Tuku talichuwinalh ktamakxtumit xaʼakgatunu kata

Tamakxtumit litasiyalh pi lu tlan latalalin chu tlan tuku natlawakan

TAMAKXTUMIT xaʼakgatunu kata xla Watch Tower Bible and Tract Society of Pennsylvania putum kilhtamaku lu kaks malakawaninan. Nachuna lalh ktamakxtumit número 127, nema tatlawalh sábado 1 xla octubre kata 2011, Salón xla Asambleas xalak Jersey City (Nueva Jersey, Estados Unidos), chu kilakgolh xala lakalhuwa países.

Gerrit Lösch tiku makgtapakgsi Lakgkgolotsin tiku Pulalinkgo xTatayananin Jehová, kawanilh lu tlan pi tanitantit, xalak tatipuxamakitsis países. Kamalakapastakalh pi xlakata lu tlan xlatalalin, tlan xkalichuwinankan chu xmalanki Jehová. Chu kʼuma tamakxtumit lhuwa lichuwinanka la lu tlan latalalinkan.

LU TLAN TAMAKATSININ XALAK MÉXICO

Tuku pulana lichuwinanka kprograma litasiya pi xkachikin Jehová lu tlan latalalin. Baltasar Perla, tiku wi kBetel xalak México, kakgalhskilh chatutu natalan tiku na anta skujkgo la xkitaxtuma taskujut xlakata akxtum xlakgonit akgchaxan sucursales xalak centroamerica nema makxtum katlawaka kMéxico. Xlakan wankgolh pi familia Betel tanu tanu xkachikinkan, tlakg lhuwa lamatliwakglhkgo chu lipaxuwakgo xlakata tanu tanu xlakatsukutkan. ¡Xtachuna la Dios xtiyalh lanka lixapan chu xapalh tuku xkamapapitsi akgatunu países!

Pulaktum tuku tuwa kmakgantaxtiw wa pi tiku lichuwinankgo Dios chu lamakgolh kpaíses niku nialh anan sucursales, ni xmakgkatsikgolh pi makgat xwilanikgolh kxkachikin Jehová. Wa xlakata, putum congregaciones kamaxkika akgtum correo electrónico. Chuna asta tiku lu lakgamakgat wilakgolh tlan natachuwinankgo sucursal xalak México.

AKXNI TACHIKILH TIYAT KJAPÓN

James Linton, tiku wi ksucursal xalak Japón, lichuwinalh tuku kitaxtulh akxni tachikilh tiyat chu takutcha chuchut kpupunu marzo kata 2011. Lhuwa kinatalankan nikgolh xfamiliajkan chu makgatsankgakgolh tuku xkgalhikgo. Lhuwa xtatayananin Jehová tiku nitu lanikgolh, kamaxkikgolh 3,100 chiki niku xtawilakgolh chu lhuwa masakuaninankgolh xputlawkan tiku makgatsankgakgolh tuku xkgalhikgo. Comités Regionales de Construcción malakgachakgolh natalan tiku lhuwa skujkgolh chu xkaxtlawakgolh xchikkan natalan. Liwaka 1,700 tiku makgtayanankgolh. Chu 575 makgtayanankgolh nakakaxtlawakan Pukgalhtawakga xla xTatayananin Jehová, chu akgtum grupo xminkgonitancha kʼEstados Unidos.

Tuku tlakg xlakaskinka akxilhkgolh wa nakamatliwakglhnikan xtakanajlakan tiku nitlan tuku kaʼakgspulalh. Liwaka akgtati ciento lakgkgolotsin tiku ankgolh makgtayanankgolh niku xtalakaskima. Lakgkgolotsin tiku Pulalinkgo xTatayananin Jehová limasiyakgolh pi xkalilakgaputsa, wa xlakata kamatliwakglhkgolh. Nachuna lu kamatliwakglhli lakwan tachuwin nema malakgachakgolh natalan xlikalanka katiyatni.

