SAPA watam ancha kusikuywan Watch Tower Bible and Tract Society of Pennsylvania nisqa huñunakuytaqa suyanchik. Chayna kasqantam qawachirqa 2011 watapa octubre killanpi qallariynin sabado punchawpi 127 kaq huñunakuypa apakusqan. Chayqa apakurqa Jercey City (Nueva Jersey, Estados Unidos) lawpi Asambleakuna Rurana Wasipim, chay asambleamanmi rirqaku enteron Pachamanta iñiqmasinchikkuna.

Diospa Llaqtanpi Punta Apaqkunamanta Gerrit Lösch iñiqmasinchikmi 85 nacionkunamanta hamuq iñiqmasinchikkunata sumaq kusikuywan chaskirqa. Paykunatam nirqa chayna achka nacionkunamanta kachkaspankupas huk sonqolla kasqankumanta achka runakuna Jehová Diosta hatunchasqankuta. Chay huñunakuypi yachachikuykunaqa yaqa llapanmi karqa huñulla kaymanta.

MÉXICO NACIONMANTA SUMAQ WILLAKUYKUNA

Punta kaq yachachikuymi qawachirqa Jehová Diospa llaqtanpi kaqkuna huk sonqolla kasqankumanta. México Betelmanta kaq Baltasar Perla iñiqmasinchikmi tapurqa chay Betelpi llamkaq kimsa iñiqmasinchikkunata, México Betelman soqta nacionkunapi kaq Betelkuna hukllawakurusqanku imayna kasqanmanta. Paykunam nirqaku kunan yachasqanku Betel wasipiqa tukuy nacionkunamanta kaspanku anchata kallpanchanakusqankumanta. Chayna kasqankuwanmi llapallanku aswan kallpanchasqa tarikunku. ¡Kayqa rikchakun hatun borradorta Jehová Dios hapiykuspan nacionkuna huklla kanankupaq harkaqta chinkarachinmanpas hinam!

Ichaqa huk sasachakuymi karqa. Betelkunapa manaña kasqan nacionkunapi iñiqmasinchikkunam Jehová Diospa llaqtanmanta karupi hina tarikurqaku, chayna mana kananpaqmi lliw congregacionkunaman correo electrónico nisqata qorqaku chaynapi maypiña kaspankupas México Betel wasiwan mana sasachakuspa rimanankupaq.

JAPÓN NACIONPI HATUN TERREMOTO PASASQANMANTA

Japón Betelmanta James Linton iñiqmasinchikmi rimarqa 2011 watapa marzo killanpi hatun terremoto pasasqanmantawan lamar qocha pawaramuspan chay nacionpi llaqtakunata apasqanmanta. Achka iñiqmasinchikkunapa familiankum chaypi wañurqaku, kapuqninkupas chinkarqataqmi. Chay llaqtamanta hawapi yachaq achkallaña Jehová Diospa testigonkunam, 3.100 masnin wasinkuta samapakunankupaq qorqaku, carronkutapas qorqakutaqmi servichikunankupaq. Comités Regionales de Construcción nisqapas kacharqataqmi yanapakuy munaq iñiqmasinchikkunata, paykunaqa tukuy kallpankuwanmi yanapakurqaku iñiqmasinchikkunapa wasinkuta allichaypi. Llapallan chaypi yanapakuqkunaqa karqaku 1.700 masninmi. Chaymantapas karqakutaqmi 575 yanapakuqkunapas, paykunaqa tuñisqa Salonkunatam kaqllamanta hatarichirqaku, paykunamanta wakinninkum karqaku Estados Unidos nacionmanta.

Chay sasachakuypiqa yanaparqaku tukuymanta puntataqa iñiyninkupiwan imapas llakinkupim. Yaqa 400 masnin ancianokunañataqmi tukuyta rurarqaku maypipas yanapakunankupaq. Diospa Llaqtanpi Punta Apaqkunapas qawachirqataqmi paykunamanta llakipayakusqankutaqa, paykunam Betel wasikunata watukuq iskay iñiqmasinchikkunata kacharqaku chay nacionpi  iñiqmasinchikkunata kallpanchanankupaq. Yanaparqataqmi enteron Pachamanta iñiqmasinchikkunapa kuyakuywan cartakuna apachisqankupas.

