Nge Par Pangimed ni Bod Rogon ni Be Yog e Thin Rok Kristus!

“Nge par pangimed ni bod rogon ni be yog e thin rok Kristus.”​—FIL. 1:27.

UW ROGON NI GA RA FULWEG?

Chon mini’ e rayog ni ngar manged girdien Gil’ilungun Got?

Mang e ba t’uf ni ngad rin’ed ni bay rogon ko thin, nge chepin, nge motochiyel u Gil’ilungun Got?

Uw rogon ni nge dag girdien Gil’ilungun Got nib t’uf e motochiyel rok Got rorad?

1, 2. Mang nib ga’ fan ngak girdien e ulung nu Filippi fare fonow ni ke pi’ Paul ngorad?

 KE PI’ apostal Paul e athamgil nga laniyan’ girdien e ulung nu Filippi ni ‘nge par pangirad ni bod rogon ni be yog e thin rok Kristus.’ (Mu beeg e Filippi 1:27.) Fare bugithin ni Greek ni ke fanay Paul u roy ma kan piliyeg ni “nge par pangimed” e ku rayog ni ngan piliyeg ni “ngam ngongolgad ni gimed girdien Gil’ilungun Got.” Re bugithin ney e rib ga’ fan ngak girdien e ulung nu Filippi. Mang fan? Ya gowa ke tay fare Am nu Roma piyu Filippi ni ngar manged girdien, ma arfan ni motochiyel ko re Am nem e ke ayuwegrad. Ere bochan e re n’em ma piyu Filippi e kar felfelan’gad ya ke ayuwegrad e re yaram nem, ma kemus ni buchuuw e girdi’ ko ngiyal’ nem e ke yag ngorad e re tow’ath nem.

² Machane bay reb i fan ni girdien e ulung nu Filippi e kar felfelan’gad. I puguran Paul ngorad ni gaar: “Gadad e gadad e girdien yu tharmiy.” (Fil. 3:20) Gathi yad girdien e am ko girdi’ ya yad girdien Gil’ilungun Got. Ma re gil’ilungun Got ney e ma ayuwegrad ni kab fel’ nga rogon ni ma ayuwegrad e am ko girdi’.​—Efe. 2:19-22.

3. (a) Chon mini’ e rayog ni ngar manged girdien Gil’ilungun Got? (b) Mang e gad ra weliy ko re article ney?

³ Fare fonow ni ke pi’ Paul ngorad ni ‘ngar ngongolgad ni yad girdien Gil’ilungun Got’ e fan ngak e piin ni yad ra un ngak Kristus ngar gagiyeggad u tharmiy. (Fil. 3:20) Machane re fonow nem, e ku rayog ni nge fanay e piin ni yad ra par u fayleng u tan Gil’ilungun Got. Mang fan? Ya urngin e Kristiano e taareb e Pilung ni yad be pigpig ngak ni aram Jehovah, ma taareb e motochiyel ni ke pi’ ngak urngin e tapigpig rok. (Efe. 4:4-6) Ngiyal’ ney, ma boor e girdi’ ni yad be maruwel nib gel ya nge yag ni ngar manged girdien reb e nam nib fel’ rogon. Ma kab ga’ fan u wan’dad ni ngad manged girdien Gil’ilungun Got! Gad ra weliy boch e motochiyel ko am ko girdi’ nib taareb rogon ko motochiyel ko Gil’ilungun  Got, ya ra ayuwegdad e re n’ey ni ngad guyed feni ga’ fan e re tow’ath ney. Ngemu’, ma gad ra weliy dalip ban’en ni thingar da rin’ed nra ayuwegdad nge yag ni nge par ni gadad girdien Gil’ilungun Got.

BOCH BAN’EN NIB T’UF NI NGAN RIN’

