Ibaver I Mkombo U sha Inyom

Mkombo u Yange Tese Mzough man Mbaawashima mba Dedoo La

MBAMKOMBO mba sha inyom mba Watch Tower Bible and Tract Society of Pennsylvania ve eren la ka ve doo kpishi. Kape mkombo u sha inyom u sha kwa 127, u i er sha iyange i Sati, Oktoba 1, 2011 la kpa lu je la. Mba yange i lôhô ve mkombo ne la, mough ken ityar kposo kposo va kohol ken Iyou i Mkohol i Mbashiada mba Yehova i hen gar u Jersey City, ken kpentar u New Jersey, ken tar u Amerika.

Anmgbian Gerrit Lösch u a lu môm ken Mbahemenev mba Shin Itine la sugh ikpelaior i i va mkombo ne la za van. Shi yange kaa a mba ve mough ken ityar i kuman 85 ve va mkombo ne la ér, mba ken tsombor wase ú sha tar cii, u u lu ken mzough u a lu hen atô u ma nongoior ugen môm sha tar ga la. Imba mzough ne ne Yehova icivir shi ka shiada u dedoo kpaa. Jighilii yô, yange i hemba teren ishember i mzough la ken mkombo ne.

I NA IBAVER I DEDOO I KEN TAR U MEXICO

Kwaghôron u yange i hii nan la lu a akav a tesen er ior mba Yehova ve lu ken mzough yô. I magh afishi a branci a ken ityar igen ataratar ken Icombotar i Amerika, nahan afishi a branci a ken tar u Mexico la gema nengen sha ityar ne. Anmgbian Baltasar Perla, u a eren tom ken afishi a branci a ken tar u Mexico la, yange tôv anmgbianev mbagenev utar, mba ve kpa ve lu ken tsombor u Betel u ken Mexico la, pine ve ér ve pase kwagh u a dugh ken m-magh u i magh afishi a branci ne la. Ve kaa ér tsombor u Betel u ken tar u Mexico la seer ngeen a anmgbianev mba ve dugh sha ajiir kposo kposo la hegen cii, nahan ishima hemba taver hanma or. Ka inja er Aôndo kar a akighir a ityar ve la kera nahan.

M-magh u i magh afishi a branci ne ijiir i môm la va a mtaver ugen. Mtaver shon yô, ka u wasen mbapasenkwagh ve nenge ér, shin er afishi a branci a kera lu ken ityar ve ga nahan kpa, i pav ve a nongo u Yehova ga. Sha ityôkyaa ne yô, i na hanma tiônnongo adereshi u sha Intanet, u i yer ér e-mail la, sha er mbapasenkwagh mba ve lu sha ajiir a icaa je kpa vea fatyô u lamen a afishi a branci jighilii yô.

IBAVER I KEN TAR U JAPAN

Anmgbian James Linton u a eren tom ken afishi a branci a ken tar u Japan la pase er tartenger u fiir agôndoamnger, u i yer ér tsunami la yange u ta sha tar u Japan ken uwer u Maaci 2011 yô, man er kwagh ne yange bende a anmgbianev la kpaa. Anmgbianev kpishi ior vev saa ku, shi akaa a ve kpa saa. Mbashiada mba Yehova mba aahe ne er sha ajiir a ve ga yô, yange ve na anmgbianev mban ajiir a tsan a hemban 3,100 shi ve wase ve a akaahendan uderi uderi. Kômatii mba Nengen sha Tom Kwaghmaan hen Haregh la yange tindi ior mba nan iwasen, ve za er tom kpoghuloo a m-mem shio, sha u sôron uya mba anmgbianev. Ior mba hemban iyenge 1,700 yange ve na ayol a ve sha u wasen hanma ijiir i gba u a er tom cii. Mba nan iwasen mba ken tar u Amerika mbagen yange ve wase sha u hiden maan Ayou a Tartor, man lu iorov 575 yange ve na ayol a ve sha u eren tom ne ye.

Yange i ver ishima kpishi sha mlu u ken jijingi u anmgbianev mba aahe er ve la, shi i sur ve asema kpishi kpaa. Mbatamen mba hemban 400 yange ve za er tom u kuran ilev ape kwagh gba sha mbakuran la. Mbahemenev mba Shin Itine yange ve tindi mbatamen mba sôron afishi a branci uhar, mba ve mough ken afishi a shin tine yô, ér ve za taver anmgbianev mba nomso man mba kasev mba aahe er ve la asema. Mbashiada mba Yehova tar sha won cii tese ér kwagh u anmgbianev mba aahe er ve la  gba ve ishima tsung, kwagh ne kpa sur anmgbianev mban asema kpishi.

