Muvhigo Wa Muṱangano Wa Ṅwaha

Muṱangano U Swayeaho U Ambaho Nga Vhuthihi Na Nzudzanyo Dzi Nyanyulaho

MUṰANGANO wa ṅwaha wa Watch Tower Bible and Tract Society of Pennsylvania u a nyanyula. Muṱangano wa vhu-127 wa ṅwaha we wa farwa nga Mugivhela wa ḽa 1 October, 2011 na wone wo takadza vhukuma. Vhe vha rambiwa vha bvaho mashangoni o fhamba-fhambabaho vho kuvhangana Holoni ya Guvhangano ya Ṱhanzi dza Yehova ngei Ḓoroboni ya Jersey, New Jersey, U.S.A.

Gerrit Lösch wa Tshigwada tshi Langaho o ṱanganedza ḽeneḽo gogo ḽa vhathu vho takalaho. O vhudza vhaeni vha bvaho mashangoni a ṱoḓaho u vha 85 uri vha na vhuthihi ho khetheaho ha tshaka dzoṱhe. Honoho vhuthihi vhu ṋea vhuṱanzi havhuḓi nahone vhu rendisa Yehova. Zwi re zwone ndi uri vhuthihi ho vha hu tshone tshiṱoho tsha ndeme kha wonoyu muṱangano.

MUVHIGO WAVHUḒI U BVAHO NGEI MEXICO

Tshipiḓa tsha u thoma tsho sumbedza zwavhuḓi vhuthihi vhune vhathu vha Yehova vha vha naho. Baltasar Perla o vha na nyambedzano na vhahashu vhararu vhane vha shuma nae Bethele ya Mexico malugana na u ṱanganywa ha ofisi dza davhi dza rathi dza ngei Amerika Vhukati uri dzi vhe nga fhasi ha davhi ḽa Mexico. Nga nṱhani ha u ṱanganywa honohu ha madavhi, muṱa wa Bethele wa Mexico wo no vha na vhathu vha mvelele dzo fhamba-fhambanaho vhane vha bva kha tshaka nnzhi. U ḓa ha vhahashu vha bvaho kha maṅwe mashango zwo ita uri vhahashu vha kone u ṱuṱuwedzana. Nga lwa pfanyisedzo zwi tou nga Mudzimu o fhelisa mikano i re hone vhukati ha mashango.

Iṅwe khaedu ye vha sedzana nayo musi hu tshi ṱanganywa madavhi ndi ya u thusa vhahuweleli uri vha ḓipfe vhe si kule na ndangulo ya Yehova naho hu si tshee na ofisi dza davhi mashangoni avho. U itela u swikelela zwenezwo, tshivhidzo tshiṅwe na tshiṅwe tsho vha tsho tea u vha na e-mail u itela uri na vhathu vha re kule-kule vha kone u kwamana nga ho livhaho na ofisi ya davhi.

MUVHIGO WA DZHAPANE

James Linton ane a bva kha davhi ḽa Dzhapane o ṱalutshedza nḓila ye vhahashu vha kwamiwa ngayo nga mudzinginyo na tsunami ye ya vha hone shangoni ḽeneḽo nga March 2011. Ṱhanzi nnzhi dzo lovhelwa nga mashaka na u xelelwa nga thundu. Ṱhanzi dzi bvaho kha maṅwe madzingu e ha si vhe na mudzinginyo na tsunami, dzo thusa nga mahaya a 3 100 na goloi dza maḓana. Vhashumi vha u ḓifunela vhane vha shuma kha Komiti ya Dzingu ya U Fhaṱa vho shuma vha sa aweli u itela u vusulusa mahaya a vhahashu. Vhahashu vha fhiraho 1 700 vho ḓiṋekedzela u shuma huṅwe na huṅwe hu re na ṱhoḓea. Tshigwada tsha vhashumi vha u ḓifunela vha ngei United States tsho thusa u vusulusa Holo ya Muvhuso, nahone ho vha na vhashumi vha u ḓifunela vha 575 vhe vha ita mushumo wonoyo.

