Ni katamastaniw xliʼakgsiyat Satanás
Ni katamastaniw xliʼakgsiyat Satanás
«[Tliwakga] katawilatit xlakata tuku liʼakgskgawinan Akgskgawini.» (EFES. 6:11, NM)
¿LA XKGALHTINANTI?
¿Tuku tlan natlawakgo xlakskujni Jehová xlakata ni lhuwa tuku nakgalhiputunkgo?
¿Tuku namakgtaya kstalanina Cristo tiku tamakgaxtokgnit ni naʼakgskgawi xpuskat o xchixku?
¿La kinkamakgtayayan akxni ni lhuwa tuku kgalhiputunaw chu ni naʼakgskgawiyaw tiku tatamakgaxtokgnitaw?
1, 2. 1) ¿Tuku xlakata Satanás ni kalakgalhaman tiku xatalaksakni chu «amakgapitsi borregos»? 2) ¿Tuku xliʼakgsiyat Satanás naʼakxilhaw kʼuma artículo?
SATANÁS nipara tsinu kalakgalhaman latamanin, chu tlakg nikaʼakxilhputun tiku skujniyaw Jehová. Wata putum kilhtamaku katalatlawa tiku kalaksakkanit naʼankgo kʼakgapun chu lamakgolhku kKatiyatni (Apoc. 12:17). Umakgolh lakskujnin tiku ni makgxtakgkgo Dios pulalinkgo natalichuwinan Tamapakgsin la uku chu wankgo pi Akgskgawini mapakgsi uma kakilhtamaku. Satanás na ni kaʼakxilhputun «amakgapitsi borregos» tiku katatayakgo tiku kalaksakkanit chu kgalhikgo tuku akgskgawini makgasa makgatsankganit: latamat nema ni kgalhi xlisputni (Juan 10:16, NM). ¡Wa xlakata lu sitsinit! Maski nalatamayaw kʼakgapun o kKatiyatni, tiku ni kinkaʼakxilhputunan kaj pulaktum tuku kinkatlawaniputunan: kinkaʼakgchipaputunan (1 Ped. 5:8).
2 Xlakata nakinkaʼakgchipayan limaklakaskin lhuwa liʼakgsiyat. Pulaktum wa pi kamalakgatsi tiku ni kanajlanikgo Jehová, xlakata ni nakgaxmatkgo xalakwan xalaksasti chu nila naʼakxilhkgo tuku kaliʼakgskgawimaka. Pero na kaʼakgchipama makgapitsi tiku kgalhakgaxmatkgo xlimapakgsin Dios (2 Cor. 4:3, 4). Artículo nema titaxtulh akxilhwi la ni nakinkaliʼakgskgawiyan pulaktutu xliʼakgsiyat Satanás: 1) akxni akglakgwa chuwinankan, 2) tapekua chu wi tuku nitlan kinkamatlawiputunkanan, chu 3) akxni nitlan limakgkatsiyaw kintalakgalhinkan. Chu la uku naʼakxilhaw pulaktiy tuku ni nakinkaliʼakgskgawiyan: tiku lhuwa tuku kgalhiputun chu tiku akgskgawi xchixku o xpuskat.
AKXNI LHUWA TUKU KGALHIPUTUNAW TLAN NAKINKALIʼAKGSKGAWIYAN
3, 4. Xlakata tuku lilipuwanaw, ¿la natlawa pi lhuwa nakgalhiputunaw?
3 Kʼakgtum parábola, Jesús lichuwinalh talhtsi nema xchankanit kalhtukunin. Chuna la wa, uma liʼakxilhtit kilhchanima tiku «kgaxmata tachuwin; pero taʼakglhuwit xla uma kakilhtamaku, chu nixaxlikana litliwakga xla tumin tlawa pi najikswa tachuwin chu nialh masta xtawakat» (Mat. 13:22, NM). Chuna la akxilhaw, akxni lhuwa tuku kgalhiputunkan na kinkaliʼakgchipayan Satanás.
