AN TINUIG nga katirok han Watch Tower Bible and Tract Society of Pennsylvania makalilipay gud pirme. Ito liwat an nahitabo ha ika-127 nga tinuig nga katirok nga ginhimo han Sabado, Oktubre 1, 2011! An imbitado nga mga bisita tikang ha iba-iba nga nasud nagkatirok ha Assembly Hall of Jehovah’s Witnesses ha Jersey City, New Jersey, U.S.A.

Hi Gerrit Lösch nga membro han Nagmamando nga Lawas an nag-abiabi han maglipayon nga tinambong. Nagsiring hiya ha mga delegado tikang ha mga 85 nga nasud nga nagpapahimulos hira han waray kapariho nga internasyonal nga pagkaurosa. Ito nga pagkaurosa maopay nga pamatuod ngan naghihimaya kan Jehova. Ha pagkamatuod, an pagkaurosa pauroutro nga ginhisgotan hini nga katirok.

MAOPAY NGA REPORT TIKANG HA MEXICO

Iginpakita han siyahan nga bahin han programa an pagkaurosa han katawohan ni Jehova. Gin-interbyu ni Brother Baltasar Perla an tulo nga iya igkasi-membro han pamilya han Bethel ha Mexico mahitungod han pagtampo han unom nga sanga nga opisina ha Central America ha sanga nga opisina ha Mexico. Tungod hito, mas nagdamu an tikang ha iba-iba nga kultura ngan nasud ha pamilya han Bethel ha Mexico. An ira pagtampo nagresulta hin pagdinasigay ha usa kag usa. Sugad hin nagkuha an Dios hin daku hinduro nga eraser ngan ginpamara an mga giutan han mga nasud.

Usa nga makuri nga bahin hini nga pagtampo amo an pagbulig ha mga magwarali nga diri umabat nga nahibubulag hira ha organisasyon ni Jehova bisan kon waray na sanga nga opisina ha ira nasud. Tungod hito, an tagsa nga kongregasyon may secure e-mail connection basi direkta nga makakagkomunikar ha sanga nga opisina bisan an aadto ha higrayo nga lugar.

BAG-O NGA SUMAT TIKANG HA JAPAN

Hi Brother James Linton han sanga nga opisina ha Japan nagsumat kon paonan-o an aton kabugtoan naapektohan han linog ngan mga tsunami nga nahitabo ha nasud han Marso 2011. Damu nga kabugtoan an namatyan han ira mga hinigugma ngan nawad-an hin mga panag-iya. Sobra 3,100 nga akomodasyon ngan ginatos nga sarakyan an iginpagamit ha ira han kabugtoan tikang ha mga lugar nga waray maapektohi han kalamidad. An mga boluntaryo upod han mga Regional Building Committee waray uroundang ha pag-ayad han mga balay han kabugtoan. Sobra 1,700 an nagboluntaryo kon diin an may panginahanglan. An usa nga grupo han mga boluntaryo tikang ha United States binulig ha pag-ayad han mga Kingdom Hall, ngan 575 nga boluntaryo an nagtrabaho hini nga proyekto.

Daku nga atensyon an iginhatag ha espirituwal ngan emosyonal nga kaopayan han mga naapektohan. Sobra 400 nga tigurang an nag-shepherding kon diin may panginahanglan. Nakita an pagtagad han Nagmamando nga Lawas han iginpadara an duha nga zone overseer tikang ha sentro nga opisina ngadto ha naapektohan nga lugar basi parig-unon an kabugtoan. An pagpahayag hin kabaraka han mga kabugtoan tikang ha iba-iba nga nasud nakaliaw gud ha ira.

