Cada wata reunionta rurayanqampita willakï

Juknölla kayanqampita y rurakänampaq kaqkunapita kushikïpaq willakïkuna

LLAPAN watakuna Watch Tower Bible and Tract Society of Pennsylvania ruranqan reunionkunaqa, imëpis kushishqa shuyarëpaqmi kayan. 2011 wata, sábado 1 de octubre junaq, Jersey City (Nueva Jersey, Estados Unidos) markachö Asamblëakuna Rurayänan Localchö 127 kaq reunionchöpis, mëtsika nacionkunapita ëwaqkunam willakïkunata kushishqa wiyakuyarqan.

Jehoväpa Testïgonkunata Pushaqkunapita Gerrit Lösch wawqim, tsëchö kushishqa këkaq cristiänokunata kushi kushi chaskir reunionta qallarqan. 85 nacionkunapita ëwaqkunatam, imawampis mana igualaq juk kastanölla kanqantsikpaq pï mëpis parlayanqanta, y tsënö kanqantsik Jehoväta alabanqanta llapankunata yarpätsirqan. Awmi, tsë reunionchöqa juk kastanölla kanqantsikpaqmi más parlayarqan.

MÉXICO NACIONPITA ALLI WILLAKÏKUNA

Progrämapa qallananqa Jehoväpa markan juknölla kanqantam rikätsikurqan. México Betelpita Baltasar Perla wawqim, tsë sucursalpita kima wawqikunata tapurqan centroamëricapita joqta sucursalkuna México sucursalman juntakäyanqampita willakuyänampaq. Betel familiankunachö atska nacionkunapita kayanqanta y tukïläya costumbreyoq kayanqan alläpa kushikïpaq kanqantam willakuyarqan. ¡Imëka juk jatun borradorta tsarirkur Diosnintsik nacionkunapa lindëronkunata borrarishqa cuenta kanqantam niyarqan!

Sucursalkuna manana kanqan nacionkunachö täraq cristiänokuna, Jehoväpa markampita rakikashqanö mana sientikuyänampaq tukï rurananmi ichik sasa o aja karqan. Tsënö mana sientikuyänampaqmi, alläpa karu markakunachö këkarpis, sucursalwan parlayänampaq correo electrónico nishqanta cada congregacionpaq churapuyashqa.

JAPÓN NACIONCHÖ TERREMOTO KANQAN

Japón sucursalpita James Linton wawqim 2011 wata, marzo killachö alläpa feyupa Patsa kuyur y lamar yaku yarqamur tukïkunata ushakätsinqanta willakurqan. Mëtsikaq cristiano mayintsikkunam kastankunata y tukï cösasninkunata oqrayarqan. Tsë desgracia mana chanqan markakunapita cristiänokunam, 3.100 wayikunata y atska pachak cärrokunata desgraciata pasaqkuna utilizäyänampaq qoyarqan. Atska Nacionkunachö Diospa Wayin Rurëta Rikaqkunam, cristiano mayinkunapa wayinkunata altsayänampaq mëtsikaq yanapakoqkunata mandayarqan, y pëkunaqa mana jamashpam trabajayarqan. 1.700 cristiänokunam tsëchöqa yanapakuyarqan. Jina 575 cristiänokunam Diospita Yachatsikuyänan Wayikunata altsayarqan, tsëchöqa Estados Unïdospitapis juk grupo yanapakurqanmi.

Más precisaq rurëninkunaqa Diospa kaqchö y llakikïninkunachö desgracia pasaqkunata yanapëmi karqan. Jina 400 anciänokunapitapis masmi më tsëman yanapakoq ëwayänampaq listo këkäyarqan. Jehoväpa Testïgonkunata Pushaqkunapis, desgraciata pasaqkunaman yarparäyanqantaqa rikätsikuyarqanmi, tsëmi principal sucursalpita shumaq animayänampaq sucursalkunata watukakur yanapakoqkunata ishkaqta mandayarqan. Jina entero Patsapita cristiänokuna kuyëllapaq cartakunata apatsiyanqanmi alläpa shoqakoq karqan.

