennan, Xoossaa Kawotettaa dere asa. Hegaa gishshau, eti laggetiyaabi baynna ogiyan goˈettidosonanne qohiyaabaappe naagettidosona.—Efi. 2:19-22.

3. (a) Xoossaa Kawotettaa dere asa gidiyo maataa demmiyaageeti oonee? (b) Ha huuphe yohuwan nuuni ay beˈanee?

³ PHauloosi ‘dere asadan deˈanaadan’ zorido waannati Kiristtoosaara saluwan haariyaageeta. (Pili. 3:20) SHin he zoree Xoossaa Kawotettau haarettiiddi saˈan deˈanaageetuyyookka hanana danddayees. Aybissi? Banttana Xoossaayyo geppida Kiristtaaneti ubbay issi Kawuwaa, Yihoowayyo oottiyoonne issi mala maaraadan deˈana bessiyo gishshataassa. (Efi. 4:4-6) Ha wodiyan, asay dure biittaa dere asa gidanau koshshiyaabaa oottanau wozanappe baaxetees. Nuuni Xoossaa Kawotettaa dere asa gidiyo maataa hegaappe aaruwan xoqqu oottidi xeellana koshshees! He maataa kaseegaappe aaruwan nashshanau, Xoossaa Kawotettaa dere asa gidanau koshshiyaabay  asa kawotettaa dere asa gidanau koshshiyaabaa mala gidido ginaa ane beˈoos. Yaatidi, Xoossaa Kawotettaa dere asa gidiyo boncho maataa naagidi deˈanau, nuuni oottana bessiya heezzubata pilggana.

KAWOTETTAA DERE ASA GIDANAU KOSHSHIYAABATA

4. Geeshsha haasayay aybee, qassi nuuni a “haasayiyoy” ayba ogiyaanee?

⁴ Qaalaa tamaara. Issi issi kawotettati eta dere asa gidanau koyiyaageeti he biittaa qaalaa haasayanaadan koyoosona. Dere asa gidi simmidikka, asay he ooratta qaalaa loyttidi eranau daro layttau baaxetana danddayees. Eti qaalaa wogaa sohuwaara erana danddayoosona, shin qaalata suure xeegiyoogaa eranau amarida wodiyaa ekkana danddayees. Hegaadankka, Xoossaa Kawotettaa dere asa gididaageeti, Geeshsha Maxaafay ‘geeshsha haasayaa’ giyoobaa erana koshshees. (Sofonaasa 3:9 nabbaba.) He haasayay aybee? Hegee, Xoossaanne a halchuwaa xeelliyaagan Geeshsha Maxaafan deˈiya tumaa. Nuuni Xoossaa higgiyaunne baaso siraatau azazettiyo wode geeshsha haasayaa “haasayoos.” Xoossaa Kawotettaa dere asa gidiyaageeti Geeshsha Maxaafaa koyro timirttiyaa sohuwaara erana danddayoosona; yaatidi xammaqettoosna. SHin, ubba eti xammaqetti simmidikka, geeshsha haasayaa kaseegaappe loyttidi ‘haasayanau’ baaxetana bessees. Ayba ogiyan? Nuuni ubbay oottiyoobay Geeshsha Maxaafaa baaso siraataabaa eriyoobaara issi mala gidana koshshees.

