MAKAPAHINAM gayod ang tinuig nga mga miting sa Watch Tower Bible and Tract Society of Pennsylvania! Tinuod usab kana sa ika-127 nga tinuig nga miting niadtong Sabado, Oktubre 1, 2011. Ang mga bisita nga gikan sa lainlaing nasod nagtigom sa Assembly Hall of Jehovah’s Witnesses sa Jersey City, New Jersey, U.S.A.

Giabiabi ni Gerrit Lösch, membro sa Nagamandong Lawas, ang malipayong mga bisita. Giingnan niya ang mga delegado gikan sa 85 ka nasod nga sila adunay talagsaong internasyonal nga panaghiusa. Naghatag kinig maayong pamatuod ug kahimayaan kang Jehova. Gani, ang panaghiusa maoy gipasiugda niini nga miting.

MAAYONG REPORT GIKAN SA MEXICO

Gipakita sa unang bahin sa programa ang usa ka pananglitan sa panaghiusa sa mga alagad ni Jehova. Giinterbiyo ni Baltasar Perla ang tulo niya ka isigka-Bethelite sa Mexico bahin sa unom ka sangang buhatan sa Central America nga gitapo ngadto sa sangang buhatan sa Mexico. Tungod niini, ang pamilyang Bethel sa Mexico nadugangan ug mga membro nga gikan sa lainlaing nasod ug kultura. Ang pag-abot sa daghang Bethelite miresulta sa pagdinasigay sa usag usa. Samag ang Diyos nagkuhag dakong eraser ug nagpapas sa utlanan sa mga nasod.

Usa ka hagit sa maong panagtapo mao ang pagtabang sa mga magmamantala nga dili sila mobating nahimulag sa organisasyon ni Jehova bisag wala nay sangang buhatan sa ilang mga nasod. Busa, ang matag kongregasyon gihatagag protektadong koneksiyon sa e-mail aron bisan kadtong atua sa hilit nga mga lugar direktang makakomunikar sa sangang buhatan.

KINABAG-OHANG REPORT SA JAPAN

Gisaysay ni James Linton, gikan sa sangang buhatan sa Japan, kon sa unsang paagi naapektohan ang atong mga igsoon sa linog ug tsunami nga milampornas sa Japan niadtong Marso 2011. Daghang Saksi ang namatyag mga minahal ug nawad-ag mga kabtangan. Ang mga Saksi nga wala maapektohi sa kalamidad nagtaganag kapin sa 3,100 ka puy-anan ug ginatos ka sakyanan alang sa mga igsoon nga nabiktima. Ang mga boluntaryo nga gipadala sa mga Regional Building Committee way hunong nga nag-ayo sa mga balay sa mga igsoon. Kapin sa 1,700 ang miboluntaryo sa mga dapit nga may panginahanglan. Usa ka tem sa mga boluntaryo gikan sa United States ang mitabang sa pagpang-ayo ug mga Kingdom Hall, ug 575 ka boluntaryo ang mitabang niini nga proyekto.

Dakong paningkamot ang gihimo alang sa paghupay sa mga igsoon ug sa pagpalig-on sa ilang espirituwalidad. Kapin sa 400 ka ansiyano ang miduaw kanila. Ang Nagamandong Lawas nagpadala usab ug duha ka magtatan-aw sa sona gikan sa hedkuwarter aron dasigon ang mga igsoon. Makapahupay gayod ang kahingawa nga gipakita sa mga Saksi sa tibuok kalibotan!

KADAOGAN SA MGA KASO

Naminaw pag-ayo ang tanan dihang gihisgotan ni Stephen Hardy gikan sa sangang buhatan sa Britain ang di pa dugay natong mga kadaogan sa mga  kaso. Pananglitan, ang gobyerno sa France nangayo ug $82 milyones (U.S.) nga buhis gikan sa asosasyon nga atong gigamit sa France. Nahusay ang kaso sa dihang ang European Court of Human Rights (ECHR) midesisyon pabor kanato. Kini nag-ingon nga gilapas sa gobyerno sa France ang Article 9 sa European Convention, nga nanalipod sa relihiyosong kagawasan. Gipakita sa maong desisyon nga dili kuwarta ang isyu, kay kini nag-ingon: “Ang dili pag-ila sa usa ka relihiyosong organisasyon, ang pagpangitag paagi sa pagbungkag niini, ang pagpanginsulto batok sa usa ka relihiyon, maoy pagtamak sa katungod sa matag relihiyon sumala sa gilatid sa Article 9 sa Convention.”

Ang ECHR midesisyon usab pabor kanato sa kaso batok sa nasod sa Armenia. Sukad sa 1965, nagtuo ang ECHR nga ang European Convention wala maghatag ug katungod sa usa ka tawo sa pagdumili sa obligasyon nga magsundalo. Apan ang Grand Chamber, ang kinatas-ang korte sa ECHR, midesisyon nga ang European Convention naghatag ug katungod sa usa ka tawo nga modumili sa pagsundalo kon kini mosumpaki sa iyang relihiyosong pagtuo. Kini nga desisyon nag-obligar sa Armenia ug sa mga nasod sa Azerbaijan ug Turkey sa pag-ila sa maong katungod.

