ANG annual meeting sang Watch Tower Bible and Tract Society of Pennsylvania makakulunyag gid pirme. Matuod gid ini sa ika-127 nga annual meeting nga ginhiwat sang Sabado, Oktubre 1, 2011! Ang gin-agda nga mga bisita nga naghalin sa bug-os nga kalibutan nagtilipon sa Assembly Hall of Jehovah’s Witnesses sa Jersey City, New Jersey, U.S.A.

Si Gerrit Lösch sang Nagadumala nga Hubon ang nag-abiabi sa malipayon nga mga tumalambong. Ginhambalan niya ang mga delegado halin sa 85 ka pungsod nga may paghiusa sila sa bilog nga kalibutan. Maayo gid ini nga panaksi kag nagahimaya kay Jehova. Ang paghiusa amo ang sulitsulit nga ginpadaku sa sini nga miting.

MAAYO NGA REPORT HALIN SA MEXICO

Ang una nga bahin sang programa nagapadaku sang paghiusa sang katawhan ni Jehova. Gin-interbyu ni Baltasar Perla, nga miembro sang pamilya Bethel sang Mexico, ang tatlo niya ka kaupod parte sa pagtingob sang anom ka sanga talatapan sa Sentral Amerika sa sanga sang Mexico. Bangod sini, ang pamilya Bethel sa Mexico ginatapuan na sang mga kauturan nga naghalin sa lainlain nga pungsod kag kultura. Nagresulta ini sa pagpalig-unay sa isa kag isa. Daw subong bala nga nagkuha ang Dios sing daku nga eraser kag ginpanas ang mga dulunan sang pungsod.

Ang isa ka hangkat sa sini nga pagtingob amo ang pagpabatyag sa mga manugbantala nga bahin sila gihapon sang organisasyon ni Jehova bisan pa wala na sing sanga sa ila pungsod. Gani, ang kada kongregasyon may e-mail address, agod makakomunikar sila sing direkta sa sanga talatapan bisan malayo sila.

REPORT HALIN SA JAPAN

Ginsaysay ni James Linton, sang sanga sa Japan, kon paano naapektuhan ang mga kauturan sang linog kag tsunami didto sang Marso 2011. Madamo nga Saksi ang nadulaan sing hinigugma kag mga pagkabutang. Sobra 3,100 ka balay kag ginatos ka salakyan ang ginpagamit sang mga Saksi sa mga lugar nga wala naapektuhan. Ang mga boluntaryo sang mga Regional Building Committee nangabudlay sa pagpangay-o sang mga balay sang mga kauturan. Sobra 1,700 ang nagboluntaryo sa mga lugar nga kinahanglan ang bulig. Ang isa ka grupo sang mga boluntaryo halin sa Estados Unidos nagbulig sa pagpangay-o sang mga Kingdom Hall, kag 575 ang nagboluntaryo sa sini nga proyekto.

Daku man ang ginhimo para buligan sa espirituwal kag emosyonal ang mga naapektuhan. Sobra sa 400 ka gulang ang nagduaw sa mga kauturan para palig-unon sila. Ginpadala man sang Nagadumala nga Hubon ang duha ka manugtatap sang sona halin sa ulong talatapan agod palig-unon ang mga kauturan. Ang pag-ulikid sang mga kauturan sa bug-os nga kalibutan nakahatag man sing daku nga paumpaw.

MGA KADALAG-AN SA KORTE

Namati gid sing maayo ang mga tumalambong samtang ginasaysay ni Stephen Hardy, sang sanga sa Britanya, ang mga kadalag-an sa korte sining karon lang. Halimbawa, ginapabayad sang gobierno sang  Pransia sing $82 milyones (U.S.) nga buhis ang mga Saksi didto. Nasolbar ini sang nagdesisyon pabor sa aton ang European Court of Human Rights (ECHR). Nagsiling ini nga ginlapas sang gobierno sang Pransia ang Artikulo 9 sang European Convention nga nagaamlig sa kahilwayan sang relihion. Ginpakita sa desisyon nga ini nga kaso indi parte sa kuarta, kay nagsiling ini: “Ang pagdumili nga kilalahon ang isa ka relihioso nga asosasyon, ang pagpauntat sa sini, kag ang pagpakanubo sa sini, mga halimbawa sang paglapas sa kinamatarong nga ginsambit sa Artikulo 9 sang Convention.”

Ang ECHR nagdesisyon man pabor sa aton parte sa kaso sa Armenia. Sugod sang 1965, ang ECHR nagasiling nga ang European Convention wala nagahatag sing proteksion sa mga indibiduwal nga nagapangindi magsoldado. Pero, ang Grand Chamber—ang pinakamataas nga bahin sang European Court—nagdesisyon nga ang mga nagapangindi sa pagsoldado bangod supak sa ila konsiensia dapat sakdagon sang European Convention. Ini nga desisyon nagaobligar sa Armenia, pati na sa mga pungsod kaangay sang Azerbaijan kag Turkey, nga kilalahon ang pareho sini nga kinamatarong.