5. Yihoowa dirijjitiyaa taarikiyaabaa nuuyyo danddayettida ubbabaa erana koshshiyoy aybissee?

⁵ Taarikiyaa xannaˈa. Issi kawotettaa dere asa gidanau koyiya uri he kawotettaa taarikiyaa xeelliyaagan geella issi issibaa erana koshshennan aggenna. Hegaadankka, Xoossaa Kawotettaa dere asa gidanau koyiyaageeti Xoossaa Kawotettaabaa eranau banttau danddayettida ubbabaa oottana koshshees. Beni Israaˈeelen Xoossau oottida, Qoraaha naatu leemisuwaa qoppa. Yerusalaameenne yan deˈiya goynniyo sohoy, qassi he katamaa taarikiyaa yootiyoogee eta keehippe ufayssees. Eti ufayttanaadan oottida waannabay, keexxanau goˈettido shuchaanne he shuchaa issippe oyttidabaa gidennan, he katamaynne goynniyo sohoy kalˈˈatiyoobaa. Yerusalaamee tumu goynuwaa humˈˈo gidiyo gishshau, “gita kawuwaa,” Yihoowa ‘katama.’ Asay Yihoowa Higgiyaa tamaariyoy yaana. Yerusalaame Kawoy haariyoogeeti Yihooway aggenna siiquwan siiqido asata. (Mazamure 48:1, 2, 9, 12, 13 nabbaba.) Ha wodiyan saˈan Xoossay darajjayido asay deˈees. Qoraaha naatuugaadan, nuuni Xoossaa asaa taarikiyaa ufayttidi xannaˈananne haratuyyo yootana koshshees. Neeni Xoossaa dirijjitiyaabaanne Yihooway ba asaa kaafiyo ogiyaabaa loytta eriyo wode, Xoossaa Kawotettay neeyyo kaseegaappe aaruwan qoncci beettana. Neeni Xoossaa Kawotettaa mishiraachuwaa sabbakanau keehi amottana.—Erm. 9:24; Luq. 4:43.

6. Yihooway nuuni a higgiyaabaanne i kessido baaso siraataabaa eranaadaaninne hegau azazettanaadan koyiyoogee bessiyaaba gididoy aybissee?

 ⁶ Higgiyaa era. Asa kawotettati banttau haarettiyaageeti he biitta higgiyaa tamaaranaadaaninne he higgiyau azazettanaadan koyoosona. Yaatiyo gishshau, Yihooway ba Kawotettaa dere asay ubbay a higgiyaanne i kessido baaso siraataa eranaadaaninne hegau azazettanaadan koyiyoogee bessiyaaba. (Isi. 2:3; Yoh. 15:10; 1 Yoh. 5:3) Asa higgee polo gidenna; qassi suure gidennan aggana danddayees. Hegaappe dumma hanotan, Yihoowa “higgee suure.” (Maz. 19:7) Nuuni Yihoowa higgiyan ufayttiyoo? Qassi a Qaalaa galla galla nabbabiyoo? (Maz. 1:1, 2) Nuuni Xoossaa higgiyaa erana danddayiyoy nu huuphen a xannaˈiyoogaa xallaana. Hara asi nu gishshaa xannaˈana danddayenna.

KAWOTETTAA DERE ASAY XOOSSAY KESSIDO MAARAA DOSEES

7. Kawotettaa dere asay Xoossaa higgiyau azazettiyoy aybissee?

⁷ Nuuni Xoossaa Kawotettaa dere asa gididi deˈanau, Xoossay kessido maaraa eriyoogaa xalla gidennan, hegaa dosana koshshees. Asa kawotettaa dere asa gidida daroti eti deˈiyo biittaa higgiyaaranne maaraara maayettiyoogaa yootoosona. Gidikkokka, eti issi higgiyaa dosennabanne ooninne eta beˈennaba gidikko, he higgiyaa kanttoosona. Darotoo he asati higgiyau azazettiyoy ‘asa ufayssanaassa.’ (Qol. 3:22) Xoossaa Kawotettaa dere asati Xoossaa higgiyaassi azazettiyo dumma gaasoy deˈees. Nuna ooninne beˈennaba gidikkokka, Xoossaa higgiyaassi ufayssan azazettoos. Ayssi giikko, nuuni higgiyaa Immidaagaa siiqoos.—Isi. 33:22; Luqaasa 10:27 nabbaba.

8, 9. Neeni Xoossaa higgiyaa tumuppe dosiyaakkonne waatada erana danddayay?

