Unaj k-kuxtal jeʼex u kajnáaliloʼob le Reinooʼ
Unaj k-kuxtal jeʼex u kajnáaliloʼob le Reinooʼ
«Kuxlakeʼex jeʼel bix ku yaʼaliktoʼon u maʼalob péektsil Cristoeʼ.» (FILI. 1:27)
¿BAʼAX JEʼEL A NÚUKIKEʼ?
¿Máaxoʼob jeʼel u kʼaʼamloʼob bey kajnáalil tiʼ le Reinooʼ?
¿Baʼax unaj k-beetik yéetel le leyoʼob, le tʼaan ku beetaʼal teʼ Reino yéetel le baʼaxoʼob uchaʼan ichiloʼ?
¿Bix u yeʼesik u kajnáaliloʼob le Reino u yaabiltmoʼob u leyoʼob Diosoʼ?
1, 2. ¿Baʼaxten jach maʼalob le baʼax tu yaʼalaj Pablo tiʼ le múuchʼulil yaan kaʼach Filiposoʼ?
LE APÓSTOL Pablooʼ tu yaʼalaj tiʼ le múuchʼulil yaan kaʼach Filiposoʼ: «Kuxlakeʼex jeʼel bix ku yaʼaliktoʼon u maʼalob péektsil Cristoeʼ» (xokaʼak Filiposiloʼob 1:27). Le tʼaan griego ku suʼutul «kuxlakeʼex[oʼ]» jeʼel u páajtal u suʼutul xan «kuxleneʼex bey kajnáaloʼobeʼ». Lelaʼ jach maʼalob úuchik u yaʼalaʼal tiʼ le múuchʼulilaʼ, tumen u kaajil Filiposeʼ tiaʼan kaʼach ichil le nukuch kaajoʼob yéeyaʼanoʼob utiaʼal u kʼaʼamal u kajnáaliloʼob bey romanoʼobeʼ. U kajnáaliloʼob Filipos yéetel u maasil romanoʼob kajaʼanoʼob tiʼ tuláakal le imperiooʼ jach kiʼimak u yóoloʼob kaʼachiʼ, tumen chéen tiʼ letiʼob tsʼaʼan jujunpʼéel derecho jeʼex u yaʼalik u ley le romanoʼoboʼ.
2 Baʼaleʼ u múuchʼulil Filiposeʼ yaan baʼax oʼolal u maas kiʼimaktal u yóoloʼob. Tumen yéeyaʼanoʼob utiaʼal u binoʼob kaʼaneʼ Pabloeʼ tu kʼaʼajsajtiʼobeʼ, letiʼobeʼ u kajnáaliloʼob «kaʼan» (Fili. 3:20). Letiʼobeʼ u kajnáaliloʼob u Reino Dios, maʼ u gobierno wíinikiʼ. Le oʼolal maas maʼalob u kanáantaʼaloʼob yéetel maas maʼalob le utsiloʼob ku kʼamkoʼoboʼ (Efe. 2:19-22).
3. 1) ¿Máaxoʼob jeʼel u kʼaʼamloʼob bey u kajnáaliloʼob le Reinooʼ? 2) ¿Baʼax ken k-il teʼ xookaʼ?
3 Le ka tu yaʼalaj Pablo kuxleneʼex bey kajnáaloʼobeʼ maases tu yaʼalaj tiʼ le máaxoʼob kun gobernaroʼob yéetel Cristo teʼ kaʼanoʼ (Fili. 3:20). Baʼaleʼ ku yaʼalaʼal xan tiʼ le máaxoʼob kun kuxtaloʼob way Luʼum yáanal u Reino Diosoʼ. ¿Baʼaxten? Tumen tuláakloʼob ku meyajtikoʼob chéen juntúuliliʼ Rey, Jéeoba, le oʼolal junpʼéeliliʼ baʼax unaj u beetkoʼob (Efe. 4:4-6). Bejlaʼeʼ yaʼab máakeʼ ku beetik tuláakal le ku páajtal utiaʼal u kʼaʼamal bey kajnáalil tiʼ junpʼéel luʼumil ayikʼaleʼ. ¿Máasaʼ maas unaj k-beetik tuláakal le ku páajtal utiaʼal k-kʼaʼamal bey kajnáalil tiʼ le Reinooʼ? Utiaʼal k-ilik jach maʼalob le páajtalil tsʼaʼantoʼonoʼ, koʼoneʼex ilik jujunpʼéel tiʼ le baʼax ku kʼáatik junpʼéel luʼumil utiaʼal u kʼamik máak bey kajnáalileʼ yéetel le ku kʼáatik u Reino Diosoʼ. Tsʼoʼoleʼ yaan k-ilik óoxpʼéel baʼaloʼob unaj k-beetik utiaʼal maʼ u xuʼulul k-kʼaʼamal bey kajnáalil tiʼ le Reinooʼ.
