WATCH Tower Bible and Tract Society of Pennsylvania edia lagani ena hebou be moale negadia. Saturday October 1, 2011 ai, hebou namba 127 idia karaia. Tanobada hegegemadai tadikaka taihu haida idia boiria, bona Jersey City ena Assembly Hall, New Jersey, U.S.A. ai idia hebou.

Gerrit Lösch, Hakaua Oreana ena memba ta ese tano 85 amo idia mai taudia ia welkam henidia. Ia hamaorodia, idia be tanobada hegegemadai lalotamona ai ia noho ruma bese badana ena kahana. Orea ma ta be unai bamona lasi. Edia lalotamona karana ese Iehova ena ladana ia hanamoa. Unai hebou ai lalotamona karana idia herevalaia momo.

MEXICO ENA RIPOTI NAMONA

Program matamanai Iehova ena taunimanima edia lalotamona karana idia herevalaia. Hari, Mexico ena brens ofesi ese Central America tanodia 6 ia naria. Baltasar Perla, Mexico brens ofesi amo, ese Mexico ena Betele famili taudia toi ia intaviu henia, bona ia nanadaidia unai senisi dainai idia vara gaudia do idia herevalaia. Idia gwau, hari Mexico ena Betele famili taudia be tano, gado bona kastom idauidau amo idia mai, bona edia hebamo karana amo ta ta idia hagoadaia. Dirava ese edia tano ena hetoana ia kokia bamona.

Unai senisi murinai, unai tano 6 ai idia noho kongrigeisen bona grup maragidia ta ta be e-mail amo Mexico brens tadikaka idia hereva henidia diba. Ena be edia brens ofesi idia koua, to idia be Iehova ena orea ida idia gaukara hebou noho.

JAPAN ENA SIVARAI

James Linton, Japan brens amo be March 2011 ai, Japan ai ia vara tano mareremarere bona sunami ia herevalaia. Tadikaka taihu momo edia lalokau taudia bona kohu ibounai idia haboioa. Tadikaka ese dika idia davaria taudia totona noho gabuna idia tahua, bona edia motuka idia henia dika idia davaria taudia ese idia gaukaralaia totona. Regional Building Committee ese ia siaia volantia taudia be dina bona hanuaboi idia gaukara, eda tadikaka taihu edia ruma idia hanamoa totona. Taunimanima ibounai 1,700 mai kahana be volantia gaukara idia karaia. Kingdom Hall haginia lou totona idia siaia volantia taudia ibounai be 575, bona United States amo grup ta ia lao danu.

Tadikaka idia gaukara goada lalometau taudia idia hagoadaia totona. Elda taudia 400 bamona be lalometau taudia idia vadivadi henia. Hakaua Oreana ese soun naria taudia rua ia siaia disasta gabudiai, tadikaka idia hagoadaia totona. Danu, tanobada hegegemadai Witnes taudia edia hebogahisi karana ese dika idia davaria taudia ia hagoadaia bada.

KOTA AI ITA KWALIMU

Gabeai, helai taudia be mai ura bada ida Stephen Hardy, Britain brens amo bona tadikaka ma haida edia hereva idia kamonai namonamo. Idia be vanegai kota dekenai ita kwalimu sivaraidia haida idia herevalaia. Hegeregere, French gavamani ia ura Iehova ena Witnes taudia be takisi moni $82 milioni  (U.S.) do idia henia. To, European Court of Human Rights (ECHR) ia gwau, unai be maoro lasi. Kota be ena hahemaoro herevana dekenai ia gwau, ia abia dae Iehova ena Witnes taudia be takisi monina henia karana idia dadaraia lasi. Bona ia gwau, French gavamani be European Convention ena Article 9 taravatuna ia utua. Unai taravatu ese ia hahedinaraia ta be mai ena maoro ena tomadiho ia abia hidi totona. To, French gavamani ia abia dae lasi Iehova ena Witnes taudia be tomadiho oreana ta. Ia ura edia orea ia hadikaia, edia gaukara ia taravatua, bona ia gwauraidia dika.

Danu, ECHR ese Armenia ai idia noho Iehova ena Witnes taudia totona, hahemaoro hereva namona ia henia. Lagani 1965 amo ECHR ia laloa European Convention be siahu lasi, ta dekenai gwaumaoro do ia henia ami dekenai ia vareai lasi totona. To, ECHR ena Grand Chamber ia gwau, bema ta be ena tomadiho dainai ia ura lasi ami dekenai ia vareai, European Convention be unai tauna dekenai gwaumaoro ia henia diba. Kota ena hahemaoro herevana dainai, Armenia, Azerbaijan bona Turkey gavamani ese ta ena tomadiho dainai ia ura lasi ami dekenai ia vareai neganai, unai idia matauraia be namo.

