Deregüdagu wamá tuéi lisadaran Satanási

“Deregüdagu humá luéi leyeedagunün Mafia.” (EFE. 6:11)

KABA HAMUGA HÓUNABA?

Ka lunbei hadügüni lubúeingu Heowá lun máfarun tániña sádara lánina línsiñegu umegeguni?

Kaba íderaguaña kristiánugu maríeitiña lun méiguadun hamá lidoun fusu lánina agabarahani?

Ka buiti wibihibei dan le mígiraguagüdün wamá woungua lun línsiñegu umegeguni luma lun magíaguni?

1, 2. a) Ka uagu magudemehabu lubéi Satanási houn kristiánugu anuadirúaaña ni houn ha “amu mudún”? b) Kaba lisadaran Satanási wakutiha lidan arütíkulu le?

MASANDITI Satanási ni murusun gudemehabu hawagu gürigia, hawagutima ha eseriwidubaña lun Heowá. Le linarün aban katei, aranseñu liña lun lawuribuhan hama kristiánugu anuadirúaaña ha añahaguabaña awinwanda ya ubouagu (Aruf. 12:17). Kristiánugu úaraguatiña ha hagía anügübalin ubaraü uguñe weyu lidan lapurichihóun Larúeihan Bungiu luma lidan lasubudiragüdüniwa Mafia lan arúeihabalin ubóu le. Iyereegutiña giñe “amu mudún” ha íchugubalin hídehan houn kristiánugu anuadirúaaña lun Satanási, ha gámabalin emenigini le leferidirubei lúmagiñe lüha: hawinwandun lun súnwandan (Huan 10:16). Ligía luéirinbei ligañi! Dandu anhein hemenigi wabéi wawinwandun sielu o ya ubouagu ábanrügüñein katei labusenra wágani: lárügüdüniwa (1 Fe. 5:8).

² Adügaali ámuñegueinarügü sádara lun libihini le labusenrubei. Luéigiñe aban oubaü, daruguati lau hasaminan gürigia ha mafiñenbaña luagu Heowá, lun mánharun hamá lun uganu buiti luma lun marihin hamanu lisadaran. Gama lumoun, lárühaña giñe hádangiñe ha ánharañabaña lun uganu lánina Larúeihan Bungiu (2 Ko. 4:3, 4). Lidan arütíkulu le ásügürübei akutihatiwa ǘrüwa tídangiñe lisadaran Satanási: 1) dimurei le ariñawagúbei masaminarunga, 2) anufudei luma hínchaniwa amu adüga katei wuribati, luma 3) igarigu le wasandirubei luagu wachara. Guentó akutiha wamá ida luba lan werederun deregüdagu luéi wéiguadun tidoun bián sádara: ínsiñeni luagu umegeguni luma agabarahani.

ÍTARA LIÑA LÍNSIÑEGU UMEGEGUNI KEI ABAN GÚRUDU LE GAYARATI LÁFARUNIWA

3, 4. Ida liña gayara lan lanügüniwa idiheri le lánina ibagari le lun línsiñedun umegeguni woun?

³ Lidan aban lídangiñe hénpulu le líchugubei, ayanuhati  Hesusu luagu ilaü le abunúbei laganagua hiyu. Según lafuranguagüdüni Hesusu, layanuhaña hénpulu le hawagu “ha aganbubalin uganu, gama lumoun wéiritimati hafuudun luagu katei le lánina ibagari le, aba leyeeduniña irisini. Sun le, aba láfaruni uganu tídangiñe hanigi; mígiruntiti lun lalubahóun hadan” (Mat. 13:22). Kei warihini, línsiñegu umegeguni tuguya ábanya sádara to lesetiruboun Mafia wabá.

⁴ Ariha wamá luagu biámañein lan katei le ‘áfarubalin uganu tídangiñe wanigi’ dan le lóundarawagun. Furumiñeti “hafuudun luagu katei le lánina ibagari le”. Lidan “weyu hénrenguti” le, gíbeti katei le gayarati lagidaruni wadabagu (2 Tim. 3:1). Adügati liserunga luma luan wadagimanu lun hénrengutima lan lóustarun waseinsun darí lagumuchun hati. Dan le wasaminarun luagun dan le lunbei liabin, háfuga álügüdaguatiwa woungua: “Danme le mawadigimaridunhadina ladüga nirumudiri, lóustaruba funa san niseinsun lun nawinwandun?”. Ladüga burí idiheri le, hóuchatiña fiú gürigia hagañeiruni sun seinsu le hayaraati, ladüga hafiñerun líchuguba lan katei le ichoururuni houn.