 JUICIOKUNACHÖ GANAYANQAN

Gran Bretaña sucursalpita Stephen Hardy wawqita, y wakin wawqikunatam, Diospa markan tsëllaraq juicio gananqankunapita willakuyanqanta tsëchö këkaqkuna mantsakashqa wiyayarqan. Franciachö këkaq gobiernom tsë nacionchö Jehoväpa markan këkaqta 58 millón euro jutiwan reqishqa qellëta impuestopita pagayänampaq mañëkäyarqan (82 millón dölarkuna). Tribunal Europeo de Derechos Humanos nishqanmi, Convenio Europeo nishqampa 9 kaq Artïculon, ima religionpis libre kanqan neqta, Francia gobierno mana kaqpaq churanqanta rikätsikur tsë juiciota ushakäratsirqan favornintsikman yarqur. Qellërëkur Diospa markanta mana juicioyanqantam tsë sentenciaqa rikätsikurqan, kënömi nirqan: “Juk religión kananta mana munar, ushakätsita munar y juk religionpaq mana allipa parlayanqanqa, Conveniopa 9 kaq Artïculonta mana wiyakuyanqantam rikätsikun”.

Jina Tribunal Europeo nishqanqa Armenia nacionchö këkaq juk Jehoväpa testïgompaq asuntonchöpis favornintsikmi yarqurqan. 1965 watapita patsëmi tsë gobiernoqa ejercitoman obligado ëwayänampaq kaqpita Convenio Europeo nishqan mana tsapäkunqanta nirqan. Tribunal Europëochö, llapampitapis más autoridadyoq Gran Sala nishqanmi, religionninrëkur ejercitoman ëwanampaq pitapis mana obligayänampaq kaqta Convenio Europeo tsapäkunqanta rikätsikurqan. Kananqa sentencia tsënö kanqampitam Armenia, Azerbaiyán y Turquía nacionkunapa gobiernon wiyakuyänampaq obligashqa këkäyan.

MUSHOQ EDIFICIOKUNATA SHÄRITSIYÄNAMPAQ PENSAYANQAN

Qateqnin kaq yachatsikoqqa Jehoväpa Testïgonkunata Pushaqkunapita Guy Pierce wawqim karqan. Nueva York markachö edificiokuna imanir rurëkayanqanta tsëchö këkaqkuna musyëta munayanqantam nirqan. Juk videowanmi Wallkill y Patterson markakunachö trabäjokuna imanö avanzakëkanqanta y Warwick y Tuxedo (Nueva York) markakunachö tsëllaraq chakrakunata rantiyanqanta rikätsikurqan. Wallkill markachöqa edificiokunatam rurëkäyan, tsëkunapitam 300 cuartokuna yarqunqa tsëchö kawayänampaq, y tsëtaqa ushëta pensëkäyan 2014 watapaqmi.

Jinamampis pensëkäyanmi Warwick markachö 100 hectariayoq chakrachö edificiokunata rurayänampaq. Jina Pierce wawqiqa këtapis nirqanmi: “Warwickpaq Jehoväpa munënin ima kanqanta alleqlla manaraq musyarpis, Jehoväpa testïgonkunapa más principal kaq sucursalnintam tsëman wititsiyänäpaq chakrata alistapakur qallëkäyä. Jina, Warwick markapita 10 kilömetroschö këkaq 20 hectariayoq chakrachömi, mäquinakunata y materialkunata guardanapaq juk almacenta rurëta pensakëkan”. Wawqi Pierceqa këtapis nirqanmi: “Edificiokunata shäritsiyänäpaq permïsota qorayämaptinqa, chusku watachö tsë llapanta ushëtam pensëkäyä. Tsëpitaqa Brooklynchö këkaq edificiokunatam rantikïkushun”.

Tsënam tapukurqan: “¿Këwanqa Jehoväpa Testïgonkunata Pushaqkuna këllachöna alläpa jipakï o ñakay tiempo kanqantaku qonqariyashqa?”. Kikinmi kënö contestarqan: “¡Manam qonqayashqatsu! Alläpa jipakï tiempo tsëkunata ruranapaq pensëkashqa chämuptinqa, ¡alläpa kushikïpaqchi kanman!”.

QAPAREQ LEONPITA CUIDAKÏ

Tsëpitanam, Jehoväpa Testïgonkunata Pushaqkunapita Stephen Lett wawqi, 1 Pedru 5:8 textopaq parlarqan, kënömi nin: “Alli penseniquicunawan cabal nunana car, mäcoq mäcoq cayë. ¡Paqtaraq, mana alliman ishquiyanquiman! Porqui chiquiyäshoqniquicuna diabloqa, imeca mallaqashqa leonnomi qaparir qayarir, purican qamcunapa marcäquiniquicunata ushacäratsinanpaq”. Leonkunapa rurëninkunawan Diablupa rurëninkunata Pedru igualatsinqanqa alli clärom këkan.