MGA PROYEKTO SA PAGPANUKOD

Ang masunod nga nagpamulongpulong amo si Guy Pierce sang Nagadumala nga Hubon. Nagsiling sia nga mahimo nalangkag gid ang tanan nga tumalambong sa mga proyekto sa pagpanukod sa New York State. May ginpagua sia nga video parte sa mga proyekto sa Wallkill, Patterson, kag sa mga propiedad nga ginbakal sining karon lang sa Warwick kag Tuxedo, New York. Sa Wallkill, ang bag-o nga bilding nga matapos sa 2014 may sobra 300 ka kuarto.

May mga plano man para sa 100 ka ektarya nga propiedad sa Warwick. “Bisan indi pa naton mapat-od kon ano gid ang kabubut-on ni Jehova sa Warwick,” siling ni Brother Pierce, “padayon namon nga ginahanda ang propiedad kay plano namon nga sayluhon didto ang ulong talatapan sang mga Saksi ni Jehova.” Ginaplano man nga ang 20 ektaryas nga duta, nga 10 kilometros sa aminhan sang Warwick, butangan sang mga makinarya kag mga materyales sa pagpatindog. “Kon mabaton na ang permiso, ginalauman namon nga matapos ang bug-os nga proyekto sa sulod sang apat ka tuig,” siling ni Brother Pierce. “Dayon, ang aton propiedad sa Brooklyn puede na ibaligya.”

“Nagbag-o bala ang pagpati sang Nagadumala nga Hubon nga malapit na ang dakung kapipit-an?” pamangkot ni Brother Pierce. “Wala gid,” siling niya. “Kon mag-abot ang dakung kapipit-an kag indi na madayon ang mga plano, wala kaso, mas maayo gani!”

MAG-ANDAM SA NAGANGUROB NGA LEON

Si Stephen Lett sang Nagadumala nga Hubon, nagbinagbinag sang 1 Pedro 5:8: “Hupti ang inyo kaligdong, mangin mabinantayon. Ang inyo kaaway, ang Yawa, nagaluyong subong sang nagangurob nga leon, nga nagapangita sing matukob.” Nagsiling si Brother Lett nga nagakaigo gid ang ilustrasyon ni Pedro kay may mga kinaiya ang Yawa nga pareho gid sa leon.

Bangod mas makusog kag madasig ang leon sangsa tawo, indi naton pagtinguhaan nga batuan ukon palagyuhan si Satanas sa aton kaugalingon nga ikasarang. Kinahanglan naton ang bulig ni Jehova. (Isa. 40:31) Ang leon nagasalakay sa iya biktima sing tago. Gani dapat likawan naton ang espirituwal nga kadulom kay dira nagapangita si Satanas sang iya biktimahon. Subong nga ginapatay sang leon ang usa ukon ang nagakatulog nga tinday nga zebra, si Satanas wala man sing kaluoy kag gusto niya kita patyon sa espirituwal. Kon mabusog na ang leon, masami nga indi na makilal-an ang iya biktima. Amo man sini  ang mga biktima ni Satanas. “Ang naulihi nila nga kahimtangan mangin mas malain sangsa nahauna.” (2 Ped. 2:20) Gani, dapat gid naton batuan si Satanas kag sundon ang mga prinsipio sa Biblia nga aton natun-an.—1 Ped. 5:9.

PABALORI ANG IMO DUOG SA BALAY NI JEHOVA

“Tanan kita may duog sa balay ni Jehova,” siling sang masunod nga humalambal nga si Samuel Herd sang Nagadumala nga Hubon. Ang tanan nga Cristiano may duog sa “balay” sang Dios ukon espirituwal nga templo, nga amo ang kahimusan sa pagsimba sa Dios base sa halad gawad ni Jesus. Isa ini ka duog nga dapat pabaloran subong hamili nga pribilehiyo. Kaangay ni David, handum naton nga “makapuyo . . . sa balay sang GINOO sa tanan nga adlaw sang [aton] kabuhi.”—Sal. 27:4.

Ginpatuhuyan ni Brother Herd ang Salmo 92:12-14 kag namangkot, “Paano kita ginapatubo ni Jehova?” Nagsabat sia: “Sa espirituwal nga paraiso, ginapainitan kita ni Jehova, ginaproteksionan, kag ginabunyagan sing makapaumpaw nga tubig sang kamatuoran. Pasalamatan naton sia sa sini.” Dayon, ginpalig-on niya ang mga tumalambong: “Dapat mangin kontento kita sa pagpabilin sa balay ni Jehova—indi lamang sa malip-ot nga tion kundi sa walay katubtuban.”