TLAJANANKGOLH KPUMAPAKGSIN

Tiku kilakgolh liwana kgaxmatkgolh tuku wa Stephen Hardy, tiku xminitancha ksucursal xalak Gran  Bretaña; chu atanu natalan xlakata la lakkaxtlawakgolh taʼakglhuwit kxlakatin pumapakgsin. Mapakgsina xalak Francia xkaskinima xtatayananin Jehová nalixokgonankgo 82,000,000 dólares. Linka uma taʼakglhuwit kTribunal Europeo de Derechos Humanos chu uma pumapakgsin wa pi mapakgsina xalak Francia xlakatsalanit Artículo 9 xla Convenio Europeo, niku wan pi chatunu chatunu tlan nakgalhi takanajla nema nalakaskin. Akxni tsokgwilika tuku xʼama tatlawa limasiyalh pi ni kaj xlakaskinkgo tumin, xlakata chuna wan: «Akxni ni makgamakglhtinankan akgtum takanajla, akxni lakxtlawaputunkan chu nitlan lichuwinankan akgtum takanajla limasiya pi ni tamakgantaxtima Artículo 9 xla Convenio».

Tribunal Europeo na kinkamakgtayakgon xlakata taʼakglhuwit nema xkgalhikgo xtatayananin Jehová xalak Armenia. Lata kata 1965 uma país xwan pi Convenio Europeo, ni xmasta talakaskin wi tiku ni soldado xlitaxtulh. Tuku wa Gran Sala, tiku tlakg kgalhi limapakgsin kTribunal Europeo, wa pi Convenio masta talakaskin «akxni wi tiku ni soldado litaxtuputun xlakata [xtalakapastakni] ni maxki talakaskin». Uma tuku wanka tlawa pi Armenia chu atanu países la Azerbaiyán chu Turquía na natlawakgo uma.

LAKKAXWILIKAN TUKU NATLAWAKAN

Alistalh na akgchuwinalh Guy Pierce, tiku na tamakgtapakgsi Lakgkgolotsin tiku Pulalinkgo xTatayananin Jehová. Lichuwinalh pi putum xkatsiputunkgo xlakata tuku xtlawamaka kʼestado xalak Nueva York. Limaklakaskilh akgtum video xlakata xlimasiyalh la an taskujut kWallkill chu kPatterson, nachuna tiyat nema aku tamawaka kWarwick chu Tuxedo (Nueva York). Anta Wallkill tlawamaka chiki nema nakgalhi akgtutu ciento cuartos, chu namasputukan kkata 2014.

Nachuna talakpuwanit nalakkaxwilikan 100 hectáreas kWarwick. Tala Pierce wa: «Maski ni liwana katsiyaw tuku lakaskin Jehová xlakata Warwick, lakkaxwilimaw tiyat xlakata anta natawila niku napulalinkan xtaskujutkan xtatayananin Jehová xlikalanka Katiyatni». Na talakpuwanit natamaklakaskin 20 hectáreas nema wi 10 kilómetros knorte xla Warwick xlakata anta namakikan máquinas chu tuku natamaklakaskin. Tala Pierce na wa: «Akxni nakinkamaxkikan talakaskin natsukuyaw skujaw, akgtati kata litlawaputunkgoyaw putum edificios. Alistalh tlan nastayaw tuku kgalhiyaw kBrooklyn».

Na kgalhskininalh: «¿Wamputun uma pi Lakgkgolotsin tiku Pulalinkgo xTatayananin Jehová lakpuwankgo pi makgasku tsankga namin lanka tapatin?». Xla kgalhtinalh: «¡Ni chuna! Komo lanka tapatin nalakxtlawa tuku lakapastaknitaw, ¡lu tlan nawan!».

SKGALALH KATAWILAW XLAKATA XATSINKSNI LAPANIT

Stephen Lett, tiku na tamakgtapakgsi Lakgkgolotsin tiku Pulalinkgo xTatayananin Jehová, lichuwinalh xlakata 1 Pedro 5:8, nema wan: «Lakatitum nalakapastakatit, chu na skgalalh natawilayatit, xampi wa Akgskgawini, xtachuna xatsinksni lapanit, lama kmintuntamaknikan, putsama wanti nachipay, naway». Lichuwinalh la likatsikgo leones chu lu tlan pi Pedro limaklakaskilh uma liʼakxilhtit.