KONSTRAKSEN GAUKARA

Unai murinai, Guy Pierce, Hakaua Oreana ena memba ta, ese helai taudia dekenai New York State ai idia karaia konstraksen gaukara ia herevalaia. Bona vidio ta amo Wallkill, Patterson ai idia karaia gaudia, bona Warwick bona Tuxedo, New York ai idia hoia tano matamata ia hahedinaraia. Edia palani be Wallkill ai Betele taudia edia noho rumana ta do idia haginia, bona ena daiutu be 300 bamona, bona reana lagani 2014 ai do idia haorea.

Warwick ai idia hoia tano ena bada be 100 hekta bona palani idia karaia, unuseniai ruma matamatadia haida idia haginia totona. Tadikaka Pierce ia gwau: “Ena be Warwick totona Iehova ena palani ai do diba lasi, to unai tano ai hegaegaelaia badina ai ura Iehova ena Witnes taudia edia hedikwota be unuseni ai abia lao.” Danu, palani idia karaia konstraksen gaukara totona, masini bona ruma ena kohu idauidau, be Sosaiti ena tano (20 hekta) ma ta, Warwick kahirakahira dekenai do idia haboua. Tadikaka Pierce ia gwau: “Gwaumaoro ai abia murinai, ruma do ai haginia matamaia bona ai laloa lagani toi o foa bamona lalonai do ai haorea. Unai murinai Brooklyn ena ofesi do ai hoihoilaia.”

Tadikaka Pierce ia henanadai: “Hakaua Oreana ia laloa hisihisi badana be ia kahirakahira lasi, a? Lasi. Bema hisihisi badana ia mai bona emai palani ia haidaua, unai be namo herea!”

LAIONA DAINAI NARIA NAMONAMO

Stephen Lett, Hakaua Oreana ena memba ta be, 1 Petero 5:8 ia herevalaia. Unai siri ia gwau: “Do umui laloa maoromaoro bona do umui gima noho. Emui inai tauna, Diabolo, be ia boiboi bada laiona bamona ia raka loaloa, do ia ania ore tauna ia tahua noho.” Tadikaka Lett ia gwau, laiona ena kara ita diba neganai, Petero ese ia herevalaia haheitalai do ita lalopararalaia namonamo.

Laiona be ia heau haraga bona ena goada ese taunimanima edia goada ia hanaia. Unai hegeregerena, Satani danu be mai ena goada, bona ita sibona ese ita heatu henia be hegeregere lasi, o ia amo ita heau mauri be hegeregere lasi. Iehova ena heduru ita abia be namo. (Isa. 40:31) Nega momo laiona be hanuaboi ai ena vamu ia tahua, unai amo ia do idia itaia lasi. Bema ita ura lasi Satani ese ita ia ania, namona be iena koikoi karadia ita diba bona lalopararalaidia. Laiona ese dia bona ia mahuta sebra maragina ia alaia hegeregerena, Satani be ita dekenai ia hebogahisi lasi to ia ura ita ia alaia. Laiona be vamu ia ania neganai, ia darea patapata dainai ena toana  be ia dika momokani, guna bamona lasi. Unai hegeregerena, Keristani tauna ta be Satani ese ia hamorua neganai, ‘ena noho dalana be ia dika momokani, guna bamona lasi.’ (2 Pet. 2:20) Unai dainai, hanaihanai Baibel ena hereva ita badinaia be namo, unai amo Satani ita tuari henia diba.​—⁠1 Pet. 5:9.

IEHOVA ENA RUMA AI OI NOHO DAINAI OI MOALE

Unai murinai, Samuel Herd, Hakaua Oreana ena memba ta ese tok ta ia henia. Ia gwau: “Ita ibounai be mai eda gabu Iehova ena ruma ai.” Anina be Iesu ena boubou gauna idia abidadama henia Keristani taudia be Iehova ese edia tomadiho karana do ia abia dae. Namona be ita ibounai ita moale, badina ita be mai eda gabu Iehova ena ruma ai. Davida ia ura “Lohiabada ena Dubu lalonai do [ia] noho” ena mauri dinadia ibounai. Davida bamona, ita danu ita ura eda mauri ibounai lalonai Iehova ita tomadiho henia.​—⁠Sal. 27:4.

Tadikaka Herd be Salamo 92:12-14 ia herevalaia, bona ia hahedinaraia Iehova ese ena taunimanima ia durua edia mauri lalonai idia kwalimu totona. Ia gwau: “Iehova ena orea lalonai ita noho be paradaiso bamona. Ia ese ita ia laloa bada, ia gimaia bona hereva momokani ena ranu be ita dekenai ia henia. Unai dainai Iehova ita tanikiu henia be namo. Namona be ita ura Iehova ena ruma dekenai nega kwadogi sibona ita noho lasi, to do ita noho ela bona hanaihanai.”