BAʼAXOʼOB KʼAʼABÉET UTIAʼAL K-KʼAʼAMAL BEY KAJNÁALILEʼ
4. ¿Baʼax le tʼaan ku yaʼalik le Bibliaoʼ yéetel bix k-tʼanik?
4 U kanik máak le tʼaanoʼ. Yaan gobiernoʼobeʼ ku yaʼalikoʼob tiʼ le máaxoʼob u kʼáatoʼob ka kʼaʼamkoʼob bey kajnáaliloʼoboʼ, ka u kanoʼob le tʼaan maas ku beetaʼal teʼ luʼumiloʼ. Yaan máakeʼ kex tsʼoʼok u kʼaʼamal bey kajnáalileʼ, ku máan yaʼab jaʼaboʼob utiaʼal u tʼanik tubeel. Maʼ xaaneʼ séeb u kanik bix unaj u tsʼíibtaʼal, baʼaleʼ talam u tʼanik tubeel. U Reino Dios xaneʼ ku kʼáatik tiʼ u kajnáaliloʼob ka u kanoʼob le «tʼaan» ku yaʼalik le Bibliaoʼ (xokaʼak Sofonías 3:9). ¿Baʼax tʼaanil? U jaajil tu yoʼolal Dios yéetel le baʼax u tukultmaj u beetik yaan teʼ Bibliaoʼ. Ken k-beet baʼax ku yaʼalik u leyoʼob Diosoʼ, k-tʼanik le tʼaanaʼ. U kajnáaliloʼob u Reino Dioseʼ maʼ xaaneʼ séeb u naʼatkoʼob jujunpʼéel baʼaloʼob ku kaʼansik le Bibliaoʼ. Baʼaleʼ tak ken tsʼoʼokok u yokjaʼobeʼ tuláakal unaj u tʼanik maas tubeel le tʼaanaʼ. ¿Bixi? Maʼ chéen unaj k-kanik baʼax uts tu tʼaan Diosiʼ, baʼaxeʼ unaj k-beetik.
5. ¿Baʼaxten unaj k-kanik le baʼaxoʼob uchaʼan ichil u kaajal Jéeobaoʼ?
5 U kanik máak baʼaxoʼob uchaʼaniʼ. Le máaxoʼob u kʼáatoʼob ka kʼaʼamkoʼob bey kajnáalil tiʼ junpʼéel luʼumileʼ maʼ xaaneʼ unaj u kankoʼob le baʼaxoʼob uchaʼan teʼ luʼumiloʼ. Le máaxoʼob xan u kʼáatoʼob ka kʼaʼamkoʼob bey kajnáalil tiʼ u Reino Dioseʼ maʼalob ka u kanoʼob tuláakal le ku páajtal tu yoʼolaloʼ. Tuukulnakoʼon tiʼ u chʼiʼibal Coré, letiʼobeʼ meyajnajoʼob teʼ templo yaan kaʼach tu kaajil Israeloʼ. U yaabiltmoʼob xan kaʼach Jerusalén, le templooʼ yéetel uts tu tʼaan u tsikbaltikoʼob baʼaxoʼob uchaʼan teʼ kaajoʼ. Le baʼax maas jatsʼuts u yilkoʼoboʼ maʼ letiʼe tuunich yéetel le mezcla meyajnaj utiaʼal u beetaʼaloʼ, baʼaxeʼ letiʼe baʼax ku chíikbesik le kúuchil yéetel u kaajil Jerusalenoʼ. U kaajal Jéeoba, «le nojoch [Reyoʼ]», tumen tiʼ ku adorartaʼaliʼ. Tiʼ ku kaʼansaʼal kaʼach u Ley Diosiʼ yéetel tiʼ ku gobernar Jéeoba bey Reyileʼ (xokaʼak Salmo 48:1, 2, 9, 12, 13). ¿A kʼáat wa xan a xakʼalxokt yéetel a tsikbaltik le baʼaxoʼob uchaʼan ichil u kaajal Jéeoba way Luʼumaʼ? Jeʼex kun bin a kaanbal tu yoʼolal yéetel ken a wil bix u yáantaʼaloʼob tumen Jéeobaeʼ, maas yaan a kʼubik a wóol tiʼ u Reino Dios yéetel maas yaan u taaktal a kʼaʼaytik (Jer. 9:24; Luc. 4:43).