Pulana, leones lu lakgtliwakga chu lakapala kgosnankgo nixawa akinin chu Satanás nachuna tlawa. Wa xlakata, ni kiakstukan natalachipayaw chu natsalaniputunaw. Maklakaskinaw xtamakgtay Jehová (Is. 40:31). Nachuna, leones tsinu tsinu talakatsuwinikgo akxni wi tiku waputunkgo, wa xlakata kuenta katlawaw kintakanajlakan chu chuna Satanás ni nakinkaʼakgchipayan. Chuna la tantum león makgni antílope nema nitu tlawa o kskgata tantun cebra nema lhtatanit, Akgskgawini nitlan likatsi chu kinkamasputuputunan. Chuna la ni talakgapasa tuku wanit león, tiku kaʼakgchipa Satanás «kaj xaliwaka ntu nitlan akgspulakgo kxtalatamankan ni xawa lantla xakgasiyaj» akxni xlakgapaskgo tuku  xaxlikana (2 Ped. 2:20). Wa xlakata talakaskin nalakatayaw Satanás, akxni kgalhakgaxmataw tuku wan Biblia (1 Ped. 5:9).

LU XLAKASKINKA KAʼAKXILHWI PI WILAW KXCHIK JEHOVÁ

Samuel Herd, tiku na makgtapakgsi Lakgkgolotsin tiku Pulalinkgo xTatayananin Jehová mastalh uma taʼakgchuwin: «Putum kgalhiyaw kimputawilhkan kchik Jehová». Xlikana, kstalaninanin Cristo kgalhikgo xputawilh «xchik» Dios, kxtemplo xaʼespiritual, tuku Dios lakkaxwilinit xlakata nakakninanikgo kxtalakgmaxtut Jesús. Xlakata anta wilaw lu lanka talakgalhaman naʼakxilhaw. La David, “Latamaputunaw nak kxchik Dios, ixliwakg kilhtamaku lata lamaw” (Sal. 27:4).

Tala Herd lichuwinalh Salmo 92:12-14 chu kgalhskininalh: «¿La tlawa Jehová pi “napakglha[w]” o naxananaw?». Alistalh wa: «Paraíso xaʼespiritual, Dios tlan kinkamamakgkatsiniyan, kinkakuentajtlawayan chu kinkamasiyaniyan tuku xaxlikana. Kilipaxtikatsinitkan chu tlan kilimakgkatsitkan xlakata wilaw kxchik Jehová, chu ni kaj tsinu wata putum kilhtamaku».

KSTALANINANIN CRISTO MAXKIKGO KAKNI XTACHUWIN DIOS

David Splane, atanu tiku na makgtapakgsi Lakgkgolotsin tiku Pulalinkgo xTatayananin Jehová wa pi xaxlikana kstalaninanin Cristo putum kilhtamaku maxkikgo kakni xTachuwin Dios. Kxapulana siglo limaklakaskinkgolh xlakata nalakkaxwilikgo taʼakglhuwit xla circuncisión (Hech. 15:16, 17). Pero xliʼakgtiy siglo, makgapitsi tiku xwankgo pi kstalaninanin Cristo chu xlikgalhtawakgakgonit xliskgalala griegos tlakg xlakaskinka akxilhkgolh xliskgalalakan chu ni tuku xmasiya Biblia. Alistalh tlakg kuenta katlawanikgolh Tiku Malakatsukikgolh Takanajla xla Católicos chu mapakgsinanin xalak Roma nixawa xTachuwin Dios chu chuna lakatsukukgolh lhuwa nixaxlikana tamasiy.

Tala Splane wa pi Jesús, lichuwinalh kʼakgtum parábola, pi putum kilhtamaku xʼamakgolh tawilakgo xaxlikana kstalaninanin Cristo nema kalaksakkanit unu kKatiyatni chu xʼamakgolh tatayakgo xaxlikana takanajla (Mat. 13:24-30). Maski nila wanaw tiku umakgolh, lhuwa latamanin lichuwinankgonit nixaxlikana takanajla chu talismanin nema ni takilhtinit  kBiblia. Makgapitsi wa umakgolh, arzobispo Agobardo de Lyon ksiglo IX; Pedro de Bruys, Enrique de Lausana chu Valdès (o Valdo) ksiglo XII; John Wyclef ksiglo XIV; William Tyndale ksiglo XVI, Henry Grew chu George Storrs ksiglo XIX. La uku xtatayananin Jehová chuntiya kgalhakgaxmatkgo xlimapakgsin Biblia chu kanajlakgo pi xTachuwin Dios masiya tuku xaxlikana. Wa xlakata Lakgkgolotsin tiku Pulalinkgo xTatayananin Jehová lakkaxwilikgonit pi texto xla kata 2012 nawan Juan 17:17 xla Traducción del Nuevo Mundo: «Mintachuwin, xaxlikana».