5. Ka san uagulariñawagúa luagu gabafu lan ‘irisini lun leyeeduniña’ gürigia?

⁵ Írida lumuti Hesusu libiaman katei le adügübei úara luma idiheri lun ‘lafarún uganu le tídanbei hanigi gürigia’: “leyeeduniña irisini”. Inarüni ariñaga tan Bíbülia luagu ‘ounigihati lan seinsu’ (Apur. 7:12). Gama lumoun, libidiounigan aau wetenirun lúnrügü láluahoun seinsu. Gíbeeña gürigia íchugutiña fe luagu éibutima lan háfaagun lun háluahan haganwoundagüdüni harisin, ábatima lan háhürüdagun tidan sádara to lánina línsiñegu umegeguni. Darí lun amudiraguagüdaaña lan fiú houngua lun irisini (Mat. 6:24).

6, 7. a) Ka katei gayarabei lanügüniwa lun wéiguadun lidoun línsiñegu umegeguni lidan wawadigimari? b) Ka lunbei wasaminaruni furumiñe anhein ariñawagúa woun lun wawadigimaridun lóugiñe oura le wawadigimaridubei?

⁶ Gayarati laweiridun wayumahan wagañeirun seinsu sin wíchugun fe. Aban hénpulu, samina humá, lun hamuga lariñagun hiyubudiri hun: “Anirein iseri ñunsu! Séiniharu kónpeni aban iseri daradu lánina bísinisi. Lidan hati le lunbei liabin mósume wawadigimaridun lóugiñe oura le wawadigimaridubei guentó, gama lumoun füramasetina hun luagu buídubei lan fáyeiti”. Kaba hamuga san hóunaba? Chóuruti, aban lan buligasion súdiniti hanügün éigini múnadoun, gama lumoun mámarügüñein lira hani buligasion (1 Tim. 5:8). Lunti gabaroun humá amu burí katei. Aban hénpulu, átiribei san oura huádigimaridun? Leberesehabei san katei burí le lunti hadügüni lidan háhuduragun lun Bungiu kéiburi adamuridaguni luma Guñoun lánina Áhuduraguni lidan Familia?

⁷ Ka lunbei súdinitima lan hun? Hasaminaruba san luagu seinsu leme lunbei hareiduni bankurugu ánhadün awadigimarida lanwoun lóurate huádigimari, o hasaminaruba luagu efekütu le lunbei gani lani le lidan humadagua luma Bungiu? Híchugubei hamuga san luáguti Larúeihan Bungiu lidoun libiaman lúgaaru ladüga weiri  lan hayumahan hagañeirun seinsu? Gunfuranda humuti san le gayarabei lasuseredun ánhadün metenirun lun humadagua luma Bungiu luma hamadagua hiduheñu luma Bungiu? Ánheinti hásügürüña lubéi luéigiñe katei le, ka gayarabei hadügün luéi gani lan línsiñegu umegeguni luriban efekütu huagu? (Aliihoualá 1 Timotéu 6:9, 10.)

8. Kaba hénpulu tídangiñeti Bíbülia íderaguawa akutihei wabagari?

⁸ Lun máfarunlanün línsiñegu umegeguni, lunti háluahan dan lun hakutihani hibagari. Maweiyasun humá ítarada kei Esaú le meha íchugubei mebereseni luagu katei luáguti Bungiu (Agu. 25:34; Ebü. 12:16). Mítaran humá giñe kei meha rísiti le máhabei laluguruni lumegegun lun líderaguniña gudemetiña lun aban lan hádangiñe lani Hesusu disipulugu, lubaragiñe lira, aba “lidin lau íruni” ladüga wéiriti meha lirisin (Mat. 19:21, 22). Yéedagua laali meha irisini darí lun leferidiruni chansi lun lani lan wügüri le súdinitimabei hádangiñe sun ha wínwanhañabaña disipulu. Anhein mabusenrun wabéi weferidiruni chansi le, mosu wóunigiragun woungua luéi línsiñegu umegeguni.

9, 10. Ka tarufudahabei Bíbülia luagu lagamadúniwa umegeguni?