KADAOGAN HA MGA KASO

An mga tinambong interesado gud nga namati han hi Brother Stephen Hardy han sanga nga opisina ha  Britain naghisgot han bag-o la nga pagdaog ha mga kaso. Pananglitan, an gobyerno han France nagsusukot hin $82 ka milyon (U.S.) nga buhis ha asosasyon nga aton ginagamit ha France. Nasulbad an kaso han an European Court of Human Rights (ECHR) nagdesisyon pabor ha aton nga nasiring nga gintalapas han gobyerno han France an Artikulo 9 han European Convention nga nagpapanalipod han kagawasan han relihiyon. An mga pulong ha desisyon hito nagpapakita nga ini nga kaso diri mahitungod ha kwarta, kay ito nasiring: “An diri pagkilala ha usa nga relihiyon, an pagsari ha pagbungkag hito, an pagpakaraot hito, mga ehemplo han pagtalapas han katungod nga iginpapasarig han Artikulo 9 han Convention.”

An ECHR nagdesisyon liwat pabor ha aton ha usa nga kaso nga nahidadabi an Armenia. Tikang han 1965 natoo an ECHR nga an European Convention waray magpanalipod ha mga indibiduwal ha igin-oobligar nga pagserbisyo ha militar. An Grand Chamber—an pinakahitaas nga korte han European Court—nagdesisyon nga an “pagdumiri ha pagserbisyo ha militar tungod han seryoso ngan daku gud nga pagkasumpaki” han obligasyon nga magserbisyo ha militar ngan han konsensya han usa nga indibiduwal sadang kilalahon han European Convention. Ini nga desisyon nag-oobligar ha Armenia ngan ha mga nasud sugad han Azerbaijan ngan Turkey nga kilalahon liwat ini nga katungod.

MGA PROYEKTO HAN PAGTUKOD

Hi Brother Guy Pierce nga membro han Nagmamando nga Lawas an sunod nga nagpahayag ngan nagsiring nga sigurado nga interesado an ngatanan mahitungod han aton proyekto han pagtukod ha New York State. Iginpakita niya an video mahitungod han mga nahitatabo ha Wallkill, Patterson, ngan ha bag-o la nga napalit nga mga lote ha Warwick ngan Tuxedo, New York. Ha Wallkill, may bag-o nga residence building nga matatapos ha 2014 nga may sobra 300 nga dugang nga mga kwarto.

May mga plano ha pagpaopay han 100 ka ektarya nga lote ha Warwick. “Bisan kon diri pa kita sigurado han kaburut-on ni Jehova ha Warwick,” siring ni Brother Pierce, “ipapadayon naton an pagpaopay han lugar nga an katuyoan nga ibalhin didto an sentro nga opisina han mga Saksi ni Jehova.” Ginpaplano liwat nga gamiton an 20 ka ektarya nga lote nga 10 ka kilometro ha norte han Warwick basi temporaryo nga butangan han mga garamiton ngan materyales ha pagtukod. “Kon maaprobaran an pagtukod, naglalaom kami nga matatapos an proyekto ha sulod hin upat ka tuig,” siring ni Brother Pierce. “Katapos, an aton mga panag-iya ha Brooklyn puydi na ibaligya.”

“Nagbag-o na ba an panhunahuna han Nagmamando nga Lawas mahitungod han pagkahirani han daku nga kagol-anan?” nagpakiana hi Brother Pierce. “Waray gud,” siring niya. “Kon mahiabtan han daku nga kagol-anan an aton mga plano, maopay, maopay gud hinduro!”

PAGBANTAY HA MAARINGASA NGA LEON

Sunod, hi Stephen Lett nga membro liwat han Nagmamando nga Lawas naghisgot mahitungod han 1 Pedro 5:8: “Magbuotan, ngan mag-agma kamo: kay an iyo kaaway nga amo an yawa, sugad hin maaringasa nga leon, naglilinakatlakat, pagpinamiling hin iya lalamyon.” Nagsiring hi Brother Lett nga an pipira nga kalidad han leon angayan gud ha paghulagway ni Pedro ha Yawa.

