“Luratanakamatsti katoqapjjätawa”

ASA reyejj mä valle manqnämwa ejercitopamp saraskäna. Judeankir qollunakatwa qota jakʼankir pampa oraqenakar sarapjjäna. Vallen mä jachʼa pampar puripkäna ukhajja, Asa reyejj walja soldadonak uñjasajj wal muspharäna. Enemigon soldadonakapajj inas mä millonächïna. Ukampis jupan soldadonakapajj mä 580.000 ukhanikïpjjpachänwa.

Niyakejjay Asa reyejj guerran nuwasiñapächejja, ¿kunsa nayraqat luri? ¿Soldado pʼeqtʼirinakaparuti orden churi? ¿Soldadonakaruch chʼamañchtʼi? ¿Familiaparucha cartanak apayi? Janiwa. Jan ukasti, Jehová Diosaruw maytʼasi.

Kunsa Diosat mayisïna ukat kunas ukjjarojj pasäna ukanak janïr yatjjatkasajja, Asa reyejj kuna kasta jaqënsa uk yatjjatañäni. ¿Kunatsa Diosat maytʼasïna? ¿Kunatsa Diosaw yanaptʼitani sasin confiyäna? Jupat yatjjatañajja, ¿Jehová Diosajj servirinakapar bendicirïtapat kunsa yatichistu?

¿ASA REYEJJ KUNA KASTA JAQËNSA?

Asa chachajj 977 nayra pacha maranwa reyit uttʼasïna. Uka tiempotakejj Israelampi Judá markampejj 20 maranakaw pä reinor jaljat sarnaqjjapjjäna. Uka maranakanjja, Reyin yanapirinakapajj Canaán markankir mirayir diosanakaruw yupaychapjjäna. Ukat kunjamtï Biblian siskejja, Asa reyejj “aski cheqapänwa [Jehová] Diosapa nayraqatanjja. Jupasti yaqha diosanakana altaranakapjja aparpayänwa, ukhamarak idolonakan santuarionakapsa, ajjsarata qalanaksa jiskʼa jiskʼa tʼunjayäna, ukhamarak Asera idolon lantinakapsa tʼunjayarakïnwa” (2 Cró. 14:2, 3). Ukat Judá “oraqetjja jaqonukünwa idolopataki amtani chacha pura jan wali luriri chachanakarojja”. Ukat mayirakïnwa, “Judá markajj Tatituru makhatjjañapataki nayra awkinakapan [Jehová] Diosaparu, ukhamarakiw leyinakapsa mandamiento arunakapsa phoqhayäna” (1 Rey. 15:12, 13; 2 Cró. 14:4).

Asa reyin cheqa yupaychäwit taqe chuyma saytʼasitapatjja, Jehová Diosajj wal kusisïna ukat walja maranakaw sumankañ churäna. Ukatwa reyejj akham säna: “[Jehová] Diosasaruw thaqtanjja, ukatwa jupajj marka jakʼanakasampejja sumana sarnaqañ churistu” sasa. Ukham sumankañ utjatapatwa Judá markajj perqa uyunakap sum muytayapjjäna. Bibliansti siwa: “Lurañanakjja tukuyañkamaw lurapjjäna” sasa (2 Cró. 14:1, 6, 7).

NUWASÏWINA

Jehová Diosajj khitinakatï Jupar confiyapjjatap uñachtʼayapki ukanakar yanaptʼirïtapjja, Asa reyejj sum yatïna. Kunjamtï Biblian siskejja, uka ejercitompi nuwasiñatakejj Jehová Diosaruw yanaptʼa mayisïna. Diosar confiyasajj janiw enemigonakarojj waljanïsipkpansa ukat wali chʼamanïsipkpansa ajjsarañasäkiti sasaw Asa reyejj atinisïna. Ukatjja, Jehová Diosan sutipaw walinsa jan walinsa uñjasispa sasaw amuyarakïna, ukatwa akham sasin maytʼasïna: “¡Yanaptʼapjjetaya, nanakan Tatit Diosajja, nanakasti jumaruwa iyawsapjjsma, juman sutimarurakiw aka ejercitompi nuwasiñatakejj jutapjjarakta! Tata, jumaw nanakan Diosajjätajja. ¡Jumasti uñachtʼayasimaya jan khitis jumataki saytʼasiñapjja!” sasa (2 Cró. 14:11). Uka arunakampejj akham siskaspänsa ukhamawa: ‘Jehová Dios, etiopenakajj Jumaruw jan wal lurañ munapjjtamjja. Jan aleq jaqenakampikejj markamar atipjayamti  ni sutimsa qʼañuchayamti’ sasa. Uka mayisitapjja Diosajj istʼänwa. Biblian akham siwa: “Tatitojj Asarusa, Judá markarusa atipjayänwa etiopenakjjarojja, ukatsti jupanakajj jaltjjapjjänwa” sasa (2 Cró. 14:12).

