LANANG a tatalaranan so annual meeting na Watch Tower Bible and Tract Society of Pennsylvania. Pinaneknekan iya na koma 127 ya annual meeting ya agawa nen Sabado, Oktubre 1, 2011! Nantitipon iray agagin nanlapud nanduruman bansa diad Assembly Hall of Jehovah’s Witnesses diad Jersey City, New Jersey, U.S.A.

In-welcome nen Gerrit Lösch na Mananguley ya Ulop so amin ya inmatendi. Imbaga tod saray agagin wadman a nanlapud 85 a bansa ya panliliketan day nikadkaduman internasyonal a pankakasakey. Satan et maabig a pantasi tan mangigloria ed si Jehova. Say manunan tema na satan a miting et nipaakar ed pankakasakey.

MAABIG A REPORT MANLAPUD MEXICO

Impaliwawa ed unonan parte na programa so pankakasakey na saray lingkor nen Jehova. Ininterbyu nen Baltasar Perla so taloran kaiba ton membro na Mexico Bethel nipaakar ed impiulop na anemiran branch office ed Central America diad Mexico branch. Lapud satan ya agawa, mas dinmakel so membro na Mexico Bethel a nanlapud nanduruman kultura tan rasa. Nanresultad pampapasesegan so insabi na saray agagi manlapud nanduruman lugar. Singa angusar so Dios na baleg ya eraser tan binural to iray ketegan na kada bansa.

Say sakey a subok ed impanuulop na sarayan branch et say pangipalikna ed saray agagi ya ag-ira niyarawi ed organisasyon lapud anggapo lay branch office ed bansa ra. Pian naresolbe itan, kada kongregasyon et inikdan na secured ya e-mail pian direkta ran nakontak so branch office.

SARAY REPORT MANLAPUD JAPAN

Impaliwawa nen James Linton a nanlapud Japan branch no panon ya naapektoan iray agagi ed yegyeg tan tsunami ya agawad satan a bansa nen Marso 2011. Dakel ed saray agagi diman et inateyan na inad-aro ed bilay tan naandian na kaykayarian. Masulok ya 3,100 ya kaabungan tan nilasus iran luluganan so intarya na saray agagi a nanlapud saray lugar ya agnaapektoan. Tuloytuloy a nantrabaho iray boluntaryo na saray Regional Building Committee pian apigeren iray abung na saray agagi. Masulok ya 1,700 iran boluntaryo so nanlingkor ed saray lugar a mankaukolan. Sakey a grupo na boluntaryo a nanlapud United States so tinmulong diad pangapiger na saray Kingdom Hall, tan 575 a boluntaryo so tinmulong ed satan a proyekto.

Ingen ta mas inikdan na imano so pangiter na espiritual tan emosyonal a tulong ed saray naapektoan. Masulok a 400 ya elder so nan-shepherding ed saray lugar a mankaukolan. Nanengneng so panangiyansakit na Mananguley ya Ulop diad impangibaki ra na duaran zone overseer manlapud headquarters pian pasesegen iray agagin naapektoan. Makaligliwa met so panangiyansakit ya imbalikas na saray agagi manlapud interon mundo.

 SARAY IMPANALO ED KORTE

Dinmengel a maong iray agagi sanen impaliwawa nen Stephen Hardy manlapud Britain branch iray balon impanalod korte. Singa bilang, pambabayaren na gobiernoy France na $82 million (U.S.) parad tax so asosasyon ya uusaren tayod satan a lugar. Sayan isyu et aresolbe sanen pinaboran itayo na European Court of Human Rights (ECHR) tan imbagan ag-inunor na gobiernoy France so Article 9 na European Convention, a manproprotektad kawayangan ed relihyon. Saray salitan inusar ed sayan desisyon et mamaneknek ya aliwan kuarta so isyu, ta oniay nabasa: “Say agpamidbir ed sakey a relihyoson organisasyon, pamatunda ed satan, pangusar na makapainsulto iran salita et alimbawa na saray isusumlang ed kanepegan ya walad Article 9 na European Convention.”

Pinaboran itayo met na ECHR ed kaso a nalalanor so Armenia. Manlapu lad 1965, imbaga na ECHR ya agprinotektaan na European Convention iray indibidual manlapud impilit a panaglingkor ed militar. Ingganggan na Grand Chamber​—say sankatageyan a korte ed Europa—​ya “no say sakey et agto labay so manlingkor ed militar lapud seryoso tan makatunongan a rason,” kaukolan itan a respetoen na European Convention. Lapud satan a desisyon, apilitan so Armenia tan saray bansan Azerbaijan tan Turkey ya mangipaakseb met ed satan.

