Lipoti ya Kukumana kwa pa Mwaka

Ukukumana kwa Bantu Abaikatana, na Mapekanyo Yabo Ayasuma

UKUKUMANA ukubako cila mwaka ukwa kabungwe ka Watch Tower Bible and Tract Society of Pennsylvania lyonse kulawama nga nshi. Ifi fine e fyo no kukumana ukwalenga 127 ukwaliko pa Cibelushi pa 1 October mu 2011 kwali! Abaitilwe ukufuma ku fyalo fyalekanalekana balilongene mu Cikuulwa Cikalamba ica Kulonganinamo ica Nte sha kwa Yehova mu musumba wa Jersey City, New Jersey, mu America.

Ba Gerrit Lösch aba mwi Bumba Litungulula e basengeele abaishile ku kukumana. Baebele bamunyinefwe abafumine mu fyalo nalimo 85 ukuti balishuka nga nshi pa kulaipakisha ukwikatana kwa babwananyina. Ukwikatana kwa musango yu kulalenga abantu ukwishiba ukuti tuli bantu ba kwa Lesa kabili kulalenga Yehova ukucindikwa. Na kuba pali uku kukumana balilandile sana pa kwikatana.

LIPOTI IISUMA IYA KU MEXICO

Ilyashi lya kubalilapo pali uku kukumana lyalangile ifyo abantu ba kwa Yehova baikatana. Munyinefwe Baltasar Perla aipwishe bamunyinefwe batatu abo aba nabo pa Musambo wa ku Mexico, abepwishe pali filya babombela pamo na babwananyina na bambi abafuma mu misambo imbi 6 iyo baisele mu Central America. E calenga mu Bethel ya ku Mexico mube abantu aba mitundu yalekanalekana abafuma ku fyalo fimbi. Bamunyinefwe batile ukukwata bamunyinefwe abalekanalekana abafuma ku fyalo fimbi kwalilenga ukuti tulekoseleshanya. Caba kwati Lesa alifumyapo imipaka ya fyalo.

Ubwafya fye bumo ubwaliko bwa kwafwa bakasabankanya mu fyalo umo baisala imisambo ukukanalatontonkanya ukuti balitaluka ku kuteyanya kwa kwa Yehova. E mulandu wine icilonganino cimo na cimo ukubikako fye ne fyaba ukutali sana, fyakwatila e-mail adresi iya kumfwaninamo no musambo wa ku Mexico.

LIPOTI YA FYACITIKE MU JAPAN

Ba James Linton aba ku Bethel ya ku Japan balondolwele amafya bamunyinefwe bakwete ilyo kwali icinkukuma ne bimbi ilikalamba ilya tsunami ilyaonawile ifintu mu March 2011. Ba Nte abengi balifwililwe ba lupwa ne fibusa, e lyo ne fipe fyabo fyalyonaike. Bamunyinefwe bambi balipekanishishe bamunyinabo abasanshilwe amayanda ukucila pali 3,100 , kabili balipekenye ne myotoka sha kuti bale-endelamo. Ababombela pamo na Komiti ya Makuule iya mu Citungu, tabalelaala no tulo, balewamya fye amayanda ayaonaike aya bamunyinefwe. Bamunyinefwe abaipeeleshe ukwafwa abasanshilwe balicilile pali 1,700. Bamunyinefwe 575 abafumine ku America baliipeeleshe ukuwamya Amayanda ya Bufumu ayaonaike.

Icikalamba ico bapooseleko sana amano kwafwa abasanshilwe lwa ku mupashi no kubasansamusha. Baeluda ukucila pali 400 balisansamwishe abalekabila icisansamushi. Ibumba Litungulula lyalipooseleko sana amano ica kuti lyatumine bakangalila ba calo babili aba ku maofeshi yakalamba aya Nte sha kwa Yehova pa kuti bayekoselesha bamunyinefwe. Bamunyinefwe mwi sonde lyonse balikoseleshe sana abali na mafya.

