កិច្ចប្រជុំមួយដែលលើកបញ្ជាក់អំពីសាមគ្គីភាពនិងគម្រោងគួរឲ្យរំភើបចិត្ដ
របាយការណ៍អំពីកិច្ចប្រជុំប្រចាំឆ្នាំ
កិច្ចប្រជុំមួយដែលលើកបញ្ជាក់អំពីសាមគ្គីភាពនិងគម្រោងគួរឲ្យរំភើបចិត្ត
កិច្ចប្រជុំប្រចាំឆ្នាំនៃសមាគមប៉មយាមខាងគម្ពីរនិងខិត្តប័ណ្ណនៃរដ្ឋប៉ិនស៊ីវ៉ានី ជាឱកាសដែលធ្វើឲ្យរំភើបចិត្តជានិច្ច។ កិច្ចប្រជុំប្រចាំឆ្នាំលើកទី១២៧ដែលប្រារព្ធឡើងនៅថ្ងៃសៅរ៍ ទី១ ខែតុលា ឆ្នាំ២០១១ ពិតជាធ្វើឲ្យរំភើបចិត្តមែន! ភ្ញៀវដែលបានត្រូវអញ្ជើញពីជុំវិញពិភពលោកបានមកជួបជុំគ្នានៅសាលសន្និបាតរបស់សាក្សីព្រះយេហូវ៉ានៅក្រុងជើហ្ស៊ី រដ្ឋនូជើហ្ស៊ី សហរដ្ឋអាម៉េរិក។
បងប្រុសហ្គារីត ឡឹសជាសមាជិកគណៈអភិបាលបានស្វាគមន៍បងប្អូនរួមជំនឿដែលមានចិត្តសប្បាយ។ គាត់បានប្រាប់បងប្អូនដែលជាតំណាងមកពីប្រទេសប្រហែលជា៨៥ថា ពួកគាត់ជាផ្នែកមួយនៃក្រុមគ្រួសារអន្តរជាតិដែលមានសាមគ្គីភាពជាងបណ្ដាជនឯទៀតលើពិភពលោក។ សាមគ្គីភាពដូចនេះជាសាក្សីបញ្ជាក់យ៉ាងប្រសើរ ហើយលើកតម្កើងព្រះយេហូវ៉ា។ មែនហើយ សាមគ្គីភាពជាប្រធានបទដែលគេនិយាយជាច្រើនដងក្នុងអំឡុងកិច្ចប្រជុំនេះ។
របាយការណ៍ដ៏ល្អពីប្រទេសម៉ិចស៊ិច
ផ្នែកទី១នៃកម្មវិធីបានលើកឡើងនូវគំរូស្តីអំពីសាមគ្គីភាពនៃរាស្ត្ររបស់ព្រះយេហូវ៉ា។ បងប្រុសបាល់ថាសា ផឺឡា បានសម្ភាសបងប្អូនបីនាក់ដែលជាសមាជិកក្រុមគ្រួសារបេតអែលនៃប្រទេសម៉ិចស៊ិចស្តីអំពីការបញ្ចូលការិយាល័យសាខា៦នៅទ្វីបអាម៉េរិកភាគកណ្ដាលជាមួយការិយាល័យសាខារបស់ប្រទេសម៉ិចស៊ិច។ ដោយសារការបញ្ចូលគ្នានេះ ក្រុមគ្រួសារបេតអែលនៅប្រទេសម៉ិចស៊ិចបានក្លាយទៅជាក្រុមគ្រួសារអន្តរជាតិដែលមានវប្បធម៌ខុសៗគ្នា។ ការមកដល់នៃបងប្អូនរួមជំនឿពីប្រទេសផ្សេងៗបាននាំឲ្យមានការលើកទឹកចិត្តគ្នាទៅវិញទៅមក។ នេះហាក់ដូចជាព្រះបានបំបាត់ចោលការបែងចែកជាតិសាសន៍។
