Maj tikixnamikikan itamekauilis Satanás

“Xikxijxikojtiyakan nochi ne [i]takajkayaualis [...] Satanás.” (EFES. 6:11)

¿TONI TIONTANANKILISKIA?

¿Toni uelis kinpaleuis itekitikauan Jiova maj amo uetsikan itech tominpialis?

¿Toni kipaleuis tokniuj namikej maj amo uetsi itech auilnemilis tein tamati kemej se talkoyok?

¿Toni tein kuali tikseliaj keman tikixnamikij tominpialis uan auilnemilis?

1, 2. 1) ¿Keyej Satanás nion tepitsin kiniknelia taixpejpenalmej uan okseki ichkamej? 2) ¿Katiyejua tataman tamekauilis tein Satanás kitekitiltia tikitaskej itech nejin tamachtilis?

SATANÁS nion tepitsin kiniknelia taltikpakneminij uan okachiok akin tiktekitiliaj Jiova. Tein melauj, kinteuia tokniuan taixpejpenalmej akin nemijok nikan taltikpak (Apo. 12:17). Nejin tokniuan tein amo kikauaj Dios kiixyekanaj tanojnotsalis tein mouikatok ika iTekiuajyo Dios itech nejin tonalmej, uan kiteixmatiltiaj ke Amokuali yejua taixyekankej itech nejin taltikpak. Satanás no kintauelita ‘okseki ichkamej’, akin kinpaleuiaj tokniuan taixpejpenalmej uan kichiaj nemiskej nochipaya (Juan 10:16). Satanás amo uelisok nemis nochipaya, yejua ika tel kualantok. Nochin akin kichiaj nemiskej ne iluikak oso nikan taltikpak, Amokuali kineki kinmekauis (1 Ped. 5:8).

² Yejua kitemoua techuetsiltis ika tataman tamekauilis. Kemej yeskia kitsakua inintanemilil akin amo kineltokaj Jiova, uan ijkon kichiua maj amo kiselikan kuali tanauatilmej nion maj uelikan kiitakan tataman tamekauilis tein kitekitiltia. Sayoj ke no kinmekauijtok sekin tein kiselianijya tamachtilis ika iTekiuajyo Dios (2 Cor. 4:3, 4). Itech tamachtilis tein achto tikitakej, timomachtijkej keniuj tikixnamikiskej eyi tamekauilis: 1) tajtolmej tein teyolkokouaj 2) moujkayot uan tachikaujkauilis uan 3) keman timoteltajtakoltiaj tein tikchiujkej. Axkan tikitaskej keniuj tikixnamikiskej ome tamanok tamekauilis: tominpialis uan keman auilnemi akin namikej.

TOMINPIALIS SE TAMEKAUILIS TEIN UELIS TECHUETSILTIS

3, 4. ¿Keniuj komo timoteltekipachouaj ika tein onkak nikan taltikpak uelis techuikas maj tiknekikan timotomintiskej?

³ Itech semej neskayomej tein Jesús kitemakak, ika tajtoj seki xinach tein kitokaj uitstsalan. Yejua kimelauak  ke kinixnextia taltikpakneminij “ten kikakij in Tajtoltsin de Dios, pero moyolkuejmoloaj ika [...] ten [onkak] nikan taltikpak. Uan no kinyoltilana ok in ricojyot [‘tein kipia ueyi chikaualis tein tekajkayaua’, NM]. Uan nochi nijin kitajtamia in Tajtoltsin de Dios. Uan [...] amo kikaua ma moskalti [...] para ma kuika takilot” (Mat. 13:22). Kemej tikitaj, tominpialis yejua okse tamekauilis tein Satanás ika kineki techuetsiltis.

⁴ Tikitaj ke moajsi ome taman tein, ijkuak mosentiliaj, “kitajtamia[j] in Tajtoltsin”. Yekinika, yejua keman “moyolkuejmoloaj ika [...] ten [onkak] nikan taltikpak”. Itech nejin itamian tonalmej tein semi ouij se monejnemiltis, moajsi miak taman tein uelis techtekipachos (2 Tim. 3:1). Uelis semi ouij tikixtauaskej tein moneki porin tel tapatiyoj oso amo tikpiaj tekit. Uan keman titanemiliaj itech tonalmej tein uitsejok, xa timotajtaniaj: “Keman nixiuejya niyeski uan amo uelisok nitekitis, ¿nechajsis tomin tein ika nimoixpanoltis?”. Sekin akin ijkon motekipachouaj, kitemouaj kitaniskej miak tomin porin kinemiliaj ke ijkon nochipa kipiaskej tein kinpolos.