4. Mang fare thin nib machalbog? Uw rogon, ma bod ni gad be ‘yog’ e re thin ney?

⁴ Ngan fil e thin riy. Bay boch e am ko girdi’ ni bay e motochiyel rorad ni fan ngak e piin ni yad be maruweliy ni ngar manged girdien e nam rorad, ni aram e ba t’uf ni ngar filed e thin riy. Tomuren ni boch e girdi’ e kar manged girdien reb e nam, ma sana ka yad be athamgil ni ngar salapgad ko thin riy. Rayog ni nge mit ngorad nib papey e motochiyel ni bay rogon ko thin u reb e nam, machane ba t’uf ni nge yan boch e tayim ma rayog ni nge puluw rogon ni nga rogned e thin riy. Maku arrogon Gil’ilungun Got ni bay e motochiyel riy ni piin ni yad ra mang girdien e ba t’uf ni ngar nanged fare “thin nib machalbog.” (Mu beeg e Zefaniah 3:9. *) Miti mang thin e ram? Aram e tin riyul’ u murung’agen Got nge tin nib m’agan’ ngay ni bay u Bible. Faanra gad be ngongol nib puluw ko motochiyel nge pi kenggin e motochiyel rok Got ma bod ni gad be ‘yog’ fare thin nib machalbog. Rayog ni ngad filed boch i kenggin e machib u Bible nib papey min taufenagdad. Machane tomuren ni kad uned ko taufe, ma thingar da athamgilgad ni ngaud salapgad i ‘yog’ fare thin nib machalbog ni buchuuw ma buchuuw. Ni uw rogon? Ra bagadad ma thingari athamgil ni nge rin’ e pi n’en ni ke fil u Bible.

5. Mang ni thingar da filed u murung’agen chepin e ulung rok Jehovah?

⁵ Ngan fil murung’agen chepin reb e am. En ni baadag ni nge mang girdien reb e am ko girdi’ e sana ba t’uf ni nge fil u murung’agen chepin e re am nem. Maku arrogon e piin ni yad ba adag ni ngar manged girdien Gil’ilungun Got e thingar ra filed murung’agen u rogon nrayog rorad. Mu lemnag e n’en ni rin’ pi fak Korah, ni yad be pigpig u Israel kakrom. Ba t’uf rorad fare mach nu Jerusalem nge gin ni yima liyor riy, ma yad baadag ni ngaur weliyed murung’agen ngak e girdi’ ni gathi bochan nib fel’ yaan, ya bochan ni aram “fare burey rok Got nib tolang ma ba gamog” ara gin ni yima liyor riy ngak Jehovah. Maku ireram e gin ni yima fil riy e Motochiyel rok Jehovah ngak e girdi’. Ngiyal’ nem, ma piin ni be gagiyegnagrad e Pilung nu Jerusalem e ri yad ba t’uf rok Jehovah. (Mu beeg e Psalm 48:1, 2, 9, 12, 13.) Gur, ga baadag ni ngam fil ma ngam weliy murung’agen chepin e ulung rok Jehovah u fayleng? Nap’an nra yoor e tamilangan’ rom u murung’agen e ulung rok Got nge u rogon ni be ayuweg e girdi’ rok, ma ra riyul’ Gil’ilungun Got u wan’um. Ma ra k’aringem ni ngam machibnag fare thin nib fel’ ni  murung’agen Gil’ilungun Got u fithik’ e pasig.​—Jer. 9:24; Luke 4:43.

6. Mang nib puluw ni nge tay Jehovah chilen ngodad ni ngad filed mad folgad ko pi motochiyel nge pi kenggin e motochiyel u Gil’ilungun?

⁶ Ngan nang murung’agen e pi motochiyel riy. Bay e motochiyel ko am ko girdi’ ni girdi’ u tan pa’ fare am e ba t’uf ni ngar filed mar folgad ko pi motochiyel riy. Ere kub puluw ni nge tay Jehovah chilen ngodad ni ngad filed mad folgad ko pi motochiyel nge pi kenggin e motochiyel ni fan ngak urngin girdien Gil’ilungun Got. (Isa. 2:3; John 15:10; 1 John 5:3) Fapi motochiyel ni girdi’ e ke fal’eg e ba ga’ ni bay e magawon riy ma de yal’uw. Machane motochiyel rok Jehovah e “ba yal’uw.” (Ps. 19:7) Gur, ga ma beeg e motochiyel rok Got nge Thin rok u fithik’ e felfelan’? (Ps. 1:1, 2) Ra bagadad mab t’uf ni nge athamgil ni nge fil murung’agen e motochiyel rok Got. Dariy be’ nrayog ni nge rin’ e re n’ey ni fan ngodad.

