Lipoti la Ungano wa pa Caka

Ungano Uwo Pakaŵa Umoza na Mapulani Ghakukondweska

MAUNGANO gha pa caka gha Watch Tower Bible and Tract Society of Pennsylvania nyengo zose ghakuŵa ghakukondweska. Ungano wa pa caka wa nambara 127, uwo ukacitika pa Cisulo, Okutobala 1, 2011, nawo ukaŵa wakukondweska comene. Ŵalendo awo ŵakacemeka ŵakufuma mu vigaŵa vyose vya pa caru capasi ŵakawungana mu Nyumba ya Maungano Ghakuru ya Ŵakaboni ŵa Yehova, mu Msumba wa Jersey, ku New Jersey, U.S.A.

Gerrit Lösch wa mu Wupu Wakulongozga wakapokelera ŵanthu wose. Wakaphalira ŵalendo awo ŵakafuma mu vyaru 85 kuti ŵakusangwa na ubali wa pa caru cose. Kukolerana uku mbupharazgi uwemi ndipo kukucindika Yehova. Nakuti, mazgu ghakuti kukolerana ghakazunulika kanandi waka pa ungano uwu.

LIPOTI LIWEMI LAKUFUMA KU MEXICO

Nkhani yakwamba pa ungano uwu yikalongora umo ŵanthu ŵa Yehova ŵaliri ŵakukolerana. Mubali Baltasar Perla wa pa Beteli ya Mexico wakafumba ŵabali ŵatatu ŵa mu mbumba ya Beteli ya Mexico pa nkhani ya kusazga maofesi gha munthavi ghankhondi na yimoza gha ku Central America na ofesi ya munthavi ya Mexico. Cifukwa ca kusazga maofesi agha, mbumba ya Beteli ya ku Mexico yili na ŵanthu ŵa mafuko ghakupambanapambana ndiposo ŵakufuma ku vyaru vyakupambanapambana. Pakuti ŵanthu ŵakufuma ku vyaru vyakupambanapambana, vyawovwira kuti ŵakhozganenge yumoza na munyake. Vikuŵa nga ni para Ciuta wawuskapo mphaka za vyaru.

Suzgo limoza ilo likaŵapo cifukwa ca kusazga maofesi agha, likaŵa la kovwira ŵapharazgi kuti ŵaleke kujipulika kuti ŵali kutali na gulu la Yehova nangauli mu vyaru vyawo mulije maofesi gha munthavi. Kuti ivi vicitike, mpingo uliwose uli na adiresi yakutumizgira mauthenga pa kompyuta mwakuti awo ŵali ku vigaŵa vyakutali ŵalemberanenge makalata na ofesi ya munthavi mwakudunjika.

LIPOTI LAKUFUMA KU JAPAN

Mubali James Linton wa ku ofesi ya munthavi ya Japan wakalongosora umo ŵabali na ŵadumbu ŵithu ŵakakhwaskikira na cindindindi ndiposo tsunami (cindindindi ca mu nyanja ico cikupangiska kuti maji ghafuluke comene) ivyo vikatimba caru ici mu Malici 2011. Ŵakaboni ŵanandi ŵakataya ŵakutemweka ŵawo kweniso katundu wawo. Ŵakaboni ŵa mu vigaŵa ivyo vikaleka kukhwaskika na soka ili ŵakabwereka ŵabali nyumba zakujumpha 3,100 ndiposo magalimoto ghanandi. Ŵabali ŵakujipeleka pamoza na Komiti ya Vyakuzenga ŵakacitanga kwambura kulekezga mulimo wa kunozga nyumba za ŵabali na ŵadumbu. Ŵabali ŵakujumpha 1,700 ŵakajipeleka kukateŵetera uko kukakhumbikwanga wovwiri. Ŵabali ŵakujipeleka ŵa ku United States ŵakawovwira pakuzengaso Nyumba za Ufumu, ndipo ŵanchito ŵakujipeleka 575 ndiwo ŵakacita mulimo uwu.

Ŵabali na ŵadumbu awo ŵakakhwaskika ŵakawovwirika mwauzimu kweniso ŵakapembuzgika. Ŵalara ŵakujumpha 400 ŵakateŵetera uko kukakhumbikwanga uliska. Wupu Wakulongozga ukalongora kuti ukufipira mtima ŵanthu aŵa apo ukatuma ŵalaŵiliri ŵaŵiri ŵakwendera maofesi gha munthavi kufuma ku ofesi yithu yikuru kuluta ku malo agho kukacitika soka. Ŵabali aŵa ŵakaluta ku malo agha kuti ŵakakhozge ŵabali  na ŵadumbu. Mauthenga ghakulongora kufipirana mtima agho Ŵakaboni pa caru cose ŵakatumizganga ghakaŵapembuzga comene.