4 Kaʼakxilhwi pi umakgolh pulaktiy «tlawa pi najikswa tachuwin». Pulana wa «taʼakglhuwit xla uma kakilhtamaku». Kʼuma «xaʼawatiya kilhtamaku lu tuwa», lhuwa tuku nalitaʼakglhuwiyaw (2 Tim. 3:1, NM). Xlakata tapalaxlama tuku maklakaskinaw chu ni anan taskujut uma tlawa pi xlisputni papaʼ ni naʼanan tumin. Akxni lakapastakaw kilhtamaku nema aku mima max nalakpuwanaw: «Akxni nialh nakskuja, ¿nakiʼakchani uma xlakata naklatama?». Xlakata uma, makgapitsi tlajaputunkgo lhuwa tumin, chu lakpuwankgo pi nakamakgtaya.
5. ¿Tuku xlakata wankan pi tumin kkgalhi «nixaxlikana litliwakga»?
5 Jesús lichuwinalh xlipulaktiy nema akxni lilipuwamaw, tlan natlawa pi nialh nakatsiputunkan xlakata Dios: «Nixaxlikana litliwakga xla tumin». Xlikana Biblia masiya pi, «tumin [...] litamakgtayakan» (Ecl. 7:12). Pero ni tlan kaj nalakapastakaw tumin. Lhuwa latamanin akxilhkgonit pi akxni tlakg kgalhiputunkgo tumin, tlakg tanukgo xliʼakgsiyat Satanás. Lhuwa chuna kaʼakspulanit wa xlakata kajwatiya skujkgo xlakata uma (Mat. 6:24).
6, 7. 1) ¿Tuku max nakinkaliʼakgskgawiputunkanan kkimputaskujutkan? 2) ¿Tuku kuenta kilitlawatkan komo nakinkawanikanan tlakg lhuwa hora kaskujwi?
6 Max ni katikatsiw akxni natsukuputunaw kgalhiyaw lhuwa tumin. Akgtum liʼakxilhtit, kalakpuwanti pi mi malana nawaniyan: «¡Lu tlan tamakatsin! Na kgalhiyaw lhuwa taskujut. Papaʼ nema mimakgo natalakaskin tlakg lhuwa hora naskuja, pero tlakg lhuwa nakxokgoniyan». ¿Tuku xkgalhtinanti? Xlikana, pi nalipina tuku maklakaskin mifamilia lu xlakaskinka, pero ni kajwatiya wa uma tuku tamaklakaskin (1 Tim. 5:8). Na wilapa atanu tuku nalilakpuwana. Akgtum liʼakxilhtit, ¿la akglit hora liwaka nakskuja? ¿Natlawa pi ni nakan tamakxtumit xalak congregación chu ni nakakninani Dios kfamilia?
7 ¿Tuku tlakg xlakaskinka miliʼakxilhat? ¿Tumin nema natlajaya, o la natalalipina Dios? ¿Nialh pulana nawiliya xTamapakgsin Dios kaj xlakata lhuwa tumin kgalhiputuna? ¿Akxilha tuku naʼakgspula mintakanajla chu xtakanajla mifamilia? Chu komo chuna titaxtupata, ¿la natlawaya xlakata tuku kgalhiputuna ni naʼakgskgawiyan? (Kalikgalhtawakga 1 Timoteo 6:9, 10.)
8. ¿Tukuya liʼakxilhtit xalak Biblia nakinkamakgtayayan naʼakxilhaw la linaw kilatamatkan?
8 Kaʼakxilhti la wi milatamat, xlakata ni naʼakgskgawiyan, lhuwa tuku kgalhiputuna. Nikxni katlawa chuna la Esaú, tiku limasiyalh pi ni xlakaskinka xakxilha tuku xla Dios (Gén. 25:34; Heb. 12:16). Ni chuna katlawa la uma chixku tiku xkgalhi lhuwa tumin, tiku ni staputulh tuku xkgalhi xlakata xkamakgtayalh tiku nitu xkgalhikgo chu kstalanina Cristo xwa, «lipuwana tialh, xampi [...] lhuwa ntu xkgalhiy» (Mat. 19:21, 22). Tuku xkgalhi liwana xʼakgchipanit, wa xlakata lakgmakgalh lanka talakgalhaman chu ni litaxtulh kstalanina Jesús tiku tlakg xlakaskinka latamalh. Komo ni makgatsankgaputunaw uma talakgalhaman, lu kuenta natlawayaw xlakata tuku kgalhiputunaw ni nakinkaʼakgskgawiyan.
9, 10. ¿Tuku masiya Biblia xlakata tuku nakgalhiputunaw?
