Ding Nghetin, Setana Thangte Chu Pumpelh Rawh!
Ding Nghetin, Setana Thangte Chu Pumpelh Rawh!
‘Diabola ngamthlêmnate chu do rawh.’—EPH. 6:11.
ENGTIN NGE KAN CHHAN ANG?
Engtin nge Jehova chhiahhlawhte chuan hausak âtchilhna thang an pumpelh theih?
Engin nge nupui pasal nei Kristian chu uirêna thanga tlu lût lo tûra ṭanpui thei?
Engvângin nge hausak âtchilhna leh nungchang bawlhhlawhna do tlat chu a hlâwk nia i rin?
1, 2. (a) Engvângin nge Setana chuan hrik thihte leh “berâm dang” chunga lainatna a neih loh? (b) He thuziakah hian Setana thang eng nge sawiho a nih ang?
DIABOL-SETANA chuan mihringte, a bîk takin Jehova rawngbâwltute chu lainatna a nei lo va. A nihna takah chuan, hriak thih la bângte chu a do a ni. (Thup. 12:17) Chûng Kristian chak takte chuan tûn laia Lalram thu hrilh hnaah hma an hruai a, Setana chu he khawvêl rorêltu a nihzia an hai lang a ni. Diabola chuan hriak thihte thlâwptu “berâm dang,” chatuana nun beiseina—Setana neih tawh loh—neitute pawh a hua a. (Joh. 10:16) Chuvângin, a thinur hle pawh hi a mak lo ve! Vân lam beiseina nei emaw, lei lam beiseina nei emaw pawh ni ila, Setana chuan kan ṭhatna tûr a duh lo. A thil tum ber chu min tawrhtîr hi a ni.—1 Pet. 5:8.
2 A thil tum hlen chhuak tûrin Setana chuan thang chi hrang hrang a kam a. Ring lotute ‘rilru a tihdel’ avângin, anni chuan chanchin ṭha chu an pawm lova, chûng thangte chu an hmu thei lo a ni. Diabola chuan Lalram thuchah pawm tawh ṭhenkhatte pawh a thangah a âwk bawk a ni. (2 Kor. 4:3, 4) Thuziak hmasaah khân, Setana thang pathum kan pumpelh theih dân târ lan a ni tawh a: (1) ṭawngkam insûm lohna, (2) mihring hlauhna leh nêksâwrna, leh (3) a lutuka mahni inthiam lohnate chu. Tûnah chuan Setana thang pahnih—hausak âtchilhna leh uirê tûra thlêmna—kan do theih dân i lo en ang u.
HAUSAK ATCHILHNA —MIN DIP THEITU THANG CHU
3, 4. Engtin nge he khawvêl lungkhamna chuan hausak âtchilhna a thlen mai theih?
3 A tehkhin thu pakhatah, Isua chuan hnimhlîngnei zînga buh chi theh chungchâng a sawi a. Chutah chuan mi chuan thu chu a hre mai thei a, “nimahsela, khawvêl lungkhamna leh hausakna bumna chuan thu chu a dîp a, rah lovin a lo awm ṭhîn,” tih a sawi a ni. (Mt. 13:22) Ni e, hausak âtchilhna chu kan hmêlma Setana thang hmante zînga pakhat a ni.
4 An ṭan kawp huna Pathian thu hriat tawh sa dîp dâl thei thil pahnih a awm a. A pakhat chu “khawvêl lungkhamna” hi a ni. Hêng ‘ni hnuhnûng hun khirh takahte’ hian lungkhamna neihtîr thei che thil tam tak a awm a. (2 Tim. 3:1) Thil man to lutukna leh hna hmuh lohnate a tam tial tial avângin, ei leh bâr kham khawp hmuh chu harsa i ti mai thei a ni. I nakin hun tûr lungkhamin, ‘Hna aṭanga ka bân hunah, ka inchâwm thei ang em?’ tiin i ngaihtuah mai thei bawk. Chutiang lungkhamna avângin, ṭhenkhat chuan hausakna lam an ûm a, sum leh paiin himna pe thei tûrah an ngai a ni.