MILANDU IYO TILI KULUSKA

Ŵabali na ŵadumbu ŵakategherezga comene apo Mubali Stephen Hardy wa ku ofesi ya munthavi ya Britain wakayowoya nkhani yakukhwaskana na milandu iyo tili kuluska. Mwaciyelezgero, boma la France likakhumbanga kuti ŵabali ŵithu ku France ŵapeleke ndalama za misonkho zakukwana $82 miliyoni (U.S.). Mulandu uwu ukamara apo mphara ya European Court of Human Rights (ECHR) yikadumura kuti tilije mulandu. Yikalangura kuti boma la France laswa Dango la nambara 9 la European Convention, ilo likuvikilira wanangwa wa visopa. Ivyo khoti likadumura vikulongora kuti nkhani yikaŵa ya ndalama yayi. Lipoti la udumuliro uwu likuti: “Usange boma likukana kuzomerezga cisopa cinyake, panji usange likukhumba kumazga cisopa, kweniso likunyoza cisopa, ndikuti likuswa Dango la nambara 9 la Convention.”

Khoti la ECHR likadumuraso makora mulandu withu wakukhwaskana na boma la Armenia. Kwambira 1965 khoti la ECHR likagomezganga kuti mphara ya European Convention yikupeleka yayi wanangwa ku munthu wa kukana kunjira usilikari. Grand Chamber ilo ni khoti likuru comene mu Europe likadumura kuti mphara ya European Convention munthu yikumupa wanangwa wa kukana kunjira usilikari usange wakucita nthena cifukwa ca vigomezgo vyake vya cisopa. Udumuliro uwu uli kupangiska kuti boma la Armenia, na vyaru vinyake nga ni Azerbaijan na Turkey, vimanye kuti pali wanangwa uwu.

MULIMO WA KUZENGA

Mubali Guy Pierce wa mu Wupu Wakulongozga wakayowoya nkhani yakulondezgapo ndipo wakati wose awo ŵakaŵa pa ungano uwu ŵakaŵa ŵakunweka kumanya vya mulimo wa kuzenga mu New York State. Wakawoneska vidiyo yakulongora vinthu ivyo vyacitika ku Wallkill, Patterson, ndiposo malo ghithu ghaphya ku Warwick na Tuxedo, New York. Ku Wallkill, nyumba yiphya yakugonamo iyo yimarenge kuzengeka mu 2014 yizamuŵa na vipinda 300.

Pali mapulani gha kuzenga nyumba ziphya pa malo ghakukwana maekara 248 (panji mahekitara 100) ku Warwick. Mubali Pierce wakati: “Nangauli tikumanya yayi khumbo la Yehova lakukhwaskana na Warwick, kweni tikunozgeka kuzenga na cilato cakuti ofesi yikuru ya Ŵakaboni ŵa Yehova yiŵe ku malo agha.” Pali mapulani gha kusunga makina na vinthu vinyake vyakuzengera pa malo ghakukwana maekara 50 (panji mahekitara 20) agho ghali pa mtunda wa makilomita 10 ku mpoto kwa Warwick. Mubali Pierce wakati: “Usange tazomerezgeka waka kuzenga, tikugomezga kuti mulimo wose uwu utorenge vyaka vinayi pera. Pamanyuma ndipo tingaguliska malo na nyumba zithu ku Brooklyn.”

Mubali Pierce wakafumba kuti: “Kasi Wupu Wakulongozga wasintha maghanoghano pa nkhani yakuti suzgo yikuru yili pafupi?” Iyo wakazgora kuti: “Napacoko pose. Usange suzgo yikuru yidumulizgenge mapulani ghithu, mbwe vili makora.”

CENJERANI NA NKHALAMU YAKUWULUMA

Mubali Stephen Lett, wa mu Wupu Wakulongozga, wakalongosora lemba la 1 Petrosi 5:8, ilo likuti: “Sungilirani maghanoghano ghinu, muŵe maso. Mulwani winu, Dyabulosi wakuyingayinga nga ni nkhalamu yakuwuluma, wakukhumba kumilimitizga yunji.” Mubali Lett wakayowoya kuti mikhaliro yinyake ya nkhalamu yikapangiska Petrosi kuyelezgera nkhalamu na Dyabulosi.

