OLTAIM ol gutpela samting i save kamap long miting ol i save mekim wanpela taim long olgeta yia, em annual miting bilong Sosaiti Wastaua Bilong Pennsylvania. Na miting namba 127, ol i mekim long Sarere, Oktoba 1, 2011, em tu i gutpela miting. Ol i bin singautim ol man bilong olgeta hap bilong graun long kam bung long Haus Kibung Bilong Ol Witnes Bilong Jehova long Jersey City, New Jersey, long Amerika.

Bilong kirapim dispela miting, Gerrit Lösch bilong Gavening Bodi i bin tok welkam long olgeta manmeri. Em i tokim ol manmeri i kam long 85 kantri olsem ol i insait long wanpela famili i stap long olgeta hap na ol i stap wanbel tru winim ol arapela lain pipol hia long dispela graun. Ol man i lukim pasin wanbel bilong ol na dispela i givim glori long Jehova. Long dispela miting ol i stori planti long pasin wanbel.

GUTPELA RIPOT I KAM LONG MEKSIKO

Namba 1 hap bilong miting i kamapim ol eksampel bilong pasin wanbel bilong ol manmeri bilong Jehova. Senis i kamap na nau brens ofis long Meksiko i save lukautim 6-pela kantri bilong Sentral Amerika. Baltasar Perla bilong Meksiko brens ofis i intaviuim 3-pela arapela memba bilong Betel famili long Meksiko na askim ol long stori long ol samting i kamap taim ol i kamapim ol dispela senis. Ol i tok olsem nau Betel famili long Meksiko i gat ol bratasista bilong ol narapela narapela kalsa na kantri, na pasin bilong bung na stori wantaim ol dispela bratasista i save strongim olgeta. I olsem God i mekim na ol i kamap olsem ol manmeri bilong wanpela kantri tasol.

Bihain long dispela senis, olgeta wan wan kongrigesen i kisim e-mail koneksen we ol inap toktok wantaim brens ofis maski ol i stap long ol longwe ples. Dispela i helpim ol pablisa i stap long ol kantri we i no gat brens ofis moa long pilim olsem ol i insait yet long oganaisesen.

RIPOT I KAM LONG JAPAN

James Linton bilong Japan brens ofis i stori long ol samting guria na sunami bilong Mas 2011 i bin mekim long ol brata bilong yumi. Olgeta samting bilong planti Witnes i bin lus na sampela insait long famili bilong ol i bin dai. Ol Witnes husat i no kisim hevi long dispela disasta i bin helpim ol bratasista long painim 3,100 ples slip na ol i givim sampela handret kar long ol. Ol volantia i wok wantaim ol Komiti Bilong Wokim Ol Haus Kingdom i bin wok strong tru long stretim ol haus bilong ol brata. Winim 1,700 i volantia long mekim dispela wok. Na i gat narapela 575 volantia husat i wok long stretim ol Haus Kingdom, na wanpela tim bilong Amerika i kam na helpim dispela wok.

Ol brata i bin mekim planti samting bilong mekim isi bel na bilong strongim bilip bilong ol bratasista husat i bin karim hevi long dispela disasta. Winim 400 elda i bin visitim ol dispela bratasista. Lain Gavening Bodi i salim tupela wasman son bilong hetkota long go na strongim ol bratasista long hap i bagarap. Pasin laikim bilong ol Witnes i kam long olgeta hap i bin strongim tru ol bratasista long Japan.

WINIM OL KOT

Bihain, odiens i amamas tru long harim stori bilong Stephen Hardy bilong brens ofis bilong Briten na sampela  arapela brata husat i stori long ol kot em yumi bin winim. Olsem, gavman bilong Frans i laik bai brens ofis bilong yumi long Frans i mas baim 82 milion dola (172 milion kina) long takis. Tasol Yuropian Kot ov Human Raits i tok dispela i no stret. Disisen ol i kamapim i soim olsem Kot i wanbel olsem ol Witnes i no laik abrusim wok bilong baim takis. Kot i tok gavman bilong Frans i brukim Atikol 9 bilong kontrak pepa European Convention, em bilong lukautim raits bilong ol manmeri long sait bilong lotu. Olsem, gavman i no laik luksave long ol Witnes i olsem wanpela lotu, ol i laik pinisim asosiesen em ol i bin rejistaim long gavman, ol i laik rausim lotu bilong ol long kantri, na ol i mekim ol tok i nogutim ol.

Kot i kamapim disisen i helpim ol Witnes Bilong Jehova long Amenia tu. Kirap long 1965 na i kam, Kot i ting olsem kontrak pepa European Convention i no givim raits long ol man long tok ol i no laik insait long ami. Tasol Kot Grand Chamber, em nambawan bikpela kot bilong Yuropian Kot ov Human Raits, i wokim disisen olsem kontrak pepa European Convention i givim raits long man long no ken go insait long ami sapos dispela i no stret wantaim bilip bilong em long lotu. So disisen bilong Kot i mekim na gavman bilong Amenia, Asebaijan, na Teki i mas rispektim raits bilong ol.