Puntataqa, leonkunaqa noqantsikpitapis más kallpayoq y imatapis raslla rurareqmi kayan, tsënöllam Satanaspis. Tsëmi kikintsikllapitaqa shillunkunapita safëta puëdentsiktsu. Jehoväpa yanapakïnintaran necesitantsik (Isa. 40:31). Jina leonkunaqa, mana mäkutsikushllapam prësankunata tsaririyan, tsëmi Jehoväpa kaqchö  pantashqa këpita alli cuidakunantsik, tsëkunachömi Satanasqa pitapis raslla tsaririn. Imanömi juk león mana imanakoq cabra niraq antïlopeta o ashnu niraq cebrapa punïkaq wawanta wanuratsin, tsënöllam mana ankupäkoq Diablupis alläpa kushikunman wanuratsimarnintsik. Y imanömi león tsarinqankunata mikuriptin chipyëpa mana reqipaq quedarin, tsënöllam Jehoväpa kaqpita waqtsakashqa nunapis Diosta manaraq reqir “une cashqanpitapis más peor” tikrarin (2 Ped. 2:20). Tsënö kaptinmi alläpa precisan Bibliapita yachakunqantsikkunawan alli cuidakunantsik (1 Ped. 5:9).

JEHOVÄPA WAYINCHÖ KANQANTSIKTA ALLÄPA PRECISAQPAQ CHURASHUN

Jehoväpa Testïgonkunata Pushaqkunapita Samuel Herd wawqim qateqnin kaq discursochö kënö nirqan: “Llapantsikpam Jehoväpa wayinchö juk sitiontsik kapamantsik”. Awmi, llapan cristiänokunapam mana rikakaq Jehoväpa wayinchö juk sitionkuna kayäpun, tsë ninanqa Jesus wanunqanrëkur imanö adoranapaq kaqtapis Dios patsätsinqanchömi. Tsëchö këqa, imawampis mana igualaq kaptinmi alläpa precisaqpaq churanantsik. Davidnöllam ‘Jehoväpa wayinchö llapan kawënintsikchö tärëta’ munantsik (Sal. 27:4).

Salmo 92:12-14 textota leirirmi, wawqi Herd kënö tapukurqan: “¿Imanötaq Jehová ‘wëtatsimantsik’?”. Tsënam kënö yachatsikurqan: “Imëka paraíso cuenta markanwanmi Diosqa kuyamanqantsikta rikätsimantsik, tukïkunapita tsapämantsik y achachëchö alalaq yakunö rasumpëpa kaq yachatsikïkunata yachatsimantsik. Alläpam agradecikushwan Jehoväpa wayinchö täranqantsikpita, pero manam juk ishkë watakunallapatsu sinöqa imëyaqpis o imaykamapis”.

CRISTIÄNOKUNAQA DIOSPA PALABRANTAM RESPETAYAN

Jehoväpa Testïgonkunata Pushaqkunapita David Splane wawqim, rasumpëpa cristiänokuna Diospa Palabranta imëpis respetashqa kayanqanta nirqan. Punta cristiänokunaqa, señalakïpaq asuntochö problëmata altsayänampaqmi, Biblia tsëpaq ima ninqantaraq alleq rikäyarqan (Hech. 15:16, 17). Pero 100 watakuna witsan cristiänotukoq nunakunaqa, yachaq griego nunakunapa yachatsikïninta estudiashqa karmi, Biblia ninqanta cäsokuyänampa rantin o trukan, kikinkunapa yachëninta más precisaqpaq churayarqan. Tiempowannam, wakinkunaqa Bibliapa yachatsikïninkunata Iglesiata Patsätseqkuna nishpa reqishqa nunakunapa y Romachö mandakoqkunapa pensëninkunatawan cambiariyarqan, tsënöpam mana rasun kaq yachatsikïkuna mëtsika mirarqan.