⁸ Neeni Xoossaa higgiyaa tumuppe dosiyaakkonne waatada erana danddayay? Leemisuwau, issi uri zoriyo wode, neeni waaniyaakko qoppa. Hegee neeni issi uri ba huuphe dooriyoobadan qoppiyo, maayuwaanne alleeqettiyoobaa gidana danddayees. Neeni Kawotettaa dere asa gidanaappe kase, yeda maayuwaa woy asho gaytotettaa qaaqqaa denttettiya maayuwaa maayennan aggakka. Neeni Xoossaa kaseegaappe aaruwan siiqiyo wode, a bonchissiya ogiyan maayiyoogaa tamaaradasa. (1 Xim. 2:9, 10; 1 PHe. 3:3, 4) Neeni haˈˈi bessiyaagaadan maayiyaabadan qoppana danddayaasa. SHin neeni maayiyoobaa gubaaˈiyan deˈiyaageetuppe daroti dosennaagaa gubaaˈe cimay neessi yootiyaakko waanuutii? Palamettuutii, yiillotuutii woy qassi zozzu guutii? Xoossaa Kawotettaa dere asay ubbay azazettana bessiya waanna higgetuppe issoy Kiristtoosa leemisuwaa kaalliyoogaa. (1 PHe. 2:21) Yesuusa leemisuwaa xeelliyaagan kiitettida PHauloosi hagaadan giis: “Nuuni huuphiyan huuphiyan nu ishaa maaddanau, ammanuwan a minttanaunne ufaissanau bessees. Aissi giikko, harai atto Kiristtoosikka bana ufaissibeenna.” (Roo. 15:2, 3) Kaymida Kiristtaanee gubaaˈiyaa sarotettaa gishshau, haratu zoriya wozanaa qumˈˈiyaabaa oottennaadan ubbatoo naagettana koshshees.—Roo. 14:19-21.

⁹ Haˈˈi hara naaˈˈubatun, giishin asho gaytotettaabaaninne aqo deˈuwaaban ne qofay aybakko akeeka. Xoossaa Kawotettaa dere asa gidennaageeti mattuman issi mala gididaageeti asho gaytotettaa poliyoogaa xaasayi xeellana danddayoosona; qassi pokkobaa bessiya misilee qohenna kaassa, wodiraa laammiyoogeenne aqo laggiyaappe paraman shaahettiyoogee issi uri ba huuphe dooriyooba giidi qoppana danddayoosona. Kawotettaa dere asay yuushshi qoppennaagaanne ba xallaa siiqiyoogaa bessiya hegaa malabaa aggiis. Daro Kiristtaaneti kase shori baynna deˈuwaa deˈidaba gidikkokka, haˈˈi eti asho gaytotettaanne aqo deˈuwaa Xoossaa imotadan xeelloosona. Eti Yihoowa higgiyaa xoqqu oottidi xeelloosona; qassi shori baynnabaa oottiyaageeti Kawotettaa dere  asa gidana danddayennaagaa wozanappe ammanoosona. (1 Qor. 6:9-11) Gidoppe attin, wozanay cimmiyaaba gidiyoogaakka eti eroosona. (Erm. 17:9) Yaatiyo gishshau, eti ubbatoo Xoossaa higgiyau azazettanaadan maaddiya akeekissuwaa nashshoosona.

KAWOTETTAA DERE ASAY NAAGETTANAADAN ZORIYOOBAA NASHSHEES

10, 11. Nuuni qohiyaabaappe naagettanaadan Xoossaa Kawotettay woygidi akeekissii, qassi hegaa mala akeekissuwaa ayba ogiyan xeellay?

