OLOHONGELE viunyamo via siata oku lingiwa lo Watch Tower Bible and Tract Society of Pennsylvania, vi nena esanju lialua. Ohongele yunyamo yetendelo 127, ya lingiwa vo Casapalo keteke 1, kosãi ya Mbalavipembe kunyamo wo 2011, ya nena esanju lialua! Akombe veyile kolonepa vialua violuali, va liongoluila Vonjango Yolohongele Yolombangi Via Yehova Volupale luo Jersey, lo ko Nova Jersey, ko Estados Unidos.

Manji Gerrit Lösch wo Kosungu Yolombangi Via Yehova, wa yolela lesanju olonjeveleli. Poku sapuila vamanji va tunda kueci ci soka 85 kolofeka wa popia hati, tua sanjukila elitokeko li kasi pokati ka vamanji voluali luosi. Elitokeko liaco, li eca uvangi uwa komanu kuenda li sivaya Yehova. Ondaka elitokeko ya tukuiwa olonjanja vialua kohongele yaco.

ULANDU UWA WO KO MESIKU

Onepa yatete ya lingiwa kohongele yaco, ya lombolola ndomo afendeli va Yehova va kuete elitokeko. Manji Baltasar Perla wo kofiliale yo Mesiku, pokati ka vamanji va tunda kolofeka epandu vio ko Amerika Central, wa pulisapo vamanji vatatu va talavaya ko Betele yo ko Mesiku. Omo liavamanji va tunda kolofeka vialua, o Betele yo Mesiku yi tendiwa okuti o Betele yomanu vo kolofeka vialua, kuenda kapata añi añi. Elitokeko lia vamanji va tunda kolofeka vialua, li vetiya kuenda li lembeleka calua. Elitokeko liaco, li kasi ndu okuti Suku wopa olongave pokati kolofeka viaco.

Kohongele yaco, kua lingiwa esokiyo lioku kuatisa akundi vana okuti, volofeka viavo ka muli olofiliale, oco ka va ka sime okuti, va kasi ocipãla locisoko ca Yehova. Omo liaco, ekongelo lekongelo li kuete onumbi yo Internet, yecelela oku sapela loku tumisa asapulo kofiliale.

ULANDU WO KOFEKA YO JAPÃU

Manji James Linton, wa tundile ko Japãu, wa lombolola ndomo vamanji va tala ohali omo liocilemawe kuenda akimba okalunga a nyõla onepa yimue yofeka, kosãi Yelombo kunyamo wo 2011. Vamanji valua va pesela ovina viavo, kuenda vamue vangandiavo va fa. Vamanji vana va kala kovitumãlo ka kua pitile ocilemawe, va eca eci ci pitahãla 3.100, kolonjo kuenda akãlu avo, oco va kuatise vamanji yaco. Valua va lieca olumue, kuenda ka va liwekelepo oku talavaya kumue Locisoko Coku Tunga Olonjo Viusoma, poku semulula olonjo via vamanji via nyõleha. Ci pitahãla 1.700 ya vamanji, va lieca kupange woku kuatisa vana va pita locilemawe. Vamanji vamue va tundile ko Estados Unidos, va kuatisa koku semulula Olonjango Viusoma kumue leci ci soka 575 ya vamanji va lieca olumue kupange waco.

Pole, upange wa velapo wa lingiwa, woku eca ekuatiso kespiritu kuenda oku lembeleka vamanji va pita locilemawe caco. Ci pitahãla 400 kakulu vekongelo va pasuisa vamanji va sukilile ekuatiso. Esakalalo Liosungu Yolombangi Via Yehova, lia limbukiwila koku tuma olomitavaso vivali via tunda Kombala Yolombangi Via Yehova oco vi lembeleke vamanji va pita locilemawe. Vamanji kolonepa viosi violuali va eca elembeleko.