6. ¿Baʼaxten ku páaʼtik Jéeoba ka k-kan yéetel ka k-beet le baʼax ku kʼáatik le Reinooʼ?
6 U kʼaj óoltik máak u leyoʼob. Le gobiernoʼoboʼ ku kʼáatkoʼob tiʼ u kajnáaliloʼob ka u kanoʼob yéetel ka u beetoʼob le baʼax ku yaʼalik u leyoʼoboʼ. Jéeoba xaneʼ ku páaʼtikeʼ, u kajnáaliloʼob le Reino ka u kanoʼob yéetel ka u beetoʼob le baʼax ku kʼáatikoʼ (Isa. 2:3; Juan 15:10; 1 Juan 5:3). U suukileʼ u leyoʼob wíinikeʼ maʼ jach maʼalobtakiʼ yéetel maʼ tu taasik utsil tiʼ tuláakal. Baʼaleʼ u leyoʼob Jéeobaeʼ «chúukaʼan» wa jach maʼalobtak (Sal. 19:7). ¿Kiʼimak a wóol wa tu yoʼolal le leyoʼobaʼ yéetel ka xokik sáamsamal le Bibliaoʼ? (Sal. 1:1, 2.) Chéen bey jeʼel u páajtal k-kanik u leyoʼob Diosoʼ. Mix máak jeʼel u beetik t-oʼolaleʼ.
U KAJNÁALILOʼOB LE REINOOʼ U YAABILTMOʼOB U LEYOʼOB DIOS
7. Toʼon u kajnáaliloʼob le Reinooʼ, ¿baʼaxten k-tsʼoʼokbesik u leyoʼob Dios yéetel bix k-beetik?
7 Utiaʼal maʼ u xuʼulul k-kʼaʼamal bey kajnáalil tiʼ le Reinooʼ, unaj k-yaabiltik u leyoʼob, maʼ chéen unaj k-kʼaj óoltikiʼ. Bejlaʼeʼ yaʼab máak aʼalikeʼ ku kʼamik u ley le luʼum tuʼux kajaʼanoʼ. Baʼaleʼ wa yaan baʼax maʼ uts tu tʼaan yéetel ku tuklik mix máak ilkeʼ, maʼ tu beetik baʼax ku yaʼalik. U suukileʼ chéen ku beetik «tiʼ le kʼiin táan [u] paktaʼal[oʼ]» (Col. 3:22). Baʼaleʼ toʼon u kajnáaliloʼob le Reinooʼ maʼ bey k-beetkiʼ. Kiʼimak k-óol k-beetik baʼax ku yaʼalik u leyoʼob Dios kex mix máak ilkoʼon. ¿Baʼaxten? Tumen k-yaabiltmaj le Máax tsʼáaoʼ (Isa. 33:22; xokaʼak Lucas 10:27).
8, 9. ¿Bix jeʼel a wojéeltik wa jach tu jaajil a yaabiltmaj u leyoʼob Dioseʼ?
8 ¿Bix jeʼel a wojéeltik wa jach tu jaajil a yaabiltmaj u leyoʼob Dioseʼ? Máans ta tuukul bix a kʼamik le tsolnuʼuk ku tsʼaʼabaltech yoʼolal bix a vestirkaba yéetel a líiʼskabaoʼ. Táanil tiʼ a kʼaʼamal bey kajnáalil tiʼ le Reinooʼ maʼ xaaneʼ maʼ maʼalob bix a vestirkabaiʼ. Baʼaleʼ ka joʼopʼ a maas yaabiltik Dioseʼ káaj a vestirkaba tubeel utiaʼal a nojbeʼenkúuntik u kʼaabaʼ (1 Tim. 2:9, 10; 1 Ped. 3:3, 4). Bejlaʼeʼ maʼ xaaneʼ ka wilik maʼalob a vestirkaba. Baʼaleʼ ¿baʼax jeʼel a beetik wa ku yaʼalaʼaltech tumen juntúul anciano ku tʼóochpajal jujuntúul j-kʼaʼaytajoʼob teʼ múuchʼulil yoʼolal bix a vestirkabaoʼ? ¿Jeʼel wa a tsʼíikileʼ? ¿Jeʼel wa a pechkaba a waʼal maʼ kʼaaseʼ? Junpʼéel tiʼ le leyoʼob maas nuuktak tiʼ u Reino Diosoʼ ku yaʼalikeʼ tuláakal u kajnáaliloʼob unaj u kuxtaloʼob jeʼex kuxlajik Cristoeʼ (1 Ped. 2:21). Tak apóstol Pabloeʼ tu yaʼalaj: «Jujuntúul tiʼ toʼoneʼ unaj u lúubul utsil tu táan uláakʼ tiʼ jeʼel baʼalak utiaʼal u yutsil uláakʼeʼ» [...]. Tumen mix Cristo lúub utsil chéen tu táan letiʼ» (Rom. 15:2, 3). Utiaʼal u yantal jeetsʼelil teʼ múuchʼuliloʼ, le máax yiijchajaʼan u tuukuloʼ yéetel kiʼimak óolal ku kʼexik baʼax ku beetik utiaʼal maʼ u tʼóochpajal mix máak (Rom. 14:19-21).