AJIR A SE HEMBE YÔ

Shighe u anmgbian Stephen Hardy u a eren tom ken afishi a branci a ken tar u Ingila la vea anmgbianev mbagenev kpishi ve lu lamen sha kwagh u ajir a se sember hemban la yô, mba ve lu hen mkombo ne kegh ato a ve zulee. U tesen ikyav yô, gomoti u tar u France yange soo u kighir mzough u Mbashiada mba Yehova ér ve ta kpandegh ku kuman udola miliôn 82 (sha inyaregh ki Amerika). Atejir u Yuropa u̱ Nan Or Ian i Eren Kwagh sha Ishima i Nan la kure ijir ne, kaa ér gomoti u tar France per tindi u ken Ngeren u sha 9, u Mzough u Ityar i Yuropa a we sha kwagh u ian i ior ve lu a mi i eren kwaghaôndo u ve soo la. Kwagh u Atejir ne kure ijir ve ôr la tese ér, lu inyaregh na ve gomoti u tar u France lu kighir Mbashiada mba Yehova ér ve ta kpandegh ga, sha ci u Atejir la kaa ér: “Mvende u gomoti u tar u France a vende u nan mzough u Mbashiada mba Yehova ian i eren kwaghaôndo ve la, man mnenge u ve lu nôngon ér vea cir kwaghaôndo ne ken tar la, kua iliam i ve lu lamen sha a ve dang la tese er ve per tindi u sha 9 u Mzough u Ityar i Yuropa a we sha kwagh u ian i ior ve lu a mi i eren kwaghaôndo u ve soo la.”

Atejir u Yuropa u̱ Nan Or Ian i Eren Kwagh sha Ishima i Nan la shi ta ikyaa a vese sha ijir i Mbashiada mba Yehova vea tar u Armenia la. Hii ken inyom i 1965 la je, Atejir ne na jighjigh ér Mzough u Ityar i Yuropa la ngu a na or ian i vendan wada u gomoti a ne ér ior ve nyôr shoja la ga. Nahan kpa, Mbaajiriv mba Vesen mba Atejir u Yuropa u̱ Nan Or Ian i Eren Kwagh sha Ishima i Nan la kure ijir ne ér, Mzough u Ityar i Yuropa kaa ér, or ngu a ian i vendan tom shojaa, aluer akaa a nan ne jighjigh a mi ken kwaghaôndo u nan taveraa la lumun nan u eren tom shojaa ga yô. Er Atejir ne a kur ijir ne nahan yô, gba kpee u tar u Armenia man tar u Azerbaijan kua tar u Turkey cii ua wa ikyo sha ian i ior ve lu a mi i vendan tom shojaa la.

KWAGHMAAN U A LU ZAN HEMEN YÔ

Anmgbian Guy Pierce u a lu môm ken Mbahemenev mba Shin Itine la kpa yange lam, kaa ér sar hanma or u nan lu hen mkombo la cii u fan er kwaghmaan u se lu maan ken kpentar u New York la a lu zan yô. Nahan a wa tser u tesen kwagh u a lu zan hemen hen iyagh yasegh ki ki lu ken geri u Wallkill man Patterson, kua hen ijiir i se sember yamen ken geri u Warwick man Tuxedo, ken kpentar u New York la. Mba maan ijiir i tsan i lun a ayou a tsan ker 300 ken iyagh yasegh ki ken Wallkill la, man i wa ishima u been kwaghmaan ne ken inyom i 2014.

Shi se mba kohol iyol i maan ayou a he hen zegejiir u se sember yamen hen geri u Warwick la. Anmgbian Pierce kaa ér, “Shin er se fe ishima i Yehova sha kwagh u ijiir yase i ken geri u Warwick la jighilii ga nahan kpa, se za hemen u maan ijiir la, sha er se mough a afishi a shin tine a Mbashiada mba Yehova se yem a mi her yô.” Se wa ishima u veren umashin kua ikyav mbi maan kwagh a mi hen ijiir igen i gbe ica a ijiir yase i ken Warwick la i kom ukilomita 10 nahan yô. Anmgbian Pierce kaa ér, “A naan se ian i hiin kwaghmaan yô, se ver ishima u been tom la jimin cii ken atô u anyom anyiin. Maa se tee iyagh yasegh ki ken Brooklyn la.”

Anmgbian Pierce pine ér: “Mbahemenev mba Shin Itine kera hen ér se mgbôghom a zegecan ga shinii?” A hide a na mlumun ér, “Aluer zegecan va bunde mbaawashima asev yô, a lu kwagh u doon tsung je!”