5. ¿Keyej moijtoua ke tominpialis kipia se “ueyi chikaualis tein tekajkayaua”?

⁵ Jesús no ika tajtoj ojpatika taman tein uelis kitajtamis tajtoltsin keman mosentilia iuan ueyi netekipacholis: akin “kinyoltilana ok in ricojyot [‘tein kipia ueyi chikaualis tein tekajkayaua’, NM]”. Semi melauak ke Biblia tamachtia ke “tomin ueli tapaleuia” (Ecl. 7:12). Sayoj ke amo tiknextiskiaj tamatilis komo tikixtaliskiaj tiktaniskej miak tomin. Miakej kiitanij ke ijkuak okachi kitemouaj kitaniskej miak tomin, okachi kinmekauia tominpialis. Sekin hasta kikauanij maj yejua kinyekana (Mat. 6:24).

6, 7. 1) ¿Keniuj tominpialis uelis techmekauis kampa titekitij? 2) ¿Toni moneki tiknemiliskej komo techiluiaj maj okachi titekitikan?

⁶ Maski nion tikmatiskej, uelis peuas tiknekiskej tiktaniskej miak tomin. Kemej neskayot, xionmonemili ke moteko mitsoniluia: “Semi kuali tein nikneki nimitsoniluis. Tikselijkej se ueyi tekit. Yejua ika, itech seki metsti tein ualas monekis okachi titekitiskej, sayoj ke no nimitsonyekiluia ke okachi tiontatanis”. ¿Toni tiontanankiliskia? Semi melauak ke motelneki tikontekipanos mochankauan (1 Tim. 5:8). Sayoj ke no moneki tiontanemilis itech okseki taman tein motelneki. Kemej neskayot, ¿kanachi horas monekis okachi tiontekitis? ¿Mitsontsakuilis xikontekitili Dios uan amo uelisok tionyas nechikolmej nion nantaueyichiuaskej kemej kalyetouanij?

⁷ Xikonnemili toni tikonitaskia ke okachi motelneki, ¿tomin tein okachi tikontanis, oso mokuali uikalis iuan Dios? ¿Amo tikontayekanaltiskiaok tekit tein mouika iuan iTekiuajyo Dios, porin tikonneki okachi tikontanis tomin? ¿Tikonajsikamati toni uelis panos komo amo tikonchikauaskia kuali uikalis tein tejuatsin uan  mochankauan nankipiaj iuan Dios? Uan komo tikonpanotokya nejon ouijkayot, ¿keniuj uelis tikonchiuas maj amo mitsonuetsilti tominpialis? (Xikonixtajtolti 1 Timoteo 6:9, 10.)

8. ¿Katiyejua neskayomej tein moajsij itech Biblia techpaleuis maj tikitakan keniuj tinemij?

⁸ Komo amo tiknekij maj techuetsilti tominpialis, kemansa moneki maj tikitakan keniuj tinemij. Maj amo keman timochiuakan kemej Esaú, akin kiixnamikik tein Jiova motenkaujka kichiuas (Gén. 25:34; Heb. 12:16). Uan maj amo no timochiuakan kemej nejon tominpixkej tein amo kinekik kinamakas tein kipiaya uan ijkon kinpaleuis akin amo teyi kipiayaj uan mochiuas imomachtijkauj Cristo, ta “moyolkokojtiyaj porin kipiaya miak ten niaxka” (Mat. 19:21, 22). Tomin uan nochi tein kipiaya kimekauijtoya uan nejon kichiuak maj kipolo tatiochiualis mochiuas imomachtijkauj Jesús, takat okachi ueyichiujkej tein nemini itech taltikpak. Komo amo tiknekij maj no ijkon techpano, moneki timopiaskej maj amo techuetsilti tominpialis.

9, 10. ¿Toni techmachtia Biblia ika tominpialis?