Ho livhiswa ṱhogomelo nga maanḓa kha u khuthadza vhe vha welwa nga makhaulambilu eneo na u khwaṱhisa vhushaka havho na Mudzimu. Vhahulwane vha fhiraho 400 vho ita mushumo wa vhulisa hu re na ṱhoḓea. Zwauri Tshigwada tshi Langaho tsho vha tshi tshi vhilaelela vhahashu zwo vha khagala musi vhalavhelesi vha madavhi vhavhili vha tshi fara lwendo u bva ngei ofisini khulwane u itela u yo khwaṱhisa vhahashu vhe vha welwa nga khombo yeneyo. O amba uri maipfi a u vha khuthadza a vhahashu vha Dziṱhanzi shangoni ḽoṱhe o vha ṱuṱuwedza vhukuma.

 U KUNDA SIANI ḼA ZWA MULAYO

Vhe vha vha vhe muṱanganoni wonoyo vho thetshelesa nga vhuronwane musi Stephen Hardy wa davhini ḽa Britain a tshi ranga phanḓa khaseledzo ya zwe zwa itea zwenezwino musi ndangulo i tshi kunda siani ḽa zwa mulayo. Sa tsumbo, muvhuso wa Fura wo vha u tshi khou ṱoḓa ndangulo yashu ngei Fura i tshi badela muthelo wa rannda dza milioni dza 626. Mulandu wonoyu wo dzudzanywa musi European Court of Human Rights (ECHR) i tshi dzhia tsheo ine ya ri tikedza, i tshi amba uri muvhuso wa Fura wo pfuka Tshipiḓa 9 tsha Buthano ḽa Yuropa, tshine tsha tsireledza mbofholowo ya zwa vhurereli. Tsheo yo vha i tshi sumbedza uri Khothe i a tenda uri Dziṱhanzi dzo vha dzi si khou shavha u badela muthelo. Yo ri: “U hana u ṋea thendelo dzangano ḽa vhurereli, u ṱoḓa ḽi tshi fheliswa, u shumisa luambo lu songo ṱambaho musi u tshi ambela kha dzangano ḽeneḽo, zwoṱhe ndi tsumbo dza uri muvhuso wo dzhenelela kha ndugelo yo khwaṱhisedzwaho nga Tshipiḓa 9 tsha Buthano.”

ECHR yo dovha ya dzhia tsheo ine ya ri tikedza malugana na mulandu wa Armenia. U thoma nga 1965, ECHR yo vha i tshi amba uri Buthano ḽa Yuropa ḽo vha ḽi sa tendeli muthu a tshi landula u ya vhuswoleni. Khothe ya Grand Chamber—ine ya vha khothe khulwane kha dzoṱhe ngei Yuropa—yo dzhia tsheo ya uri “u hana u ya vhuswoleni arali muthu e na tshiitisi tshi pfalaho tshi si tsha tseḓa tsho thewa kha vhurereli hawe,” zwi nga tendelwa nga Buthano ḽa Yuropa. Yeneyi tsheo yo kombetshedza muvhuso wa Armenia na wa maṅwe mashango a ngaho Azerbaijan na Turkey uri a ṱhonifhe zwenezwo.

U FHAṰA

Guy Pierce wa Tshigwada tshi Langaho o amba uri vhoṱhe vha re henefho vha nga vha vha tshi khou fhisetshela u ḓivha nga ha mushumo washu wa u fhaṱa une wa khou itea New York. O shumisa vidio u itela u sumbedza mushumo une wa khou itwa ngei Wallkill, Patterson, na kha zwitentsi zwiswa zwine zwa kha ḓi bva u rengiwa ngei Warwick na Tuxedo, henefho New York. Ngei Wallkill, hu khou fhaṱiwa fhethu ha u dzula he ha dzudzanywa uri hu ḓo fhele nga 2014, hune ha ḓo vha na rumu dzo engedzeaho dza 300.