OL KONSTRAKSEN PROJEK

Neks spika em Guy Pierce bilong Gavening Bodi, em i tok odiens bai amamas long harim stori bilong ol wok konstraksen bilong yumi long New York State. Em i soim vidio long ol wok ol i mekim pinis na ol wok ol bai mekim long Wallkill, Patterson, na long ol nupela hap graun long Warwick na Tuxedo, New York. Long Wallkill, wok bilong sanapim nupela bilding i gat moa long 300 rum slip bai pinis long 2014.

I gat ol plen long wokim ol nupela bilding long bikpela hap graun (100 hekta) long Warwick. Brata Pierce i tok nau yet Gavening Bodi i no klia long laik bilong Jehova long wok ol i mas mekim long Warwick, tasol klostu nau ol bai kirap sanapim ol haus. Gavening Bodi i laik muvim hetkota i go long Warwick na lusim Brooklyn. Taim ol i wok long sanapim ol bilding long Warwick, ol masin na ol samting bilong wokim haus bai stap long wanpela hap graun i stap longwe inap 10 kilomita. Brata Pierce i tok mipela bai statim wok taim mipela i kisim tok orait, na mipela laik bai wok i pinis insait long 4-pela yia. Bihain long dispela bai mipela salim ol bilding long Brooklyn.

Olsem wanem? Gavening bodi i no gat tingting moa olsem taim bilong traipela hevi tru i kam klostu pinis? Brata Pierce i tok: “Nogat tru. Sapos taim bilong traipela hevi tru i pasim wok bilong mipela, dispela bai gutpela stret!”

WAS GUT LONG LAION I SINGAUT STRONG

Stephen Lett, narapela memba bilong Gavening Bodi, i stori long 1 Pita 5:8: “Yupela i mas holimpas gutpela tingting na was i stap. Satan, dispela birua bilong yupela, em i raun olsem wanpela laion i singaut strong na i painim ol man bilong kaikai.” Brata Lett i tok taim yumi tingim pasin bilong ol laion, yumi kliagut moa olsem tok piksa bilong Pita i stret tru.

Ol laion i strong moa na inap spit moa winim ol man. Satan tu i gat bikpela strong na yumi no inap pait wantaim em o sakim em long strong bilong yumi yet. Jehova i mas helpim yumi. (Ais. 40:31) Planti taim laion i save painim abus long nait, taim narapela animal i hatwok long lukim em. Sapos yumi no laik kamap abus bilong Satan, yumi mas luksave long olsem wanem em i traim long holimpasim yumi. Laion bai kilim i dai antelop i no inap pait long em o bebi sibra taim em i slip, olsem tasol Satan i no save marimari liklik na em bai amamas tru long kilim yumi i dai. Na taim laion i kaikai pinis, bodi bilong animal i brukbruk olgeta na yu no inap luksave long em i wanem kain animal. Long wankain pasin, taim Satan i holimpas wanpela Kristen, i stap bilong dispela Kristen bai i go nogut moa winim bipo, taim em i no bin save long  tok i tru. (2 Pita 2:20) Olsem na yumi mas sakim Satan, na bilong mekim olsem, oltaim yumi mas bihainim ol tok yumi lainim long Baibel.—1 Pita 5:9.

AMAMAS YU STAP INSAIT LONG HAUS BILONG JEHOVA

Neks spika, Samuel Herd bilong Gavening Bodi i tok: “Yumi olgeta inap stap insait long haus bilong Jehova.” Dispela i makim olsem olgeta Kristen husat i bilip long ofa bilong Jisas long baim bek man, ol inap lotuim God long pasin em i orait long en. Yumi olgeta i mas amamas olsem yumi stap insait long haus bilong Jehova. Devit i bin i gat laik long i “stap long haus bilong [God]” inap laip olgeta. Olsem Devit, yumi tu i laik lotuim Jehova inap laip olgeta bilong yumi.—Sng. 27:4.

Brata Herd i kamapim tok bilong Song 92:12-14 na em i stori long olsem wanem Jehova i save helpim ol manmeri bilong en long stap gut. God i save mekim gut bel bilong yumi, lukautim yumi, na givim gutpela wara long yumi, em tok i tru. Brata Herd i kirapim odiens long tenkyu long Jehova long dispela samting na amamas long i stap long haus bilong Jehova na lotuim em inap oltaim oltaim.

OL KRISTEN TRU I RISPEKTIM TOK BILONG GOD

David Splane, narapela memba bilong Gavening Bodi, i mekim neks tok. Em i stori olsem oltaim ol Kristen tru i bin rispektim Tok Bilong God. Olsem, long taim bilong ol aposel, ol i bin bihainim tok bilong Baibel bilong stretim tok long wok bilong katim skin. (Apo. 15:16, 17) Tasol bihain liklik long taim bilong ol aposel, sampela husat i tok olsem ol i Kristen, ol i kirap tingim olsem bilip bilong ol Grik i winim tok bilong Baibel. Bihain, sampela arapela i skulim ol man long tingting bilong ol empera bilong Rom na ol lain ol i kolim olsem Ol Tisa Bilong Misin bilong bipo, ol i no yusim Baibel. Planti bilip giaman i bin kamap long dispela rot.