5. Eng kawngin nge “hausakna” chu bumna a nih theih?
5 Isua chuan thil dang pakhat a sawi leh a—“hausakna bumna” chu. Chu thil leh lungkhamna ṭang kawp chuan thu chu a dîp thei a ni. Bible chuan “tangka sum himna a ni,” tih a pawm a. (Thur. 7:12) Mahse, hausak tuma tangka sum ûm erawh chu a finthlâk loh a ni. Mi tam tak chuan hausak an tum poh leh hausak âtchilhna thangah an lût thûk tih an hmu chhuak a. Ṭhenkhat phei chu hausakna bâwihah an tâng hial a ni.—Mt. 6:24.
6, 7. (a) Engtin nge hausak âtchilhna chu mi a hna thawhna hmuna thil hlauhawm a nih theih? (b) Hunbi pângngai aia tam hna thawk tûra tih a nih hunah Kristian chuan eng nge a ngaihtuah ang?
6 Hausak châkna chu mâwl mang taka lo inṭan a ni mai thei a. Entîr nân, he thil thleng hi han ngaihtuah teh. I hna thawhna pu chuan rawn pan chein, heti hian a hrilh che a ni: “Thu lâwmawm tak hrilh tûr che ka nei a nia! He Company hian hna lian tak a hmu a. Thla engemaw zât chhûng chu hunbi pângngai aia tam i thawh deuh fo a ngai dâwn a ni. Mahse, i hlawh hmuh tûr chuan i thawhrimna chu a phu ngei ang,” tiin. Engtin nge chu chu i chhân lêt ang? I chhûngte tâna tisa lam mamawh pêk chu mawhphurhna pawimawh tak a ni ngei mai; mahse, chu chu i mawhphurhna neih awmchhun a ni lo. (1 Tim. 5:8) Thil dangte pawh i ngaihtuah tel a ngai a ni. Engtianga zingin nge hunbi pângngai aia tam i thawh a ngaih dâwn? I hna chuan kohhran inkhâwm leh Chhûngkuaa Pathian Biakna in neih zân pawh tiamin, i thlarau thiltihte a khawih buai ang em?
7 I thutlûkna siam tûr i bûk tawnnaah chuan, eng nge i ngaih pawimawh zâwk dâwn—hunbi pângngai aia tam thawhna chuan i bank account a ngawng dân tûr nge ni a, i thlarau lam a nghawng dân tûr zâwk? Sum hlawh tam lehzual châkna chuan i nunah Lalram a dah hmasak lohtîr che ang em? Nangmah leh i chhûngte thlarau lam hrisêlna i ngaihthah chuan hausak âtchilhnain a nghawng dân tûr che chu i hmu thiam em? Chutiang thil chu i chungah a thleng mêk a nih chuan, engtin nge i din ngheh a, hausak âtchilhna dîpa awmna chu i pumpelh theih ang?—1 Timothea 6:9, 10 chhiar rawh.
8. Bible-a eng entîrnate ngaihtuahnain nge kan nun dân bih chiang tûra min ṭanpui thei?
8 Hausak âtchilhna dîpa i awm loh nân i nun dân chu a khât tâwkin i bih chiang ṭhîn tûr a ni. A thiltiha thlarau lam thil a ngaihnêpzia târ langtu Esauva ang nih chu i duh ngai lo vang! (Gen. 25:34; Heb. 12:16) A thil neih zawng zawng hralh a, mi retheite pe a, Isua hnung zui tûra sâwmna dawngtu tlangvâl hausa ang pawh i ni tûr a ni lo. Chu tlangvâl chuan chutiangin thil a ti lo va, “lungngai takin a kal bo ta a; sum tam tak nei mi a nih avângin.” (Mt. 19:21, 22) Hausakna thanga a awh avângin, chu pa chuan chanvo ropui tak—nung dam tawh zawng zawnga mi ropui ber hnungzui theihna—chu a chân ta a nih chu! Isua Krista zirtîr nih theihna chanvo chu chân lo tûrin fîmkhur rawh.