ការបញ្ចូលគ្នានេះមានការពិបាកមួយគឺការជួយអ្នកផ្សព្វផ្សាយឲ្យមានអារម្មណ៍ថាពួកគេមិនដាច់ឆ្ងាយពីអង្គការព្រះយេហូវ៉ាទេ ទោះជាការិយាល័យសាខានៅប្រទេសរបស់ពួកគេលែងដំណើរការទៀតក៏ដោយ។ ដើម្បីសម្រេចគោលដៅនេះ ក្រុមជំនុំនីមួយៗមានអ៊ីមែលដែលមានសុវត្ថិភាព ដើម្បីឲ្យក្រុមជំនុំដែលនៅតំបន់ដាច់ស្រយាលអាចទាក់ទងដោយផ្ទាល់ជាមួយការិយាល័យសាខា។
ដំណឹងថ្មីៗពីប្រទេសជប៉ុន
បងប្រុសជេម លីនថឹនមកពីការិយាល័យសាខាប្រទេសជប៉ុនបានពន្យល់ថាការរញ្ជួយដីនិងរលកយក្សស៊ូណាមីដែលបានបំផ្លាញប្រទេសនោះនៅខែមីនា ឆ្នាំ២០១១ បានប៉ះពាល់យ៉ាងណាដល់បងប្អូនរបស់យើង។ សាក្សីព្រះយេហូវ៉ាជាច្រើននាក់បានបាត់បង់មនុស្សជាទីស្រឡាញ់និងទ្រព្យសម្បត្ដិរបស់ពួកគាត់។ សាក្សីព្រះយេហូវ៉ាដែលនៅក្រៅតំបន់រងគ្រោះបានផ្ដល់ផ្ទះជាង៣.១០០ខ្នងឲ្យបងប្អូនដែលរងគ្រោះស្នាក់នៅ ហើយបានផ្ដល់យានជំនិះជាច្រើនរយគ្រឿងដល់ពួកគាត់។ បងប្អូនស្ម័គ្រចិត្តជាច្រើននាក់ដែលគណៈកម្មាធិការខាងការសាងសង់តាមភូមិភាគបានចាត់ឲ្យមក បានធ្វើការឥតឈប់ឈរដើម្បីជួសជុលផ្ទះរបស់បងប្អូន។ មានបងប្អូនជាង១.៧០០នាក់បានស្ម័គ្រចិត្តបម្រើនៅកន្លែងណាដែលមានសេចក្ដីត្រូវការ។ បងប្អូនស្ម័គ្រចិត្តមួយក្រុមដែលមកពីសហរដ្ឋអាម៉េរិកបានជួយជួសជុលសាលប្រជុំ ហើយបងប្អូនស្ម័គ្រចិត្តដែលធ្វើកិច្ចការនេះសរុបទាំងអស់មានចំនួន៥៧៥នាក់។
បងប្អូនបានយកចិត្តទុកដាក់យ៉ាងខ្លាំងក្នុងការសម្រាលទុក្ខនិងការពង្រឹងជំនឿបងប្អូនដែលរងគ្រោះ។ អ្នកចាស់ទុំជាង៤០០នាក់បានទៅសួរសុខទុក្ខបងប្អូនដែលរងគ្រោះ។ គណៈអភិបាលបង្ហាញការយកចិត្តទុកដាក់ដោយចាត់អ្នកត្រួតពិនិត្យការិយាល័យសាខាពីរនាក់ពីមន្ទីរចាត់ការពិភពលោកឲ្យធ្វើដំណើរទៅតំបន់ដែលមានមហន្តរាយដើម្បីផ្ដល់ការលើកទឹកចិត្ត។ ការយកចិត្តទុកដាក់ពីសាក្សីព្រះយេហូវ៉ានៅទូទាំងផែនដីបានសម្រាលទុក្ខបងប្អូនយ៉ាងខ្លាំង។