PANAGPAALAGEY IRAN PROYEKTO

Say sinmublay a nampaliwawa et si Guy Pierce na Mananguley ya Ulop. Amta ton saray inmatendi et interesadod nagawan proyekto diad New York. Sikatoy angipanengneng na video nipaakar ed iyaaligwas na panagpaalagey a kimey diad Wallkill, Patterson, tan say agano ni labat ya asaliw ya dalin ed Warwick tan Tuxedo, New York. Kaplesan ya ipapaalagey diad Wallkill so balon residence bilding a walaan na masulok ya 300 a kuarto, tan iilaloan a nasumpal diad taon 2014.

Wala ray planon parakepen imay 100 ektaryan dalin ed Warwick. Oniay imbaga nen Brother Pierce: “Anggano agtayo ni amta no antoy linawa nen Jehova ed Warwick, ipaparaan la itan a lugar a pangiyalisan na world headquarters na Saray Tasi nen Jehova.” Say 20 ektaryan dalin a walad 10 kilometro diad norte na Warwick et planon usaren a bodega na saray makina tan materyales parad panagpaalagey. Inyarum to nin, “Sano makala tayo lay permit, iilaloan tayon nasumpal so pasilidad diad loob na apat taon. Insan la ilako so pasilidad tayod Brooklyn.”

“Kasin alingwanan la na Mananguley ya Ulop no panon tayo la kaasingger ed baleg ya irap?” so intepet nen Brother Pierce. “Andin balot,” so ebat to. “No bilang ta onsabi baleg ya irap legan itayon manpapaalagey, di mas balibali!”

MANALWAR ED MANAGLEM A LEON

Impaliwawa nen Stephen Lett, sakey nin membro na Mananguley ya Ulop so nipaakar ed 1 Pedro 5:8: “Mantultuloy kayon manlikas tan manbantay. Ta say Diablo a kabusol yo et siber-siber a singa managlem a leon, a manaanap na buagen to.” Imbaga nen Brother Lett ya pigarad saray ugali na leon ed ilustrasyon nen Pedro et dugarugan manideskribe ed Diablo.

Lapud mas mabiskeg tan mas maples iray leon nen saray totoo, agtayo sasalien a labanay Satanas ed dilin biskeg tayo. Kaukolan tayoy tulong nen Jehova. (Isa. 40:31) Masilib met so leon, kanian kaukolan tayon paliisan so espiritual a kabilungetan ya panaanapan nen Satanas na biktimaen to. No panon a labay a pateyen na leon so anggapoy laban ya usa odino melag nin zebra, ontan met si Satanas, anggapoy panangasi to tan labay to itayon pateyen. No apenek lay leon, mabetbet ya agla nabidbir so biktima to. Ontan met so “pansumpalan” na saray  biktima nen Satanas ed espiritual, ‘seguradon mas mauges so kipapasen da nen say diad gapo.’ (2 Ped. 2:20) Kanian nepeg tayon ontalindeg sumpad si Satanas tan malet a tumboken iray nanaaralan tayon prinsipyo ed Biblia.​—1 Ped. 5:9.

PABLIM SO PASEN MO ED ABUNG NA DIOS

“Amin tayo et walaan na pasen ed abung na Dios,” so inkuan nen Samuel Herd na Mananguley ya Ulop. Amin a Kristiano et walaan na pasen ed “abung” na Dios​—say espiritual a templo to​—say uksoyan pian makapandayew ed sikato base ed dondon bagat nen Jesus. Sakey itan a pasen ya kaukolan a pabpablien. Singa si David, pirawat tayoy ‘manayam ed abung nen Jehova diad amin ya agew na bilay tayo.’​—Sal. 27:4.

Sinalambit nen Brother Herd so Salmo 92:12-14 tan intepet ton, “Panon itayon tutulongan nen Jehova ya onaligwas?” Oniay ebat to: “Diad espiritual a Paraiso, aasikasoen, proprotektaan, tan iikdan itayo na Dios na makaparepreskon danum na katuaan. Sikatoy pisalamatan tayo lapud satan. Panliketan tayo so pansiansia ed abung nen Jehova​—aliwan diad antikey labat a panaon noagta diad andi-angga,” so impaseseg nen Brother Herd ed saray inmatendi.