⁹ Lun mígiraguagüdün wamá woungua lun idiheri luagu lagamadúniwa umegeguni falá waméi eweridihani le líchugubei Hesusu: “Madiherida humá lubeiti ariñaga: ‘Kaba san weiga?’ O ‘Kaba san wata?’ O ‘Kaba san wadaüra?’ Gürigia ha lánigu ubóu le, luágunrügüñein burí katei le haritagua; anhein huguya, anihein húguchi Bungiu sielu le subudihabúbalin katei lan hemegeirubei” (Mat. 6:31, 32; Luk. 21:34, 35).

¹⁰ Subuditi meha luáguti lebegi seinsu lun aban abürühati Bíbülia gíriti Aguru ligía mígiraguagüdün lubéi lungua lun leyeedaguni irisini. Ligíati lamuriahanbei luma Heowá: “Marisidagüdabana magudemedagüdün báname, rubei lérügü nemegeirun nun” (Ari. 30:8). Áfaagua wamá lun wáyeihani ligaburi. Gabaroun waméi luagu gayara lan ladügün idiheri lánina ibagari luma ubafu le luágubei irisini lun leyeedaguniña gürigia lun lagadeirun wamadagua luma Heowá. Ánhawa adiherida saragu luagu umegeguni, madaanihadiwame, mere wagíame ani mabusenrunhadiwame wawadigimaridun lun lawanserun luáguti Larúeihan Bungiu. Ligíati, desidírü wamá tídangiñe sun wanigi méiguadunbadiwa lan tidoun lisadaran Satanási lánina línsiñegu umegeguni (aliihoualá Ebüréu 13:5).

MÉIGUADA WAMÁ LIDOUN FUSU LÁNINA AGABARAHANI

11, 12. Ida liña gayara lan héiguadun kristiánugu tidoun sádara lánina agabarahani luma o tuma somu paaná lidan wadagimanu?

¹¹ Añahein fiú agaliruhatiñu árühatiña animaalugu héretiña lau hachigin aban huyu huliliti lidan üma le ñéingiñe lubéi hásügüra, luéi harihini animaalugu huyu ligía aba haramuduni lau tuburébu wewe, tubana wewe luma lau múa. Ligíati, gayarati konpararü wamanu sádara to luma óuchawaguni le rútimahalibei resultóu lun Satanási: magíaguni (Ari. 22:14; 23:27). Añahein kristiánugu héiguaaña lidoun “fusu” le, ladüga hayarafahóun lun burí katei le adügübei lun ménrengun lan hafigouhan. Aban hénpulu, gumesetiña fiú burí gürigia maríeitiña umadaguaü le moun lumuti hama gürigia ha mama hani weiriei o weiriou ani barǘ lumutiña le lidoun agabarahani.

¹² Halía gayara lan lasuseredun katei burí le? Gayarati lasuseredun lidan wadagimanu. Según aban aturiahani le adügǘbei, lóugiñe hamidan würiña ha agabarahabaliña hani weiriei hama hibe-agei wügüriña ha agabarahabarun hani weiriou, adüga hamuti luma o tuma aban paaná lidan wadagimanu. Anhein mosu lubéi hásügürün saragu dan lidan huádigimari hama würiña anhein wügüri hubéi o anhein würi hubéi hama wügüriña, ida liña hanaagun hungua hama? Ígiratün san furangu mabusenrun humá amu katei hama hánigu paaná luéidigia katei lánina wadagimanu? Másiñati yarafagua lan tayanuhan aban kristiána luma somu tipaaná le tarihibei kei aban gürigia le únbei gayara lan tabahüdahani luáguti tibagari darí lun tabahüdaguni burí titurobulin luma tani weiriei lun. O másiñati ladügün aban kristiánu umadaguaü tuma aban lipaaná ábati lasaminarun:  “Gebegiti le nasaminarubei tun würi to ani aganba tumutina dan nayanuhan tuma. Anati tuguya inebetina tun. Ítaradügü hamuga nouserúniwa múnada!”. Lidan sügǘ kéiburi le, ménrengunti hagabarahan gürigia ha asaminarubaña ítara.