ជ័យជម្នះខាងច្បាប់
អ្នកស្ដាប់បានស្ដាប់យ៉ាងជក់ចិត្តពេលបងប្រុសស្ទេវិន ហាឌី ពីការិយាល័យសាខាប្រទេសអង់គ្លេសបានដឹកនាំការពិភាក្សាអំពីជ័យជម្នះថ្មីៗខាងច្បាប់។ ជាឧទាហរណ៍ រដ្ឋាភិបាលបារាំងបានទាមទារឲ្យសមាគមយើងនៅប្រទេសបារាំងបង់ពន្ធចំនួន៨២លានដុល្លារអាម៉េរិក។ បញ្ហានេះបានត្រូវដោះស្រាយពេលដែលតុលាការសិទ្ធិមនុស្សនៅទ្វីបអឺរ៉ុបបានកាត់ក្ដីឲ្យអង្គការយើងឈ្នះ ដោយប្រកាសថារដ្ឋាភិបាលបារាំងបានបំពានមាត្រាទី៩នៃអនុសញ្ញាទ្វីបអឺរ៉ុបដែលការពារសេរីភាពខាងសាសនា។ ពាក្យដែលគេប្រើក្នុងសេចក្ដីសម្រេចនោះបង្ហាញថារឿងក្ដីនេះមិនទាក់នឹងលុយកាក់ទេ ពីព្រោះសេចក្ដីសម្រេចនោះចែងថា៖ «ការបដិសេធមិនទទួលស្គាល់អង្គការសាសនាមួយ ការបណ្ដាលឲ្យអង្គការនោះត្រូវរំលាយ និងការប្រើពាក្យមើលងាយចំពោះអង្គការសាសនាមួយជាគំរូនៃការរំលោភសិទ្ធិដែលបានត្រូវធានាដោយមាត្រាទី៩នៃអនុសញ្ញានោះ»។
តុលាការសិទ្ធិមនុស្សនៅទ្វីបអឺរ៉ុបក៏បានកាត់ក្ដីឲ្យអង្គការរបស់យើងឈ្នះក្នុងរឿងក្ដីដែលទាក់ទងនឹងប្រទេសអាមេនីដែរ។ តាំងពីឆ្នាំ១៩៦៥ តុលាការសិទ្ធិមនុស្សនៅទ្វីបអឺរ៉ុបជឿថាអនុសញ្ញាទ្វីបអឺរ៉ុបមិនឲ្យបុគ្គលម្នាក់ៗរួចផុតពីកាតព្វកិច្ចយោធាទេ។ សភាជាន់ខ្ពស់ដែលមានអំណាចជាងគេនៅក្នុងតុលាការទ្វីបអឺរ៉ុបបានកាត់ក្ដីថា អនុសញ្ញាទ្វីបអឺរ៉ុបគួរធានាសិទ្ធិ«បដិសេធកាតព្វកិច្ចយោធាដោយសារចិត្តឬសមត្ថភាពវិនិច្ឆ័យរបស់បុគ្គលនោះប្រាប់ថាការធ្វើដូច្នេះគឺជាការខុសយ៉ាងធ្ងន់ធ្ងរ»។ ការសម្រេចនេះបង្គាប់ឲ្យប្រទេសអាមេនីនិងប្រទេសដូចជាអាស៊ែបៃសាននិងប្រទេសទួរគីទទួលស្គាល់សិទ្ធិបដិសេធកាតព្វកិច្ចយោធា។
គម្រោងសាងសង់