Ho dzudzanywa uri hu fhaṱwe kha tshitentsi tsha Warwick tshine tsha vha hekhithara dza 100. Wahashu Pierce o ri: “Naho ri sa ḓivhi uri zwine Yehova a zwi funa malugana na tshitentsi tsha Warwick ndi zwifhio, ri khou bvela phanḓa ri tshi fhaṱa henefho, nahone ndivho yashu ndi uri ofisi khulwane ya Ṱhanzi dza Yehova i pfulutshele henefho.” Ho dzudzanywa uri hu ḓo shumiswa hekhithara dza 20 dzine dza vha devhula ha Warwick nga khilomithara dza fumi u itela u vhulunga mitshini na zwishumiswa zwa u fhaṱa. Wahashu Pierce o ri: “Musi ri tshi ṋewa thendelo ya u fhaṱa, ri fulufhela uri ri ḓo fhedza nga murahu ha miṅwaha miṋa. Nga zwenezwo ri ḓo kona u rengisa zwifhaṱo zwashu zwa Brooklyn.”

Wahashu Pierce o vhudzisa uri: “Naa Tshigwada Tshilangaho tsho shandula mavhonele atsho malugana na uri maṱungu mahulu a tsini? Na khathihi. Arali maṱungu mahulu a swika ri tshi kha ḓi fhaṱa, zwenezwo zwi ḓovha zwavhuḓi vhukuma!”

THANYELANI NDAU I VHOMBAHO

Stephen Lett muṅwe wa muraḓo wa Tshigwada tshi Langaho o haseledza luṅwalo lwa 1 Petro 5:8, lune lwa ri: “Dzivhuluwani ni fhaṱuwe! Swina ḽaṋu Diabolo u mona-mona vhunga ndau i vhombaho, iné ya ṱoḓa ané ya mu mila.” Wahashu Lett o amba uri pfaneleo dzo vhalaho dzine ndau ya vha nadzo dzi ita uri tshifanyiso tshee Petro a tshi shumisa u ṱalusa Diabolo tshi vhe tsho teaho.

Samusi ndau dzi na maanḓa nahone dzi na luvhilo u fhira vhathu a ro ngo fanela u lingedza u ḓilwela kana u ḓipilela nga maanḓa ashu. Ri ṱoḓa thuso ya Yehova. (Yes. 40:31) Ndau i zwima swiswini nga zwenezwo ri fanela u iledza u vha swiswini ḽa lwa muya ḽine Sathane a zwima khalo. U fana na musi ndau i tshi kona u vhulaha tshipuka tshiṱuku kana mbiḓana yo eḓelaho,  Sathane a nga si ri khathutshele nahone u ṱoḓa u ri vhulaha. Nga murahu ha musi ndau yo no fura, i sokou sia tshipuka tshe ya tshi vhulaha tshi kha vhuimo vhu si havhuḓi, nga hu fanaho vhathu vhane Sathane a vha vutshela u vha sia vhe kha vhuimo vhu si havhuḓi u fhira ha musi vha sa athu u ḓivha mafhungo-ngoho. (2 Pet. 2:20) Nga zwenezwo, ri fanela u lwisana na Sathane ro khwaṱha nahone ri farelele kha milayo ye ra i guda Bivhilini.—1 Pet. 5:9.

DZHIELANI NṰHA TSHIPIḒA TSHAṊU NḒUNI YA YEHOVA

Samuel Herd wa Tshigwada tshi Langaho o ri: “Roṱhe ri na tshipiḓa nḓuni ya Yehova.” Vhakriste vhoṱhe vha na tshipiḓa “nḓuni” ya Mudzimu—thembeleni yawe ya muya—hune vha mu gwadamela hone kha mutheo wa tshiṱhavhelo tsha Yesu tshi rengululaho. Ndi tshipiḓa tsha ndeme tshine ra fanela u tshi dzhiela nṱha. U fana na Davida, ri tama “u dzula nḓuni ya Yehova maḓuvha oṱhe a vhutshilo [hashu].”—Ps. 27:4.