JUICIOPI ATIPASQANCHIKMANTA

Gran Bretaña Betelmanta Stephen Hardy iñiqmasinchik chaynataq huk iñiqmasinchikkunapas juiciokunapi atipasqanchikmanta rimariptinkum, lliw huñunakuypi kaqkunaqa admirasqallaña uyarirqaku. Francia gobiernom chaypi kaq Diospa llaqtanta mañarqa 58.000.000 euros (82.000.000 dolarta) impuestota paganankupaq. Chay juicioqa allichakururqa Tribunal Europeo de Derechos Humanos nisqawanmi ñoqanchikpa allinninchikpaq, 9 Articulopa nisqanman hinaqa Francia gobiernom Europa nacionwan contrato rurasqankuta mana respetarqachu, chay kamachikuypim nirqa religionkunaqa libre kasqankumanta. Chay willakuypim nirqa mana qollqeraykuchu Juicioman yaykusqankumanta, ninmi: “Chayta ruray munasqanqa qawachirqa mana reqsikuyniyoq kasqankutam, harkakuq kasqankutapas chaynataq mana allinpaq qawasqankutapas, chaywanmi 9 Articulopa nisqanta yanqachachkarqaku”, nispa.

Armenia nacionpipas Tribunal Europeo nisqaqa Jehová Diospa testigonkunapa allinninpaqtaqmi rurarqa. 1965 watamantaraqmi Armenia nacionpiqa mana chaskiyta munarqakuchu Convenio Europeo nisqanman hina Jehová Diospa testigonkuna llaqtata servinankupaq mana riyta munaptinku. Tribunal Europeo nisqapi Gran Salaqa nirqam llaqtata servinankupaq mana riyta munaptinkuqa amparasqanta. Chayna nisqanmi Armenia nacionta hinaspa Azerbaiyán chaynataq Turquía nacionkunatapas qawachin, chay nisqanta reqsikunankupaq.

IMAKUNATA HATARICHINANKUMANTA

Chaymantañataqmi yachachirqa Diospa Llaqtanpi Punta Apaq Guy Pierce. Nirqam chay huñunakuypi kaqkuna Nueva York llaqtapi imakuna hatarichinankumanta yachay munasqankuta. Huk videowanmi qawachirqa Wallkill hinaspa Patterson lawpi imakuna ruray qallaykusqankumanta, chaynataq chayllaraq rantisqanku Warwick hinaspa Tuxedo (Nueva York) lawmantapas. Wallkill lawpiqa mosoq wasikunatam rurachkanku 300 cuartoyoqkunata, chayqa qespinqa 2014 watapaqmi.

Chaymantapas, tantearunkum Warwick lawpi 100 hectarea chakrapi imatapas ruranankupaq. Pierce iñiqmasinchikmi nirqa: “Warwick lawpi ima rurananchikta Jehová Dios munasqanmanta mana yachaptinchikpas, alistachkanikuñam enteron Pachapi Betel wasikunamanta aswan hatun kaq Betel wasi chaypiña kananpaq. Tanteachkanikutaqmi 20 hectareapi maquinakunata hinaspa hukkunatapas waqaychanapaq, chayqa kachkan Warwick lawpa norte lawninpim”, nispa. Pierce iñiqmasinchikqa nirqataqmi: “Chay wasikunata hatarichinapaq saqewaptinchikqa, tawa watallapim lliwta tukusunchik. Chaymantañataqmi Brooklynpi tukuy imanchikta rantikusun”, nispa.

Tapurqataqmi: “¿Kaywanqa nichkanchikchu llumpa-llumpay ñakariy punchaw karupiraq kasqanta Diospa Llaqtanpi Punta Apaqkuna piensasqankuta?”, nispa. Hina kikinmi nirqa: “¡Manamá! Sichu rurachkaptinchik llumpa-llumpay ñakariy punchaw hapiruwaptinchikqa, ¡mayna allinchá kanman!”, nispa.

WAQAYCHAKUSUNYÁ SATANASMANTA

Qatiqninmanñataqmi Diospa Llaqtanpi Punta Apaq Stephen Lett, 1 Pedro 5:8 nisqanmanta rimarirqa, nirqam: “Listollayá rikchaychik, enemigoykichik diabloqa yarqasqa leon hinam muyuriqnikichikpi purichkan pitapas millpurunanpaq”, nispa. Qawachirqam leonkunapa imayna kasqanqa Pablopa rimasqanwan allintapuni tupasqanta.