 Splane wawqiqa rikätsikurqan, Jesuspa igualatsikïnin ninqannöpis, ciëlota ëwaqpaq kaq cristiänokuna Patsachö rasumpa kaqta defendirnin imëpis këkäyänampaq kaqta (Mat. 13:24-30). Pasaq watakunachö pikuna kayanqanta alleqllaqa mana musyashqapis, mëtsikaq nunakunam Biblia mana yachatsikunqan creenciakuna y costumbrekuna mana alli kanqanta niyashqa. Wakinmi këkuna kayarqan: 800 watakunachö, arzobispo Agobardo de Lyon; 1100 watakunachö, Pedru de Bruys, Enrique de Lausana y Valdès (o Valdo); 1300 watakunachö, John Wyclef; 1500 watakunachö, William Tyndale, y 1800 watakunachö Henry Grew y George Storrs. Diospa Palabran rasumpa kaqta yachatsikunqanta musyarmi, kanan witsampis Jehoväpa testïgonkunaqa respetëkäyanlla. Tsëmi Jehoväpa Testïgonkunata Pushaqkuna, 2012 watapaq, Juan 17:17 (NTCN) textota akrayämushqa, kënömi nin: “Palabrayquiga rasumpacagmi”.

DIOSPITA YACHATSIKUYÄNAMPAQ ESCUËLAKUNACHÖ KUSHIKÏPAQ CAMBIOKUNA

Jehoväpa Testïgonkunata Pushaqkunapita Anthony Morris wawqim, misionërokunapaq y precursor especialkunapaq atska cambiokuna kanqanta willakurqan. Juk nacionkunachöqa, Casakushqakuna Bibliapita Yachakuyänampaq Escuëlaqa 2012 wata septiembre killachömi qallanqa. Jina Galaad Escuëlapita yarqoqkuna imakunachö yanapakuyänampaqpis juknönam. Pasaq octubre killapitam, Galaad Escuëlamanqa ëwëta puëdeyan, tsë escuëlaman mana ëwashqa kaq misionërokuna, precursor especialkuna, watukakur pureq anciänokuna o betelïtakuna. Galaad Escuëlapita yarqoqkunaqa, sucursalkunachö, congregacionkunata watukakoqnö, watukakoqkunata rikaqnö o mëtsikaq nunakuna täräyanqan markakunachö Diospa markanta sinchiyätsirmi yanapakuyanqa.

Testïgokuna mana kayanqan markakunamanmi más precursor especialkunata mandayanqa. 2012 wata, 1 de enero killapita patsëmi, Soltërokuna Bibliapita Yachakuyänampaq Escuëlapita, y Casakushqakuna Bibliapita Yachakuyänampaq Escuëlapita yarqoqkunapita, juk watapa o hasta kima watapa precursor especialnö karu markakunachö Diospita yachatsikurnin qallayänampaq wakinta mandëkäyan. Diospita yachatsirnin nunakunata allipa yanapëkaqkunataqa precursor especialnö sïguiyänampaqmi churayanqa.

2011 watachö reunionta rurayanqanqa alläpa kushikïpaqmi karqan. Kë mushoq arreglokunata Jehová bendecinampaqmi alläpa rogakuyä, tsëkunaqa rurakashqa Diospita más yachatsikunapaq y juk kastanölla kanqantsikwan Diosta alabanapaqmi.

[18 y 19 kaq päginakunachö dibüju y recuadru]

JEHOVÁ MUNANQANNÖ KAWAQ WARMIKUNA

Tsë reunionchöqa, Jehoväpa Testïgonkunata Pushaqkunawan casakushqa isqun viuda panikunapitam pitsqaq viudakunata kawëninkunapaq tapupäyarqan. Marina Sydlik, Edith Suiter, Melita Jaracz, Melba Barry y Sydney Barber panikunam willakuyarqan Diospita imanö yachakuyanqanta y llapan tiemponkunawan sirwita imë qallayanqanta. Jinamampis shumaq cösaskunata pasayanqampita, nunankunapita y ishkankuna ima bendicionkunata chaskiyanqampitam willakuyarqan. Tapupar ushariyaptinnam, tsëchö llapan juntarëkaqkunapaq alläpa kushikïpaq karqan, “Jehová munanqannö kawaq warmikuna” neq tïtuloyoq 86 kaq canticota cantë.

[Dibüjukuna]

(Janachö) Daniel y Marina Sydlik; Grant y Edith Suiter; Theodore y Melita Jaracz

(Urachö) Lloyd y Melba Barry; Carey y Sydney Barber

[16 kaq päginachö mäpa]

(Para el texto completamente formateado, vea la publicación)

Joqta sucursalkunam México sucursalman juntakäyashqa

MÉXICO

GUATEMALA

HONDURAS

EL SALVADOR

NICARAGUA

COSTA RICA

PANAMÁ

[17 kaq päginachö fötu]

Warwick (Nueva York) markachö Jehoväpa testïgonkunapaq principal sucursalninta rurayänampaq kaq pensayanqan