បងប្រុសហ្គាយ ភាសជាសមាជិកគណៈអភិបាលបានថ្លែងបន្ទាប់ ហើយទទួលស្គាល់ថាបងប្អូនទាំងអស់ដែលមានវត្តមាននៅកិច្ចប្រជុំចង់ដឹងអំពីគម្រោងសាងសង់របស់យើងនៅរដ្ឋញូវយ៉ក។ គាត់បានបញ្ចាំងវីដេអូដែលបង្ហាញអំពីដំណើរការនៅក្រុងវ៉លឃីល ផាតឺសិននិងដីដែលទើបនឹងបានទិញថ្មីៗនេះនៅក្រុងវ័រវិក និងនៅធូហ្សីដូ រដ្ឋញូវយ៉ក។ នៅក្រុងវ៉លឃីល កន្លែងស្នាក់នៅថ្មីមួយដែលត្រូវបង្ហើយនៅឆ្នាំ២០១៤ នឹងផ្ដល់ជាង៣០០បន្ទប់បន្ថែមទៀត។
មានគម្រោងដើម្បីសាងសង់អគារថ្មីនៅលើដី២៤៨អេឃឺ (១០០ហិចតា) នៅក្រុងវ័រវិក។ បងប្រុសហ្គាយ ភាសបាននិយាយថា៖ «ទោះជាយើងមិនដឹងច្បាស់អំពីបំណងប្រាថ្នារបស់ព្រះយេហូវ៉ានៅក្រុងវ័រវិក យើងត្រៀមលក្ខណៈដើម្បីចាប់ផ្ដើមសាងសង់នៅលើដីនោះដោយមានបំណងរើមន្ទីរចាត់ការពិភពលោករបស់សាក្សីព្រះយេហូវ៉ាទៅទីនោះ»។ ម្យ៉ាងទៀត យើងមានគម្រោងប្រើដី៥០អេឃឺ (២០ហិចតា) ដែលស្ថិតនៅចម្ងាយ៦អេឃឺ (១០គីឡូម៉ែត្រ) ខាងជើងក្រុងវ័រវិកដើម្បីទុកម៉ាស៊ីនផ្សេងៗនិងសម្ភារសម្រាប់សាងសង់។ បងប្រុសភាសបាននិយាយថា៖ «យើងនឹងចាប់ផ្ដើមការសាងសង់ភ្លាមៗពេលយើងទទួលការអនុញ្ញាត យើងសង្ឃឹមថានឹងបញ្ចប់គម្រោងទាំងមូលនេះក្នុងរយៈពេលបួនឆ្នាំ បន្ទាប់មកយើងអាចលក់ដីនិងអគាររបស់យើងនៅក្រុងប៊្រុគ្លីន»។
បងប្រុសភាសបានសួរថា៖ «តើគណៈអភិបាលលែងគិតថាគ្រាវេទនាជាខ្លាំងជិតមកដល់ហើយឬ?»។ គាត់បានឆ្លើយថា៖ «មិនមែនទេ ប្រសិនបើគ្រាវេទនាជាខ្លាំងបង្អាក់គម្រោងសាងសង់របស់យើងនោះគឺល្អណាស់ គឺពិតជាល្អណាស់!»។
ចូរប្រុងប្រយ័ត្ននឹងតោដែលកំពុងគ្រហឹម
បន្ទាប់មកបងប្រុសស្ទេផាន ឡេតដែលជាសមាជិកគណៈអភិបាលម្នាក់ទៀត បានពន្យល់អំពីពេត្រុសទី១ ៥:៨ថា៖ «ចូរដឹងខ្លួនជានិច្ច ហើយប្រុងប្រយ័ត្នចុះ។ មេកំណាចដែលជាសត្រូវរបស់អ្នករាល់គ្នា ដើរក្រវែលដូចតោដែលកំពុងគ្រហឹមរកលេបត្របាក់អ្នកណាម្នាក់»។ បងប្រុសឡេតបានពោលថាលក្ខណៈមួយចំនួនរបស់សត្វតោដែលពេត្រុសបានលើកឡើងជាការពណ៌នាមួយដ៏សមត្រឹមត្រូវអំពីមេកំណាច។