⁹ Komo amo tiknekij timoteltekipachoskej ika tomin, maj tikchiuakan kemej Jesús tayolmajxitij: “Amo xiknemilijtinemikan toni nankikuaske mosta, uan toni titayiske, uan tonika timotakentiske. Porin in tagayot ten amo pouij iuan Dios, yejuan nojonkes kitemoaj sayo de nijin taman. [...] [Porin] Namoueyitajtsin ten yetika ne eluiyaktsinko [...] kimatok ya ten namejuan namechpoloa” (Mat. 6:31, 32; Luc. 21:34, 35).

¹⁰ Agur, semej akin kijkuiloj Biblia, kimatia nepaleuil tein kitemaka tomin, sayoj ke amo mokauak maj kimekaui tominpialis tein kipia ueyi chikaualis tein tekajkayaua. Yejua ika kitajtanij Jiova: “Amo xinechmaka tatasojtilis nion xikchiua maj nitominpia. Xinechkaua maj nikmajseua tein ixyetok maj nikua” (Prov. 30:8). Maj timochikauakan no ijkon titanemiliskej. Maj amo timoteltekipachokan uan maj amo techuetsilti tominpialis tein kipia ueyi chikaualis tein tekajkayaua porin uelis techuikas maj tikpolokan tokuali uikalis iuan Dios. Komo timoteltekipachouaj ika tomin, amo tikemantiskej, amo tikpiaskej chikaualis nion tiknekiskej tikchiuaskej tekit tein ika motayekanaltia iTekiuajyo Dios. Yejua ika, maj senkis tikixtalikan amo timokauaskej maj Satanás techmekaui ika tominpialis (xikonixtajtolti Hebreos 13:5).

AUILNEMILIS TAMATI KEMEJ SE TALKOYOK TEIN AMO MOITA

11, 12. ¿Keniuj se tokniuj takat oso siuat namikej uelis uetsis itech auilnemilis iuan se itekitikaikniuj?

¹¹ Sekin takitskianij akin kinekij kimekauiskej se tapial tein tel chikauak, kichiuaj se uejkatan talkoyok kampa panoua tapial uan kiixtsakuaj ika koujmayit, xiuit uan tal. No ijkon tamati se tamekauilis tein Satanás okachi ika kinuetsiltia itekitikauan Dios, uan nejin yejua auilnemilis (Prov. 22:14; 23:27). Sekin itatojtokakauan Cristo uetsinij itech nejon talkoyok porin kichiuaj seki taman tein kinuika maj amo ouij kichiuakan tajtakol. Kemej neskayot, sekin akin kipiaj ininnamik peuaj motasojtaj iuan aksa tein amo ininnamik uan uetsinij itech auilnemilis.

¹² ¿Kani uelis peuas nejin tachiualis? Okachi uelis panos itech tekit. Keman tetakauan uan tesiuauan tein auilnenkej kintajtanijkej akoni iuan kikajkayaujkej ininnamik, moitak ke panoua tajko siuamej uan okachi takamej auilnenkej iuan se itekitikaikniuj. Komo se tokniuj takat moneki tekitis iuan se siuat, oso se siuat iuan se takat, ¿keniuj moneki mouikaskej? ¿Kichiua tein kipaleuis maj sayoj mouikakan kemej tekitikaiknimej uan amo maj peua kimachilikan netasojtalis? No uelis panos ke se tokniuj siuat tel tajtos iuan se takat tein iuan tekiti, uan peuas tel itech takuaujtamatis tein kiuikas maj kitapoui kuejmolmej tein kipia iuan inamik. Oso xa se tokniuj takat  moteluika iuan se siuat tein iuan tekiti uan peua kinemilia: “Nejin siuat kipoujkaita tein niknemilia uan nechkaki keman niknojnotsa. Yejua kemaj nechpoujkaita. ¡Nikuelitaskia maj no ijkon kichiua nonamik!”. Takat oso siuat akin namikej uan ijkon kipanotoskia semi amo ouij uetsiskia itech auilnemilis.

13. ¿Keniuj itech nechikol se takat uan se siuat uelis peuas kimachiliskej netasojtalis tein amo kuali?