Jichhürunakanjja, cristianonakajj wali chʼamani enemigonakampiw nuwasiraktanjja. Cheqas janiw cheqpach guerran nuwasktanti, ukampis jiwasatï Jehová Diosar taqe chuyma serviñäni ukat sutipsa jachʼañchañäni ukhajj Jupaw atipjayistani. Jiwasat yaqhepajj inas kuna qʼañu luräwinakatï akapachan utjki ukanakamp nuwasiñapächi, jan ukajj pantjasir chuymampi ukat kunanakatï familiasar Diosat apaqañ munki ukanakampi nuwasiñapächi. Ukhaman jikjjatasisajj Asa reyin mayisïwipaw chʼamañchtʼistaspa. Guerran atipatapajj Jehová Diosan atipjäwipänwa, ukat khitinakatï Diosar confiyapki ukanakajj kunsa suyapjjaspa ukwa uñachtʼayarakistu. Cheqas janipuniw khiti jaqes Jehová Diosar atipjañatak saytʼkaspati.

CHʼAMAÑCHTʼKIRI UKAT EWJJTʼA ARUNAKA

Asa reyejj guerrat kuttʼasinkäna ukhajja, Azarías profetaw chʼamañchtʼañataki ukat ewjjtʼañataki jikjjatir saräna, ukat akham sänwa: “¡Jumajj Asa istʼita, ukhamarak Judá, Benjamín ukanakankiri jaqenaka! Tatitusti jumanakampïskiwa, jumanakatejj jupampïpjjäta ukajja. Jumanakatejj jupar thaqapjjät ukajja, jikjjatapjjätawa, ukampis [...] apanukupjjätajja, jupajj jumanakarojj apanukupjjarakïtamwa”. “Jumanakajj jan ajjsarirïpjjamti, ukatsti janiraki mayjtʼasipjjamti, luratanakamatsti katoqapjjätawa” sasa (2 Cró. 15:1, 2, 7).

Uka arunakajj wal chʼamañchtʼistu. Jiwasatï Jehová Diosar taqe chuyma serviskakiñänejja, Jupajj janiw jaytanukkistaniti. Ukat Jupat maytʼasiñäni ukhas istʼarakistaniwa. “Jumanakajj jan ajjsarirïpjjamti” sasaw Azariasajj säna. Cheqas kunatï askïki uk lurañatakejj jan ajjsarirïñasawa, ukat Diosan yanaptʼapampejj kunatï cheqäki ukat sumäki ukanak luraskakiñäniwa.

Asa reyin Maaca awichapajj “Asera sat mä ídolo lurayata[yna]”, ukatwa “tayka reina kankañapa apaqäna”. Yamas uka idoljja ninampiw nakhantayäna (1 Rey. 15:13). Ukham jan ajjsarasa ukat jankʼaki luratapatjja, Diosajj bendicïnwa. Jiwasajj ukhamarakiw Jehová Diosar jan kun suyasin taqe chuyma confiyañasa, ukat familiasajj janis Diosar istʼapkchejja, taqe kamachinakapwa istʼañasa ukat phoqhañasaraki. Ukhamtï lurañänejja, Jehová Diosajj bendicistaniwa.

Jehová Diosajj Judá markar bendecitap yatisajja, Diosat jitheqtata markankir israelitanakajj, alay toqet Judá markaruw jutjjapjjäna, uk uñjañajj Asa reyitakejj mä bendicionänwa. Cheqa yupaychäwirojj wali askitwa uñjapjjäna ukatwa utanakap jaytanukusajj Jehová Diosar serviri jaqenakamp jakasir jutjjapjjäna. Ukatsti, Asa reyimpi ukat judionakampejj “taqe chuymaw arsupjjarakïna taqe chuymampi [Jehová] Tatitur thaqtaña”. Ukat Diosajj “jupanakampejja jikjjatayasirakïnwa” ukat uka “jakʼankir taqe markanakampejja suman sarnaqañwa churäna” (2 Cró. 15:9-15). ¡Kunapachatï suma chuymani jaqenakajj Jehová Diosar yupaychjjapjje ukhajj wal kusistanjja!

Azarías profetan arunakapajj wakiskir ewjjtʼanirakiwa, jupasti akham sänwa: “Jumanakatejj  [Diosar] apanukupjjätajja, jupajj jumanakarojj apanukupjjarakïtamwa” sasa. Jiwasajj janipun Jehová Diosat jitheqtañäniti, kunattejj jan walipunïspawa (2 Ped. 2:20-22). Kunatsa Diosajj Asa reyir ukham ewjjtʼpachäna ukjja Bibliajj janiw qhanañchkiti, ukampis Asajj janiw istʼkänti.