ដោយសារសត្វតោគឺខ្លាំងនិងរហ័សជាងមនុស្ស នោះយើងមិនគួរខំប្រឹងតយុទ្ធឬខំគេចពីសាថានដោយពឹងលើកម្លាំងរបស់យើងផ្ទាល់នោះទេ។ យើងត្រូវការជំនួយពីព្រះយេហូវ៉ា។ (អេ. ៤០:៣១) សត្វតោច្រើនតែលបចាប់សត្វនៅពេលយប់ ដូច្នេះយើងត្រូវជៀសវាងមិននៅដាច់ឆ្ងាយពីអង្គការព្រះយេហូវ៉ាដែលហាក់ដូចជាស្ថិតក្នុងភាពងងឹត។ ដូចសត្វតោសម្លាប់សត្វស្លូត ដូចជាសត្វឈ្លូសម្យ៉ាងឬកូនសេះបង្កង់ដែលកំពុងដេកលក់ ដូច្នេះសាថានគឺគ្មានមេត្ដា ហើយចង់សម្លាប់យើង។ បន្ទាប់ពីសត្វតោបានស៊ីឆ្អែត សត្វដែលជាចំណីរបស់វាច្រើនតែបាត់បង់សភាពដើម ដូចគ្នានឹង«ស្ថានភាពចុងក្រោយ»នៃអ្នកដែលក្លាយជាចំណីរបស់សាថាន«គឺអាក្រក់ជាងស្ថានភាពដំបូង»។ (២ពេ. ២:២០) ដូច្នេះ យើងត្រូវតែតតាំងនឹងសាថានហើយកាន់ខ្ជាប់តាមគោលការណ៍គម្ពីរដែលយើងបានរៀន។—១ពេ. ៥:៩
ចូរមានចិត្តដឹងគុណចំពោះភារកិច្ចរបស់អ្នកក្នុងអង្គការរបស់ព្រះយេហូវ៉ា
អ្នកថ្លែងបន្ទាប់គឺបងប្រុសសាំយ៉ូអែល ហឺដដែលជាសមាជិកគណៈអភិបាល គាត់បានមានប្រសាសន៍ថា៖ «យើងទាំងអស់គ្នាមានភារកិច្ចក្នុងអង្គការរបស់ព្រះយេហូវ៉ា»។ គ្រិស្តសាសនិកទាំងអស់មានភារកិច្ចក្នុង«ដំណាក់»ឬអង្គការរបស់ព្រះ ពោលគឺវិហារក្នុងន័យធៀបដែលជាការរៀបចំដើម្បីគោរពប្រណិប័តន៍លោកដោយផ្អែកលើគ្រឿងបូជាលោះរបស់លោកយេស៊ូ។ នេះជាភារកិច្ចដែលយើងត្រូវចាត់ទុកថាជាឯកសិទ្ធិដ៏មានតម្លៃមួយ។ ដូចដាវីឌ យើងចង់«នៅក្នុងដំណាក់នៃព្រះយេហូវ៉ា រាល់តែថ្ងៃអស់១ជីវិត[យើង]»។—ទំនុក. ២៧:៤
បងប្រុសហឺដបាននិយាយអំពីទំនុកតម្កើង ៩២:១២-១៤ ហើយបានសួរថា៖ «តើតាមរបៀបណាដែលព្រះយេហូវ៉ាជួយយើងឲ្យរីកចម្រើន?»។ គាត់បានឆ្លើយថា៖ «ក្នុងស្ថានភាពមួយដែលប្រៀបដូចជាសួនឧទ្យាន ព្រះផ្ដល់ភាពកក់ក្ដៅដល់យើង ហើយការពារយើង ព្រមទាំងផ្ដល់សេចក្ដីបង្រៀនជាច្រើនដែលប្រៀបដូចជាទឹកស្អាតបរិសុទ្ធ»។ បងប្រុសហឺដបានដាស់តឿនអ្នកស្ដាប់ថា៖ «ចូរយើងអរគុណលោកចំពោះអ្វីៗទាំងនេះ។ ចូរយើងពេញចិត្តនៅក្នុងអង្គការរបស់ព្រះយេហូវ៉ា មិនគ្រាន់តែសម្រាប់មួយរយៈពេលខ្លីប៉ុណ្ណោះទេ ប៉ុន្តែជារៀងរហូត»។