Leonkunaqa aswan kallpasapam ñoqanchikmantaqa, chaynataqmi Satanaspas. Chaymi mana kikillanchikmanta atipaytaqa atichwanchu. Jehová Dios yanapawaptinchikmi ichaqa atipasun (Isa. 40:31). Chaymantapas, leonkunaqa mana musyayllatam hapin  imatapas, chaymi iñiyninchikpi allin takyasqa kananchik Satanaspa toqllankunaman mana wichiykunapaq. Imaynam huk leonqa uña luwichuchata otaq ima uñachatapas puñuchkaq hapiruspan wañurachin, chaynam Diablopas chinkarachiyta munawanchik. Leonpa mikusqan animaltaqa manañam reqsiyta atichwanñachu, chaynam Satanaspa toqllanman wichiykuqkunapas ‘ñawpaq kasqanmantaqa’ aswan mana allinraq rikurinku (2 Ped. 2:20). Chaynaqa, iñiyninchikpiyá allinta takyasunchik Bibliapa nisqankunapi hapipakuspanchik (1 Ped. 5:9).

DIOSPA LLAQTANPI KASQANCHIKTAYÁ CHANINCHASUN

Diospa Llaqtanpi Punta Apaq Samuel Herdmi nirqa: “Llapanchikmi Diospa llaqtanpiqa ima rurayniyoqpas kanchik”, nispa. Arí, Jesuspa wañukusqanta servichikuspa asuykunanchikpaq Diospa rurasqanpiqa, lliw cristianokunam imapas rurayniyoq kanchik. Chaypi kasqanchiktaqa anchatam chaninchananchik. David hinam ‘wañukunanchikkama Diospa templonpi kawsakuyta munanchik’ (Sal. 27:4).

Herd iñiqmasinchikmi Salmo 92:12-14 nisqanmanta rimaspan kaynata tapurqa: “¿Imaynatam Diosqa ‘wiñachiwanchik’?”, nispa. Hinaspam chay tapukuyta kutichirqa: “Diosqa iñiyninchikpim tukuy imata qowanchik allin kananchikpaq. Ancha kusisqa hinaspa agradecesqam kananchik kunanpas chaynataq wiñaykamapas Diospa llaqtanpi kasqanchikmanta”, nispa.

DIOSTA SERVIQKUNAQA PALABRANTAM CHANINCHANKU

Diospa Llaqtanpi Punta Apaq David Splane iñiqmasinchikmi nirqa cheqap cristianokunaqa Diospa palabranta chaninchasqankumanta. Punta cristianokunapas señalasqa kaymanta tapukuyta kutichinankupaqmi, Bibliapi qawarqaku (Hech. 15:16, 17). Iskay pachak watakunapim ichaqa, wakin cristiano tukuqkuna Griego runakunapa yachayninta astawan chanincharqaku Bibliamantaqa. Chay qepamantaqmi wakin runakunaqa Bibliamanta yachachikuykunataqa cambiarurqaku iglesiapi sacerdotekunapa piensayninkuman hina chaynataq Romapi kamachiqkunapa yachayninkuman hina, chaynapim pantay yachachikuykunaman qokururqaku.

Splane iñiqmasinchikqa qawachirqam, Jesusqa kay Pachapi kachkaspan huk kaqnin rikchanachisqanpi, hanaq pachaman rinankupaq suyakuyniyoqkuna cheqap kaqta defiendenankumanta (Mat. 13:24-30). Pikuna kasqankumanta mana sumaqta yachaptinchikpas, achka runakunam pachak watakuna ñawpaqmantaraq runakunapa  piensayninkuman hina yachachikuykunatawan Bibliamanta pantay yachachikuykunataqa mana allin kasqanta qawachirqaku. Paykunamanta wakinninmi kaykuna karqaku: Sacerdote Agobardo de Lyon (siglo IX); Pedro de Bruys, Enrique de Lausana hinaspa Valdès (otaq Valdo) (siglo XII); John Wyclef (siglo XIV); William Tyndale (siglo XVI), hinaspa Henry Grew chaynataq George Storrs (siglo XIX). Kunan tiempopiqa Jehová Diospa testigonkunam Bibliamanta cheqap kaqkunata chaninchachkanku, Diospa Palabrallanpi cheqapqa kasqantataqmi reqsikunku. Chayraykum, Diospa Llaqtanpi Punta Apaqkunaqa kay 2012 watapaq Jesuspa nisqanman hina kay textota akllarunku: ‘Palabraykim cheqapqa’, niqta (Juan 17:17).