9, 10. Sum leh pai lama Bible thlîr dân chungchâng eng nge i sawi ang?
9 A lutuka sum leh pai lungkham lo tûr chuan Isua fuihna: “Chutichuan, ‘Engnge kan ei ang?’ emaw, ‘Engnge kan in ang?’ emaw, ‘Eng sinin nge kan awm ang?’ emaw tih, lungkham suh u, Jentailten chûng zawng zawng chu an zawng ṭhîn a ni. Chûng zawng zawng chu in mamawh tih in Pa vâna mi’n a hre reng a ni,” tih chu kan ngaihthlâk a ngai a ni.—Mt. 6:31, 32; Lk. 21:34, 35.
10 Hausak bumna thanga tlûk luh ai chuan, “Pachhiatna emaw, neihnunna emaw mi pe hek suh. Ka mamawh tâwk chiah min pe rawh,” tia sawitu Bible ziaktu Agura thil thlîr dân neih chu tum tlat ang che. (Thuf. 30:8, Contemporary English Version) Agura chuan sum leh paiin mi a vênghim thei tih leh hausaknain mi a bum thei tih pawh a hre thiam tih a chiang hle. He khawvêl lungkhamna leh hausakna bumna chuan thlarau lama chhiatna a thlen thei tih hre reng ang che. Sum leh pai lam a lutuka lungkhamna chuan i hun leh tha leh zung a ei ral theiin, Lalram dah hmasak châkna a neih lohtîr thei che a ni. Chuvângin, Setana hausak âtchilhna thanga awh loh chu tum tlat ang che!—Hebrai 13:5 chhiar rawh.
UIRENA—FING TAKA THUP THANG CHU
11, 12. Engtin nge Kristian chu a hnathawhna hmunah uirêna thanga a awh theih?
11 Ramsa chak tak awh tum sapêl mite chuan ramsa kal ṭhinna kawngah chuan thang anga a awhna tûr lei an lai khuar ṭhîn a. Chu chu thingṭang leh lei pan têin an khuh bo ṭhîn. Setana thlêmna hlawhtling takte zînga pakhat chuan chu thang nêna inanna a nei a. Chu chu nungchang bawlhhlawhna sual hi a ni. (Thuf. 22:14; 23:27) Kristian ṭhenkhat chu thil sual tih awlsam êm êmna dinhmunah indahin, chu thangah chuan an âwk a. Nupui pasal nei Kristian ṭhenkhat chu âwm lo taka ngaihzâwng an neih hnuah uirêna sualah an tlu lût a ni.
12 Awm lo taka ngaihzâwng neihna chu i hnathawhna hmunah a thleng thei a. Dik takin, zir chianna pakhat chuan hmeichhe uirê a chanve aia tam leh mipa uirê hmun 4 ṭhena hmun 3 deuh thawte’n an hnathawhpuite an uirêpui thu a târ lang a ni. I hnathawhnaah chuan i mipat hmeichhiatpui ni lote i thawhpui a ngai em? A ngai a nih chuan, anni nên eng ang inlaichînna nge in neih? Inngaihzâwnna thleng lo tûrin ramri fel tak i insiam em? Entîr nân, a hnathawhpui mipa nêna an titi ṭhin hnu chuan, Kristian unaunu pakhat chuan chu pa chu ringin, an nupa kâra buaina a tawhte pawh a hrilh ṭan mai thei a. Dinhmun dangah chuan Kristian mipa pakhat chuan a hnathawhpui hmeichhe pakhat nêna an inkawmngeih hnuah: “Ka ngaih dânte chu min hlutsakin, ka thusawite ngun takin min ngaihthlâksak a. Min zahthiam hle bawk si. In lamah pawh hetianga cheibâwl hi hlawh thei ila ka tingawt mai,” tiin a ngaihtuah mai thei a ni. Chutiang dinhmuna ding Kristiante tâna uire a awlsam theih dân chu i hmu thiam em?