WA IKYO SHA BEGHA U TAN KUME LA

Anmgbian Stephen Lett, u un kpa a lu môm ken Mbahemenev mba Shin Itine la kpa lam sha kwagh u i nger ken takerada u 1 Peteru 5:8 la. Ijiir la kaa ér: “Lu nen geng ge geng shi kuran nen kpaa, orihyom wen diabolo ngu zenden er begha u tan kume nahan, keren or u una ya yô.” Anmgbian Lett kaa ér, aluer se hen sha aeren a begha yô, se hemba kaven er i hii ve Peteru yange tôô Diabolo kar sha begha yô.

Er ubegha ve hembe taver iyol a uumace shi ve hembe wan kpaver a uumace yô, mayange se ker ser se nôngo kwagh a Satan shin se hemba un ayem sha tahav asev ga. Gba u Yehova una wase se. (Yes. 40:31) Begha ka a meen inyam myer, nahan aluer se soo ser Satan a kôr se ga yô,  gba u se fa igbenda i a keren u tan num sha a vese la. Di er begha ka a wua ihyo i i lu inyam i tswam ga, shin ka a wua wan jakitoho nahan, kape kunya u ker Satan a or môm ga shi una soo u wuan se je la. Zum u begha ka una kôr inyam una ya a kuma un yô, inyam la i ande javer javer, kape mba Satan a ker ve la kpa “mkur ve u masejime la [ka a] hemba vihin a mlu ve u hiihii” je la. (2 Pet. 2:20) Nahan gba u se tile dông se nôngo kwagh a Satan sha u eren sha akaa a se henen ken Bibilo la.—1 Pet. 5:9.

IAN I U LU A MI KEN MCIVIR U YEHOVA LA I GBA U KWAGH

Anmgbian Samuel Herd, u un kpa a lu môm ken Mbahemenev mba Shin Itine la di yange mough na kwaghôron kaa ér: “Se cii se mba a ian ken mcivir u Yehova.” Inja na yô, Mbakristu mba ve ne nagh ku ipaan ku Yesu la jighjigh cii mba a ian i civir Aôndo sha gbenda u una lumun a mcivir ve yô. Se cii doo u ian i se lu a mi ken mcivir u Yehova la ia gba se kwagh. Davidi yange soo ér ma un “lu ken iyou i TER” sha ayange a uma na cii. Se kpa sar se u civir Yehova sha ayange a uma wase cii.—Ps. 27:4.

Anmgbian Herd yange ôr kwagh u i nger ken Pasalmi 92:12-14 la, maa pine ér: “Yehova ngu a na se hôm nena?” A hide a na mlumun ér: “Aôndo surun se asema shi kor se shi tesen se mimi u kundun iyol, ken paradiso u ken jijingi u se lu ker ne.” Anmgbian Herd maa taver mba ve lu hen mkombo la asema ér: “Doo u se sugh Yehova sha kwagh ne. I̱ saan se iyol u lun ken mcivir u Yehova, i de lu sha shighe kpuaa tseegh ga, kpa i lu gbem sha won.”

MBAKRISTU MBA NE MKAANEM MA AÔNDO ICIVIR

Anmgbian David Splane, u un kpa a lu môm ken Mbahemenev mba Shin Itine la na kwaghôron u dondon pase ér Mbakristu mba mimi mba ne Mkaanem ma Aôndo icivir hanma shighe cii. Ken derianyom u hiihii la, ve suur sha mkaanem ma Aôndo sha u sôron zayol ugen u va sha kwagh u icôngo yô. (Aer. 15:16, 17) Kpa sha derianyom u sha uhar la, mbagenev ken mba yange i tese ve kwaghfan u Mbagrika, mba ve senge ér ve mba Mbakristu yô, hii u nengen ér kwaghfan u Mbagrika la hemba gban kwagh a Icighanruamabera. Ken masejime yô, mbagenev ken a ve hii u tesen ior mbamhen mba ator a tartor u Roma kua mbamhen mba Mbahemenev mba Côôci, kera lu atesen a Bibilo ga. Kape atesen a aiegh yange hii je la.

Anmgbian Splane seer tan iwanger sha injakwagh igen i Yesu yange ôr yô. Injakwagh ne tese ér hii sha derianyom u hiihii la je, Mbakristu mba mimi mba i shigh ve mkurem mbara vea bee sha tar kera ma shighe môm ga. (Mat. 13:24-30) Se fatyô u fan ve jighilii ga. Nahan kpa, ior kpishi yange ve venda atesen a aiegh a ukwaghaôndo man  aeren a ve la. Mbagenev ken ambaaior ne lu Bishôp u tamen ugen hen gar u Lyons, ken tar u France, u i yilan un ér Agobard, u lu sha derianyom u sha 9 la, kua orgen ken gar u Bruys, i yilan un ér Peter, man Henry u ken gar u Lausanne man Valdès, (shin Waldo), mban di ve lu uma sha derianyom u sha 12 la. Mbagen yô, lu John Wycliffe, u ken derianyom u sha 14 la, man William Tyndale, u sha derianyom u sha 16 la, kua Henry Grew man George Storrs, mba ve lu uma sha derianyom u sha 19 la. Nyian Mbashiada mba Yehova za hemen u dondon kwaghwan u Bibilo, shi jighjigh ve u nan har sha mimi u ken Bibilo la tseegh. Ka nahan ve Mbahemenev mba Shin Itine ve tsough ivur i sha inyom i 2012 la ken takerada u Yohane 17:17 ye. Ivur la kaa ér: “Ka kwaghôron Wou je a lu mimi ye.”