9 Xlakata ni lu nalilipuwana xlakata tuku kgalhiputuna kuenta katlawa uma tastakyaw nema mastalh Jesús: «Ni kalilakgaputsatit chu kawantit: “¿Tuku nawayaw?” o “¿tuku nalikgotnanaw?” o “¿tuku nalilhakgananaw?”. Xlakata wa uma tuku lu putsakgo latamanin. Pero minTlatkan xalak kʼakgapun katsi pi putum uma maklakaskinatit» (Mat. 6:31, 32, NM; Luc. 21:34, 35).
10 Agur tiku na tsokgli Biblia xkatsi pi tumin kgalhi xtapalh, pero ni mastalh talakaskin naʼakgskgawi xlitliwakga tumin. Wa xlakata skinilh Jehová: «Ni katlawa nakkgalhi lhuwa tumin o nitu nakkgalhi; kaj kakimaxki tuku kmaklakaskin» (Prov 30:8, Dios habla hoy [Versión Popular], 1994). Kaliskujwi xlakata nachuna nalakapastakaw. Liwana kalakapastakwi pi tuku lama kʼuma kakilhtamaku chu ni xaxlikana xlitliwakga tumin tlan tlawakgo pi natamakgatliniyaw Dios. Komo lu lilipuwanaw tuku kgalhiputunaw, ni katikgalhiw kilhtamaku, litliwakga chu nialh katiskujnaniputuw xTamapakgsin Dios. Wa xlakata, liwana kalakpuwanti tuku natlawaya xlakata Satanás ni naliʼakgskgawiyan tuku nakgalhiputuna (kalikgalhtawakga Hebreos 13:5).
NI KAʼAKGSKGAWIW TIKU TATAMAKGAXTOKGNITAW
11, 12. ¿La max chatum kstalanina Cristo naʼakgskgawi xchixku o xpuskat anta niku skuja?
11 Makgapitsi talatna xlakata nachipakgo lakgtliwakga animales, tlawakgo akgtum pulhman lhuku niku titaxtu chu liʼakgtlapakgo laktsu kiwi, xpakgan kiwi chu tiyat. Uma taʼakgsiyut tlan tamalakxtumiyaw tuku limaklakaskin Satanás: talakgxtumit xalimaxana (Prov. 22:14; 23:27). Wilakgo makgapitsi kstalaninanin Cristo tiku patastakgo, o tamokgoskgo kʼuma «lhuku» akxni wilakgo niku tlan xtlawakgolh uma talakgalhin. Akgtum liʼakxilhtit, makgapitsi tiku tamakgaxtokgnit tsukukgo talalinkgo tiku ni xchixku o xpuskat chu alistalh akgskgawikgo.
12 ¿Niku tlan xlalh uma? Max tlan xlalh kputaskujut. Liwaka itat lakpuskatin chu atsinu ni putum lakchixkuwin tatalakgxtumikgonit chatum tiku taskujkgo chu akgskgawikgonit tiku tamakgaxtokgo. Komo lhuwa kilhtamaku taskujaw chatum puskat o puskat taskuja chatum chixku, ¿la nakatalalinaw? ¿Liwana waniyaw pi tamakgaxtokgnitawa chu kajwatiya taskujmaw? Akgtum liʼakxilhtit, max chatum tala puskat lu lhuwa tachuwinan chatum chixku tiku taskuja chu lu tsuku talalin chu asta wani tukuya taʼakglhuwit kgalhi kxtamakgaxtokgat. O max chatum tala chixku lu talalin chatum puskat tiku taskuja chu max natsuku lakpuwan: «Uma puskat xlikana kinkgaxmatni chu kuenta tlawa tuku kwani. Xla kimaxki kakni. ¡Lu tlan xwa komo chuna xkilikatsinika kkinchik!». Akxni wi tiku chuna titaxtu max tlan naʼakgskgawi xchixku o xpuskat.
13. ¿La chatum xalak congregación natsuku akgskgawi tiku tatamakgaxtokgnit?