13. Engtin nge âwm lo taka inngaihzâwnna chu kohhran chhûnga a thlen theih?
13 Awm lo taka inngaihzâwnna chu kohhran chhûngah pawh a thleng thei a. He thil thleng tak tak hi han ngaihtuah teh. Daniel-a leh Sarah-i * chu regular pioneer an ni a. Ama insawi dânin Daniel-a chu “aih, ti ngai lo upa,” a ni. Chanvo a dawn apiang lâwm taka pawm ṭhîn mi a ni a. Ani chuan mipa panga Bible a zirpui a, an zînga pathum chuan baptisma an chang tawh a ni. Chûng baptisma chang tharte chuan ṭanpuina nasa tak an mamawh a. Daniel-a chu theocratic chanvo chi hrang hranga a buai hle lai chuan Sarah-i chuan chûng mite chu a lo ṭanpui ṭhîn a ni. Chutiang chuan thil chu a awm chho ta zêl a: Daniel-a Bible zirpuite chuan rilru lama ṭanpuina an mamawh a, chu chu Sarah-i hnên aṭangin an dawng a. Sarah-i pawhin ngaihsakna a mamawh a, Daniel-a Bible zirpuite hnên aṭangin a dawng ve bawk a ni. Chu dinhmun chu thang hlauhawm tak ang a ni a. Daniel-a chuan heti hian a sawi: “Ka nupuiin mi dangte ṭanpui nâna a thla têl a tha leh zung zawng zawng a hman avângin, thlarau lam leh rilru lamah ṭanpuina a mamawh a. Chutih lai chuan kei lahin ka lo ngaihsak bawk si lo. Chûng dinhmunte chuan chhiatna nasa tak a thlen ta a. Ka nupui chu ka Bible zirpuite zînga pakhat lakah a uirê ta a ni. Ka mit hmuhah ngei chuan thlarau lamah a lo chak lo hle chu niin, kei lah chuan ka chanvo chan zawng zawngte ka ngaihsak êm avângin ka hmuh hmaih tlat si a,” tiin. Engtin nge chutiang chhiatna chu i pumpelh theih ang?
14, 15. Eng thilte’n nge Kristian nupate chu uirêna thang pumpelh tûra ṭanpui thei?
14 Uirêna thang pumpelh tûr chuan inneihnaa intiamna awmzia chu ngaihtuah rawh. Isua chuan: “Pathianin a zawm tawh chu mihringin ṭhen suh se,” a ti a. (Mt. 19:6) I theocratic chanvote chu i kawppui aia pawimawh zâwk angah ngai ngai suh. Chu bâkah, thil ṭûl lem lo tia i kawppui hlata i awm fona chu in inneihna a nghet lo tih hriltu a ni thei a, chu chuan thlêmnaah a hruai thei chein, thil sual lian tak pawh a tihtîr thei che tih hre reng ang che.
15 Mahse, upa i nih chuan berâmte vên chungchâng chu eng nge ni ve? Tirhkoh Petera chuan: “In zînga Pathian pâwlho awm chu enkawl rawh u; tih tûr a nih vâng ni lovin, Pathian thu anga châk chung zâwkin, hlêpna bawlhhlawh duh vâng ni hek lovin, rilru duh tak zâwkin,” tiin a ziak a. (1 Pet. 5:2) I enkawlna hnuaia awm kohhran mite chu ngaihthah tûr an ni lo va. Mahse, pasal anga i chanvo hlen thei lo tûr khawp chuan berâm vênnaah i inhmang tûr a ni lo. Inah i nupui “ṭâma” a awm laia kohhran châwm ringawt i ngaihsakna chuan awmzia a nei lova—a hlauhawm hial thei a ni. Daniel-a chuan: “Kan nunah hian mahni chhûngkaw chhiat phahna tûr khawpa kohhran mawhphurhnate ngaih pawimawh aia thil pawimawh zâwk a awm a ni,” tiin a sawi a ni.
16, 17. (a) An hna thawhna hmunah nupui pasal nei Kristiante chuan anmahniah beisei tûr a awm tawh lo tih lantîr nân eng thilte nge an tih theih? (b) Bâwih rinawm leh fing chuan eng vaukhânna nge min pêk?