GIRDIEN GIL’ILUNGUN GOT E BA T’UF RORAD E PI MOTOCHIYEL ROK GOT

7. Mang fan ni girdien Gil’ilungun Got e yad ma fol ko motochiyel rok?

⁷ Rayog ni ngad pared ni gadad girdien Gil’ilungun Got nfaanra ba t’uf rodad e pi motochiyel rok. Boor girdien e am ko girdi’ ni yad ma yog nib fel’ u wan’rad e pi motochiyel u lan e nam ni yad ma par riy. Machane, faanra bay e motochiyel nib mo’maw’ ni ngar folgad riy ma yad be lemnag ndariy be’ ni be guyrad, ma yad ra th’ab e re motochiyel nem. Pi cha’nem e ba ga’ ni ke mus ni yad baadag ni ngar ‘fel’gad u wan’’ e girdi’. (Kol. 3:22) Girdien Gil’ilungun Got e bay ban’en nib thil ni be k’aringrad ni ngar folgad ko motochiyel rok Got. Ba t’uf Jehovah rodad. Ma aram fan ni gadad ba felfelan’ ni ngad folgad ko motochiyel rok Got ni yugu aram rogon ndariy e girdi’ ni be guydad.​—Isa. 33:22; mu beeg e Luke 10:27.

8, 9. Uw rogon ni ngam nang ko riyul’ nib t’uf rom e motochiyel rok Got, fa danga’?

⁸ Uw rogon ni ngam nang ko riyul’ nib t’uf rom e motochiyel rok Got, fa danga’? Bod ni, mang e ga ra rin’ nfaanra bay be’ ni ke fonownigem. Sana ke fonownigem ni bay rogon ko munmad rom, ma ga be lemnag ni bay mat’awum ni ngam mel’eg e mad ni ngam chuw ngay. Kafram, u nap’an ndawor mu nang e tin riyul’ e sana kam mecham ngay ndemtrug e mad ni ga ma chuw ngay, ara ga ma chuw ko mad nra k’aring e girdi’ ni ngar ar’arnaged e tin kireb. Machane, nap’an ni ke t’uf Jehovah rom ma kam nang rogon ni ngam munmad nra pining e sorok ngak. (1 Tim. 2:9, 10; 1 Pet. 3:3, 4) Chiney e ga be lemnag ni ke manigil e munmad rom. Machane uw rogon nfaanra bay reb e piilal nra yog ngom ni munmad rom e ke magawonnag laniyan’ boor e walag u lan e ulung? Mang e ga ra rin’? Ga ra towey, fa ngam damumuw, ara dab mu thilyeg e munmad rom? Reb e motochiyel nrib ga’ fan ni nge fol girdien Gil’ilungun Got riy e nge folwok rok Kristus. (1 Pet. 2:21) I yoloy apostal Paul murung’agen e n’en ni rin’ Jesus ni gaar: “Nge bagadad me yan nga laniyan’ walagen ni girdien Kristus ni fan ngak faanem, ya nge ayuweg nge gel e michan’ rok ngak Somol. Yi Kristus e de yan nga laniyan’.” (Rom. 15:2, 3) Reb e Kristiano ni ke ilal ko tirok Got e thingari athamgil ni nge dabi rin’ ban’en nra magawonnag laniyan’ e girdi’, ma ireray e n’en nra ayuweg ni nge par ni bay e gapas u lan e ulung.​—Rom. 14:19-21.

⁹ Chiney e ngam lemnag ko uw rogon u wan’um e par ko pumoon nge ppin nge rogon e mabgol. Piin ni gathi girdien Gil’ilungun Got e yad be lemnag ni par ko pumoon nge pumoon nge ppin nge ppin, nge yaan e puwlag, nge be’ ni kar parew be’ ni gathi mabgol rok, nge mabgol ni be dar e dariy e kireb riy. Piin ni kar manged girdien Gil’ilungun Got e dakurur lemnaged ni aram rogon. Yugu aram rogon ni boor e Kristiano ni kar uned ko ngongol ni aram rogon kafram, ma chiney e yad manang ni pumoon nge ppin ni nge mabgol e ba tow’ath ni yib rok Got. Ba t’uf rorad e motochiyel rok Got, ma  yad manang ni piin nra th’ab e motochiyel u murung’agen e par ko pumoon nge ppin nge rogon e mabgol e dabiyog ni ngar manged girdien Gil’ilungun Got. (1 Kor. 6:9-11) Machane ku yad manang ni gum’irchaen e girdi’ e ba sasalap. (Jer. 17:9) Ere yad ba felfelan’ ni ngar fanayed boch e fonow nra ayuwegrad ni ngaur folgad ko motochiyel rok Got.

GIRDIEN GIL’ILUNGUN GOT E YAD BAADAG E FONOW

10, 11. Mang fonow ni ke pi’ Gil’ilungun Got ngodad, ma uw rogon u wan’um e pi fonow ney?