គ្រិស្តសាសនិកគោរពបណ្ដាំរបស់ព្រះ
បងប្រុសដាវីឌ សិផ្លេនដែលជាសមាជិកគណៈអភិបាលដែរ បានពន្យល់នៅសុន្ទរកថាបន្ទាប់ថាគ្រិស្តសាសនិកពិតតែងតែគោរពបណ្ដាំរបស់ព្រះ។ នៅសតវត្សរ៍ទី១ គ្រិស្តសាសនិកពិតបានផ្អែកលើបណ្ដាំរបស់ព្រះដើម្បីដោះស្រាយបញ្ហាស្តីអំពីការកាត់ចុងស្បែក។ (សកម្ម. ១៥:១៦, ១៧) ប៉ុន្តែ នៅសតវត្សរ៍ទី២ អ្នកខ្លះដែលអះអាងថាខ្លួនជាគ្រិស្តសាសនិកដែលបានទទួលការបង្ហាត់បង្រៀនតាមទស្សនវិជ្ជាក្រិច បានចាប់ផ្ដើមចាត់ទុកទស្សនវិជ្ជានេះថាសំខាន់ជាងបទគម្ពីរទៅទៀត។ ក្រោយមក អ្នកខ្លះទៀតបានយកគំនិតរបស់ពួកអ្នកដែលហៅថាមេដឹកនាំសាសនានិងអធិរាជរ៉ូម មកជំនួសសេចក្ដីបង្រៀនក្នុងគម្ពីរវិញ។ អាស្រ័យហេតុនេះ សេចក្ដីបង្រៀនក្លែងក្លាយជាច្រើនបានកើតឡើង។
បងប្រុសសិផ្លេនបានដៅបញ្ជាក់ថានៅឧទាហរណ៍មួយរបស់លោកយេស៊ូ លោកបានបញ្ជាក់ថានឹងតែងតែមានគ្រិស្តសាសនិកដែលបានត្រូវរើសតាំងពិតប្រាកដលើផែនដីដើម្បីការពារសេចក្ដីពិត។ (ម៉ាថ. ១៣:២៤-៣០) យើងមិនអាចដឹងប្រាកដថាអ្នកណាជាគ្រិស្តសាសនិកដែលបានត្រូវរើសតាំងពិតប្រាកដទេ។ ក៏ប៉ុន្តែ អស់ជាច្រើនសតវត្សរ៍មកហើយ មានមនុស្សជាច្រើនបានបកអាក្រាតជំនឿនិងការប្រព្រឹត្តដែលមិនសមស្របនឹងបទគម្ពីរ។ ក្នុងចំណោមពួកគេទាំងនោះ មានអភិបាលជាន់ខ្ពស់អាហ្គោបាដនៃក្រុងលីយ៉ុង នៅសតវត្សរ៍ទី៩ ភីធើដែលមកពីតំបន់ប៊្រូយនិង ហេនរីពីទីក្រុងឡូសាន វ៉ាលដេស (ឬវ៉ាលដូ) នៅសតវត្សរ៍ទី១២ និងចន វ៉ាយឃ្លីហ្វនៅសតវត្សរ៍ទី១៤ វីលៀម ធីនដេលនៅសតវត្សរ៍ទី១៦ និងហេនរី គ្រូរ និងចច ស្ទ័រនៅសតវត្សរ៍ទី១៩។ សាក្សីព្រះយេហូវ៉ាសព្វថ្ងៃនេះបន្តប្រកាន់ខ្ជាប់ខ្នាតតម្រាក្នុងគម្ពីរ ហើយទទួលស្គាល់គម្ពីរជាគ្រឹះមូលដ្ឋាននៃសេចក្ដីពិត។ ហេតុនេះហើយបានជាគណៈអភិបាលបានជ្រើសរើសយ៉ូហាន ១៧:១៧ដែលចែងថា៖ «បណ្ដាំរបស់លោកជាសេចក្ដីពិត» ជាបទគម្ពីរប្រចាំឆ្នាំ២០១២របស់យើង។