9 Koʼoneʼex ilik uláakʼ kaʼapʼéel baʼal jach kʼaʼanaʼan: le bix k-ilik le tsʼoʼokol beel yéetel le sexooʼ. Le máaxoʼob maʼ kajnáaloʼob tiʼ u Reino Dioseʼ maʼ xaaneʼ maʼ kʼaas u yilkoʼob le homosexualidadoʼ mix le pornografíaoʼ yéetel maʼ xaaneʼ ku tuklikoʼobeʼ maʼ kʼaas le divorciooʼ mix u tusik u núup máak yéetel yaanal, le oʼolal ku yaʼalikoʼob cada juntúul unaj u chʼaʼtuklik wa yaan u beetik. Baʼaleʼ u kajnáaliloʼob le Reinooʼ maʼ bey u yilkoʼobiʼ. Yaʼab máax meyajtik Dioseʼ ku beetkoʼob baʼaloʼob kʼaastak kaʼachi, baʼaleʼ tsʼoʼok u naʼatkoʼobeʼ le tsʼoʼokol beel yéetel le sexooʼ junpʼéel u siibal Jéeoba. U yaabiltmoʼob xan u leyoʼob Dios yéetel u yojloʼobeʼ le máaxoʼob ku núupkʼebantaloʼoboʼ maʼ kun kʼambiloʼob bey kajnáaloʼob tiʼ le Reinooʼ (1 Cor. 6:9-11). Yojloʼob xaneʼ le puksiʼikʼaloʼ jeʼel u tusik máakeʼ (Jer. 17:9). Le oʼolal ku kiʼimaktal u yóoloʼob ken aʼalaʼaktiʼob tiʼ baʼax unaj u kanáantkubaʼob utiaʼal u biskoʼob junpʼéel toj kuxtal.
U KAJNÁALILOʼOB LE REINOOʼ KIʼIMAK U YÓOL U TSOLNUʼUKTAʼALOʼOB
10, 11. U Reino Dioseʼ, ¿tiʼ baʼax ku yaʼalik unaj k-kanáantikba, yéetel bix a wilik?
10 Le gobiernoʼoboʼ utiaʼal maʼ u kʼojaʼantal máakeʼ u suukileʼ ku yaʼalikoʼob baʼax maʼ unaj u jaantaʼaliʼ yéetel baʼax tsʼaakil jeʼel u beetik kʼaaseʼ. U jaajileʼ maʼ kʼaas tuláakal le baʼaloʼobaʼ. Baʼaleʼ wa yaan junpʼéel jeʼel u beetik kʼaaseʼ, maʼ xaaneʼ le gobiernooʼ ku yaʼalik unaj u kanáantkuba máak tiʼ. Wa maʼ u beetkeʼ yaan u yaʼalaʼal u culpa. U Reino Dios xaneʼ ku yaʼalik tiʼ baʼax unaj k-kanáantikba utiaʼal u yantaltoʼon junpʼéel toj kuxtal. Le palitsil chúukaʼan u yóoloʼ tsʼoʼok u máan yaʼab jaʼaboʼob táan u yaʼalik tiʼ u kajnáaliloʼob le Reino ka u kanáantubaʼob tiʼ le baʼaloʼob jeʼel u náachkuntkoʼob tiʼ Dios, jeʼex le pornografía teʼ Internetoʼ. ¿Máasaʼ jach kiʼimak k-óol yoʼolal le tsolnuʼukoʼobaʼ?