¹⁰ Am ko girdi’ e yad ma pi’ e fonow u rogon ni ngan ayuweg fithik’ i dowey. Gad manang ni gathi gubin e ggan nge falay e ba kireb. Machane, faanra kan pirieg ni bay e ggan nrayog ni nge kirebnag e girdi’, ma ra pi’ e am e fonow nrayog ni nge ayuwegrad. Faanra de pi’ girdien e am e fonow ngak e girdi’ ma de yag ni ngar rin’ed ban’en nib mil fan ngorad. Maku arrogon Gil’ilungun Got, ni ma pi’ e fonow ngodad ya nge dab da th’abed e motochiyel rok Got nra kirebnag e tha’ u thildad Got. Bod ni, boor e girdi’ ni yad ma fanay e Internet ni ngar nonad ara ngar yolgad ngak e girdi’ rorad u bang, maku yad ma fil ban’en riy, ara yad ma chuweg e chalban rorad ngay. Ulung rok Got e yad ma fanay e Internet ma boor ban’en nib fel’ ni kar rin’ed riy. Machane, boor yang ko Internet nrayog ni nge magawonnag e piin ni yad baadag ni ngar rin’ed e tin nib mat’aw. Web site ni ma dag yaan e puwlag e riyul’ nib kireb. Ke yan boor e duw ni fare tapigpig nib yul’yul’ mab gonop e yad ma pi’ e fonow ngodad ni ngad paloggad riy, ma gad ba felfelan’ ni kar ayuweged gadad.

¹¹ Dawori n’uw nap’an, ma bay reb e Web site nri boor e girdi’ ni yad ma maruwel ngay. Machane, re n’ey ni ka nog e social networking ngay e rayog ni nge kirebnagdad. Rayog ni nge k’aring be’ ni nge chag ko girdi’ nib kireb. (1 Kor. 15:33) Aram fan ni ulung rok Got e ke fonownagdad u rogon ni ngad maruwelgad ngay. Gur, kam beeg urngin e pi article ni ke pi’ fare tapigpig nib yul’yul’ mab gonop ngodad ni be ayuwegdad u rogon ni ngad fanayed e re social networking site ney? Rib kireb nfaanra ngad fanayed e re n’ey ndab da beeged e fonow ni kan pi’ ngodad. * Ya bod ni kam unum e falay nib gel ni dam beeg e thin ni bay u dow e melor ko fare falay.

12. Mang fan nib kireb ni ngan darifannag e fonow?

¹² Piin ni kar darifannaged e fonow ni ke pi’ fare tapigpig nib yul’yul’ mab gonop e kar magawongad nib muun ngay e piin nib t’uf rorad. Boch i yad e kar mechamgad ngay ni ngar yaliyed yaan e puwlag ara kar uned ko ngongol ndarngal e kar bannaged yad, ya yad be lemnag ni dabi guy Jehovah e n’en ni yad be rin’. Faan gad ra lemnag nrayog ni ngad mithaged rok Jehovah e ngongol rodad nib kireb, ma ri gadad balyang! (Prov. 15:3; mu beeg e Hebrews 4:13.) Dabi pag Jehovah e piin ndarur folgad ko pi motochiyel rok ngar manged girdien Gil’ilungun, ma yu ngiyal’ e aram rogon e n’en ni ma rin’ girdien e am ko girdi’. (1 Kor. 5:11-13) Machane Jehovah e ir e Got nib tarunguyey, ma ma fanay e piin piilal ni nge guy rogon ni nge ayuweg e piin ni kar denengad. (Gal. 6:1) Piin ni kar kalgadngan’rad e ra fel’ thilrad Jehovah bayay, maku yad ra par ni yad girdien Gil’ilungun Got. (2 Kor. 2:5-8) Ere gadad ba tow’ath ni gad be pigpig ngak reb e Pilung ni ma t’ufegey!