OKU YULA VEKANGA

Manji Stephen Hardy wo kofiliale yo Bretanya, wa lomboluila olonjeveleli ndomo esombiso limue lia lingiwa lia sulila veyulo. Ombiali yo ko Fransa ya kisikile vamanji oku feta elisimu liolombongo vi soka 82 kolohuluwa violondolale. Ocitangi caco ca tetuluiwa Locisoko ci Teyuila Omanu ko Europa kuenje, va tu ĩha esunga vekanga liaco. Vekanga liaco va popia hati, ombiali yo ko Fransa ya lueya Ocihandeleko 9 ci sangiwa vukanda Wocisoko Cavelapo ko Europa, ci teyuila elianjo liefendelo. Uvangi waco wa lekisa okuti ocitangi ca vamanji, ka catiamẽlele kolombongo. Kuenje, vuvangi waco mua sonehiwa ndoco: “Ombiali ka yi yongola okuti Olombangi Via Yehova vi kala vofeka. Omo liaco, ya seteka oku imũla upange vamanji va enda oku lingila vofiliale yavo loku va sepula lolondaka ka via sungulukile okuti, elinga liaco ka li likuata lonumbi yi sangiwa vocihandeleko 9 ca eciwa Locisoko Cesombiso.”

Oseketa Yinene yo Europa yi Teyuila Omanu, ya tetululavo ocitangi ca vamanji ko Armenia. Tunde kunyamo wo 1965, Ombala yaco ka ya tavele okuti, Ocisoko Cesombiso, ci teyuila omanu vana va likala oku enda kusualali. Omo liaco Ekanga Linene okuti olio lia velapo Kombala yo Europa yi Teyuila Omanu, lia nõlapo okuti, Ocisoko Cesombiso, ci sukila oku eca komunu omoko “yoku likala oku enda kusualali nda utima waye ka u tava oku ci linga, omo lietavo liaye.” Ocitangi co ko Armenia ca ecelela okuti olofeka vimue ndeci: Azerbajãu kuenda o Turkia, vi sukila oku sumbila ocihandeleko caco.

ESOKIYO LIOKU TUNGA OLONJO VIOCISOKO

Vohundo ya kuamamo, manji Guy Pierce wo Kosungu Yolombangi Via Yehova, wa lomboluila olonjeveleli via yonguile oku kũlĩha esokiyo liatiamẽla koku tunga olonjo viocisoko ko Nova Yorke. Noke, va tala o video ya lekisa upange wa siata oku lingiwila ko Wallkill, ko Patterson, kuenda ocitumãlo cokaliye ca landiwa ko Warwick kuenda ko Tuxedo, ko Nova Yorke. Onjo yi kasi oku tungiwila ko Wallkill, yi ka malusuiwa kunyamo wo 2014 okuti, yi ka kuata eci ci pitahãla 300 kolohondo.

Kua lingiwa esokiyo lioku tungila olonjo kocitumãlo ci kuete 100 kolo ekitare, ci sangiwa ko Warwick. Manji Pierce wa popia hati: “Ndaño ka tua kũlĩhĩle ocipango ca Yehova catiamẽla kupange waco, pole, tu yongola oku tungila Ombala Yolombangi Via Yehova Voluali Luosi, ko Warwick.” Omo liaco, kua sokiyiwa ocitumãlo ci kuete 20 kolo ekitare ci sangiwa ocinãla ci soka 10 kolokilometulu konano yo Warwick, kuna ku ka pangiwila ovina viosi vioku tunga olonjo viaco. Manji Pierce wa amisako hati: “Nda Yehova wa panga, tu lavoka oku malusula upange waco vokuenda kuanyamo akuãla. Noke, o Betele yo Brooklyn yi landisiwa.”

Manji Pierce wa pula ndoco: “Anga hẽ Osungu Yolombangi Via Yehova yi sima okuti, ohali ya piãla ka yi kasi ocipepi?” Noke wa tambulula ndoco: “Sio. Nda ohali ya piãla yi fetika, tu liwekapo upange waco. Handi vali, ci tu nenela esanju lialua, kuenda esanju liaco, lia piãla enene!”

LUNGUKA LOKU KOMA KUOHOSI

Manji Stephen Lett wo Kosungu Yolombangi Via Yehova, wa lombolola olondaka vi sangiwa kelivulu lia 1 Petulu 5:8, vi popia hati: “Lunguki. Lavululi. Unyãli wene eliapu o ñuala ñuala ndohosi yi koma oku sandiliya u a lia.” Manji Lett wa lombolola ovituwa vialua viohosi Petulu a tukula okuti, vi tiamisiwila Keliapu.

