SAPA watan corporación Watch Tower Bible and Tract Society of Pennsylvania huñunakuy aparisqanqa yachayta munanapaq hinapunin. Chaytan rikuchin 127 huñunakuy ruwasqanku, aparikurqanmi sábado 1 de octubre 2011 watapi Jersey City (Nueva Jersey, Estados Unidos) llaqtapi, Hatun Huñunakuy Wasipi, chaymanmi rirqanku pachantinmanta askha cristianokuna.

Umalliq T’aqamanta Gerrit Lösch iñiqmi chaypi kaqkunata sumaqta chaskirqan. 85 nacionkunamantan hamurqanku, paykunatan yuyarichirqan pachantinpi huk hinalla kawsasqanchis allinta qhawarichiwasqanchista, Jehová Diosta hatunchasqantapas. Chay huñunakuypiqa yaqa llapanpin rimakurqan huk sonqolla kawsaymanta.

MÉXICO NACIONMANTA WILLAKUYKUNA

Qallariq discurson rikuchirqan Diospa llaqtan huk sonqolla kawsasqanta. México sucursalmanta Baltasar Perla iñiqmi chay sucursalpi kinsa hermanokunata tapurqan centroamericapi soqta sucursalkuna México sucursalwan hukllachakusqan imapi allin kasqanmanta. Paykunan willarqanku askha nacionkunamanta Betelpi kasqankuta, chhaynapin astawan kallpachanakunku. ¡Diospas huk hatun borradorwan nacionkunaq linderonta picharqonman hinan!

Chaymantapas sucursalkunaq manaña kasqanpi hermanokuna mana qonqasqa tarikunankupaqmi sapanka iñiq t’aqaman huk correo electrónico nisqata qorqanku, chhaynapi karu llaqtakunamantapas sucursalwan rimanakunankupaq.

JAPÓN NACIONPI TERREMOTO

Japón sucursalmanta James Linton iñiqmi rimarqan marzo 2011 watapi chay nacionpi terremotoq kasqanwan lamar-qochaq phoqchimusqanwanpas sasachakuykuna kasqanmanta. Askha iñiqmasinchiskunaq munakusqanku runakunan wañurqan, mana imayoqtaq qhepakurqanku. Mana terremotoq kasqanpi tiyaq Testigokunan 3.100 wasikunapi iñiqmasinkuta qorpacharqanku, hinallataq carrokunatapas pachakninpi mañarqanku. Comités Regionales de Construcción nisqamantan yanapakuy munaqkunata kacharqanku hermanokunaq wasinta allichamunankupaq. Paykunan tukuy kallpankuwan llank’arqanku, llapankun karqanku 1.700 iñiqkuna. Chaymantapas, 575 iñiqkunan yanapakurqanku Huñunakuna Wasita allichaypi, wakinmi karqanku Estados Unidosmanta.

Paykunatan sonqocharqanku astawanqa iñiyninkupin yanaparqanku. 400 más umallikunan rirqanku yanapanata necesitakusqanman. Umalliq T’aqapas paykunapi interesakusqantan rikuchirqan sucursalkuna watukuqkunamanta kallpachamunankupaq iskay iñiqkunata kachaspa. Pachantinmanta iñiqkunaq kallpachasqankupas sonqocharqanmi.

JUICIOKUNA GANASQANCHIS

Gran Bretaña sucursalmanta Stephen Hardy huk iñiqkunapiwan juicio ganasqanchismanta willasqankutan  tukuy yuyaywan uyarirqanku. Francia nacionmanta gobiernon chaypi kaq sucursalta cobrasharqan 82 millón dolarta impuestokunamanta. Chay juicion ganakurqan Tribunal Europeo de Derechos Humanos nisqapi. Chay Tribunalmi Francia gobiernota huchacharqan Artículo 9 del Convenio Europeo nisqata p’akisqanmanta, chaypin religionniyoq kayta respetachin. Juiciopi qelqakusqanpin rikuchin mana qolqeraykuchu chay sasachakuy kasqanta, ninmi: “Huk religionta mana respetay, millayta chay religionmanta rimay, chinkachiyta munaypas Artículo 9 del Convenio nisqatan p’akin”, nispa.

Tribunal Europeon Armenia nacionmanta Jehová Diospa testigonkunaq allinninpaq juiciota ruwallarqantaq. 1965 watamantapachan chay Tribunal nisharqan Convenio Europeo nisqa servicio militarta ruwanankupaqpuni kamachisqanta. Juicio ganakusqanpin ichaqa Gran Sala (Tribunal Europeo ukhupi aswan hatun autoridadkuna) nirqan Convenio Europeo nisqaqa servicio militar ruwayta mana munaqkunaq favorninpi kasqanta religionninkurayku kaqtinqa. Chay juicioq ganakusqanqa Armenia, Azerbaiyán, Turquía nacionkunatan kamachin chay leyta respetanankupaq.