DIOSPA LLAQTANPI ESCUELAKUNAPI IMAKUNA MANA CHAYNALLA KANANMANTA

Diospa Llaqtanpi Punta Apaqkunamanta Anthony Morris iñiqmasinchikmi willarqa misionerokunawan precursor especialkuna ima rurayniyoqkuna kanankumanta. Casadokunapaq Bibliamanta Escuelam qallarinqa wakin nacionkunapiqa 2012 wata septiembre killapi. Chaymantapas, Galaad Escuelapi yachachikuykunapas cambiakurunmi. Qayna wata octubre killamantam Galaad Escuelaman riqkunaqa kanku tukuy tiemponkuwan Diosta serviqkunaña, kanmankum mana haykapipas Galaad Escuelaman riq misionerokuna, precursor especialkuna, congregacionkunata watukuqkuna chaynataq Betelpi llamkaqkunapas. Chay Escuelamanta lloqsimuqkunaqa Betel wasikunamantachá otaq congregacionkunata watukuq kaspankuchá Diospa llaqtan allin tarikunanpaq yanapanqaku, wakinkuqa hatun llaqtapi kaspankuchá congregacionkunata kallpanchanqaku hinalla Diosmanta willakunankupaq.

Karu llaqtachakunapi predicaq precursor especialkunapas achkataqmá kanqaku. 2012 watapa enero killapa qallariynin punchawmantam Solterokunapaq Bibliamanta Escuelamanta chaynataq Casadokunapaq Escuelamanta lloqsimuqkunata churachkanku pisi tiempollapaq precursor especialkuna kanankupaq, chaynapi karu llaqtachakunapipas Jehová Diosmanta astawan willakunankupaq. Paykunataqa kachachkanku huk watapaq chaynataq kimsa watakunapaqmi. Allin lloqsiptinqa churanqaku hina precursorkuna kanankupaqñam.

2011 watapi sapa wata huñunakuymanta willakuyqa ancha kusikunapaqmi karqa. Jehová Diostam mañakuniku hinalla predicaypi kallpanchasunaykichikpaq; kaykunaqa rurakun Diosta yupaychaspa hatunchananchikpaqmi.

[18 hinaspa 19 kaq paginakunapi fotokuna hinaspa recuadro]

DIOSMAN SONQO WARMIKUNA

Chay huñunakuypiqa tapurqakutaqmi isqon warmikunamanta pichqa warmikunatapas, paykunapa qosankuqa Diospa Llaqtanpi Punta Apaqkunam karqaku, paykunaqa ñam wañukunkuña. Marina Sydlik, Edith Suiter, Melita Jaracz, Melba Barry hinaspa Sydney Barber iñiqmasinchikkunaqa willakurqakum cheqapmanta imayna yachasqankumantawan imaynata tukuy sonqonkuwan Diosta servisqankumanta. Willakurqakutaqmi kusikuywan yuyarisqankuta hinaspa qosankuwan ima bendicionkuna chaskisqankumantapas. Chay tapusqanku tukuytam llapallanku kusikuywan 86 kaq takita takirqaku, chay takim nin: “Diosman sonqo warmikuna”, nispa.

[Fotokuna]

(Hanaypi) Daniel hinaspa Marina Sydlik; Grant hinaspa Edith Suiter; Theodore chaynataq Melita Jaracz

(Uraypiñataq) Lloyd hinaspa Melba Barry; Carey chaynataq Sydney Barber

[16 kaq paginapi mapa]

(Imayna kasqanmanta yachanapaq qaway kay qellqata)

Soqta Betel wasikunam México nacionpi Betelman hukllawakurun

MÉXICO

GUATEMALA

HONDURAS

EL SALVADOR

NICARAGUA

COSTA RICA

PANAMÁ

[17 kaq paginapi dibujo]

Hamuq watakunapaq Warwick (Nueva York) lawpi enteron Pachapi Betel wasikunamanta aswan hatun kaq Betel wasi