Ohosi yi kuete ongusu kuenda yi lupuka calua okuti omanu ci sule. Cimuamue haico Satana a tuwa okuti, o kuete ongusu yalua, kuenda ka tu tẽla oku liyaka laye longusu yetu muẽle. Omo liaco, tu sukila ekuatiso lia Yehova. (Isa. 40:31) Ohosi nda yi yongola oku kuata ocinyama yi salama. Omo liaco, tu sukila oku yuvula owelema wespiritu oco ka tu ka kuatiwe  la Satana. Ndeci ohosi yi kuata onusi, ale omõla wongolo wa pekela, Satana ka kuete ohenda letu, kuenda o yongola oku tu ponda. Ohosi noke yoku kuata ocinyama, ocinyama caco ci vĩha. Cimuamue haico, ci pita Lakristão vamue okuti, noke yoku yapuisiwa la Satana, ‘ekalo liavo li vĩha calua, okuti, liatete ci sule.’ (2 Pet. 2:20) Oco ka tu ka yapuisiwe la Satana, tu sukila oku kapako olonumbi Viembimbiliya tua siata oku lilongisa.​—1 Pet. 5:9.

SANJUKILA OCITUMÃLO COVE VONJO YA YEHOVA

Manji Samuel Herd wo Kosungu Yolombangi Via Yehova, vohundo a linga wa popia hati: “Vosi yetu tu kuete ocitumãlo vonjo ya Yehova. Akristão va kuete ocitumãlo vonembele yespiritu muna va siata oku u fendelela vonduko yocisembi ca Yesu. Omo liaco, tu sukila oku sanjukila ocitumãlo caco loku amamako ‘oku kala vonjo ya Yehova oloneke viosi viomuenyo wetu.’​—Osa. 27:4.

Manji Herd wa tukula Osamo 92:12-14, kuenje wa pula ndoco: “Yehova o tu kuatisa ndati oku amamako lesanju?” Poku eca etambululo manji Herd wa vetiya olonjeveleli hati: “Ombembua tu kuete la vamanji, lukamba wetu la Yehova, vi tu teyuila kuenda vi kavuluisa utima wetu ndovava. Omo liaco, tu eci olopandu kokuaye. Kuenda tu sanjukili oku kala vonjo ya Yehova otembo ka yi pui.”

AKRISTÃO VA SUMBILA ONDAKA YA SUKU

Manji David Splane, wo Kosungu Yolombangi Via Yehova, poku linga ohundo yaye, wa lombolola hati, Akristão va sumbila Ondaka ya Suku. Akristão vo kocita catete, poku tetulula ocitangi coku seviwa evamba va kuama olonumbi Viovisonehua. (Ovil. 15:16, 17) Pole, Akristão vesanda va kala kocita cavali, vana va pindisiwa lovilongua viesanda via va Helasi, va fetika oku velisapo elongiso liavo okuti Ovisonehua vi sule. Noke, vakuavo va piñainya alongiso Embimbiliya lovisimĩlo viomanu vana va tukuiwa hati, va Isia Yetavo kuenda Viombiali yo ko Roma kuenje, va sandula alongiso alua esanda.

Manji Splane wa tukula olusapo lua Yesu lu lekisa okuti, tunde kocita catete, palo posi pa kasi Akristão olombuavekua va teyuila ocili Cembimbiliya. (Mat. 13:24-30) Ka tu pondola oku tukula velie va kala omanu vaco. Pole, vokuenda kuanyamo valua pokati kavo, va pisa alongiso ka a sangiwa Vembimbiliya kuenda ovilinga ka via sungulukile. Vamue pokati komanu vaco vava: Bisipu Agobard wo volupale  luo Lyons wa kala kocita cecea, Peter wo ko Bruys, Henry wo ko Lausanne, kuenda Valdès (ale, Waldo) wa kala kocita cekũi lavali, John Wycliffe, wa kala kocita cekũi lakuãla, William Tyndale, wa kala kocita cekũi lepandu, la Henry Grew kuenda George Storrs va kala kocita cekũi lecea. Koloneke vilo, Olombangi Via Yehova, vi kasi oku amamako oku kakatela kolonumbi Viovisonehua, kuenda via sumbila Embimbiliya. Eli olio esunga lieci Osungu Yolombangi Via Yehova ya nõlela ocisonehua cunyamo wo 2012 copiwa kelivulu lia Yoano 17:17, ci popia hati: “Ondaka yove oyo ocili.”