11 Bejlaʼeʼ yaan uláakʼ baʼaloʼob jach kʼaj óolaʼan tiʼ Internet jeʼel u yáantajeʼ, baʼaleʼ jach unaj u kanáantik máak bix u meyajtiʼ. Letiʼe redes socialesoʼ, tumen jeʼel u beetik u biskuba máak tak yéetel máaxoʼob maʼ unajeʼ (1 Cor. 15:33). Le oʼolal u kaajal Jéeobaeʼ ku yaʼalik unaj k-kanáantikba tiʼ. ¿Tsʼoʼok wa a xokik tuláakal le baʼax tsʼoʼok u yaʼalik le palitsil chúukaʼan u yóol tu yoʼolaloʼ? U yokol máak tiʼ junpʼéel red social táanil tiʼ u xokik le jóoʼsaʼaniloʼobaʼ, bey ka u yukʼ junpʼéel tsʼaak jach fuerte táanil tiʼ u xokik baʼax jeʼel u beetkeʼ. *
12. ¿Baʼaxten jach minaʼan u naʼat le máax maʼ tu beetik u cuentail le tsolnuʼukoʼoboʼ?
12 Le máaxoʼob maʼ tu beetkoʼob le baʼax ku yaʼalik le palitsiloʼ ku bintiʼob kʼaasil yéetel ku beetkoʼob u muʼyaj u láakʼtsiloʼob. Yaneʼ ku suuktal u chaʼantik pornografía wa ku núupkʼebantal, tumen ku tuklik maʼ tu yilaʼal tumen Jéeoba. ¡Jach minaʼan u naʼat le máax beetik beyoʼ! (Pro. 15:3; xokaʼak Hebreob 4:13.) Jeʼex le gobiernoʼob ku xuʼulul u kʼamik bey kajnáalil le máax ku bin tu contra le leyoʼ, Jéeobaeʼ yaan u xuʼulul u kʼamik bey u kajnáalil le Reino le máax maʼ tu yuʼubik u tʼaan yéetel maʼ tu arrepentiroʼ (1 Cor. 5:11-13). * Baʼaleʼ tu yoʼolal u chʼaʼ óotsilileʼ taak u yáantkoʼob, utiaʼal lelaʼ ku meyajtiʼ le máaxoʼob meyajtik way Luʼumeʼ (Gal. 6:1). U maʼalobileʼ le máax ku arrepentir yéetel ku kʼexik u kuxtaleʼ jeʼel u kaʼa kʼaʼamal tumen Dios bey u kajnáalil le Reinooʼ (2 Cor. 2:5-8). ¿Máasaʼ jach maʼalob u meyajtaʼal juntúul Rey beyaʼ?
U KAJNÁALILOʼOB LE REINO KIʼIMAK U YÓOLOʼOB IKIL U KAʼANSAʼALOʼOB
13. ¿Bix u yeʼesik u kajnáaliloʼob le Reino kiʼimak u yóol u kaʼansaʼaloʼoboʼ?
13 Yaʼab gobiernoeʼ ku yilik u kaʼansik u kajnáaloʼob. Utiaʼal u yantal baʼax kʼaʼabéettiʼobeʼ ku beetkoʼob escuelaʼob utiaʼal u kaʼansaʼaloʼob xook yéetel tsʼíib. Le máaxoʼob meyajtik Diosoʼ maʼalob u yilkoʼob yéetel ku jóoʼskoʼob u yutsil, baʼaleʼ maas maʼalob u yilkoʼob le kaʼansaj ku tsʼaʼabaltiʼob bey u kajnáaliloʼob le Reinooʼ. Jéeobaeʼ ku yaʼalik unaj u suuktal u xook le máaxoʼob yanoʼob ichil u kaajaloʼ. Tiʼ le taatatsiloʼoboʼ ku yaʼalaʼal ka xooknakoʼob utiaʼal u yuʼub u mejen paalaloʼob. Yéetel utiaʼal k-maas kaanbal tiʼ le Bibliaoʼ le palitsil chúukaʼan u yóoloʼ, ku jóoʼsik yaʼab revista U Pʼíich Tulumil Kanan yéetel ¡Despertad! Wa ka xokik sáamsamal kaʼapʼéel táan juʼunoʼobeʼ yaan u bin a kanik le baʼaxoʼob ku kaʼansik Diosoʼ.
14. 1) ¿Baʼax kaʼansajil ku tsʼaʼabaltoʼon? 2) Tiʼ le baʼaxoʼob ku yaʼalaʼal yoʼolal le Adoración ich Familiaoʼ, ¿máakalmáak tsʼoʼok u páajtal a beetkiʼ?