 BA GA’ FAN E SKUL U WAN’ GIRDIEN GIL’ILUNGUN GOT

13. Uw rogon ni nge dag girdien Gil’ilungun Got nib ga’ fan e skul u wan’rad?

¹³ Boor e am ko girdi’ nib gel e maruwel ni yad ma tay ni fan ni ngar ayuweged e girdi’ nge yag ni ngar uned ko skul. Yad ma fal’eg e skul nra ayuweg e girdi’ ngar nanged e yol maku rayog ni ngar salapgad u boch e maruwel. Mab ga’ fan e pi skul nem u wan’ girdien Gil’ilungun Got, ma yad ma athamgil ni ngar nanged e yol, maku yad ma fil u rogon ni nge yag boch e salpiy ngorad. Machane kab ga’ fan u wan’rad e skul ni ke pi’ Gil’ilungun Got ngorad. Ma fanay Jehovah e ulung ko Kristiano ni nge ayuweg e girdi’ rok ngar nanged e yol. Yibe pi’ e athamgil nga laniyan’ e piin gallabthir ni ngar beeged boch e babyor ngak e pi bitir rorad ni bod e Babyor Rog Ni Chep Nu Bible. Gubin e pul ma fare tapigpig nib yul’yul’ mab gonop e yad ma ngongliy Fare Wulyang ko Damit nge Awake! Ba’ Fare Wulyang ko Damit ko thin nu Waab, ma faanra ngam beeg l’agruw e page riy ni gubin e rran, ma ga be pag ni nga i skulnagem Gil’ilungun Got.

14. (a) Uw rogon ni yibe skulnagdad? (b) Mang fonow u murung’agen e Fol Bible ni Tabinaw e kam fol riy?

¹⁴ Gubin e wik ma yima skulnag girdien Gil’ilungun Got u nap’an e pi muulung rorad. Bod ni ke pag 60 e duw ni fare Theocratic Ministry Skul e ke ayuwegrad ni ngar salapgad i fil e Thin rok Got ngak e girdi’. Gur, ga be un ko re skul ney? Dawori n’uw nap’an, ma fare tapigpig nib yul’yul’ mab gonop e kar tamilangnaged feni ga’ fan ni ngad ted e Fol Bible ni Tabinaw ni gubin e wik. Re yaram ney e ke gelnag e michan’ rok girdien e tabinaw. Kam fol u boch e fonow ni kan pi’ ngodad ni bay ko pi babyor rodad, fa? *

15. Mang reb ko pi tow’ath nrib fel’ ni bay rodad?

¹⁵ Bay boor e girdi’ ni yad ma guy rogon ni ngar weliyed ngak boch e girdi’ fan nib fel’ ni ngan ayuweg reb e am, ma boch i yad e yad ma rin’ e re n’ey u mit e tabinaw i yan. Ma girdien Gil’ilungun Got u ga’ngin yang e fayleng e ku yad ma machibnag e thin u murung’agen fare am rok Got ngak e girdi’ u kanawo’ ngu lan e tabinaw rorad. Bod ni, fan ni kan ngongliy Fare Wulyang ko Damit e ngan weliy murung’agen Gil’ilungun Jehovah. Ma rogon ni kan weliy ko bin som’on e article, e Fare Wulyang ko Damit e aram reb e babyor ni th’abi yoor ken ni kan wereg ngak e girdi’ u ga’ngin yang e fayleng. Faanra rayog ni ngad uned i weliy ngak e girdi’ murung’agen Gil’ilungun Got, ma aram e bin th’abi fel’ e tow’ath. Ga be machibnag fare thin nib fel’ u murung’agen Gil’ilungun Got u fithik’ e pasig, fa?​—Matt. 28:19, 20.

16. Uw rogon ni ngam dag ni gur girdien Gil’ilungun Got nib fel’?

¹⁶ Dabki n’uw nap’an ma kemus ni Gil’ilungun Got e ra gagiyegnag e fayleng ni ga’ngin. Ma ngiyal’ nem e kemus ni motochiyel rok Got e ra pow’iy e girdi’. Gur, rayog ni ngam mang girdien Gil’ilungun Got nib fel’ ko ngiyal’ nem? Chiney e aram e tayim ni ngam dag nrayog rom. Urngin ban’en ni ga ra dugliy u gubin e rran, ma ngam pining e sorok ngak Jehovah riy ya faanra aram rogon ma ga be dag ni gur girdien Gil’ilungun Got nib fel’.​—1 Kor. 10:31.

[Footnotes]

[Study Questions]

[Blurb on page 21]

Gur, ga ma fol ko fonow u Bible u murung’agen e Internet?

[Picture on page 19]

Ga ma felfelan’ ko liyor nib machalbog nge chep ni bod pi fak Korah?

[Picture on page 22]

Fol Bible ni Tabinaw e ra ayuwegem nge piin nib t’uf rom ngam manged girdien Gil’ilungun Got nib fel’