AKAA A DOON A I SER SHA KWAGH U IMAKERANTA I TESEN IOR BIBILO YÔ

Anmgbian Anthony Morris, a lu môm ken Mbahemenev mba Shin Itine la yange yôô er i ser akaa sha kwagh u mbamishen man upania yô. A kôron ken uwer u Setemba 2012 yô, a hii u nyôron Makeranta u Henen Bibilo Ú Mbakristu Mba Ve Vese Ayol a Ve Yô, ken ityar igen. Hii ken uwer u Oktoba ken inyom i bee la je, i gema awashima u Makeranta u Gileadi la. Hegen mba a lu tsaase ve ken makeranta u Gileadi cii, a lu mba ve vande lun ken tom u pasen kwagh hanma shighe la yô. Mbagen ker ka mbamishen mba ve vande zan makeranta u Gileadi ga yô; mbagen ka ikpur pania, mbagenev di ka mbakuran mba ningir sha shin mba eren tom shin Betel. Mba vea bee u la, a tindi ve u za eren tom u taver ior mba Aôndo ishima hen afishi a ubranci shin tom u ningir sha, gayô a tindi ve sha ajiir a ior ve ngee kpishi yô, sha u ve̱ za taver atôônanongo asema ken tom kwaghpasen.

Yange i yôô ér, a kôron ken uwer u Janawari 2012 yô, mba vea za Makeranta u Henen Bibilo Ú Anmgbianev mba Nomso mba Lun Kwav la, kua Makeranta u Henen Bibilo Ú Mbakristu Mba Ve Vese Ayol a Ve la cii vea er tom u ikpur pania sha anshighe kpuaa. Vea za pase kwagh sha ajiir a mbapasenkwagh ve lu kpuaa, shin ve lu ga kuaa yô. Hanma inyom yô, a tindin ve vea za eren tom u ikpur pania mape. A tindin ve sha ajiir kposo kposo anyom a karen a kuman atar yô, mba ve er tsembelee la vea za hemen u eren tom u ikpur pania.

Mkombo u sha inyom, u ken inyom i 2011 la yange lu shighe u saan iyol. Ior mba Aôndo mba nôngon kpoghuloo sha u vea seer pasen kwagh sha ajiir kpishi sha tar shi vea kohol anmgbianev tar sha won cii imôngo ken mzough yô. Se na jighjigh ser Yehova una ver tom wase doo doo, shi ua va un a icivir man iwuese kpaa.

[Ngeren u kiriki/Foto u sha peeji 18, 19]

Seer Fan ve

Yange i tôv kasev mba côgholov mba Mbahemenev mba Shin Itine mba utaan ken mkombo u sha inyom u yange i nyôr sha iyange i Sati, Oktoba 1, 2011 la. Anmgbianev mba kasev mban lu Marina Sydlik man Edith Suiter man Melita Jaracz man Melba Barry kua Sydney Barber. Ve cii yange ve pase er yange ve fa mimi la, man er yange ve hii u eren tom u pasen kwagh hanma shighe la kpaa. Hanmô ve nan pase mba ve lu hen mkombo la akaa a nan umbur sha kwagh u nom u nan man averen a yange nan zua a mi vea nom u nan kpaa. Mba yange ve lu hen mkombo ne wa icam namba 86 sha u kuusu kwaghtôvon u injaa ne. Icam ne ngi a itinekwagh ér, “Faithful Women, Christian Sisters.”

[Foto]

(Sha ityou) Daniel man Marina Sydlik; Grant man Edith Suiter; Theodore man Melita Jaracz

(Shin inya) LIoyd man Melba Barry; Carey man Sydney Barber

[Foto u tesen ijiir u sha peeji 16]

(U soo u ôron ngeren ne cii yô, nenge takerada u)

I magh afishi a branci ataratar ijiir i môm, afishi a branci a ken tar u Mexico zom nga nengen sha a

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Ufoto mba sha peeji 17 la]

Kwaghkperan u afishi a shin itine a Mbashiada mba Yehova a hen geri u Warwick, ken kpentar u New York la