13 Atanu niku nala uma tuku nitlan anta kcongregación. Chuna limasiya tuku kaʼakgspulalh Daniel chu xpuskat, Sara, * tiku precursores regulares xwankgonit. Xla wan pi kgolotsin chu «ni xkatsini wan pi ni» taskujut nema xmaxkikan kcongregación. Xlakata taskujut nema xtlawa, na xkalimakgalhtawakge Biblia kgalhkitsis lakgkgawasan. Kgalhtutu tamunukgolh chu xmaklakaskinkgo tiku xkamakgtayalh. Xlakata Daniel lhuwa taskujut xkgalhi kcongregación, Sara xkamakgtaya. Makglhuwa akxni lakgkgawasan xmaklakaskinkgo tamakgtay xla xkamakgtaya. Chu komo xla na xmaklakaskin tiku kuenta xtlawanilh, umakgolh lakgkgawasan xkgaxmatnikgo. Liwana xwi taʼakgsiyut. ¿Tuku lalh alistalh? Daniel wan: «Kimpuskat akglhuwa kata kamakgtayalh chu uma tlawalh pi kxlajwanalh xtakanajla chu nialh tliwakga xwi xtalakapastakni. Pero akit ni kkuentajtlawalh, wa xlakata kaj lakapala lalh tuku nitlan: alistalh Sara tatalakgxtumilh chatum. Kkilakatin xlajwanalh xtakanajla, chu akit kaj xaklakpuwan kintaskujut chu ni kuentajtlawalh». ¿Tuku tlan natlawayaw xlakata ni chuna nakinkaʼakgspulayan?
14, 15. ¿Tuku nakamakgtaya tiku tamakgaxtokgkgonit xlakata ni nalaʼakgskgawikgo?
14 Tuku nakinkamakgtayayan xlakata ni naʼakgskgawiyaw tiku tatamakgaxtokgnitaw, kililakapastakatkan tuku malaknuw akxni tamakgaxtokgwi. Jesús wa: «Wantu Dios makxtum tlawalh, ni kamapapitsilh nchixku» (Mat. 19:6). Nikxni kalakpuwanti pi tlakg xlakaskinka tuku lakgaya kcongregación nixawa tiku tatamakgaxtokgnita. Komo makglhuwa ni akxtum tawila tiku tamakgaxtokga kaj xlakata wi tuku tlawapat nema ni lu xlakaskinka, kuenta katlawa: max kmintamakgaxtokgat wi tuku namalakatsuki nitlan talakapastakni chu alistalh akgtum lanka talakgalhin nakitaxtu.
15 Komo wix kgolotsin xalak congregación, max lilakgaputsaya natalan. Apóstol Pedro tsokgli: «Kamakgtakgalhlipitit nkamputum xkalhnilu Dios wa nti nkamakuintajlikanitantit, ni kaj fuerzaj, wampi xlipaks mintapaxuwankan nalitlawayatit; ni wa mpala kaj natlajaputunatit ntumin, wampi xlipaks mintakpuwantinkan nalitlawayatit» (1 Ped. 5:2). Wa xlakata kuenta kakatlawa natalan tiku lakgayawakanita kcongregación. Pero ni kaj xlakata tlan kuentajtlawana nalitaxtuya nialh tlan nakuentajtlawaya mifamilia. Lu nitlan xwa nakakuentajtlawaya amakgapitsin chu ni kuenta natlawaya xtakanajla mimpuskat. Daniel tiku pulana lichuwinaw wan: «Ni xlilat lhuwa tuku natlawaya kcongregación chu uma natlawa pi nialh nakuentajtlawaya mifamilia».
16, 17. 1) ¿Tuku natlawakgo xtaskujutkan kstalaninanin Cristo tiku tamakgaxtokgkgonit xlakata nalimasiyakgo pi nikxni naʼakgskgawikgo tiku tamakgaxtokgkgo? 2) Kalichuwinanti makgapitsi likgalhtawakga nema nakamakgtaya kstalaninanin Cristo ni naʼakgskgawikgo tiku tatamakgaxtokgkgonit.