Tungod kay mas makusog ngan mas malaksi an leon kay ha tawo, diri kita sadang magsari pag-ato o pagpirde kan Satanas ha aton la kalugaringon nga kusog. Kinahanglan naton an bulig ni Jehova. (Isa. 40:31) Maikmat an leon ha pamiling han iya bibiktimahon, salit sadang naton likyan an espirituwal nga kasisidman diin namimiling hi Satanas hin mabibiktima. Sugad la nga ginpapatay han leon an bugsok o an nakaturog nga gutiay nga zebra, diri liwat nalolooy ha aton hi Satanas ngan karuyag gud niya nga patayon kita ha espirituwal. Ngan kon nabusog na an leon, kasagaran nga diri mo na makikilala an iya nabiktima, sugad la nga an “urhi  nga kamutangan” han mga nabiktima ni Satanas ha espirituwal “malabi pa hin kamaraot kay han siyahan.” (2 Ped. 2:20) Salit kinahanglan atohan naton hi Satanas ngan marig-on nga sundon an mga prinsipyo ha Biblia nga aton hinbaroan.—1 Ped. 5:9.

APRESYARA AN IMO LUGAR HA BALAY NI JEHOVA

“Kita ngatanan may-ada lugar ha balay ni Jehova,” siring han sunod nga nagpahayag nga hi Samuel Herd han Nagmamando nga Lawas. An ngatanan nga Kristiano may lugar ha “balay” han Dios—an iya espirituwal nga templo—an kahikayan ha pagsingba ha iya pinaagi ha halad lukat ni Jesus. Usa ito nga lugar nga sadang pabilhan sugad nga presyoso nga pribilehiyo. Pariho kan David, hingyap naton nga “makaukoy ha balay ni Jehova ha ngatanan nga mga adlaw han [aton] kinabuhi.”—Sal. 27:4.

Ginhisgotan ni Brother Herd an Salmo 92:12-14 ngan nagpakiana, “Paonan-o kita ginbubuligan ni Jehova nga mag-uswag?” Hiya binaton: “Ha espirituwal nga paraiso, ginmamangnoan kita han Dios, ginpapanalipdan, ngan gintatagan hin nakakarepresko nga tubig han kamatuoran.” Katapos gin-aghat ni Brother Herd an mga mamarati: “Magpasalamat kita ha iya tungod hito. Magin kontento kita nga magpabilin ha balay ni Jehova, diri la ha halipot nga panahon kondi ha waray kataposan.”

AN MGA KRISTIANO MAY PAGTAHOD HA PULONG HAN DIOS

Ha sunod nga pahayag, hi David Splane nga membro liwat han Nagmamando nga Lawas nagsaysay nga tikang pa hadto, an tinuod nga mga Kristiano may pagtahod ha Pulong han Dios. Han siyahan nga siglo, ito an ira gin-gamit ha pagsulbad han isyu mahitungod han pagturi. (Buh. 15:16, 17) Kondi han ikaduha nga siglo, mas ginpabilhan han iba nga nag-aangkon nga Kristiano an ira kahibaro ha Griego nga pilosopiya kay han Kasuratan. Ha urhi, an mga katutdoan ha Biblia ginsaliwnan han iba hin mga ideya han gintatawag nga mga Amay han Singbahan ngan han mga emperador han Roma, ngan nagdamu an buwa nga mga doktrina.

Ginhisgotan ni Brother Splane nga ha usa nga ilustrasyon, iginpakita ni Jesus nga padayon nga magkakaada tinuod nga dinihogan nga mga Kristiano dinhi ha tuna nga magdidepensa han kamatuoran. (Mat. 13:24-30) Diri kita sigurado kon hin-o hira. Kondi ha paglabay han mga siglo, damu an nagbuhayhag han mga katutdoan ngan buruhaton nga diri uyon ha Kasuratan.  An pipira ha ira amo hi Arsobispo Agobard nga taga-Lyons han ika-9 nga siglo, hira Peter nga taga-Bruys, Henry nga taga-Lausanne, ngan Valdès (o, Waldo) han ika-12 nga siglo, hi John Wycliffe han ika-14 nga siglo, hi William Tyndale han ika-16 nga siglo, ngan hira Henry Grew ngan George Storrs han ika-19 nga siglo. An mga Saksi ni Jehova yana padayon nga nasunod ha mga suruklan han Kasuratan ngan ira ginkikilala an Biblia sugad nga pundasyon han kamatuoran. Tungod hito ginpili han Nagmamando nga Lawas sugad nga aton tinuig nga teksto ha 2012 an Juan 17:17: “An imo pulong amo an kamatuoran.”