RERESPETOEN NA SARAY KRISTIANO SO SALITA NA DIOS

Si David Splane, sakey met a membro na Mananguley ya Ulop so tinmumbok a nampaliwawa nipaakar ed no panon a lawas rerespetoen na saray tuan Kristiano so Salita na Dios. Nen inmunan siglo, nanmatalek irad satan pian resolbien so isyu nipaakar ed panagsegat. (Gawa 15:16, 17) Balet sanen komaduan siglo, saramay mangibabagan Kristiano ya nibangat ed Griegon pilosopiya et nanmatalek ed inaral da, imbes a diad Kasulatan. Ag-abayag, saray opinyon na Saray Ama na Simbaan tan emperador na Roma so insalat da ed bangat na Biblia, a sengegay inlesa na dakel a palson doktrina.

Impaimano nen Brother Splane a diad sakey ya ilustrasyon, indanet nen Jesus ya walan wala ray alanaan a Kristiano ed dalin a mantultuloy a mangidepensa ed katuaan. (Mat. 13:24-30) Agtayo segurado no siopa ira. Balet diad pigaran siglo, dakel so angikaindan  ed agmakasulatan iran sisisiaen tan kagagawa. Arum ed sikara et di Archbishop Agobard na Lyons nen koma 9 a siglo, Peter na Bruys, Henry na Lausanne, tan Valdès (odino, Waldo) nen koma 12 a siglo, John Wycliffe nen koma 14 a siglo, William Tyndale nen koma 16 a siglo, tan Henry Grew tan George Storrs nen koma 19 a siglo. Itutultuloy ya tutumboken na Saray Tasi nen Jehova iray Makasulatan ya estandarte tan bibidbiren dan say Biblia so basiyan na katuaan. Kanian, pinili na Mananguley ya Ulop bilang teksto parad taon 2012 so Juan 17:17: “Say salitam et katuaan.”

MARAKEP IRAN PANANGUMAN PARAD PANANGIPASAL TAN PANAGLINGKOR

Inyanunsio nen Anthony Morris na Mananguley ya Ulop iray pananguman parad saray misionero tan espisyal payunir. Manlapu lad Setyembre 2012, saray klase na Bible School for Christian Couples et nagawad apili iran bansa. Say gagala na panaral ed Gilead School et nauman. Nanlapu la nen Oktubre, amin ya manaral ed Gilead et wala lad special full-time service​—bilang misionero ya agni akapan-Gilead, espisyal payunir, ombiabiahen manangasikaso, odino Bethelite. Saray man-graduate et nausar pian mamabiskeg ed saray lingkor na Dios diad saray branch office, panagbiahen kimey, odino niasain irad lugar a dakel so populasyon pian mamaseseg ed saray kongregasyon parad panagpulong a kimey.

Saray kaaruman ya espisyal payunir et mangigapo na saray balon teritorya diad saray arawi tan nisulinek iran lugar. Manlapu lad Enero 1, 2012, arum ed saray nan-graduate ed Bible School for Single Brothers tan Bible School for Christian Couples et niasain bilang temporaryon espisyal payunir tan nausar ira pian palaknaben so kimey ed saray nisulinek a lugar. Niasain ira bilang espisyal payunir ed loob na sakey taon ya anggad taloy taon. Saramay epektibo et makaawat na permanentin asainmin.

Say 2011 ya annual meeting et talagan makapalikliket. Iilaloan tayon bendisyonan nen Jehova irayan balon uksoyan pian lalon napalaknab so panagpulong a kimey tan napaelet so pankakasakey tayo bilang sanaagi​—amin et parad kigloriaan tan kirayewan nen Jehova.

[Kahon/Saray litrato ed pahina 18, 19]

PANGABAT NIN MAONG

Sakey nin parte na programa et say impanginterbio ed limaran abalon asawa na saray membro na Mananguley ya Ulop. Insalaysay di Marina Sydlik, Edith Suiter, Melita Jaracz, Melba Barry, tan Sydney Barber no panon dan naaralan so katuaan, tan say inloob dad sigpot-panaon ya serbisyo. Balang sakey et angibaga na makapaliket iran eksperiensya to, saray agto nalingwanan nipaakar ed asawa to, tan saray bendisyon ya naawat da bilang sanasawa. Bilang konklusyon ed sayan interbyu, kinansion so kanta 86 ya atemaan na “Matoor Iran Bibii, Kristianon Agagin Bibii.”

[Saray litrato]

(Tagey) Daniel tan Marina Sydlik; Grant tan Edith Suiter; Theodore tan Melita Jaracz

(Leksab) Lloyd tan Melba Barry; Carey tan Sydney Barber

[Mapa ed pahina 16]

(Parad aktual a format, nengnengen so publikasyon)

Inyulop so anemiran branch diad panangasikaso na Mexico branch

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Litrato ed pahina 17]

Say planon desinyo na world headquarters na Saray Tasi nen Jehova diad Warwick, New York