 UKUCIMFYA MU FILYE FYA MILANDU

Abantu balekutikisha ilyo ba Stephen Hardy aba pa Bethel ya ku Britain balelanda pa fyo ba Nte bacimfya mu filye fya milandu. Ku ca kumwenako, ubuteko bwa ku France bwalelipilisha ba Nte umusonko amadola 82 milioni (U.S.). Uyu umulandu walipwile ilyo icilye cikalamba ica European Court of Human Rights (ECHR) catulandiileko ukuti, ubuteko bwa mu France bwalipulile mwi funde lyalenga 9 ilya kabungwe ka European Convention akalandilako aba mapepo ne nsambu isho bakwata. Ifyo icilye capingwile fyalangile ukuti umulandu uukalamba uwalipo te kulipila fye umusonko, pantu katile: “Ukukaana akabungwe ka mapepo, ukukapasa, nelyo ukulanda ifyabipa pa kabungwe ka mipepele, kupusana ne funde lyalenga 9 ilya kabungwe ka European Convention.”

Na kabili icilye ca ECHR, calilandiileko bamunyinefwe mu calo ca Armenia. Ukufuma mu 1965, ici icilye calandile ukuti akabungwe ka European Convention takalecingilila abantu filya balebapatikisha ukwingila ubushilika. Icilye icikalamba sana ica European Court capingwile ukuti, “Umuntu nga akaana ukwingila ubushilika, pa mulandu wa kuti talefwaya ukuitumpa mu kukansana,” akabungwe ka European Convention kafwile ukumupokololako. Ici calolele mu kuti icalo ca Armenia ne fyalo fimbi pamo nga Azerbaijan na Turkey na fyo fyali no kulakonka ili ifunde ilipya.

AMAKUULE

Ba Guy Pierce aba mwi Bumba Litungulula e balandile ilyashi lyakonkelepo, kabili batile balishibe ukuti bonse abalongene balefwaya sana ukwishiba pa lwa fikuulwa balefwaya ukukuula mu New York State. Balangile abantu vidio iyalelanga ifyo umulimo ule-enda mu Wallkill, ku Patterson, e lyo ne mpanga isho bashitile nomba line ku Warwick na ku Tuxedo, mu New York. Ku Wallkill, icikuulwa ica kwikalamo cikapwa mu 2014 kabili cikakwata imiputule 300.

Pa ncende yaba ku Warwick iyaba ama eka 248, balepekanya ukukuulapo ifikuulwa. Munyinefwe Pierce atile: “Nangu ca kuti tatwishibe bwino nga Yehova alefwaya ukuti tukuulepo nelyo iyo, tuli no kukuula pa kuti eko tukakuushishe amaofeshi yakalamba aya Nte sha kwa Yehova.” Na kabili tulepanga ukuputulako ama eka 50 lwa kukapinda ka ku kuso aka iyi mpanga iya ku Warwick ukukuulapo ifikuulwa umo tukabika fimashini e lyo ne fisolobelo fya makuule. Ukufuma apo tukakuulila ifi fikuulwa na po tukakuula ifikulwa fimbi, paba amakilomita 10. Munyinefwe Pierce atile: “Nga batusuminisha ukwamba ukukuula, tule-enekela ukupwisha ubukuule mu myaka ine. Pa numa kuti twashitisha ifikuulwa fyaba mu Brooklyn.”

Ba Pierce baipwishe ati: “Bushe aba mwi Bumba Litungulula nabalula filya balelanda ukuti ubucushi bukalamba nabupalama?” Bayaswike abati: “Awe nakalya.” Kabili batile: “Ubucushi bukalamba nga bukesa ninshi tatulapwisha ukukuula, ninshi cikawama icine cine!”

CENJELENI KU NKALAMO IILEBULUMA

Munyina Stephen Lett, na umbi uwa mwi Bumba Litungulula alandile pe lembo lya 1 Petro 5:8, ilitila: “Beni abalola, cenjeleni. Umulwani wenu, Satana Kaseebanya, endauka nge nkalamo iilebuluma, iilefwaya untu ingalya.” Munyinefwe Lett alandile pa fyaba inkalamo ifyalengele Petro alande ukuti e fyaba na Satana.

