Umbiko Womhlangano Waminyaka Yonke

Umhlangano Ophawuleka Ngobunye Nangezinhlelo Ezivusa Amadlingozi

IMIHLANGANO yaminyaka yonke ye-Watch Tower Bible and Tract Society of Pennsylvania ihlale inesasasa. Kwaba njalo nangomhlangano waminyaka yonke we-127 owawungoMgqibelo, ngo-October 1, 2011! Izimenywa ezivela emhlabeni wonke zahlangana eHholo LoMhlangano LoFakazi BakaJehova eliseDolobheni laseJersey, eNew Jersey, e-U.S.A.

UGerrit Lösch weNdikimba Ebusayo wamukela izixuku ezithokozile. Watshela izihambeli ezivela emazweni angaba ngu-85 ukuthi ubunye bazo bomhlaba wonke babuyingqayizivele. Lobu bunye bunikeza ubufakazi obuhle futhi bukhazimulisa uJehova. Empeleni, igama elithi ubunye lasetshenziswa kaningi kulo mhlangano.

UMBIKO OMUHLE OVELA EMEXICO

Inkulumo yokuqala yesimiso yanikeza isibonelo sobunye babantu bakaJehova. UBaltasar Perla waxoxa namalungu amathathu akhonza nawo emkhayeni waseBethel yaseMexico mayelana nokuhlanganiswa kwamahhovisi egatsha ayisithupha asemazweni aseMelika Ephakathi negatsha laseMexico. Ukuhlanganiswa kwawo kwenze umkhaya waseBethel yaseMexico waba nabantu abanezizinda ezihlukahlukene nabavela emazweni amaningi. Ukufika kwabafowethu abavela emazweni ahlukahlukene kuholele ekukhuthazaneni. Kunjengokungathi uNkulunkulu wayeyisusile imingcele ehlukanisa la mazwe.

Enye inselele ebe khona ngenxa yalokhu kuhlanganiswa kwamagatsha kube ukuqinisekisa abamemezeli ngokuthi abahlukanisiwe nenhlangano kaJehova yize amahhovisi egatsha engasekho emazweni abo. Ukuze kufezwe lokho, ibandla ngalinye line-e-mail yalo ephephile ukuze nalawo asezindaweni ezicezile akwazi ukuxhumana ngokuqondile nehhovisi legatsha.

UMBIKO WAMUVA NGEJAPANE

UJames Linton ovela egatsheni laseJapane wachaza indlela ukuzamazama komhlaba nama-tsunami okwagadla kulelo zwe ngo-March 2011 okwabathinta ngayo abafowethu. OFakazi abaningi bashonelwa izihlobo, balahlekelwa nayimpahla yabo. OFakazi basezindaweni ezingathintekanga bavula amakhaya angaphezu kuka-3 100 babalungiselela nezimoto ezibalelwa emakhulwini. Izisebenzi zokuzithandela ezisebenza namaKomiti Okwakha Esifunda zasebenza imini nobusuku zilungisa imizi yabazalwane. Zingaphezu kuka-1 700 izisebenzi ezazinikela ukukhonza nomaphi lapho kwakunesidingo khona. Iqembu lezisebenzi zokuzithandela elivela e-United States lasiza ekulungiseni amaHholo OMbuso, futhi zingu-575 ezahlanganyela kulo msebenzi.

Labo abathinteka baye basizwa kakhulu futhi ngokomoya nangokomzwelo. Abadala abangaphezu kuka-400 baye benza ukuhambela kokwalusa kulabo ababekudinga. Ukukhathalela kweNdikimba Ebusayo kwaba sobala lapho ababonisi bamagatsha ababili abavela endlunkulu yomhlaba wonke beza endaweni yenhlekelele bezonikeza isikhuthazo. Amazwi okukhathalela avela koFakazi emhlabeni wonke aye aba induduzo enkulu.