MAKALILIPAY NGA MGA PAGBAG-O HA PAGBANSAY NGAN PAG-ALAGAD

Iginpahibaro ni Anthony Morris han Nagmamando nga Lawas an mga pagbag-o para ha mga misyonero ngan espesyal payunir. Tikang ha Septyembre 2012, magkakaada mga klase han Bible School for Christian Couples ha pinili nga mga nasud. Ginbag-o na an katuyoan han Gilead School. Tikang han Oktubre han naglabay nga tuig, an ngatanan nga naeskwela ha Gilead amo adton aada na ha usa nga klase hin espesyal nga bug-os-panahon nga pag-alagad—an mga misyonero nga waray pa makaeskwela ha Gilead, mga espesyal payunir, mga nagbibiyahe nga paramangno, o mga Bethelite. An mga magradwar ha Gilead gagamiton ha pagparig-on ngan pagdasig ha katawohan han Dios ha mga sanga nga opisina, sugad nga nagbibiyahe nga paramangno, o ha mga lugar nga damu an tawo diin madadasig nira an mga kongregasyon ha pagsangyaw nga buruhaton.

Magkakaada dugang nga mga espesyal payunir nga itutoka ha interyor ngan higrayo nga teritoryo. Tikang han Enero 1, 2012, an pipira nga naggradwar ha Bible School for Single Brothers ngan Bible School for Christian Couples itutoka sugad nga temporaryo nga mga espesyal payunir, ngan ira titikangan ngan pauuswagon an pagsangyaw nga buruhaton ha interyor nga mga lugar. Itutoka hira sugad nga espesyal payunir hin tag-usa ka tuig, ngan puydi ito magpadayon tubtob tulo ka tuig. An mga epektibo ha ira ministeryo mahimo tagan hin permanente nga toka.

Makalilipay gud an tinuig nga katirok para ha 2011. Nasarig kita nga bibendisyonan ni Jehova an bag-o nga mga kahikayan nga pauswagon an aton pagsangyaw nga buruhaton ngan mas pag-urusahon an ngatanan nga kabugtoan, para ha iya himaya ngan kadayawan.

[Kahon/Retrato ha mga pahina 18, 19]

Mas Nakilala Naton Hira

Usa nga bahin han programa an interbyu ha lima han siyam nga balo nga an bana membro hadto han Nagmamando nga Lawas. Hira Sister Marina Sydlik, Edith Suiter, Melita Jaracz, Melba Barry, ngan Sydney Barber nagsumat kon paonan-o hira nahibaro han kamatuoran ngan sinulod ha bug-os-panahon nga pag-alagad. An tagsa ha ira nagsumat mahitungod han diri-hingangalimtan nga makalilipay nga mga hitabo ha ira kinabuhi, han ira masisiring mahitungod han ira bana, ngan han mga bendisyon nga ira nakarawat sugad nga mag-asawa. Sugad nga makapabantad nga pagtapos han interbyu, ginkanta han mga tinambong an karantahon numero 86 nga may ulohan, “Matinumanon nga Kababayin-an nga Kabugtoan.”

[Mga retrato]

(Igbaw) Daniel ngan Marina Sydlik; Grant ngan Edith Suiter; Theodore ngan Melita Jaracz

(Ubos) Lloyd ngan Melba Barry; Carey ngan Sydney Barber

[Mapa ha pahina 16]

(Para ha aktuwal nga format, kitaa an publikasyon)

Unom nga sanga nga opisina an gintarampo ha pagdumara han sanga nga opisina han Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Retrato ha pahina 17]

An ginpaplano nga disenyo han sentro nga opisina han mga Saksi ni Jehova ha Warwick, New York