16 Kristian nupate uirêna thanga an awh loh nâna ṭanpui nânVênnainsâng leh Awake! magazine-ahte chuan fuihna thu ṭha tak tak a chuang a. Entîr nân, October 1, 2006 chhuak Vênnainsâng chuan he fuihna hi a pe a ni: “Hnathawhna hmun leh hmun danga inlaichînna awmtîr thei dinhmunte lakah fîmkhur rawh. Entîr nân, mipatpui leh hmeichhiatpui ni lote nêna hnathawh bân hnua hun rei tak chhûng hna thawh belhna chuan thlêmna a awmtîr thei a. Pawm lai nei i nih angin, i ṭawngkam chhuak leh i khawsazia hmangin nangmahah beisei tûr a awm tawh lo tih lantîr ang che. Pathian ngaihsakna ûmtu i nih angin, inchhai derna emaw, silhfên leh inchei dân hmanga mi dangte ngaihsakna lâk emaw chu i duh lo ngei ang. . . . I pawm lai leh i fate thlalâk hnathawhna hmuna târna chuan ngaihsak zâwk tûr i nei tih nangmah leh mi dangte chu a hriattîr ang. Mi dang ngaihzâwn theih tûra awm loh leh an rawn ngaihzâwnna lo chhân lêt loh chu tum tlat rawh,” tih hi.
17 Nupui pasal nei tawh i nih chuan, inneihna chungchâng bawih rinawm leh fing pâwl tihchhuah thu leh hlate in nupaa ennawn fo chu a finthlâk ngei ang. Inneihna chu Jehova din a ni a, a thianghlim bawk a ni. In inneihna chungchâng i kawppui nêna sawi dûn tûra hun insiam chu thil thianghlimte i hlutzia târ lanna kawng ṭha tak a ni.—Gen. 2:21-24.
18, 19. (a) Uirêna rah chhuahte chu eng nge ni? (b) Mahni nupui pasalte laka rinawmna chuan eng hlâwknate nge a thlen?
18 Awm lo taka ngaihzâwng nei tûra thlêmna i tawn chuan, inngaihna leh uirênain a rah chhuah chhiatnate chu ngaihtuah rawh. (Thuf. 7:22, 23; Gal. 6:7) Nungchang bawlhhlawhnaa inhmangte chuan Jehova an tilâwm lo va, an kawppuite rilru an tinâ a, mahni pawh an intinâ a ni. (Malakia 2:13, 14 chhiar rawh.) Nungchang thianghlimna vawngtute neih hlâwkna chu ngaihtuah zâwk rawh. Chutiang mite chuan chatuan nun beiseina chauh ni lovin, tûnah ngei pawh hian chhia leh ṭha hriatna thiang pawh tiamin, nun ṭha ber chu an nei bawk a ni.—Thufingte 3:1, 2 chhiar rawh.
19 Fakna hla phuahtu chu: “[Pathian] dân ngainatute chuan thlamuanna nasa tak an nei a; tlûkna rêng rêng an nei lo,” tiin a zai a ni. (Sâm 119:165) Chuvângin, he hun suaksual takah hian thutak ngaina la, ‘mi fing lote anga awm lovin mi fingte anga awm zâwkin, i awm dânah fîmkhur rawh.’ (Eph. 5:15, 16) Kan kawng zawhahte hian betu dikte awh nân Setana chuan thang tam tak a kam a. Mahse, kan invênhim theih nân ṭha taka thuam kan ni. Jehova chuan kan din ngheh theih nân leh ‘mi sual thal alh thei zawng zawng kan tihmih’ theih nâna kan mamawhte chu min pe si a!—Eph. 6:11, 16. (w12-E 08/15)
[Footnote]
^ par. 13 Hmingte chu thlâk a ni.
[Zirlai Atâna Zawhnate]
[Phêk 29-naa milem]
Hausak âtchilhna chuan mi chu thlarau lama ṭhang lo tûrin a dîp thei. Chu chu i chungah thlentîr suh ang che
[Phêk 32-naa milem]
Inchhai derna—a nih loh leh lo chhân lêtna—chuan uirêna a thlen thei