 UKUNQOBA KWEZOMTHETHO

Izilaleli zathula cwaka lapho uStephen Hardy ovela egatsheni laseBrithani exoxa ngokunqoba kwamuva kwezomthetho. Ngokwesibonelo, uhulumeni waseFrance wawufuna intela engamaRandi ayizigidi ezingu-626 enhlanganweni esiyisebenzisayo kulelo zwe. Le nkinga yaxazululwa lapho iNkantolo Yamalungelo Abantu YaseYurophu (ECHR) ikhipha isinqumo esisivunayo, ithi uhulumeni waseFrance wayephule okushiwo eSigabeni 9 seSivumelwano Samazwe AseYurophu, esivikela inkululeko engokwenkolo. Amazwi aleso sinqumo abonisa ukuthi leli cala lalingaphathelene nemali ngoba afundeka kanje: “Ukwenqaba ukuqaphela inhlangano ethile yenkolo, ukuyiqeda, ukusebenzisa inkulumo elulaza inhlangano ethile yenkolo, konke kuyizibonelo zokungalihloniphi ilungelo eliqinisekiswa iSigaba 9 seSivumelwano [Samazwe AseYurophu].”

Le Nkantolo yakhipha isinqumo esisivunayo nasecaleni elihilela i-Armenia. Kusukela ngo-1965, i-ECHR yayikholelwa ukuthi iSivumelwano Samazwe AseYurophu asizange sibavikele abantu ngabanye ekubuthelweni ebusosheni okuphoqelelwe. UMkhandlu Ophakeme—okuyisigaba esiphakeme seNkantolo yaseYurophu—wakhipha isinqumo sokuthi iSivumelwano Samazwe AseYurophu kufanele siqinisekise “ilungelo lokwenqaba ukubuthelwa ebusosheni okushukunyiswa isimo esingathí sina nesingagwemeki esingqubuzana nako.” Lesi sinqumo siyayibopha i-Armenia namazwe anjenge-Azerbaijan neTurkey ukuba alihloniphe lelo lungelo.

IMISEBENZI YOKWAKHA

Inkulumo eyalandela yanikezwa uGuy Pierce weNdikimba Ebusayo owathi uyazi ukuthi bonke abakhona bafisa ukwazi ngemisebenzi yokwakha eqhubekayo eNew York State. Wethula i-video ebonisa ukuthi umsebenzi uqhubeka kanjani eWallkill, ePatterson nasezizeni ezisanda kuthengwa eWarwick naseTuxedo, eNew York. EWallkill, isakhiwo esisha sokuhlala okulindeleke ukuba siqedwe ngo-2014 sizoba namakamelo engeziwe angaphezu kuka-300.

Kunezinhlelo zokwakha esizeni esingamahektare ayikhulu esiseWar-wick. UMfoweth’ uPierce wathi, “Nakuba singakaqiniseki ukuthi iyini intando kaJehova ngeWarwick, sizoqhubeka nokwakha ngenjongo yokuthuthela indlunkulu yomhlaba wonke yoFakazi BakaJehova kule ndawo.” Kwenziwa nezinhlelo zokusebenzisa indawo engamahektare angu-20 eqhele ngamakhilomitha ayishumi ukusuka enyakatho yeWarwick ekugcineni imishini nezinto zokwakha. UMfoweth’ uPierce wathi, “Uma imvume yokwakha isitholakele, sithemba ukuthi wonke umsebenzi uzothatha iminyaka emine. Indawo yethu eseBrooklyn iyobe isiyadayiswa.”

UMfoweth’ uPierce wabuza, “Ingabe iNdikimba Ebusayo isishintshe umqondo mayelana nokuba seduze kosizi olukhulu?” Waphendula, “Lutho neze. Uma usizi olukhulu lufika sisakha, lokho kuyoba yinto enhle, empeleni enhle kakhulu!”

QAPHELA INGONYAMA EBHONGAYO

Kwabe sekulandela uStephen Lett, ongelinye lamalungu eNdikimba Ebusayo, waxoxa ngeyoku-1 Petru 5:8, ethi: “Hlalani nisangulukile, qaphani. Isitha senu, uDeveli, sihambahamba njengengonyama ebhongayo, efuna engamshwabadela.” UMfoweth’ uLett wathi izici eziningana zezingonyama zenza umfanekiso kaPetru umchaze kahle uDeveli.