PROYEKTO SA PAGPANUKOD

Ang sunod nga mipakigpulong mao si Guy Pierce, membro sa Nagamandong Lawas. Siya miingon nga tingali interesado ang mamiminaw nga mahibalo bahin sa atong mga proyekto sa New York State. Iyang gipakita ang video bahin sa pagpanukod didto sa Wallkill, Patterson, ug sa bag-ong mga propidad nga napalit didto sa Warwick ug Tuxedo, New York. Sa Wallkill, usa ka bag-ong bilding nga may 300 ka kuwarto ang gilaomang matapos sa 2014.

Naa nay mga plano nga tukoran ang 100 ektaryas nga propidad sa Warwick. Si Brader Pierce miingon: “Bisag wala pa kita masayod kon unsay kabubut-on ni Jehova alang sa Warwick, ginahimo na namo ang mga pagpangandam sa maong propidad sa tuyo nga ibalhin didto ang hedkuwarter sa mga Saksi ni Jehova.” Giplanong gamiton ang 20 ektaryas nga yuta nga nahimutang 10 kilometros amihanan sa Warwick alang sa mga makinarya ug mga materyales sa pagpanukod. “Kon makuha na ang mga permit sa pagtukod, gilaoman nga mahuman ang tibuok proyekto sulod sa upat ka tuig,” matod ni Brader Pierce. “Human niana, mahimo nang ibaligya ang propidad sa Brooklyn.”

“Nausab ba ang panglantaw sa Nagamandong Lawas bahin sa pagkaduol sa dakong kasakitan?” nangutana si Brader Pierce. “Wala gayod,” siya mitubag. “Kon moabot ang dakong kasakitan sa dili pa mahuman ang atong mga proyekto, labing maayo!”

PAGBANTAY SA NAGANGULOB NGA LEYON

Ang sunod nga mamumulong nga si Stephen Lett, laing membro sa Nagamandong Lawas, naghisgot sa 1 Pedro 5:8: “Hupti ninyo ang maayong panghunahuna, magmabinantayon. Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.” Iyang gipatin-aw ang lainlaing kinaiya sa leyon, nga tukma kaayo sa paghubit ni Pedro bahin sa Yawa.

Kay mas kusgan ug mas paspas man ang leyon kay sa tawo, dili gayod kita mosulay sa pagpakig-away kang Satanas sa kaugalingon natong kusog. Gikinahanglan nato ang tabang ni Jehova. (Isa. 40:31) Ang leyon mangukoy sa pagpangitag tukbonon, busa likayan nato ang espirituwal nga kangitngit diin didto nangukoy si Satanas. Maingon nga ang leyon mopatay sa way ikasukol nga osa o sa natulog nga nating sebra, si Satanas usab way kaluoy ug gustong mopatay kanato. Ug human kuniskunison sa leyon ang iyang biktima, kini sagad dili na mailhan. Susama niini ang “kataposang kahimtang” sa mga biktima ni Satanas, nga ‘mahimong labi pang daotan kay  sa nahauna.’ (2 Ped. 2:20) Busa magbantay kita batok kang Satanas ug sundon gayod ang mga prinsipyo sa Bibliya nga atong nakat-onan.—1 Ped. 5:9.

PABILHI ANG IMONG LUNA DIHA SA BALAY NI JEHOVA

“Kitang tanan adunay luna sa balay ni Jehova,” matod sa sunod nga mamumulong nga si Samuel Herd, membro usab sa Nagamandong Lawas. Ang tanang Kristohanon adunay luna sa “balay” sa Diyos nga mao ang iyang espirituwal nga templo. Kini ang kahikayan sa pagsimba kaniya pinasukad sa halad lukat ni Jesus. Angay natong mahalon kining bililhon nga pribilehiyo. Sama kang David, buot natong ‘mopuyo sa balay ni Jehova sa tanang adlaw sa atong kinabuhi.’—Sal. 27:4.

Gikutlo ni Brader Herd ang Salmo 92:12-14 ug siya nangutana, “Sa unsang paagi kita gitabangan ni Jehova nga molambo?” Siya mitubag: “Sa espirituwal nga paraiso, kita giatiman, gipanalipdan, ug gihatagan sa Diyos ug makarepresko nga tubig sa kamatuoran. Atong pasalamatan si Jehova niana.” Dayon giawhag ni Brader Herd ang mga mamiminaw: “Magmakontento kita sa pagpabilin sa balay ni Jehova—dili sa mubo lang nga panahon kondili sa walay kataposan.”

ANG MGA KRISTOHANON NAGTAHOD SA PULONG SA DIYOS

Ang sunod nga mipakigpulong mao si David Splane nga membro sa Nagamandong Lawas. Iyang gipatin-aw nga ang matuod nga mga Kristohanon kanunayng nagtahod sa Pulong sa Diyos. Sa unang siglo, sila naggamit niana aron masulbad ang isyu bahin sa pagtuli. (Buh. 15:16, 17) Apan sa ikaduhang siglo, gipalabi sa pipila ka nag-angkong Kristohanon ang Gregong pilosopiya kay sa Kasulatan. Sa ulahi, gitudlo sa uban ang opinyon sa mga emperador sa Roma ug sa gitawag nilang mga Amahan sa Simbahan, imbes ang mga pagtulon-an sa Bibliya. Ingong resulta, mikaylap ang daghang bakak nga doktrina.