GINATAHOD SANG MGA CRISTIANO ANG PULONG SANG DIOS

Sa masunod nga pamulongpulong, ginpaathag ni David Splane sang Nagadumala nga Hubon, nga ginatahod pirme sang matuod nga mga Cristiano ang Pulong sang Dios. Sang unang siglo, nagsalig sila sa sini sa paghusay sang isyu parte sa pagtuli. (Binu. 15:16, 17) Pero ang pila ka nagapangangkon nga Cristiano sang ikaduha nga siglo nga nagtuon sang Griegong pilosopiya nagsalig sa ila kaugalingon nga kaalam imbes sa Kasulatan. Sang ulihi, sa baylo nga mga panudlo sang Biblia ang itudlo, gin-islan ini sang iban sang mga opinyon sang mga Amay sang Simbahan kag sang Romano nga mga emperador, gani naglapnag ang butig nga mga doktrina.

Nagsiling si Brother Splane nga sa isa ka ilustrasyon, ginpakita ni Jesus nga may ara pirme matuod nga hinaplas nga mga Cristiano sa duta agod pangapinan ang kamatuoran. (Mat. 13:24-30) Indi kita makapat-od kon sin-o gid sila. Pero sa sulod sang  mga siglo, madamo ang nagsikway sa di-Makasulatanhon nga mga pagpati kag paggawi. Ang pila sa ila amo sanday Arsobispo Agobard sang Lyons sang ika-9 nga siglo, Peter sang Bruys, Henry sang Lausanne, kag Valdès (ukon, Waldo) sang ika-12 nga siglo, John Wycliffe sang ika-14 nga siglo, William Tyndale sang ika-16 nga siglo, kag Henry Grew kag George Storrs sang ika-19 nga siglo. Sa karon, ang mga Saksi ni Jehova padayon nga nagasunod sa mga talaksan sang Kasulatan kag nagakilala sa Biblia subong ginhalinan sang kamatuoran. Gani, ginpili sang Nagadumala nga Hubon nga mangin yeartext sa 2012 ang Juan 17:17: “Ang imo pulong kamatuoran.”

MAKALILIPAY NGA MGA PAGBAG-O PARA SA PAGHANAS KAG PAG-ALAGAD

Ang pahibalo ni Anthony Morris sang Nagadumala nga Hubon nagapadaku sang mga pagbag-o para sa mga misyonero kag espesyal payunir. Sugod sa Septiembre 2012, hiwaton ang mga klase para sa Bible School for Christian Couples sa pila ka pungsod. May ginbag-o man sa Gilead. Sugod sang Oktubre 2011, ang mga hanason sa Gilead amo ang mga misyonero nga wala pa makaeskwela sa sini, mga espesyal payunir, mga nagalakbay nga manugtatap, ukon mga Bethelite. Ang mga naggradweyt gamiton sa pagpalig-on kag sa pagpabakod sa katawhan sang Dios sa sanga talatapan man, sa nagalakbay nga hilikuton, ukon sa mga lugar nga madamo sing tawo para palig-unon ang mga kongregasyon sa pagbantala.

Ang dugang nga espesyal payunir magasugod sa pagbantala sa malayo ukon naligwin nga mga teritoryo. Sugod sang Enero 1, 2012, ang pila ka naggradweyt sa Bible School for Single Brothers kag Bible School for Christian Couples iasayn subong temporaryo nga espesyal payunir para buksan kag pasangkaron ang pagbantala sa naligwin nga mga lugar. Mangin espesyal payunir sila anay sing isa tubtob tatlo ka tuig. Kon epektibo sila, mangin permanente ang ila asaynment.

Ang 2011 nga annual meeting makalilipay gid. Nagasalig kita kay Jehova nga pakamaayuhon niya ang bag-o nga mga kahimusan agod mag-uswag ang pagbantala kag mahiusa sing labi pa ang aton paghiliutod. Ini tanan para sa iya kahimayaan kag kadayawan.

[Kahon/Mga Retrato sa pahina 18, 19]

PAGKILALA SA ILA SING LABI PA

Ang programa nagalakip man sang interbyu sa lima ka nabalo nga asawa sang mga miembro sang Nagadumala nga Hubon. Ginsugid nanday Marina Sydlik, Edith Suiter, Melita Jaracz, Melba Barry, kag Sydney Barber kon paano sila nakatuon sang kamatuoran kag nakasulod sa bug-os tion nga pag-alagad. Ginsaysay nila ang mga tinion nga kaupod pa nila ang ila bana kag ang mga pagpakamaayo nga ila natigayon. Makatalandog gid ang konklusion sini nga mga interbyu sang gin-amba ang ambahanon 86 nga natig-uluhan “Matutom nga mga Cristianong Babayi.”

[Mga Retrato

(Ibabaw) Sanday Daniel kag Marina Sydlik; Grant kag Edith Suiter; Theodore kag Melita Jaracz

(Ubos) Sanday Lloyd kag Melba Barry; Carey kag Sydney Barber

[Mapa sa pahina 16]

(Para sa aktual nga pormat, tan-awa ang publikasyon)

Anom ka sanga nga gintingob para dumalahan sang sanga sa Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Retrato sa pahina 17]

Ginaplano nga desinyo sang ulong talatapan sang mga Saksi ni Jehova sa Warwick, New York