¹³ Itech nechikol no uelis panos nejin tachiualis. Ijkon kinextia tein kipanok Daniel uan inamik, Sara, * akin kichiujtoyaj tekit kemej precursor regular. Daniel katka se tayekankej tein kiseliaya nochi tekit tein kimakayaj itech nechikol. Uan no, kinmachtiaya ika Biblia makuil telpochmej. Eyin moauijkej uan semi monekia kiseliskej nepaleuil tein kinyolchikauaskia. Kemej Daniel kipiaya miak tekit itech nechikol, nochipa keman semej akin kinmachtij monekia kiselis nepaleuil, yejua Sara akin kipaleuiaya. Uan kemej yejua no monekia maj ika motekipachokan, kiseliaya ininnepaleuil akin Daniel kinmachtiaya. Nochi nejon mochiuak kemej se tamekauilis tein tel tamouilil. ¿Toni panok? Daniel kimelaua: “Nonamik kinmakak nepaleuil miak metsti, sayoj ke yejua no monekia kiselis nepaleuil tein kichikauaskia ikuali uikalis iuan Jiova, uan tein kipaleuiskia maj kuali momachili. Nejua amo nikpaleuijtoya, yejua ika mochiuak se ueyi ouijkayot: Sara auilnemik iuan semej akin nikmachtijka. Nejua nikchiujtoya okseki taman tekit uan amo nikitak ke kipoloj ikuali uikalis iuan Jiova”. ¿Toni uelis techpaleuis maj amo tikpiakan se ouijkayot kemej nejin?

14, 15. ¿Toni uelis kinpaleuis tokniuan namikuanij maj amo uetsikan itech auilnemilis?

¹⁴ Se taman tein namikuanij uelis techpaleuis maj amo tiuetsikan itech auilnemilis, tein tamati kemej se talkoyok, komo tiknemiliaj toni kijtosneki netenkaualis tein tikchiujkej keman timonamiktijkej. Jesús kijtoj: “In tagat uan in siuat ten Dios kinsentalis namikuani ya, [...] ma amo se tagat kinxexelos ok” (Mat. 19:6). Amo keman xikonnemili ke tekit itech nechikol okachi motelneki ke monamik. Komo tikonkui motonaluan itech okseki taman uan amo semi tionyetok iuan monamik, xionmopia: xa mochiujtok teisa tein kichiua xikpolojtiyakan netasojtalis kemej namikuanij uan uelis peuas nankinemiliskej tein amo kuali uan xa uelis namechuikas itech auilnemilis.

¹⁵ Komo tejuatsin tiontayekankej itech nechikol, tikmatij ke ininka tionmotekipachoua tokniuan. Tatitanil Pedro kijkuiloj: “Xikinyolmajxitijtinemikan nochi itaneltokakauan de Dios nekes ten namejuan nankinyekantokke, ijkon keme in tapixke kinyekantinemi iichkauan. Uan nochi nijin xikchiutiyakan ika sayo ten kuali tanejnekilis uan amo ika ne tekiuil. Uan amo [...] porin nankinektinemij nintomin san. Ta, xitekititinemikan ika nochi namotanejnekilis” (1 Ped. 5:2). Yejua ika, moneki amo tikonsenkauas tokniuan tein momako mitsonkauilijtokej. Sayoj ke amo moneki tikonsenkauas monamik porin tiontekiti kemej tayekankej. Amo taixejekol uan tel tamouilil yeskia, komo sayoj tikonpaleuia tokniuan maj kichikauakan ininkuali uikalis iuan Dios uan amo tikonpaleuia monamik. Daniel, tein achto ika titajtojkej kijtoua: “Amo kuali maj se kinsenkaua se ichankauan porin se kichiujtok okseki taman tekimej”.

16, 17. 1) ¿Toni uelis kichiuaskej tokniuan namikuanij itech tekit, tein ika kinextiskej ke senkis kiixnamikij motasojtaskej iuan aksa akin amo ininnamik? 2) Xikonijto se tamachtilis tein mokixtiani itech amaixmej tein kinpaleuia tokniuan namikuanij maj amo uetsikan itech auilnemilis.