ការកែប្រែដ៏គួរឲ្យរំភើបចិត្តសម្រាប់ការបង្ហាត់បង្រៀននិងក្នុងកិច្ចបម្រើ
សេចក្ដីជូនដំណឹងមួយដែលធ្វើឡើងដោយបងប្រុសអានថូនី ម៉ូរីសដែលជាសមាជិកគណៈអភិបាល បានពន្យល់អំពីការកែប្រែសម្រាប់សាសនទូតនិងអ្នកត្រួសត្រាយពិសេស។ នៅខែកញ្ញា ឆ្នាំ២០១២ សាលាសម្រាប់ប្ដីប្រពន្ធខាងគម្ពីរនឹងធ្វើឡើងនៅប្រទេសឯទៀត។ គោលដៅនៃសាលាគីលាតបានត្រូវផ្លាស់ប្ដូរ។ ចាប់ផ្ដើមពីខែតុលា អស់អ្នកដែលទទួលការបង្ហាត់បង្រៀននៅសាលាគីលាតគឺជាអ្នកដែលធ្លាប់បានចូលរួមក្នុងកិច្ចបម្រើពេញពេលពិសេសរួចហើយ ពោលគឺសាសនទូតដែលមិនទាន់បានចូលសាលាគីលាត អ្នកត្រួសត្រាយពិសេស អ្នកធ្វើដំណើរត្រួតពិនិត្យ ឬអ្នកធ្វើការនៅបេតអែល។ អ្នកដែលរៀនចប់នៅសាលាគីលាតនឹងត្រូវចាត់ឲ្យទៅបម្រើនៅការិយាល័យសាខា បម្រើជាអ្នកធ្វើដំណើរត្រួតពិនិត្យក្រុមជំនុំនានា ឬនឹងត្រូវចាត់ឲ្យទៅផ្សព្វផ្សាយនៅទីក្រុងធំៗជាមួយក្រុមជំនុំ។ នៅទីនោះពួកគេអាចពង្រឹង គាំទ្រ ហើយបង្ហាត់បង្រៀនបងប្អូនប្រុសស្រីដែលពួកគេផ្សព្វផ្សាយជាមួយ។
អ្នកត្រួសត្រាយពិសេសថ្មីនឹងចាប់ផ្ដើមបើកតំបន់ផ្សាយនៅតំបន់ដាច់ស្រយាល។ ចាប់ពីថ្ងៃទី១ ខែមករា ឆ្នាំ២០១២ បងប្អូនខ្លះដែលរៀនចប់នៅសាលាបង្ហាត់បង្រៀនបងប្អូនប្រុសនៅលីវខាងគម្ពីរនិងសាលាបង្ហាត់បង្រៀនប្ដីប្រពន្ធខាងគម្ពីរ នឹងត្រូវចាត់ឲ្យបម្រើជាអ្នកត្រួសត្រាយពិសេសបណ្ដោះអាសន្ន ហើយត្រូវចាត់ឲ្យទៅចាប់ផ្ដើមនិងពង្រីកកិច្ចផ្សព្វផ្សាយនៅតំបន់ដាច់ស្រយាល។ ពួកគេអាចធ្វើជាអ្នកត្រួសត្រាយពិសេសរហូតដល់បីឆ្នាំដោយទទួលតំបន់ផ្សាយមួយសម្រាប់រយៈពេលមួយឆ្នាំ។ ពួកអ្នកដែលមានប្រសិទ្ធភាពក្នុងកិច្ចផ្សព្វផ្សាយអាចក្លាយជាអ្នកត្រួសត្រាយពិសេសជាអចិន្ត្រៃយ៍។