Wahashu Herd o ambela kha Psalme ya 92:12-14, nahone a vhudzisa uri: “Yehova u ita hani uri ri nake?” O fhindula a ri: “Kha paradiso ya muya Mudzimu u a ri khuthadza, a ri tsireledza, na u ri ṋea maḓi a mafhungo-ngoho a ri homolosaho. Ri fanela u mu livhuha.” Wahashu Herd o dovha a ṱuṱuwedza vhathetshelesi a ri: “Ri fanela u fushea nga u dzula nḓuni ya Yehova hu si lwa tshifhinganyana, fhedzi hu vhe lwa tshoṱhe.”

VHAKRISTE VHA ṰHONIFHA IPFI ḼA MUDZIMU

David Splane wa Tshigwada tshi Langaho o amba uri u bva kale Vhakriste vha ngoho vho vha vha tshi ṱhonifha Ipfi ḽa Mudzimu. Ḓanani ḽa u thoma ḽa miṅwaha vho ḓitika ngaḽo u itela u dzudzanya fhungo ḽa u ruba. (Mish. 15:16, 17) Fhedzi vhaṅwe Vhakriste vha ḓanani ḽa vhuvhili ḽa miṅwaha vhe vha guda pfunzo dza maṱali dza Lugerika vho thoma u fulufhela vhuṱali havho nṱhani ha u fulufhela Maṅwalo. Nga murahu, vhaṅwe a vho ngo tsha tevhedza pfunzo dza Bivhili, fhedzi vho tevhedza mavhonele a Vhafunzi vha Dzikereke na vhavhusi vha Roma, nahone vha phaḓaladza pfunzothendwa dza mazwifhi.

Wahashu Splane o amba uri kha tshiṅwe tshifanyiso Yesu o sumbedza uri hu ḓo dzula hu na Vhakriste vha ngoho kha ḽifhasi vhane vha ḓo tikedza mafhungo-ngoho. (Mat. 13:24-30) Ri nga si ambe nga ho livhaho uri ndi vhafhio. Naho zwo ralo, musi maḓana a miṅwaha a tshi khou ḓi ṱanḓulukana hu na vhathu vhanzhi vhe vha sasaladza pfunzo na maitele zwi si zwa maṅwalo. Vhaṅwe vhavho ndi Mubishopo Agobard wa ngei  Lyons wa ḓanani ḽa vhuṱahe ḽa miṅwaha, Peter wa ngei Bruys, Henry wa ngei Lausanne, na Valdès (kana, Waldo) wa ḓanani ḽa vhu-12 ḽa miṅwaha, John wa ḓanani ḽa vhu-14 ḽa miṅwaha, William wa ḓanani ḽa vhu-16 ḽa miṅwaha, na Henry Grew na George Storrs wa ḓanani ḽa vhu-19 ḽa miṅwaha. Ṱhanzi dza Yehova ṋamusi dzi bvela phanḓa dzi tshi tikedza zwilinganyo zwa Maṅwalo na u ṱhogomela uri Bivhili ndi yone mutheo wa mafhungo-ngoho. Ndi ngazwo Tshigwada tshi Langaho tsho khetha ndimana ya ṅwaha yashu i re kha Yohane 17:17 ine ya ri: “mafhungo au ndi a ngoho.”