Gipatin-aw usab ni Brader Splane ang usa sa mga ilustrasyon ni Jesus. Gipakita niini nga ilustrasyon nga sukad sa unang siglo, kanunayng may dinihogang mga Kristohanon sa yuta nga nagdepensa sa kamatuoran. (Mat. 13:24-30) Dili kita makaseguro kon kinsa sila. Apan latas sa kasiglohan, daghan  ang nagsalikway sa mga doktrina ug mga tradisyon nga supak sa Kasulatan. Ang pipila kanila mao si Arsobispo Agobard sa Lyons sa ika-9 nga siglo, si Peter sa Bruys, si Henry sa Lausanne, ug si Valdès (o, Waldo) sa ika-12 nga siglo, si John Wycliffe sa ika-14 nga siglo, si William Tyndale sa ika-16 nga siglo, ug si Henry Grew ug George Storrs sa ika-19 nga siglo. Ang mga Saksi ni Jehova karon padayong nagsunod sa mga sukdanan sa Kasulatan ug nag-isip sa Bibliya ingong pundasyon sa kamatuoran. Kanay hinungdan nga gipili sa Nagamandong Lawas ang Juan 17:17 ingong tinuig nga teksto sa 2012: “Ang imong pulong maoy kamatuoran.”

MAKAIIKAG NGA MGA KAUSABAN ALANG SA PAGBANSAY UG PAG-ALAGAD

Gipahibalo ni Anthony Morris, membro sa Nagamandong Lawas, ang pipila ka kausaban alang sa mga misyonaryo ug espesyal payunir. Sugod sa Septiyembre 2012, dunay pagahimoong mga klase sa Bible School for Christian Couples diha sa pinili nga mga nasod. Duna usay kausaban sa Gilead School. Sugod sa miaging Oktubre, ang tanang bansayon sa Gilead maoy mga igsoon nga anaa na sa espesyal nga bug-os panahong pag-alagad—sama sa mga misyonaryo nga wala pa makatungha sa Gilead, mga espesyal payunir, nagapanawng magtatan-aw, o mga Bethelite. Human sa graduwasyon, sila iasayn diha sa sangang mga buhatan, sa nagapanawng buluhaton, o sa lokal nga mga kongregasyon diha sa dagkong mga siyudad diin ilang madasig, matabangan, ug mabansay ang mga igsoon.

Sugod sa Enero 1, 2012, ang pipila nga mograduwar sa Bible School for Single Brothers ug sa Bible School for Christian Couples iasayn ingong temporaryong mga espesyal payunir diha sa hilit nga mga lugar nga diyutay ra ang mga magmamantala o walay Saksi. Sila mag-alagad didto sulod sa usa ka tuig, nga mahimong moabot ug tulo ka tuig. Kadtong magmabungahon sa ilang asaynment mahimong itudlo ingong permanenteng espesyal payunir.

Makapalipay kaayong okasyon ang tinuig nga miting sa 2011. Hinaot panalanginan ni Jehova ang bag-ong mga kahikayan aron mouswag pa ang buluhatong pagsangyaw ug magkahiusa pa gayod ang atong organisasyon—ang tanan alang sa iyang kahimayaan ug kadayeganan.

[Kahon/Mga hulagway sa panid 18, 19]

MAS NAILHAN PA NAMO SILA

Lakip sa programa ang pag-interbiyo sa lima ka biyuda sa namatay nang mga membro sa Nagamandong Lawas. Giasoy nila Sister Marina Sydlik, Edith Suiter, Melita Jaracz, Melba Barry, ug Sydney Barber kon sa unsang paagi sila nakadangat sa kamatuoran ug nakasulod sa bug-os panahong pag-alagad. Giasoy sa matag usa ang ilang dili malimtang kasinatian, ang maayong mga hiyas sa ilang bana, ug ang mga panalangin nga ilang nadawat ingong magtiayon. Dayon ang tanan nanganta sa awit numero 86, nga nag-ulohang “Matinumanong Kababayen-an, Kristohanong mga Sister.”

[Mga hulagway]

(Ibabaw) Sila Daniel ug Marina Sydlik; Grant ug Edith Suiter; Theodore ug Melita Jaracz

(Ubos) Sila Lloyd ug Melba Barry; Carey ug Sydney Barber

[Mapa sa panid 16]

(Alang sa aktuwal nga pagkahan-ay, tan-awa ang publikasyon)

Ang unom ka sangang buhatan nga gitapo ubos sa pagdumala sa sangang buhatan sa Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Hulagway sa panid 17]

Ang giplanong disenyo para sa hedkuwarter sa mga Saksi ni Jehova sa Warwick, New York