Apo Satana aba kwati ni nkalamo iyakosa kabili iya lubilo ukucila abantu, tatulingile ukwesha ukumulwisha ku maka yesu. Tulingile ukulomba Yehova ukutwafwa. (Esa. 40:31) Inkalamo nga ilefwaya ukwikata inama ilabendelela, kanshi na fwe tatulingile ukulaenda mu mfifi ya ku mupashi umo Satana atemwa ukwikatila abantu. Nga filya fine inkalamo ikata impelembe iyabula umulandu, nelyo akana ka kwa colwa akaleele, e fyo na Satana aba, taba no luse  kabili alatemwa sana nga atwipaya. Pa numa inkalamo nga yalya inama iyo ikete, iishalako imoneka fye cimbi cimbi. Ifi fine e fiba na bantu abo Satana ekata, “imibele yabo iya kulekelesha ilabipisha ukucila iya kubalilapo.” (2 Pet. 2:20) Kanshi pa kuti twiminine ndi pa kulwisha Satana, tulingile ukulakonka sana ifyo tusambilila muli Baibolo.—1 Pet. 5:9.

TWALILILENI UKUBA MU NG’ANDA YA KWA YEHOVA

Munyinefwe na umbi, Samuel Herd uwa mwi Bumba Litungulula atile: “Bonse fye Yehova alitwita ukuba mu ng’anda yakwe.” Abena Kristu bonse balikwata ishuko lya kuba mu “ng’anda” yakwe, e kutila mwi tempele lya ku mupashi. Ili itempele kupekanya kwa kwa Lesa ukwa kuti tulemupepa ukupitila mwi lambo lya cilubula ilya kwa Yesu. Kanshi tulingile ukutasha nga nshi pali ili shuko. Nga filya Davidi alandile, na ifwe tufwaya ‘ukwikala mu ng’anda ya kwa Yehova inshiku shonse isha mweo wesu.’—Amalu. 27:4.

Munyinefwe Herd abelengele Amalumbo 92:12-14 kabili aipwishe ati, “Bushe Yehova atukosha shani?” Bayaswike ukuti: “Muli paradaise ya ku mupashi, Lesa alatusansamusha, alatucingilila, kabili alatusambilisha icine. Tulingile ukulamutasha pali ifi fyonse.” Lyena ba Herd bakoseleshe abantu abati: “Natutwalilile ukuba mu ng’anda ya kwa Yehova, twikatala atufumamo.”

ABENA KRISTU BALICINDIKA ICEBO CA KWA LESA

Ba Splane, nabo aba mwi Bumba Litungulula, balondolwele ukuti Abena Kristu ba cine lyonse balacindika Icebo ca kwa Lesa. Mu nshita ya batumwa, pa kupwisha ubwafya bwa kusembululwa babomfeshe Icebo ca kwa Lesa. (Imil. 15:16, 17) Lelo bamo muli ba 100 C.E., abaleti Bena Kristu, abasambilile amano ya ba Griki batendeke ukukonka amano yabo mu nshita ya kukonka Amalembo. Pa numa, bambi batendeke ukusambilisha amasambilisho ya ba shimapepo na yaba kateka abena Roma, e calengele ukuti kube ifisambilisho ifingi ifya bufi.

Munyinefwe Splane atile, mu cilangililo ico Yesu alandile, atile lyonse pe sonde pa kulaba Abena Kristu basubwa aba kucingilila icine. (Mat. 13:24-30) Kwena te kuti twishibe bwino bwino aba abasubwa. Lelo pa  myaka fye iingi abantu bamo balisuusha ifisambilisho fya bufi ne fibelesho. Bamo pali aba, ni Shikofu Agobard uwa ku Lyons uwa muli ba 800 C.E., Peter uwa ku Bruys, Henry uwa ku Lausanne, na Valdès (nelyo, Waldo) uwa muli ba 1100 C.E., John Wycliffe uwa muli ba 1300 C.E., William Tyndale uwa muli ba 1500 C.E., Henry Grew na George Storrs aba muli ba 1800 C.E. Inte sha kwa Yehova muno nshiku, balitwalilila ukukonka ifyo Baibolo ilanda pantu balishiba ukuti e mwaba icine. E calengele ukuti Ibumba Litungulula lisale ilembo lya mwaka ilya 2012 ilyaba pali Yohane 17:17, apatila, “Icebo cenu e cine.”