14 Cada semanaeʼ teʼ muchʼtáambaloʼoboʼ ku kaʼansaʼal u kajnáaliloʼob le Reinooʼ. Jeʼex le muchʼtáambal Kaanbalil utiaʼal Kaʼansajoʼ, tsʼoʼok maas tiʼ sesenta jaʼaboʼob káajak u yáantik máak u kaʼans tubeel u Tʼaan Dios. ¿Tsʼoʼok wa u káajal a táakpajliʼ? Teʼ tu tsʼook jaʼaboʼob xanaʼ le palitsil chúukaʼan u yóol yéetel yaan u naʼatoʼ yaʼab u téenel tsʼoʼok u yeʼesik baʼaxten unaj u beetaʼal le Adoración ich Familiaoʼ. Lelaʼ ku beetik u maas biskuba le familiaʼoboʼ. ¿Tsʼoʼok wa a beetik le baʼax ku yaʼalik le jóoʼsaʼaniloʼob tu yoʼolaloʼ? *
15. ¿Baʼax jatsʼuts meyajil yaantoʼon?
15 Yaʼab tiʼ le máaxoʼob ku tsʼáaikubaʼob tu tséel junpʼéel gobiernooʼ, ku máanoʼob joonaj joonajil utiaʼal u yaʼalikoʼob ka u tsʼáauba máak tu tséel le gobiernooʼ. Yéetel kiʼimak óolal xaneʼ u kajnáaliloʼob le Reinooʼ ku yeʼeskoʼob teʼ calleʼob yéetel joonaj joonajil tiaʼanoʼob tu tséel u gobierno Dioseʼ. Tsʼoʼoleʼ jeʼex t-ilaj teʼ xook máanikoʼ, U Pʼíich Tulumil Kananeʼ letiʼe revista maas ku kʼaʼaytaʼal tiʼ tuláakal le Luʼumaʼ, u biilaleʼ u kʼaʼaytik u Reino Jéeoba. Junpʼéel tiʼ le maas jatsʼuts meyaj yaantoʼonoʼ letiʼe k-kʼaʼaytik le Reinooʼ. ¿Ka tsʼáaik wa a wóol a beete? (Mat. 28:19, 20.)
16. ¿Bix jeʼel k-eʼesik maʼalob kajnáaloʼon tiʼ u Reino Dioseʼ?
16 Maʼ kun xáantaleʼ chéen u gobierno Dios kun gobernar way Luʼumeʼ. Yaan u nuʼuktik tuláakal baʼax k-beetik. Teʼ kʼiinoʼoboʼ, ¿yaan wa k-ilaʼal maʼalob kajnáaloʼon? Wa beyoʼ desde bejlaʼa unaj k-eʼesikeʼ. Koʼoneʼex nojbeʼenkúuntik Jéeoba yéetel baʼaxoʼob k-chʼaʼtuklik k-beetik sáamsamal yéetel koʼoneʼex k-eʼesik maʼalob kajnáaloʼon tiʼ u Reino Dios (1 Cor. 10:31).
[Tsolajiloʼob]
^ xóot’ol 11 Ilaʼak ¡Despertad! tiʼ julio tiʼ 2011, táan juʼun 24 tak 27, bey xan tiʼ agosto tiʼ 2011, táan juʼun 10 tak 13, yéetel tiʼ febrero tiʼ 2012, táan juʼun 3 tak 9.
^ xóot’ol 14 Ilaʼak U Pʼíich Tulumil Kanan 15 tiʼ agosto tiʼ 2011, táan juʼun 6 yéetel 7, yéetel K-meeyjil tiʼ le Reino tiʼ enero tiʼ 2011, táan juʼun 3 tak 6.
[U kʼáatchiʼiloʼob le xookoʼ]
[Uláakʼ baʼax ku tsoʼolol teʼ táan juʼun 14]
¿Ka beetik wa le baʼax ku yaʼalik le Biblia yoʼolal le Internetoʼ?
[Foto yaan teʼ táan juʼun 12]
Jeʼex u chʼiʼibal Coreeʼ, ¿a yaabiltmaj wa u jaajil adoración yéetel le baʼaxoʼob uchaʼan ichiloʼ?
[Foto yaan teʼ táan juʼun 15]
Le Adoración ich Familiaoʼ jeʼel u yáantkeʼex a beetabaʼex maʼalob kajnáalil tiʼ le Reinooʼ