13. Ida liña gayara lan ñein lan aban umadaguaü le moun lumuti lidan damuriguaü?

¹³ Damuriguaü ligía amu fulasu le ídanbei gayara lan hagumeserun maríeitiña umadaguaü le moun lumuti. Ítara liña larufuduni lásügürün Danieli tuma Sara to lani weiriou, * ha meha prekursorubaña hádangiñe ha adügübaña ǘrüwa-wein-diisi oura sagü hati. Ariñagati aban lan meha wéiyaali lidan afiñeni ligía le ánharubei lun sun wadagimanu le ichugúti lun lidan lóundarun Heowá. Ruti meha külase tídangiñe Bíbülia houn seingü wügüriña ha nibureingiña. Badiseitiña ǘrüwa hádangiñe ani mégeitiña meha ídemuei lun hasandiragun houngua buidu. Kei meha le bereseguñein lubéi Danieli agunfulirei lani buligasion lidan damuriguaü, ábaha tetenirun Sara houn. Ságüha lemegeirun aban hádangiñe nibureintiña ha aturiahabaña luma Danieli ídemuei, Sara meha íderagubaliña. Keiti íbini lan tuguya mégeitu letenirún tun, ténitiña meha ha aturiahabaña luma Danieli tun. Aranseeru meha aban sádara gáfarahatu. Ka lánibei resultóu? Afuranguagüda lumuti Danieli: “Gíbeti hati tásügürün nani weiriou íderaguaña, ábati ledebilidun tumadagua luma Heowá luma ligaburi tasandiragun tungua. Gama lumoun metenitina meha tun. Aranseeli buga sun katei lun ñein lan aban turóbuli wéiriti: aba téiguadun Sara lidoun agabarahani luma aban hádangiñe nibureintiña hagía. Aba meha ledebilidun tumadagua Sara luma Heowá ligibugiñe nagu ani míchutina fe ladüga weiri lan netenirun lun nuberesegun”. Ka lunbei wadügüni luéi lasuseredun ligiaméme woun?

14, 15. Kaba íderaguaña kristiánugu ha maríeitiña lun mábürühan hamá lidoun agabarahani?

¹⁴ Aban katei le gayarabei líderaguniwa lun méiguadun wamá lidoun agabarahani wasaminarun luagu le mini lubéi úaragua wamá lun wani weiriei o tun wani weiriou. Ariñagati Hesusu: “Ligía moun lubéi lafanreinraguni wügüri le ladunraguagüdübei Bungiu” (Mat. 19:6). Maweiyasun humá asaminara súdinitima lan hani buligasion lidan heseriwidun lun Bungiu tuéi hani weiriou o weiriei. Anhein hechu hubéi ásügüra saragu dan etenira hábuguarügü lun katei burí le masudininbei, góunigi humá: másiñati anihein lan somu débili lidan hamarieidun le gayarabei lanügün lidoun aban óuchawaguni le gayarabei lanügün lidoun aban figóu wéiriti.

¹⁵ Anhein aban lubéi wéiyaali lidan afiñeni huguya gunfurandawati hadiheridun hawagu lánigu Bungiu mudún. Abürühati apostolu Féduru: “Góunigi humaña lirahüñü Bungiu ha lábugiñebaña haríaahan keisi hóunigiruniña hóuniri mudún mudún. Adüga huméi lau ugundani keisi labusenruni Bungiu, mama ladüga hafosuruña lan; adüga huméi ladüga busén humá heseriwidun lun Bungiu, mama ladüga línsiñe seinsu hun” (1 Fe. 5:2). Ligíati, lunti hóunigiruniña lílana damuriguaü ladüga Bungiu íchugubalin kárugu hun. Gama lumoun mama ladüga mosu lan hóunigiruniña lílana damuriguaü lun metenibadün lan tun hani weiriou. Mabuidunti ani peliguruti hetenirun houn íbirigu lidan damuriguaü ani metenitün lun híderagunu hani weiriou lidan táhuduragun lun Heowá. Ariñagati Danieli, le buga uágubei wayanuha: “Siñati báfaagun saragu lun betenirun lun bani buligasion darí lun meteniba houn biduheñu”.

16, 17. a) Ka katei gayarabei hadügüni kristiánugu maríeitiña lun harufuduni furangu luagu mabusenrun hamá hagabarahan? b) Írida humá somu ariñahani le áfuachuti tidan burí agumeiraguagüdüni le íderagutiña kristiánugu lun magabarahan hamá.