KERISTANI KORIKORIDIA BE BAIBEL IDIA MATAURAIA

David Splane, Hakaua Oreana ena memba ta ese tok ma ta ia henia. Ia hahedinaraia Keristani korikoridia be hanaihanai Baibel idia matauraia. Hegeregere, aposetolo edia negai, Keristani taudia be Baibel idia gaukaralaia kopina utua hepapahuahu idia hamaoromaoroa totona. (Kara 15:16, 17) To lagani 100-200 C.E. lalodiai, sibona idia gwauraia Keristani taudia haida ese Greek taudia edia hahediba hereva idia abia dae, bona Baibel ena hereva idia matauraia lasi. Gabeai, haida be Dubu Ena Tamana Taudia bona Roma pavapavadia edia lalohadai idia hadibaia, to Baibel ena hereva idia dadaraia. Hahediba hereva koikoidia be unai dala amo idia matamaia.

Danu, tadikaka Splane ese Iesu ena haheitalai ta ia herevalaia. Unai haheitalai ese ia hahedinaraia aposetolo edia nega amo, tanobada ai idia noho horoa  Keristani taudia be hanaihanai hereva momokani idia gimaia. (Mat. 13:24-30) Ita diba lasi idia be daidia. To lagani momo lalodiai, idia ese tomadiho koikoi edia hahediba herevadia idia dadaraia. Unai taudia haida be Lyons ena Bisop Badana Agobard, (779 C.E.-840 C.E.), Bruys tauna Peter, Lausanne tauna Henry, bona Valdès (o Waldo) 1100 C.E. ai idia noho, John Wycliffe (1330-1384), William Tyndale (1494-1536), Henry Grew (1781-1862), bona George Storrs (1796-1879). Hari, Iehova ena Witnes taudia be Baibel idia badinaia noho, bona edia hahediba herevadia ibounai be Baibel amo. Unai dainai, Hakaua Oreana ese Ioane 17:17 ia abia hidi lagani 2012 ena siri badana. Ia gwau: “Oiemu hereva be momokani.”

SIKULI HAIDA IDIA HAIDAUA

Anthony Morris, Hakaua Oreana ena memba ta ese misinari bona spesel painia taudia edia gaukara dekenai, idia haidaua gaudia haida ia herevalaia. September 2012 ai, Keristani Headava Taudia Edia Baibel Sikuli be tano ma haida dekenai do idia karaia matamaia. Lagani 2011, October ai, Gilead Sikuli idia haidaua. Hari, Gilead Sikuli idia lao taudia ibounai be spesel ful-taim hesiai taudia. Hegeregere, Gilead Sikuli dekenai idia do lao lasi misinari, spesel painia, loaloa naria bona Betele taudia. Gilead Sikuli idia haorea murinai, idia be brens ofesi ai idia gaukara, sekit gaukara idia karaia o siti badadia edia kongrigeisen dekenai idia siaidia. Unuseniai, idia bamoa tadikaka taihu idia hagoadaia, hadibaia bona durua.

Hebou ai idia gwau, January 1, 2012 ai Singul Tadikaka Edia Baibel Sikuli bona Keristani Headava Taudia Edia Baibel Sikuli idia haorea taudia, be nega sisina lalonai pablisa momo lasi o pablisa be lasi gabudia ai spesel painia gaukara do idia karaia. Idia be lagani ta lalonai spesel painia gaukara do idia karaia. Bena lagani toi murinai, idia gaukara namonamo taudia be do idia abia hidi spesel painia gaukara idia karaia noho totona.

Lagani 2011 ena lagani hebouna be moale negana. Oibe, tanobada hegegemadai Dirava ena orea ia gaukara goada haroro gaukara ia habadaia bona ita ibounai ia hatamonaia totona. Namona be Iehova ita noia eda gaukara do ia hanamoa, unai amo ena ladana do ia abia isi bona hanamoa.

[Box/Pictures on page 18, 19]

IDIA DO ITA DIBAIA NAMONAMO

Program lalonai vabu faiv, idia intaviu henidia. Idia be idia mase vadaeni Hakaua Oreana taudia faiv edia adavadia. Idia be taihu Marina Sydlik, Edith Suiter, Melita Jaracz, Melba Barry, bona Sydney Barber. Idia ta ta ese hereva momokani idia dibaia bona ful-taim hesiai gaukara idia hamatamaia negana idia herevalaia. Bona idia ta ta ese edia memori namodia, edia adavadia edia kara namodia, bona edia adavadia ida Iehova ena hesiai gaukara lalonai idia karaia hebou gau namodia idia herevalaia. Unai murinai, hebou taudia ibounai ese ane namba 86 ladana, “Abidadama Keristani Taihudia” idia abia.

[Pictures]

(Ataiai) Daniel bona Marina Sydlik; Grant bona Edith Suiter; Theodore bona Melita Jaracz

(Henunai) Lloyd bona Melba Barry; Carey bona Sydney Barber

[Map on page 16]

Mexico brens ofesi ese Central America tanodia 6 ia naria

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Picture on page 17]

Warwick, New York ai do idia haginia Iehova ena Witnes taudia edia hedikwota ena laulau