កិច្ចប្រជុំប្រចាំឆ្នាំ២០១១នេះគឺជាពេលវេលាដ៏សប្បាយរីករាយមួយ។ យើងទន្ទឹងរង់ចាំទទួលពរពីព្រះយេហូវ៉ាចំពោះការរៀបចំថ្មីទាំងនេះដើម្បីបង្កើនសកម្មភាពផ្សព្វផ្សាយរបស់យើង និងដើម្បីជួយបងប្អូនយើងទូទាំងពិភពលោកឲ្យមានសាមគ្គីភាព។ នេះនឹងនាំឲ្យព្រះទទួលសិរីរុងរឿងនិងសេចក្ដីសរសើរ។
[ប្រអប់/រូបភាពនៅទំព័រ១៨, ១៩]
ស្គាល់គ្នាឲ្យកាន់តែច្បាស់ថែមទៀត
ក្នុងកម្មវិធីនៃកិច្ចប្រជុំនេះក៏មានបទសម្ភាសន៍ជាមួយបងស្រីមេម៉ាយ៥នាក់ក្នុងចំណោមបងស្រី៩នាក់ដែលនៅរស់ដែលជាប្រពន្ធរបស់សមាជិកគណៈអភិបាល។ បងស្រីម៉ារីណា ស៊ីដលីក បងស្រីអេឌីត ស៊ូតថឺ បងស្រីម៉េលីតា ចារ៉ាក់ បងស្រីមែលបា បារី បងស្រីស៊ីដនី បារប៊ឺ បានប្រាប់អំពីរបៀបដែលពួកគាត់បានរៀនសេចក្ដីពិត ហើយបានចូលរួមក្នុងកិច្ចបម្រើពេញពេល។ បងស្រីម្នាក់ៗបានប្រាប់អ្នកស្ដាប់អំពីអនុស្សាវរីយ៍ល្អៗ ទស្សនៈពួកគាត់ចំពោះប្ដីរបស់ពួកគាត់ និងពរដែលពួកគាត់ធ្លាប់មានជាមួយគ្នា។ ដើម្បីបញ្ចប់បទសម្ភាសន៍ដ៏គួរឲ្យរំភើបចិត្តទាំងនោះ អ្នកស្ដាប់បានច្រៀងចម្រៀងលេខ៨៦ដែលមានចំណងជើងថា «ស្ត្រីស្មោះត្រង់និងបងប្អូនស្រីគ្រិស្តសាសនិក»។
[រូបភាព]
(ខាងលើ) បងប្រុសដានីយ៉ែលនិងបងស្រីម៉ារីណា ស៊ីដលីក បងប្រុសគ្រែននិងបងស្រីអេឌីត ស៊ូតថឺ បងប្រុសទីអូឌ័រនិងបងស្រីម៉េលីតា ចារ៉ាក់
(ខាងក្រោម) បងប្រុសឡយដ៍និងបងស្រីមែលបា បារី បងប្រុសខារីនិងបងស្រីស៊ីដនី បារប៊ឺ
[ផែនទីនៅទំព័រ១៦]
(ដើម្បីមើលឃើញទាំងអស់ សូមមើលសៀវភៅ)
ការិយាល័យសាខា៦បានត្រូវបញ្ចូលគ្នាក្រោមការគ្រប់គ្រងនៃការិយាល័យសាខានៅប្រទេសម៉ិចស៊ិច
ម៉ិចស៊ិច
ក្វាតេម៉ាឡា
ហុងឌុយរ៉ាស
អែលសាវ៉ាឌ័រ
នីការ៉ាហ្គា
កូស្ដារីកា
ប៉ាណាម៉ា
[រូបភាពនៅទំព័រ១៧]
គំនូរមន្ទីរចាត់ការពិភពលោករបស់សាក្សីព្រះយេហូវ៉ាដែលនឹងត្រូវសាងសង់នៅក្រុងវ័រវិករដ្ឋញូវយ៉ក