Pakuti nkhalamu njankhongono ndiposo yikucimbira kujumpha ŵanthu, tikwenera yayi kuyezga kulimbana na Satana nesi kumucimbira mu nkhongono zithu. Tikukhumbikwira wovwiri wa Yehova. (Yes. 40:31) Nkhalamu yikucita kuŵenda pakukora nyama, ntheura tikwenera kugega cisi cauzimu ceneico Satana wakukhumba kuti watikoleremo. Nga umo nkhalamu yikukomera nyiska panji mwana wa boli uyo wagona, ntheura Satana nayo ngwankhaza ndipo wangatemwa kuti watikome. Ndipo pamanyuma pakuti nkhalamu  yamara kurya, nyama iyo yangukoleka yikuŵa yakutwazukatwazuka mwakuti yikumanyikwaso yayi kuti yanguŵa nyama wuli. Ntheura pera, para Mkhristu wakoleka na Satana, wakuŵa muheni comene kuluska umo wakaŵira pambere wandamanye unenesko. (2 Pet. 2:20) Ntheura tikwenera kwimikana na Satana na kudemelera comene ku fundo za mu Baibolo izo tasambira.—1 Pet. 5:9.

ZIRWISKANI MALO GHINU MU NYUMBA YA YEHOVA

Mubali Samuel Herd wa mu Wupu Wakulongozga wakayowoya kuti: “Tose tili na malo mu nyumba ya Yehova.” Ŵakhristu wose ŵali na malo mu “nyumba” ya Ciuta, ilo ni tempile lauzimu. Nyumba iyi ni ndondomeko ya kumusopa kwizira mu sembe yakuwombora ya Yesu. Tikwenera kuzirwiska comene malo agha. Nga ni Davide, tikukhumba ‘kukhala mu nyumba ya Yehova mazuŵa ghose gha umoyo withu.’—Sal. 27:4.

Mubali Herd wakayowoya vya lemba la Salmo 92:12-14 ndipo wakafumba kuti: “Kasi Yehova wakutovwira wuli kuti ticite makora?” Wakazgora kuti: “Mu paradiso wauzimu, Ciuta wakutitemwa, wakutivikilira, ndipo wakutipa maji gha unenesko. Tiyeni timuwonge cifukwa ca ivi.” Kufuma apo, Mubali Herd wakaciska ŵanthu awo ŵakiza ku ungano uwu kuti: “Tiyeni tikhorwe kukhala mu nyumba ya Yehova, kwa nyengo yifupi yayi kweni kwamuyirayira.”

ŴAKHRISTU ŴAKUZIRWISKA MAZGU GHA CIUTA

Mubali David Splane, wa mu Wupu Wakulongozga, wakalongosora mu nkhani yakulondezgapo kuti Ŵakhristu nyengo zose ŵakuzirwiska Mazgu gha Ciuta. Mu nyengo yakale, Ŵakhristu ŵakademelera ku Mazgu gha Ciuta kuti ŵamazge nkhani ya ukotoli. (Mil. 15:16, 17) Kweni nyengo yikati yajumphapo ŵanthu awo ŵakajicemanga waka kuti Mbakhristu ŵeneawo ŵakasambizgika visambizgo vya Ŵagiriki ŵakamba kuzirwiska visambizgo ivi m’malo mwa kuzirwiska Malemba. Pamanyuma, ŵanji ŵakamba kusambizga maghanoghano gha mafumu gha Romu ndiposo gha awo ŵakaŵacemanga kuti Ŵalongozgi ŵa Chalichi panji Ŵabambo. Ndimo visambizgo vinandi vyautesi vikambira.

Mubali Splane wakayowoya kuti mu ntharika, Yesu wakalongora kuti pa caru capasi palutilirenge kuŵa Ŵakhristu ŵakuphakazgika kuti ŵavikilire unenesko. (Mat. 13:24-30) Tingaŵazunura mwakusimikizga yayi kuti ŵakaŵa ŵakuti nthena. Ndipouli, kwambira kale, ŵanthu ŵanandi ŵakana vigomezgo na maluso agho ghakuleka kufuma mu Malemba. Ŵanyake mwa ŵanthu aŵa ni Archbishop Agobard wa ku Lyons  uyo wakaŵako mu vyaka vya m’ma 800, Peter wa ku Bruys, Henry wa ku Lausanne, na Valdès (panji, Waldo) uyo wakaŵako mu vyaka vya m’ma 1100, John Wycliffe uyo wakaŵako mu vyaka vya m’ma 1300, William Tyndale uyo wakaŵako mu vyaka vya m’ma 1500, ndiposo Henry Grew na George Storrs ŵa mu vyaka vya m’ma 1800. Mazuŵa ghano, Ŵakaboni ŵa Yehova ŵakulutilira kudemelera ku fundo za mu Malemba ndipo ŵakumanya kuti Baibolo ndilo lufura lwa unenesko. Lekani Wupu Wakulongozga wasankha lemba la Yohane 17:17 kuŵa lemba la caka ca 2012, ilo likuti: “Mazgu ghinu mbunenesko.”