Brata Splane i stori tu long wanpela tok piksa bilong Jisas. Dispela tok piksa i soim olsem kirap long taim bilong ol aposel, oltaim i bin i gat ol Kristen God i bin makim i stap hia long graun na ol i sambai long tok i tru. (Mat. 13:24-30) Yumi no inap kliagut long ol i husat tru. Tasol insait long planti handret yia, planti i bin tokaut long ol bilip na pasin giaman bilong lotu. Sampela bilong ol em Asbisop Agobard Bilong Lyons, husat i bin stap 1,200 yia i go pinis, Peter Bilong Bruys,  Henry Bilong Lausanne, na Valdès (o, Waldo), em ol i bin stap 900 yia i go pinis, John Wycliffe, husat i bin stap 650 yia i go pinis, William Tyndale, husat i bin stap 500 yia i go pinis, na Henry Grew na George Storrs, em ol i bin stap 200 yia i go pinis. Ol Witnes Bilong Jehova long nau i save mekim yet ol samting Baibel i tok ol i mas mekim, na tok i tru bilong Baibel i as bilong ol bilip bilong ol. Olsem na Gavening Bodi i makim Jon 17:17 olsem yiateks bilong 2012: “Tok bilong yu em i tok i tru.”

OL BIKPELA SENIS LONG OL SKUL

Anthony Morris, wanpela memba bilong Gavening Bodi, i tokaut long sampela senis bilong ol misineri na ol painia salim. Long Septemba 2012, ol klas bilong Baibel Skul Bilong Ol Marit Kristen bai kirap long sampela arapela kantri. Long Oktoba bilong las yia wok bilong Skul Gileat i bin senis. Olsem, olgeta bratasista husat i go long Skul Gileat, ol i insait pinis long spesel fultaim sevis. Sampela bilong ol em ol misineri husat i no bin skul yet long Gileat. Sampela em ol painia salim, ol wasman raun, na ol bratasista i wok long Betel. Taim ol i skul pinis long Skul Gileat, ol bai salim ol i go wok long ol brens ofis o long mekim wok wasman raun, o long ol kongrigesen i stap long ol bikpela siti bilong mekim wok autim tok. Long ol dispela hap ol inap strongim, sapotim, na givim trening long ol bratasista ol i wok wantaim ol.

I gat toksave olsem kirap long Janueri 1, 2012 na i go, sampela sumatin bilong Baibel Skul Bilong Ol Singel Brata na bilong Baibel Skul Bilong Ol Marit Kristen, bai mekim wok painia salim inap sotpela taim. Ol bai autim tok long ol hap we i gat wan wan pablisa o i no gat pablisa. Ol bai mekim wok painia salim inap wanpela yia na bihain ol inap makim ol long mekim wok long narapela yia. Taim ol i mekim dispela wok inap 3-pela yia pinis, ol lain i mekim gutpela wok, ol inap kisim tok orait long mekim yet wok painia salim.

Dispela annual miting bilong 2011 em i taim bilong amamas. Oganaisesen bilong God i wok strong long autim tok long planti ples moa na long helpim ol bratasista long olgeta hap long kamap wanbel. Mipela beten olsem Jehova bai blesim wok bilong yumi, na wok bilong yumi i ken givim bikpela glori na biknem long em.

[Blok/Ol Piksa long pes 18, 19]

KISIM SAMPELA SAVE MOA LONG OL

Ol i intaviuim 5-pela wido bilong ol brata husat i bin stap long Gavening Bodi. Sista Marina Sydlik, Edith Suiter, Melita Jaracz, Melba Barry, na Sydney Barber i stori long olsem wanem ol i bin lain long tok i tru na olsem wanem ol i kirap mekim fultaim sevis. Olgeta wan wan i bin stori long sampela gutpela samting i bin painim ol, ol gutpela pasin bilong man bilong ol, na ol gutpela wok bilong Jehova ol i bin mekim wantaim man bilong ol. Bihain odiens i mekim singsing namba 86, em “Ol Gutpela Meri, Ol Sista Kristen.”

[Ol Piksa]

(Antap) Daniel na Marina Sydlik; Grant na Edith Suiter; Theodore na Melita Jaracz

(Daunbilo) Lloyd na Melba Barry; Carey na Sydney Barber

[Mep long pes 16]

(Bilong save ol dispela rait i stap we long pes, lukim buk o magasin)

Ol i bungim 6-pela brens ofis aninit long wok bos bilong brens ofis bilong Meksiko

MEKSIKO

GUATEMALA

HONDURAS

EL SALVADO

NIKARAGUA

KOSTA RIKA

PANAMA

[Piksa long pes 17]

Piksa bilong wol hetkota bilong ol Witnes Bilong Jehova long Warwick, New York