Njengoba izingonyama zinamandla futhi zinejubane kunabantu, akufanele sizame ukulwa noSathane noma ukumbalekela ngamandla ethu. Sidinga usizo lukaJehova. (Isaya 40:31) Ingonyama iyacathama lapho izingela, ngakho kumelwe sibugweme ubumnyama obungokomoya lapho uSathane ezingela khona. Njengoba nje ingonyama ibulala inyamazane engeyona ingozi noma inkonyane ledube elizilalele, unjalo noSathane, akanazwela futhi angathanda  ukusibulala. Lapho ingonyama isisuthi, ngokuvamile ishiya izisulu zingasabonakali nokuthi beziyini, njengoba nje ‘nezimo zokugcina’ zezisulu zikaSathane ezingokomoya ‘ziba zimbi kakhulu kunezokuqala.’ (2 Pet. 2:20) Ngakho kudingeka simelane noSathane futhi sibambelele ngokuqinile ezimisweni zeBhayibheli esizifundile.—1 Pet. 5:9.

YAZISE INDAWO YAKHO ENDLINI KAJEHOVA

Isikhulumi esalandela, uSamuel Herd weNdikimba Ebusayo, sathi, “Sonke sinendawo endlini kaJehova.” Wonke amaKristu anendawo “endlini” kaNkulunkulu—ithempeli lakhe elingokomoya—ilungiselelo lokumkhulekela ngesisekelo somhlatshelo wesihlengo kaJesu. Lena indawo okufanele siyazise njengeyilungelo eliyigugu. NjengoDavide, sifisa ‘ukuhlala endlini kaJehova zonke izinsuku zokuphila kwethu.’—IHu. 27:4.

UMfoweth’ uHerd wabhekisela kumaHubo 92:12-14 wabe esebuza, “UJehova usenza kanjani ukuba sichume?” Waphendula: “Epharadesi elingokomoya, uNkulunkulu usigcina sifudumele, uyasivikela futhi usinika amanzi aqabulayo eqiniso. Masimbonge ngalokho.” Wabe esenxusa izilaleli: “Masaneliseke ngokuhlala endlini kaJehova—hhayi nje isikhashana kodwa kuze kube phakade.”

AMAKRISTU AYALIHLONIPHA IZWI LIKANKULUNKULU

Enkulumweni eyalandela, uDavid Splane, naye oyilungu leNdikimba Ebusayo, wachaza ukuthi selokhu kwathi nhlo amaKristu eqiniso ayalihlonipha iZwi likaNkulunkulu. Ekhulwini lokuqala, asebenzisa lona ukuze axazulule inkinga yokusoka. (IzE. 15:16, 17) Kodwa amanye amaKristu okuzisholo ekhulu lesibili ayefundiswe ifilosofi yamaGreki aqala ukuyibheka njengengcono kunemiBhalo. Kamuva, amanye asusa izimfundiso zeBhayibheli afaka imibono yalabo ababizwa ngokuthi oBaba BeSonto nababusi bamaRoma, okwaphumela ekuveleni kwezimfundiso eziningi zamanga.

UMfoweth’ uSplane waphawula ukuthi emfanekisweni, uJesu wabonisa ukuthi amaKristu agcotshiwe eqiniso ayeyoqhubeka ekhona emhlabeni ukuze avikele iqiniso. (Math. 13:24-30) Asinakusho ngokuqiniseka ukuthi ayengobani lawo maKristu. Nokho, phakathi namakhulu eminyaka edlule, kunabaningi abaye bagxeka izinkolelo nemikhuba engasekelwe  emiBhalweni. Abanye babo kwakunguMbhishobhi Omkhulu u-Agobard waseLyons wangekhulu lesi-9, uPeter waseBruys, uHenry waseLausanne noValdès (noma uWaldo) wangekhulu le-12, uJohn Wycliffe wangekhulu le-14, uWilliam Tyndale wangekhulu le-16, uHenry Grew noGeorge Storrs bangekhulu le-19. OFakazi BakaJehova namuhla bayaqhubeka nokuphakamisa izindinganiso ezingokomBhalo nokuqaphela iBhayibheli njengeliyisisekelo seqiniso. Kungakho iNdikimba Ebusayo iye yakhetha uJohane 17:17 othi: “Izwi lakho liyiqiniso,” njengomBhalo wonyaka ka-2012.