¹⁶ Rúharu Garüdia Atalaya tuma ¡Despertad! saragu adundehani huuti lun tíderaguniña kristiánugu ha maríeitiña lun méiguadun wamá lidoun agabarahani. Aban hénpulu, tidan Garüdia Atalaya to lánina 15 lidan widü-hati irumu 2006 agumeiraguagüdawati adundehani le asigirubei: “Dandu lidan wadagimanu kei lidan amu fulasu góunigi humá luéi katei burí le gayarabei ladügün lun hagumeserun umadaguaü le moun  lumuti. Kéiburi dan le herederun awadigimarida lóugiñe oura le lunbei hawadigimariduni anhein wügüri hubéi tuma aban würi o anhein würi hubéi luma aban wügüri gayarabei hagagibudagun luma óuchawaguni. Kei gürigia maríeiti mosu hígiruni furangu dandu lau le hariñagubei kei lau ligaburi hóuserun luagu mabusenrun humá hagabarahani hani weiriei o weiriou. Keiti hudugua hubéi lun Heowá, madügünbadün katei lun hínsiñedun lun somu wügüri o würi, masansiragunbadün giñe ani maranseragun hugíame hungua lidan aban igaburi le adügübei lun hawamadun houn amu [...]. Híchugunu liyawa hani weiriei o weiriou tuma hayawa hisaanigu lidan aban fulasu le furanguti lidan huádigimari, laritaguagüdübei hun luma houn amu ka lan katei súdinitimabei hun. Desidírü humá maweiyasunbadün lan íchiga lébuna hadarihanün amu mígirun hugíame lun lasuseredun”.

¹⁷ Lidan arütíkulu le gíribei “¿Qué implica realmente la fidelidad conyugal?”, le áfuachubei tidan garüdia ¡Despertad! to lánina gádürü-hati irumu 2009, eweridihóuati luagu dan lan le herederun gürigia asaminara luagun hagamaridun aban gürigia to mama hani weiriou o weiriei ménrenguntimati héiguadun lidoun agabarahani (Sant. 1:14, 15). Dan luagun dan, buiti lun hakutihani kristiánugu maríeitiña ariñahani burí le úara. Sagüráuti maríei lugundun Heowá guánarügü adügübalin. Lau hásügürün maríeitiña dan úara adimureha luagu hani maríei arufudatiña luagu inebe lan katei sagüráuti houn (Agu. 2:21-24).

18, 19. a) Ka burí resultóu hibihubei ha agabarahabaña? b) Kaba buiti wibiha ánhawa úaragua lun o tun gürigia to úmaboun wamarieida?

¹⁸ Ánhadündügü abusenra somu dan lun hadügün aban umadaguaü le moun lumuti, samina humá furumiñe luagun resultóu le lanügübei agamariduni mamarieidunga luma agabarahani (Ari. 7:22, 23; Gal. 6:7). Gürigia ha éiguadubaña lidoun magíaguni adügatiña lun lasandiragun Heowá lungua wuriba, barütiña igarigu lun hani weiriei o weiriou ani adügatiña dañu hóuniwagua (aliihoualá Malakíasi 2:13, 14). Luéigiñe le aban oubaü, samina humá luagun buiti le ibihúbei dan le haruma lan wakipuruni wabagari. Hemenigibadün lun habagaridun lun súnwandan ani gúndaabadün giñe lidan hibagari, ani darangilu ligíame hisaminan (aliihoualá Ariñawagúni 3:1, 2).

¹⁹ Eremuhati aban abürühati Sálumu lun Heowá ítara: “Wéiriti darangila hamá ha hínsiñehabubaña lun barufudahan, ani úati lunti léiguadagüdüniña” (Sal. 119:165). Lidan dan le ídanbei wawinwanda, súdiniti lun hínsiñe lan inarüni houn kristiánugu luma lun ‘góunigi hamá buidu ida liña lan hóuserun. Mabagaridun hagíame kei ibidiougua tau, lunti habagaridun kei chu tau’ (Efe. 5:15, 16). Buin liña ubóu tau lisadaran Satanási to adügǘboun lun tábürügüdüniña lubúeingu Bungiu ha inarünitiña. Gama lumoun góunigi lumutiwa Heowá buidu. Le linarün katei, anihein létima wemegeirubei wama lun “deregüdagu” wamá luma lun wararamunu “sun gimara durunguatu to lachüühaboun Mafia” wawagun (Efe. 6:11, 16).

[Abürüdǘni]

[Álügüdahani lánina aturiahani]

[Iyawaü to lídanboun páhina 29]

Gayarati lagadeiruni línsiñegu umegeguni wamadagua luma Heowá. Mígira humá lun lasuseredun katei le hun

[Iyawaü to lídanboun páhina 32]

Ánhawa adariha o ánhawa ígira lun hadarihaniwa amu, gayarabei wéiguadun tidoun sádara to lánina agabarahani