¹⁰ Asa kawotettay qumaaranne xaliyaara gayttidaagan payyatettaabaa asaa akeekissana danddayees. Ubba qumaynne ubba xalee iita gidennaagee qoncce. SHin kawotettay issibay qohees giidi hirggikko, ba dere asay hegaappe naagettanaadan akeekissana danddayees. Hegee issi kawotettay oottana bessiyaaba. Hegaadankka, Xoossaa Kawotettay kandduwaaninne ayyaanaaban qohiyaabaappe naagettanaadan nuna akeekissees. Leemisuwau, daro asay Intternneetiyan asaara gayttees, tamaareesinne wodiyaa aattees. Xoossaa dirijjitee Intternneetiyaa goˈettidi, maaddiya darobaa oottees. Gidikkokka, Intternneetiyan daro sayiteti kandduwaaninne ayyaanaaban qohiyaageeta. Pokkobaa bessiya weyb sayiteti Kawotettaa dere asaa ayyaanaaban qohiyoogee qoncce. Ammanettida wozannaama ashkkaray daro wodiyau hegaa malabaappe naagettanaadan nuna akeekissiiddi takkiis. Ayyaanaaban payya gidanaadan nuna hegaadan akeekissido gishshau keehippe galatoos!

¹¹ Amarida wodiyaappe haa simmin daro asay hara saytiyaa goˈettees; hegee akeekan goˈettikko maaddana danddayees. SHin sooshal network geetettiya he Weyb saytee qohanakka danddayees. He Weyb saytee issi uri iita asatuura laggetanaadan oottana danddayees. (1 Qor. 15:33) Hegaa mala saytiyaabaa nuuni bessiyaagaadan qoppanaadan ammanettida wozannaama ashkkaray akeekissiyoy hegaassa. Ammanettida wozannaama ashkkaray sooshal networkkiyaa goˈettiyoogaa xeelliyaagan mata wode giigissido xuufiyaa ubbaa nabbabadii? He xuufeta nabbabennan hegaa mala sayitiyaa goˈettiyoogee eeyyatetta! * Hegee naagettanaadan xaafettidabaa nabbabennan, wolqqaama xaliyaa mittiyoogaa mala.

12. Naagettanaadan akeekissiyoobaa siyennan ixxiyoogee eeyyatetta gididoy aybissee?

¹² Ammanettida wozannaama ashkkaray akeekissiyoobaa xaasayi xeelliyaageeti banttaukka qohettoosona, qassi bantta siiqiyoogeetakka qohoosona. Issotu issotuyyo pokkobaa misiliyaa beˈiyoogee amale gidiis, woykko eti shori baynnabaa oottidi, bantta oosuwaa Yihooway beˈenna giidi qoppoosona. Nuuni oottiyoobaa Yihoowappe genttana danddayoos giidi qoppiyoogee eeyyatetta! (Lee. 15:3; Ibraawe 4:13 nabbaba.) Xoossay hegaa mala asata maaddanau koyees, qassi ha saˈan a kalˈˈatiyaageeti eta maaddanaadan denttettees. (Gal. 6:1) Gidikkokka, asa kawotettay bantta dere asa gidida uri issi issibaa oottiyo wode he maataa diggiyoogaadan, Yihooway a higgiyaa kanttidi bantta nagaraappe simmennaageeti Kawotettaa dere asa gidennaadan diggees. * (1 Qor. 5:11-13) Gidoppe attin, i maariyaagaa. Bantta nagaraappe simmidi, kase  deˈuwaa aggiyaageeti zaarettidi Yihoowaara dabbotananne Kawotettaa dere asa gididi deˈana danddayoosona. (2 Qor. 2:5-8) Hegaa mala siiqiya Kawuwaayyo oottiyoogee nuussi gita boncho!