KUSINTHA KWAKUKONDWESKA PA NKHANI YA MASAMBIRO NA UTEŴETI

Cipharazgo ico Anthony Morris wa mu Wupu Wakulongozga wakapharazga cikayowoya vya kusintha kwa vinthu ku ŵamishonale na ŵapayiniya ŵapadera. Kwambira waka Seputembala 2012, makilasi gha Sukulu Yakusambizga Baibolo ya Ŵakhristu Ŵakutorana ghazamwamba mu vyaru vinyake. Cilato ca Sukulu ya Giliyadi cili kusintha. Kwambira mu Okutobala caka camara, wose awo ŵasambirenge Sukulu ya Giliyadi ŵaŵenge awo ŵali kale mu uteŵeti wanyengozose. Ŵanthu aŵa mbamishonale awo ŵandasambire Sukulu ya Giliyadi, ŵapayiniya ŵapadera, ŵalaŵiliri ŵakwendakwenda, panji awo ŵakuteŵetera pa Beteli. Awo ŵamalizga masambiro agha ŵazamukhozganga ŵanthu ŵa Ciuta pa ofesi ya munthavi, mu mulimo wa kwendakwenda, panji mu vigaŵa ivyo ŵanthu mbanandi uko ŵangakhozga mipingo kuti yicitenge mulimo wa kupharazga na mtima wose.

Kweniso ŵapayiniya ŵapadera ŵakusazgikira ŵazamutumikanga mu vigaŵa ivyo kulijirethu ŵapharazgi. Kwambira pa Janyuwale 1, 2012, ŵanji awo ŵamalizga Sukulu Yakusambizga Baibolo ya Ŵabali Ŵambura Kutora ndiposo Sukulu Yakusambizga Baibolo ya Ŵakhristu Ŵakutorana ŵakutumika kuti ŵakacite upayiniya wapadera wa nyengo yicoko waka. Ŵakupharazga mu vigaŵa ivyo kulijirethu ŵapharazgi na kovwira kuti mulimo uwu ulutilire. Ŵacitenge upayiniya wapadera caka cimozacimoza mpaka ŵafiske vyaka vitatu. Awo ŵalongora kuti ŵakucita makora ŵangapempheka kuti ŵalutilire kucita upayiniya wapadera.

Ungano wa pa caka wa 2011 ukaŵa wakukondweska comene. Tikulomba Yehova kuti watumbike ndondomeko ziphya izi kuti mulimo withu wa kupharazga ulutilire kwenda makora ndiposo kuti ubali withu wa pa caru cose ulutilire mwakuti ucindami na malumbo vilute kwa iyo.

[Bokosi/Vithuzithuzi pa peji 18, 19]

TIKAŴAMANYA MAKORA

Pa ungano uwu pakaŵa vyokoro vinkhondi na vinayi vya ŵabali awo ŵakaŵa mu Wupu Wakulongozga. Vyokoro vinkhondi pa vyokoro ivi vikafumbika. Mudumbu Marina Sydlik, Edith Suiter, Melita Jaracz, Melba Barry, na Sydney Barber ŵakayowoya umo ŵakasambilira unenesko ndiposo umo ŵakambira uteŵeti wanyengozose. Waliyose wakayowoya vinthu vyakukondweska ivyo wakakumbukanga, vinthu vyakukhwaskana na mfumu wake, na vitumbiko ivyo ŵakasangwanga navyo apo ŵakaŵa lumoza. Paumaliro, ŵakati ŵamara kufumbika mafumbo, wumba wose ukimba sumu nambara 86, ya mutu wakuti: “Ŵanakazi Ŵakugomezgeka, Ŵadumbu Ŵacikhristu.”

[Vithuzithuzi]

(Pacanya) Daniel na Marina Sydlik; Grant na Edith Suiter; Theodore na Melita Jaracz

(Musi) Lloyd na Melba Barry; Carey na Sydney Barber

[Mapu pa peji 16]

(Mu magazini yakusindikizga ndimo vikuwoneka makora)

Maofesi gha munthavi ghankhondi na yimoza ghali kusazgika pamoza ndipo ofesi ya munthavi ya Mexico ndiyo yikulaŵilira

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Cithuzithuzi pa peji 17]

Umo ofesi yikuru ya Ŵakaboni ŵa Yehova, iyo yiŵenge ku Warwick, New York, yizamuwonekeranga