16 Revista Makatsinina chu ¡Despertad! mastakgonit lhuwa tastakyaw nema tlan makgtaya kstalanina Cristo xlakata ni naʼakgskgawi xpuskat o xchixku. Akgtum liʼakxilhtit, La Atalaya 15 xla septiembre kata 2006 wa uma tuku wa: «Kputaskujut o alakatanu niku natawilaya kuenta natlawaya tuku max natlawa pi wi tiku lu tlan natalalipina. Akgtum liʼakxilhtit, akxni chatum chixku tlakg lhuwa hora taskuja chatum puskat o puskat taskuja chixku max natsuku tuku nitlan. Xlakata wix tamakgaxtokgnitata liwana milimasiyat xlakata tuku wana chu tuku tlawaya pi nipara tsinu lakgatiya achatum. Xlakata wix skujnaniya Dios ni nalimasiyaniya achatum pi lakgatiya o natakaxtayaya chuna la nitlan tasiya [...]. Nawiliya niku tasiya fotografías xla mimpuskat chu xla minkamanan nema namalakapastakayan chu nachuna amakgapitsin tuku tlakg xlakaskinka akxilha. Liwana nalakapastakaw ni namastayaw talakaskin pi wi tiku nakinkalakgatiyan o nalakgatiyaw».
17 Kʼartículo: «¿Qué implica realmente la fidelidad conyugal?», nema taxtulh krevista ¡Despertad! xla abril kata 2009, wa pi tiku lakpuwan pi tatalakgxtumiputun achatum tiku ni tamakgaxtokga tlakg nituwa akgskgawi xchixku o xpuskat (Sant. 1:14, 15). Talakaskin pi kstalaninanin Cristo tiku tamakgaxtokgkgonit akxtum nalikgalhtawakgakgo uma. Tamakgaxtokgat xasanto xlakata wa Jehová malakatsukilh. Pulaktum nema tiku tamakgaxtokgkgonit nalimasiyakgo pi lu xlakaskinka akxilhkgo tuku xasanto wa nalimaxtukgo kilhtamaku xlakata nachuwinankgo (Gén. 2:21-24).
18, 19. 1) ¿Tuku nitlan kitaxtu akxni wi tiku akgskgawi xchixku o xpuskat? 2) ¿Tuku tlan namakglhtinanaw komo ni naʼakgskgawiyaw tiku tamakgaxtokgaw?
18 Komo namin kilhtamaku wi tiku natsukuya lakgatiya, kalilakpuwanti tuku nitlan kitaxtu akxni wi tiku tlawa talakgxtumit nema ni xlilat chu tiku akgskgawi xpuskat o xchixku (Prov. 7:22, 23; Gál. 6:7). Tiku tlawakgo talakgxtumit nema ni xlilat, makgalipuwankgo Jehová, makgalipuwankgo tiku tamakgaxtokgkgo chu nitlan kakitaxtuni (kalikgalhtawakga Malaquías 2:13, 14). Pulana kalilakapastakti tuku tlan kitaxtu akxni xaʼakgstitum lipina milatamat. Ni kaj nakgalhiya takgalhkgalhin pi tlan nalatapaya xliputum kilhtamaku, wata la uku na tlan napaxuwaya chu tlan natawila mintalakapastakni (kalikgalhtawakga Proverbios 3:1, 2).
19 Chatum salmista chuna tlinilh Jehová: «Lhuwa tapaxawan takgalhi ti talakgati tatlawa tu wan milimapakgsin, xlakan ni natakgchakgxa nak ixlatamatkan» (Sal. 119:165). La uku lu xlakaskinka pi kstalaninanin Cristo xlikana nalapaxkikgo chu “kuintaj natlawakgo lantla nalatamakgo, ni wa xtachuna wanti ni katsi, wampi wa xtachuna nti katsiy” (Efes. 5:15, 16). Kkatiyatni niku lamaw anan lhuwa xliʼakgsiyat Satanás nema kaliʼakgchipaputun xaxlikana xlakskujnin Dios. Pero Jehová kinkamaxkinitan tuku nalitamakgtayayaw. Xlikana kgalhiyaw tuku tamaklakaskin xlakata “tliwakglh natawilayaw” chu «nalimamixiya[w] tuku lakgpasama nakinkamalakgachaniyan» Akgskgawini (Efes. 6:11, 16, NM).
[Nota nema wi kpágina]
^ párr. 13 Talakgpalikgonit tukuwani.
[Takgalhskinin]
[Dibujo xla página 26]
Akxni lhuwa tuku kgalhiputunaw natlawa pi naxlajwanan kintakanajlakan. Ni kamasta talakaskin chuna naʼakgspulayan
[Dibujo xla página 29]
Komo namastayaw talakaskin pi wi tiku nakinkalakgatiyan o nalakgatiyaw, nitlan nakitaxtu max naʼakgskgawiyaw tiku tatamakgaxtokgnitaw