LU TLAN TUKU TALAKGPALILH KʼESCUELAS NIKU MASIYAKAN XLAKATA DIOS

Anthony Morris, tiku na makgtapakgsi Lakgkgolotsin tiku Pulalinkgo xTatayananin Jehová, wa pi wi tuku xʼama talakgpali xlakata misioneros chu precursores especiales. Escuela niku kamasiyanikan xalak Biblia tiku Tamakgaxtokgnit natsukukan tlawakan kmakgapitsi países septiembre kkata 2012. Nachuna wi tuku lakgpalika xlakata Escuela xla Galaad. Octubre nema titaxtulh tiku ankgo kʼGalaad wa kstalaninanin Cristo tiku skujnanimakgolha Dios xliputum kilhtamaku, la misioneros tiku nikxni ankgonit kʼuma escuela, precursores especiales, superintendentes viajantes o betelitas. Tiku ankgo kʼuma escuela namatliwakglhkgo chu nakamakgtayakgo xkachikin Dios anta ksucursales, la superintendentes xla circuito o distrito, o niku anan lhuwa latamanin tlan nakamakgtayakgo congregaciones nalichuwinankgo Dios.

Tlakg naʼanan precursores especiales nema natsukukgo lichuwinankgo Dios niku tlakg lakgamakgat. Nachuna 1 xla enero kata 2012, makgapitsi tiku ankgolh kʼEscuela niku kamasiyanikan xalak Biblia Lakchixkuwin tiku Ni tamakgaxtokgkgonit chu tiku Tamakgaxtokgnit, kaj ni lhuwa kilhtamaku precursores especiales kaliyawakan, akgtum o asta akgtutu kata, xlakata natsukukgo tlakg natalichuwinan Dios niku lu lakgamakgat. Komo lu tlan tlawakgo xtaskujut kamakgxtakgkgan xlakata xliputum kilhtamaku precursores especiales nawankgo.

Tamakxtumit xaʼakgatunu kata xla 2011 xatapaxuwan tawi. Skiniyaw Jehová pi kasikulunatlawalh tuku tatlawaputun, xlakata tlakg natalichuwinan Dios chu tlakg tlan kakatalaliw kinatalankan xlikalanka kakilhtamaku, xlakata natalamalanki chu tlan natalichuwinan Dios.

[Dibujo chu recuadro xla página 18 chu 19]

LAKPUSKATIN TIKU NIKXNI MAKGXTAKGKGOLH DIOS

Uma tamakxtumit likgasputli akxni katlawanika takgalhskinin kgalhkitsis natalan tiku xtatamakgaxtokgkgonit tiku Lakgkgolotsin tiku xpulalinkgo xtaskujut xTatayananin Jehová. Marina Sydlik, Edith Suiter, Melita Jaracz, Melba Barry chu Sydney Barbe lichuwinankgo la katsinikgolh xaxlikana takanajla chu la tsukukgolh skujnikgo Dios xliputum kilhtamaku. Na lichuwinankgolh tuku xlakapastakkgo xlakata tiku xtatamakgaxtokgkgonit chu tasikulunalin nema akxtum makgamakglhtinankgolh. Akxni tlawakgoka takgalhskinin putum tiku anta xwilakgolh lu xatapaxuwan kilhtlikgolh takilhtlin número 86 nema wanikan «Fieles siervas de Dios».

[Dibujos]

(Talhman) Daniel chu Marina Sydlik; Grant chu Edith Suiter; Theodore chu Melita Jaracz

(Tutsu) Lloyd chu Melba Barry; Carey chu Sydney Barber

[Mapa xla página 16]

(Xlakata nakatsiya la tasiya kaʼakxilhti likgalhtawakga)

Akgchaxan sucursales nema natapakgsikgo kMéxico

MÉXICO

GUATEMALA

HONDURAS

EL SALVADOR

NICARAGUA

COSTA RICA

PANAMÁ

[Dibujo xla página 17]

Chuna la natawila niku pulalinkan taskujut xla xtatayananin Jehová kWarwick (Nueva York)