IFYALWIKE MU MASUKULU YA KUKANSHA NA MU MIBOMBELE YESU

Ba Anthony Morris aba mwi Bumba Litungulula balandile pa fyalwike ifikumine ba mishonari na bapainiya baibela. Ukutendekela mu September 2012, kwakulaba Isukulu Ilya Bena Kristu Abaupana mu fyalo ifyo bakasala. Nabaalula na bo bakulaita kwi Sukulu lya Gileadi. Ukutula mu October 2011, bonse abo bakulaita kwi Sukulu lya Gileadi bafwile ukuba mu mulimo waibela uwa nshita yonse, pamo nga bamishonari abashaya kwi sukulu lya Gileadi, bapainiya baibela, bakangalila benda, nelyo ababombela pa Bethel. Nga bapwisha Isukulu lya Gileadi bakalabomba ku kukukoselesha no kwafwa abantu ba kwa Lesa mu misambo, mu mulimo wa kwenda, nelyo ukubombela mu ncende umwaba ifilonganino na bantu abengi abo bengashimikilako no kubakoselesha.

Bapainiya abaibela na bambi bakalabatuma mu ncende ishaba ukutali, ukushaba ifilonganino. Ukutendekela pa 1 January, 2012, bamo abakulapwisha Isukulu lya Bamunyinefwe Abashimbe ne Sukulu Ilya Bena Kristu Abaupana, bakulabatuma nga bapainiya baibela kabili bakulaya mu kubombela mu ncende sha mu mishi. Bakulabatuma nga bapainiya baibela pa mwaka umo uutuntulu, nga babomba bwino, bakulabapeela umwaka na umbi e lyo no walenga butatu. Pa numa, e lyo bakulabatasha ukutwalilila ukubomba nga bapainiya baibela.

Abasangilwe ku kukumana kwa pa mwaka ukwa mu 2011, baliipakishe nga nshi. Tulesuubila ukuti Yehova akapaala iyi mitantikile iipya iya kulenga imbila nsuma ukushimikilwa sana, kabili iikalenga ukuti tukekatane sana no kulenga Yehova ukucindikwa.

[Akabokoshi ne Fikope pe bula 18, 19]

UKUBESHIBA BWINO

Pali uku ukukumana, mu lyashi limo balipwisheko na bamukamfwilwa 5 pali balya 9 abo abena mwabo bali mwi Bumba Litungulula. Baipwishe ba nkashi Marina Sydlik, ba Edith Suiter, ba Melita Jaracz, ba Melba Barry, na ba Sydney Barber. Aba bonse balilondolwele ifyo basambilile icine, ne fyo batampile umulimo wa nshita yonse. Ba nkashi bonse balilandile pa fintu ifikalamba ifyo bebukishishapo abena mwabo, na mapaalo baipakishe ilyo bali nabo pano calo. Pa numa, ibumba lyaimbile ulwimbo ulusuma sana ulwalenga 86, ulwaba no mutwe ulutila, “Abanakashi ba Citetekelo.”

[Ifikope]

(Pa muulu) Ba Daniel na ba Marina Sydlik; ba Grant na ba Edith Suiter; ba Theodore na ba Melita Jaracz

(Pe samba) Ba Lloyd na ba Melba Barry; ba Carey na ba Sydney Barber

[Mapu pe bula 16]

(Nga mulefwaya ukumona bwino iyi mapu, moneni muli magazini)

Abalebombela mu misambo 6 iyo baisele, nomba babombela pa musambo wa ku Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Icikope pe bula 17]

Ifyo amaofeshi yakalamba aya Nte sha kwa Yehova ayo bakakuula mu Warwick, ku New York yakalamoneka