SANJUKILA APONGOLOKO OKU PINDISIWA LOVOPANGE AKUAVO

Manji Anthony Morris wo Kosungu Yolombangi Via Yehova, wa linga esapulo liatiamẽla kapongoloko awa a lingiwa kupange wumisionaliu kuenda wakundi valikasi. Kua lingiwa esokiyo liokuti, oku upisa kosãi Yenyenye Linene kunyamo wo 2012, vana va ka pindisiwa Kosikola Yembimbiliya ya Vamanji va Kuele, va ka nõliwa kolofeka vimue. Kosikola yo Gileada, kua lingiwavo epongoloko limue. Omo liaco, oku upisa kosãi ya Mbalavipembe yunyamo ulo, Kosikola yo Gileada ku pindisiwa lika vamanji vana va kasi kupange wotembo yosi ndeci: Olomisionaliu vina ka via pindisiwile Kosikola yo Gileada, akundi valikasi, vamanji va nyula akongelo, ale vana va kasi ko Betele. Vamanji yaco, va ka pindisiwa locimãho coku kuatisa afendeli va Yehova va sangiwa kolofiliale, kupange woku nyula akongelo, ale va ka tumiwa kovitumãlo ku kasi omanu valua pole, ka kuli Olombangi Via Yehova.

Akundi valikasi, va ka tumiwa kovikanjo vina vi kasi ocipãla okuti ka kuli Olombangi Via Yehova. Oku upisa keteke 1 kosãi ya Susu yunyamo wo 2012, vana va pindisiwa Kosikola Yembimbiliya ya Vamanji Alume ka va Kuelele, kuenda Kosikola Yembimbiliya ya Vamanji Vakuele, va ka tumiwa kupange wakundi valikasi. Citava okuti va kalako anyamo amue oco va kuatise oku sanduila upange woku kunda kovitumãlo vi kasi ocipãla. Vamanji yaco va pondola oku kala kupange waco unyamo umosi, ale anyamo atatu. Vana va linga ciwa upange wavo, va ka taviwa oku kala akundi valikasi otembo yosi.

Ohongele yunamo wo 2011, ya tu vetiya oku kuata esanju lialua. Tu lavoka okuti, Yehova o sumũlũisa esokiyo liokaliye liatiamẽla koku vokiya upange woku kunda, oco elitokeko li kasi pokati ka vamanji voluali luosi, li u sivaye loku eca ulamba kokuaye.

[Okakcia/​Alitalatu kemẽla 18 19]

TUA VA KŨLĨHA CIWA

Onepa ya velapo kohongele yaco, apulilo a lingiwa ku vamanji vamue akãi vatãlo haivo ovimbumba ndeci: Marina Sydlik, Edith Suiter, Melita Jaracz, Melba Barry, kuenda Sydney Barber. Alume vavo vatiamẽlele Kosungu Yolombangi Via Yehova. Vamanji yaco akãi, va lombolola ndomo va fetika oku lilongisa Embimbiliya, kuenda ndomo va iñila kupange wotembo yosi. Omunu lomunu pokati kavo, wa lomboluila kolonjeveleli ovolandu awa atiamẽla kulume waye, kuenda asumũlũho va kuata. Kesulilo liapulilo, vosi va kala kohongele yaco, va imba ocisungo 86 losapi hati: “Akãi Vakuekolelo, Vamanji Akãi Akristão.”

[Alitalatu]

(Kilu liemẽla) Vamanji ndeci: Daniel lukãi waye Marina Sydlik, Grant lukãi waye Edith Suiter, kuenda manji Theodore lukãi waye Melita Jaracz

(Pombuelo yemẽla) Vamanji ndeci: Lloyd lukãi waye Melba Barry, Carey la manji Sydney Barber

[Omapa kemẽla 16]

Ofiliale yo Mesiku, oyo yi kasi oku songuila olofiliale violofeka epandu

MESIKU

O GUATEMALA

O HONDURA

O EL SALVADOR

O NIKARAGUA

O KOSTA RIKA

O PANAMA

 [Elitalatu kemẽla 17]

Ocitumãlo cokaliye ku ka tungiwila ombala Yolombangi Via Yehova voluali, ko Warwick, Nova Yorke