RUWAKUNANPAQ KAQKUNA

Chay qhepataqa Umalliq T’aqamanta Guy Pierce iñiq rimamurqan. Allintan repararqan Nueva York llaqtapi wasikuna hatarichikunanmanta uyariqkuna yachay munasqankuta. Huk videota qhawachispan rikuchirqan Wallkill, Patterson cheqaskunapi llank’aykuna aparikusqanmanta, hinallataq Warwick, Tuxedo (Nueva York) cheqaspi hallp’akuna rantikusqanmantapas. Wallkill cheqaspin 300 cuartokunayoq wasi perqakushan, chaytan tukunqaku 2014 watapi.

Chaymantapas, Warwick cheqaspi hallp’aqa 100 hectareakunan, chaypin wasikunata perqallanqakutaq. Pierce iñiqmi nirqan: “Manan yachanchischu imatachus Jehová Dios munan Warwick cheqaspi ruwakunanta, chaywanpas, allichakushanñan pachantinpi Betelkunata qhawariq oficina chayman astakapunanpaq. Warwick cheqasmanta 10 kilometropin 20 hectárea hallp’a kashan, chaypin waqaychakunqa maquinariakunata hukkunatapas”, nispa. Nillarqantaqmi: “Perqanaykupaq kamachikuyta chaskispaqa, tawa watapin tukuyta munashayku. Chaymantañan Brooklyn kaq hallp’anchista vendepusaqku”, nispa.

Hinan tapurqan: “Chhaynaqa, ¿creeshallanchu Umalliq T’aqa manchay ñak’ariy p’unchay chayamunanpaq pisillaña kasqanta?”, nispa. Kutichirqantaq: “Arí, sichus manchay ñak’ariy chayamunqa manaraq yuyaykusqayku hunt’akushaqtin chayqa, allinpunin kanqa”, nispa.

CUIDAKUYCHIS QAPARISHAQ LEONMANTA

Chay qhepamanmi Umalliq T’aqamanta Stephen Lett cristiano rimamurqan 1 Pedro 5:8 textoq kay nisqanmanta: “Allin yuyayniyoq kaychis, makillapuni cuidakuychis, awqaykichis saqraqa qaparishaq león hinaraqmi tukuyneqta purishan pillatapas oqoykunanpaq maskhaspa”, nispa. Willamurqanmi Leonpa imayna kasqan allinta Pedroq rikch’anachisqanwan tupasqanta.

Huk leonqa aswan kallpayoq, aswan phawaqmi ñoqanchismanta, Satanaspas chhaynallataqmi. Chhaynaqa atiyllanchiswanqa manan maqanakuyta ayqekuytapas atisunmanchu, Jehová Diospa yanapaynintan necesitanchis (Isa. 40:31). Leonkunaqa mana reparachikuq hinallan animalkunata hap’inku, chaymi manapuni espiritual laqhayaqpi kanachu, chaypin Saqraqa hap’iwasunman. Imaynan  leonqa mana kutipakuq animalkunata otaq puñushaq uñakunata hap’in chay hinatan Saqrapas mana khuyapayaspa oqoykuyta munawanchis. Leonpa hap’isqan animalkunaqa mana reqsiymi qhepanku, chhaynan Satanaspa oqoykusqankunaqa ‘aswan mana allinraq kapunku’ manaraq Diosta reqsishaspa kawsasqankumantaqa (2 Ped. 2:20). Chhaynaqa, qaqan sayananchis Bibliapi yachasqanchisman hina kawsaspa (1 Ped. 5:9).

DIOSPA WASINPI KASQANCHIS

Umalli T’aqamanta Samuel Herd iñiq nirqan: “Llapanchispas atisunmanmi Jehová Diospa wasinpi kayta”, nispa. Chhaynaqa, llapanchismi Diospa espiritual yupaychana wasinpi kayta atisunman, chayqa Jesuspa wañusqanpi iñisqanchisrayku payta yupaychay atisqanchismi. Chaytan ancha chaninpaq hap’inanchis. David hinan ñoqanchispas ‘tukuy kawsasqanchis p’unchaykunapi Señor Diospa wasinpi kayta’ munanchis (Salmo 27:4).

Chaymantapas Salmo 92:12-14 textomanta rimamuspan tapumurqan: “¿Imaynatan Jehová Dios t’ikarichiwanchis?” nispa. Kutichirqantaq: “Llaqtanpin kallpata qowanchis, pakaykuwanchis, cheqaq kaqmanta thasnuykuq unutapas qowanchis. Anchatan agradecekunanchis Diospa wasinpi wiñaypaq thakpi tiyasqanchismanta”, nispa.