¹⁶ Amaixmej Tanejmachtijkej uan ¡Despertad! kitemakanij miak tayolmajxitilis tein kinpaleuia tokniuan namikuanij maj amo uetsikan itech auilnemilis. Kemej neskayot, itech La Atalaya 15 de septiembre de 2006 tanejmachtij maj mopiakan ika tachiualismej itech  tekit oso okseko, tein uelis kichiuas maj moteluikakan iuan aksa akin amo ininnamik. Kemej neskayot, komo se tokniuj takat moneki tekitis okachi horas iuan se siuat, oso se siuat iuan takat, nejin uelis kichiuas maj peua kimachilikan ke motasojtaj. Komo tejuatsin tionnamikej, moneki tikonyeknextis ika motajtoluan uan motachiualisuan ke senkis tikonixnamiki nejon taman netasojtalis. Amo keman xikonnexti ke tikonuelita aksa oso tikonchiuas maj mitsonuelitakan ika taken tein tikonkui oso ika motachialis. Xikonpia itaixkopin monamik uan mokoneuan kampa tiontekiti porin nejon mitsonelnamiktis ke mochankauan okachi tayekantokej, uan oksekin no ijkon kiitaskej. Amo keman xikonchiua maj aksa kisentoka mitsonnextili ke mitsontasojta uan nion moneki tikonkauas maj pano nejon.

¹⁷ Itech tamachtilis “¿Qué implica realmente la fidelidad conyugal?”, tein moajsi itech amaix ¡Despertad! abril de 2009, tanejmachtij ke akin kinemilia ke moteka iuan aksa akin amo inamik, okachi ijsiujka uelis uetsis itech auilnemilis (Sant. 1:14, 15). Semi kuali maj tokniuan namikuanij kemansa kisenitakan tamachtilismej kemej nejin. Yejua Jiova akin kichiuak maj onka nemilis kemej namikuanij uan yejua ika chipauak. Komo nankixelouaj tonal uan ika nantajtouaj nanmonenamiktilis, nankinextiskej ke nankiitaj ke tayekantok nochi taman tein Dios kiita ke chipauak (Gén. 2:21-24).

18, 19. 1) Komo se akin namikej auilnemi, ¿toni tein amo kuali kiualkuilia? 2) ¿Toni tein kuali tikseliskej komo amo tikajkayauaj tonamik iuan okse?

¹⁸ Komo kemansa peua tikonnemilia tionmotasojtas iuan aksa akin amo monamik, xiontanemili itech ouijkayomej tein kiualkui auilnemilis (Prov. 7:22, 23; Gál. 6:7). Akin auilnemij kiyolkokouaj Jiova uan ininnamik uan ininselti moijtakouaj (xikonixtajtolti Malaquías 2:13, 14). Sayoj ke no xiontanemili itech nochi tein kuali tein kiualkui chipaujkanemilis. Amo sayoj tikonchias nemilis nochipaya, ta no, axkan okachi kuali tionnemis uan amo mitsonkuejmolojtos motanemilil (xikonixtajtolti Proverbios 3:1, 2).

¹⁹ Se akin kijkuiloj salmo mokuikatij iixpan Jiova: “Ueyi yolseuilis kipiaskej akin kitasojtaj motanauatil, uan amo teyi kinuetsiltis” (Sal. 119:165). Itech nejin tonalmej, motelneki maj itatojtokakauan Cristo kitasojtakan tein melauak uan maj ‘amo nentinemikan keme nekes yolmijmikilome [...]. Ta, maj nentinemikan’ ika tamatilis (Efes. 5:15, 16). Axkan, Satanás kitekitiltia miak taman tamekauilis tein ika kineki kinuetsiltis itekitikauan Dios tein melaujkej. Sayoj ke Jiova techmakani nochi tein techpaleuis maj ‘tikxijxikotiyakan nochi ne takajkayaualis’ uan maj tikixnamikikan “nochi tataman kuejmololis tenika in Satanás kineki techyolxokolis” (Efes. 6:11, 16).

[Tajtolmelaualis]

[Inetajtaniluan tamachtilis]

[Taixkopin itech página 29]

Amo xionmokaua maj tominpialis mitsonuetsilti uan maj kijtako mokuali uikalis iuan Jiova

[Taixkopin itech página 32]

Komo tiknextiaj ke tikuelitaj aksa akin amo tonamik oso timokauaj maj technextili ke techtasojta, uelis techuikas maj tiauilnemikan