KAWOTETTAA DERE ASAY TIMIRTTIYAA NASHSHEES

13. Kawotettaa dere asay timirttiyaa nashshiyoogaa ayba ogiyan bessii?

¹³ Daro kawotettati bantta dere asaa tamaarissanau minni oottoosona. Eti nabbabiyoogaa, xaafiyoogaanne oosuwau goˈˈiya hiillaa tamaarissanau timirtte keettaa essoosona. Xoossaa Kawotettaa dere asay hegaa mala timirttiyaa nashshees, qassi nabbabanau, xaafanaunne deˈuwau koshshiya miishshaa demmanau minnidi tamaarees. Eti Xoossaa Kawotettaa dere asa gididi tamaariyoobaa hegaappekka aaruwan nashshoosona. Nuuni xaafanaadaaninne nabbabanaadan Yihooway Kiristtaane gubaaˈiyaa baggaara minttettees. Yelidaageeti bantta naatuyyo nabbabanaadan Yihoowa dirijjitee zorees. Ammanettida wozannaama ashkkaray, Wochiyo Keelaanne Beegottite! maxeetetun aginan aginan daro sinttan Geeshsha Maxaafaa qofaa attamissees. Neeni galla galla guutta sinttaa nabbabikko, hegaa issi aginan wurssana danddayaasa. Yaatiyoogan, Yihooway nuna tamaarissiyoobaappe ubbatoo goˈettana danddayaasa.

14. (a) Nuuni tamaariyoy aybee? (b) So Asaa Goynuwaa omarssan neeni oosuwan peeshshido qofay awugee?

¹⁴ Kawotettaa dere asay gubaaˈe shiiqotun saaminttan saaminttan tamaarees. Leemisuwau, Tiˈokiraase Haggaazo Timirtte Keettay 60ppe dariya layttau tamaareti Xoossaa Qaalaa loyttidi tamaarissanaadan maaddiis. Neeni ha timirtte keettan mazggafettadii? Ammanettida wozannaama ashkkaray amarida layttappe haa simmin, nuuni saaminttan saaminttan So Asaa Goynuwau issi omarssaa bazzanaadan minttettees. Hegee so asaa issippetettaa minttees. Neeni nu xuufetun kiyida qofaa oosuwan peeshshadii? *

15. Nuussi gita boncho gididabay aybee?

¹⁵ Asa kawotettaa dere asay polotika yamiyau exatanaadan, haray atto sooppe soo biidikka asaa denttettees. Xoossaa Kawotettaa dere asay alame yuushuwan, dabaabaaninne sooppe soo biidi sabbakiyoogan Xoossaa Kawotettau exatiyoogaa bessees. Hagaappe kasetiya xannaˈiyo huuphe yohuwan qonccidaagaadan, Yihoowa Kawotettaa erissiya Wochiyo Keelay, ha wodiyan saˈa ubban ay xuufeppenne aaruwan asaa gakkiis! Xoossaa Kawotettaabaa haratussi yootiyoogee nuussi gita boncho. Neeni Kawotettaa mishiraachuwaa mishettada sabbakay?—Maa. 28:19, 20.

16. Neeni Xoossaa Kawotettau bessiya dere asa gidiyoogaa waatada qonccissana danddayay?

¹⁶ Mata wode Xoossaa Kawotetta xallay saˈaa haarana. Asaa naati azazettanay he Kawotettaa higgiyaa xallaassa. Neeni he wode Xoossaa Kawotettau bessiya dere asa giduutii? Gidanaagaa qonccissiyo wodee haˈˈa. Neeni galla galla kuuyiyooban ubban, ubbabaa Yihoowa bonchuwaassi ootta; yaatiyoogan, Xoossaa Kawotettau bessiya dere asadan deˈiyoogaa qonccissa.—1 Qor. 10:31.

[Tohossa qofata]

[Oyshata]

[Sinttaa 21n deʼiya misiliyaa qonccissuwaa]

Intternneetiyaara gayttidaban naagettanaadan Geeshsha Maxaafaappe akeekissiyoobaa oosuwan peeshshay?

[Sinttaa 19n deʼiya misiliyaa qonccissuwaa]

Qoraaha naatuugaadan, geeshsha goynoynne a taarikee nena ufayssii?

[Sinttaa 22n deʼiya misiliyaa qonccissuwaa]

So Asaa Goynuwaa omarssay intte Kawotettau bessiya dere asa gidanaadan keehippe maaddees