TSHANDUKO DZI NYANYULAHO DZA U GUDISWA NA TSHUMELO

Anthony Morris wa Tshigwada tshi Langaho o ita nḓivhadzo malugana na tshanduko dzine dza ḓo vha hone kha tshumelo ya vharumiwa na vhavulanḓila vho khetheaho. U thoma nga September 2012, kilasi dza Tshikolo Tsha Bivhili Tsha Vhavhingani Vha Vhakriste dzi ḓo farelwa kha maṅwe mashango. Ho shandulwa ndivho ya Tshikolo tsha Gilead. U thoma nga October 2011, vhane vha ḓo ya Tshikoloni tsha Gilead ndi vha re tshumeloni ya tshifhinga tsho ḓalaho yo khetheaho—u fana na vharumiwa vhe vha vha vha sa athu ya Gilead, vhavulanḓila vho khetheaho, vhalavhelesi vha dalelaho, kana vhashumi vha Bethele. Vho ṱhaphudzaho tshikoloni tshenetshi vha ḓo thusa u khwaṱhisa vhathu vha Mudzimu khamusi ofisini ya davhi, mushumoni wa u dalela zwivhidzo, kana ḓoroboni khulwane hune vha nga ṱuṱuwedza zwivhidzo u ita mushumo wa u huwelela.

Vhavulanḓila vho khetheaho vha ḓo huwelela fhethu hu re na zwivhidzo zwi si gathi kana hu si na zwivhidzo, fhethu hu re kule. U thoma nga ḽa 1 January, 2012, vhaṅwe vho ṱhaphudzaho kha Tshikolo Tsha Bivhili Tsha Vhahashu Vha Tshinnani Vha Songo Vhingaho na kha Tshikolo Tsha Bivhili Tsha Vhavhingani Vha Vhakriste vha ḓo avhelwa sa vhavulanḓila vho khetheaho vha tshifhinganyana uri vha yo shuma fhethu hu si na zwivhidzo na u thusa zwi re hone uri zwi aluwe. Vha ḓo shuma fhethu henefho ṅwaha muthihi, vha iswa huṅwe nga ṅwaha u tevhelaho u swikela musi vho no fhedza miṅwaha miraru. Vhane vha ita mushumo wavho zwavhuḓi vha nga tendelwa u bvela phanḓa tshumeloni yeneyi.

Muṱangano wa ṅwaha wa 2011 wo takadza vhukuma. Ri lavhelela uri Yehova a fhaṱutshedze dzenedzi tshanduko na u ṱavhanyisa mushumo wa u huwelela na u ita uri ri dzule ri na vhuthihi ha vhurathu na vhukomana—nahone zwenezwi zwoṱhe zwi ḓo ita uri a rendiwe.

[Bogisi/Zwifanyiso kha masiaṱari 18, 19]

U ḒIVHANA KHWINE

Kha mbekanyamushumo yeneyi ho dovha ha vha na khaseledzo na tshilikadzi ṱhanu kha dza ṱahe dze dza vha dzo vhingana na miraḓo ya Tshigwada tshi Langaho. Wahashu wa tshisadzini Marina Sydlik, Edith Suiter, Melita Jaracz, Melba Barry, na Sydney Barber vho ṱalutshedza nḓila ye vha wana ngayo mafhungo-ngoho na u dzhenela tshumelo ya tshifhinga tsho ḓalaho. Muṅwe na muṅwe wavho o vhudza vhathetshelesi nga ha zwithu zwavhuḓi zwine a zwi humbula nga ha munna wawe, na phaṱhutshedzo dze vha ḓiphina ngadzo. Musi hu tshi phethiwa yeneyi khaseledzo, vhoṱhe vha re muṱanganoni wonoyu vho imba luimbo 86, lu re na tshiṱoho tshine tsha ri: “Vhafumakadzi vha Fulufhedzeaho, Vhahashu vha Tshisadzini Vha Vhakriste.”

[Zwifanyiso]

Nṱha) Daniel na Marina Sydlik; Grant na Edith Suiter; Theodore na Melita Jaracz

(Fhasi) Lloyd na Melba Barry; Carey na Sydney Barber

[Mapa kha siaṱari 16]

(U itela uri ni vhone nḓila ye mafhungo a dzudzanywa ngayo nga vhuḓalo, sedzani khandiso)

Madavhi a rathi o ṱanganywa a vha nga fhasi ha davhi ḽa Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Tshifanyiso kha siaṱari 17]

Tshifhaṱo tshine tsha khou anganyelwa ofisi khulwane dza Ṱhanzi dza Yehova ngei Warwick, New York