IZINGUQUKO EZITHAKAZELISAYO EZIPHATHELENE NEZIKOLE NENKONZO

Isaziso esakhishwa u-Anthony Morris weNdikimba Ebusayo sachaza izinguquko ezithinta izithunywa zevangeli namaphayona akhethekile. Wathi kusukela ngo-September 2012, kwakuzoba namakilasi eSikole SeBhayibheli Semibhangqwana EngamaKristu emazweni athile. Injongo yeSikole SaseGileyadi isithe ukushintsha. Kusukela ngo-October odlule, bonke labo abaqeqeshwa eGileyadi kuzoba abantu kakade abasohlotsheni oluthile lwenkonzo ekhethekile yesikhathi esigcwele—izithunywa zevangeli ezazingazange ziye eGileyadi, amaphayona akhethekile, ababonisi abajikelezayo noma izikhonzi zaseBethel. Abaphothule kulesi sikole bayosetshenziselwa ukuqinisa nokusimamisa abantu bakaNkulunkulu besemahhovisi amagatsha, emsebenzini wokujikeleza noma ezindaweni ezinabantu abaningi lapho bengakhuthaza khona amabandla emsebenzini wokushumayela.

Amanye amaphayona akhethekile azovula amasimu asezindaweni ezikude nezicezile. Kusukela ngo-January 1, 2012, abanye abaphothule eSikoleni SeBhayibheli Sabazalwane Abangashadile naseSikoleni SeBhayibheli Semibhangqwana EngamaKristu babezomiswa njengamaphayona akhethekile esikhashana futhi basetshenziswe ekuvuleni nasekwandiseni umsebenzi ezindaweni ezikude. Leso sabelo sizovuselelwa njalo ngemva konyaka kuze kuphele iminyaka emithathu. Lawo aphumelelayo ezabelweni zawo angase engabe esashintshwa.

Kwakujabulisa ngempela ukuba kulo mhlangano ka-2011! Sibheke kuJehova ukuba abusise lezi zinhlelo ezintsha zokwandisa umsebenzi wethu wokushumayela nokuqinisa izibopho zobunye bobuzalwane bomhlaba wonke—kube inkazimulo nodumo kuye.

[Ibhokisi/Izithombe emakhasini 18, 19]

UKUBAZI KANGCONO

Isimiso sahlanganisa ingxoxo nabafelokazi abahlanu kwabangu-9 abasaphila bamalungu eNdikimba Ebusayo. UDadewethu uMarina Sydlik, u-Edith Suiter, uMelita Jaracz, uMelba Barry noSydney Barber balandisa ngendlela abalithola ngayo iqiniso nokuthi bayingenela kanjani inkonzo yesikhathi esigcwele. Ngamunye wabo walandisa izilaleli izinto eziyigugu azikhumbulayo ngomyeni wakhe nezibusiso abazijabulela bendawonye. Ukuphetha lezi zingxoxo ngendlela ethinta inhliziyo, izilaleli zacula ingoma 86, enesihloko esithi “Abesifazane Abathembekile, Odade AbangamaKristu.”

[Izithombe]

(Ngenhla) UDaniel noMarina Sydlik; uGrant no-Edith Suiter; uTheodore noMelita Jaracz

(Ngezansi) ULloyd noMelba Barry; uCarey noSydney Barber

[Ibalazwe ekhasini 16]

(Ukuze ubone ukuthi indaba ihlelwe kanjani, bheka encwadini)

Amagatsha ayisithupha ahlanganiswa ukuba abe ngaphansi kokuqondisa kwegatsha laseMexico

IMEXICO

IGUATEMALA

IHONDURAS

I-EL SALVADOR

INICARAGUA

ICOSTA RICA

IPANAMA

[Isithombe ekhasini 17]

Umklamo ocatshangelwayo wendlunkulu yomhlaba wonke yoFakazi BakaJehova ezoba se-Warwick, eNew York