BIBLIATAN RESPETANKU

Chay qhepamanmi Umalliq T’aqamanta David Splane nimurqan cheqaq cristianokunaqa Bibliata respetasqankuta. Apostolkunaq tiemponpin huk sasachakuy karqan qhari kaynin qaracha señalaymanta, chaytan allicharqanku Diospa Siminpa yanapayninwan (Hech. 15:16, 17). Ichaqa 100-200 watakunapin filosofía griega estudiaq runakuna cristianoman tukuspa aswan allinpaq yachasqankuta qhawarirqanku Bibliaq yachachikuyninmantaqa. Qhepamantaq Iglesiapi Umalliqkunaq, Romapi kamachikuqkunaq yuyaykusqankuta aswan allinpaq qhawarirqanku, chaymi Bibliapi yachachikuykunata cambiarqanku, chhaynapin pantasqa yachachikuykuna paqarirqan.

Huk rikch’anachiypin Jesús willarqan akllasqa cristianokunaqa cheqaq kaqkunata yachachishanallankuta, chaytan Splane iñiq rimamurqan (Mat. 13: 24-30). Manan sut’itaqa yachasunmanchu pikunachus chay runakuna kasqanta, ichaqa askhan pantasqa yachachikuykunata huchacharqanku chaykunamantan wakin karqan: arzobispo Agobardo de Lyon 800-900 watakunapi; Pedro de Bruys, Enrique de Lausana, Valdès (Valdo) 1100-1200 watakunapi; John Wyclef 1300-1400 watakunapi; William Tyndale 1500-1600 watakunapi, Henry Grew, George Storrs 1800-1900 watakunapi. Kunanpas Jehová Diospa testigonkunaqa anchatan respetanku Bibliapi kamachikuykunata, creenkutaqmi chayllapi cheqaq yachachikuykuna tarikusqanta. Chayraykun Umalliq T’aqaqa kay 2012 watapaq textota horqomurqan Juan 17:17 textomanta, ninmi: “Simiykiqa cheqaq-kaypunin”, nispa.

ESCUELAKUNAPI CAMBIOKUNA

Umalliq T’aqamanta Anthony Morris iñiqmi willamurqan misionerokunapaq precursor especialkunapaqwan askha cambiokuna kasqanta. Casarasqa cristianokunapaq Escuelan wakin nacionkunapi aparikunqa setiembre 2012 watamantapacha. Chaymantapas, octubre killamantapachan Galaad Escuelamanqa rishanku tukuy tiemponkuwan Diosta serviqkunalla. Paykunan Galaadman mana riq misionerokuna, precursor especialkuna, watukuq umallikuna, betelitakunapas. Chaymanta lloqsiqkunaqa anchatan kallpachanqaku Diospa llaqtanta sucursalkunapi kaspanku, watukuq umallikuna kaspa otaq hatun llaqtakunapi iñiq t’aqakunata predicanankupaq kallpachaspa.

Mana hayk’aq predicakusqan llaqtakunapin astawan precursor especialkuna kanqa. Enero 2012 watamantapachan Soltero qharikunapaq Escuelamanta, Casarasqa Cristianokunapaq Escuelamanta lloqsiqkuna huk wata otaq kinsa wata precursor especial kashanku, chhaynapi karu llaqtakunapi predicayta qallarichinankupaq. Allin llank’aqkunaqa precursor especial llank’aypin qhepakapunqaku.

2011 watapi sapa wata ruwakuq huñunakuyqa kusikunapaqmi karqan. Anchatan Diosta mañakuyku ruway munasqaykuta bendecinanpaq, chaykunaqa ruwakushan astawan predicay aparikunanpaqmi, pachantinpi huk sonqolla kawsananchispaq ima, chhaynapi Diosta hatunchanapaq.

[18, 19 paginakunapi fotokuna recuadropiwan]

DIOS SONQO WARMIKUNA

Umalliq T’aqamanta wañukapuq isqon cristianokunaq esposankun chaypi kasharqanku, paykunamanta phisqa willakurqanku experienciankuta. Marina Sydlik, Edith Suiter, Melita Jaracz, Melba Barry, Sydney Barber paykunan willakurqanku cheqaq Diosta imaynapi reqsisqankuta tukuy tiemponkuwan servisqankutapas. Chaymantapas yuyarirqankun munay tiempokunata, willarqankutaqmi qosankuwan kuska bendicionkuna chaskisqankuta. Chay huñunakuy tukupunanpaqqa llapa chaypi kaqkunan tukuy sonqowan takirqanku “Dios sonqo warmikuna” nisqa 86 takita.

[Fotokuna]

(Wichaypi) Daniel, Marina Sydlik; Grant, Edith Suiter; Theodore, Melita Jaracz

(Uraypi) Lloyd, Melba Barry; Carey, Sydney Barber

[16 paginapi mapa]

(Imaynapuni kasqanta yachanaykipaq, qelqata qhaway)

Soqta sucursalkunan México sucursalwan hukllachakapun

MÉXICO

GUATEMALA

HONDURAS

EL SALVADOR

NICARAGUA

COSTA RICA

PANAMÁ

[17 paginapi dibujo]

Warwick (Nueva York), pachantinpi Betelkunata qhawariq oficina chayman astakunanpaqmi yuyaykushayku