“MÄ LOQJAMAWA UKHAM LURTAJJA”

Asa reyejj 36 maranak apnaqjjäna ukhajja, Israelan Baasá reyipajj jan walinakpunwa Judá contrajj luräna. Sañäni, qorpankki uka Ramá markwa uyuntayäna, uka markajj Jerusalenat 8 kilometronak alay toqenkiwa, inas markachirinakapan Judá markaru ukat cheqa yupaychäwiru jan sarjjapjjañapatak ukham lurchïna. Ukampis Asa reyejj Jehová Diosat nayrjam mayisiñat sipansa jaqenakarukiw yanaptʼa mayïna. Siria markankir reyiruw regalonak apayäna ukat Israel reinompi nuwasir saram sasaw säna. Ukat Asirionakajj Israelamp nuwasiñatak walja kuti sarapjjatapatjja, Baasajj Ramá cheqat sarjjänwa (2 Cró. 16:1-5).

Jehová Diosajj chuym ustʼayasitapjja Hananí profeta toqew Asar yatiyäna. Asa reyisti, Jehová Diosajj etiopenakat qhespiyatapa ukat “taqe akapachana kunanakatejj lurasiski ukanakjja [sum uñjaskatapa], ukhamata chʼama churañataki khitinakatejj cheqpachana juparu iyawsasipki ukanakaru” uk amtañapänwa. Inas maynin jan wal ewjjtʼat ukham jan wal lurchïna. Jan ukajj inas Baasa reyisa ukat ejercitopasa janiw kunäkisa, jan yanaptʼampikiw atipjirista sasin amuychïna. Kunjamächïnjjay ukampis janiw Jehová Diosar cofiykänti. Ukatwa Hananí profetajj akham säna: “¡Jumasti mä loqjamawa ukham lurtajja! ¡Jichhat uksarusti jukʼampi guerranakawa jumataki utjani!” sasa (2 Cró. 16:7-9).

Uka arunak istʼasajja, Asa reyejj wal colerasïna ukat profetarus carcelaruw uchayäna (2 Cró. 16:10). ¿Walja maranak Diosar taqe chuyma yupaychatajjätsa kamisarak ukham sitanisti sispachänti? Jan ukajj ¿chuymanëjjepancha jan sum amuytʼasjjpachäna? Bibliajj janiw qhanañchkiti.

Ukat 39 maranak apnaqkasaw Asa reyejj kayut wal usuntäna. “Ukham usutäsinsa janiw Tatitur thaqtkänti, jan ukasti qollirinakarukiw saräna” siw Biblianjja. Ukhamasti janiw nayrjam Diosar taqe chuyma yupaychjjpachänti. Ukat 41 maranak apnaqkasa jiwjjäna ukhajj inas ukham chuymanikïskchïna (2 Cró. 16:12-14).

Ukhamäkchïnsa, Asa reyejj suma chuymanïkäna ukat Diosar taqe chuyma serviwaykäna ukanakaw jukʼamp amtatajja. Kunattejj Jehová Diosar yupaychapunïnwa (1 Rey. 15:14). Ukhamasti, ¿kunsa Asa reyit yateqsna? Jehová Diosajj kunjamsa yanaptʼawayistu ukjja amtañasapuniwa, ukaw jan walinakan uñjaskañäni ukhajj Diosar yanaptʼa mayisiñ yanaptʼistani. Ukat janipuniw Diosarojj walja maranak servitas laykojj janis Bibliankir ewjjtʼanak katoqañasajj wakisjjaspa ukham amuyañasäkiti. Walja maranakas Diosar taqe chuyma serviwaykstanjja, juchachasiñänejj cheqañchakipunistaniwa. Ukham cheqañchatäsajj altʼat chuymampiw katoqasiñasa, ukhamatwa jan inamayäkaniti. Ukat jiwasatï Jehová Diosar taqe chuyma jan jitheqtas serviskakiñänejja, Jupajj janipuniw jaytanukkistaniti. Diosajj taqe chuyma servirinakaruw thaqhaski. Ukat Juparakiw chʼamañchtʼaski. Cheqas ukhamwa Asa reyir yanaptʼäna jiwasarojj ukhamwa yanaptʼarakistani.

[9 janan qhanañchäwipa]

Jiwasatï Jehová Diosar taqe chuyma serviñänejj Jupaw atipjañatak yanaptʼistani

[10 janan qhanañchäwipa]

Jehová Diosatak kunatï askïki uk lurañatakejj jan ajjsarirïñaw wakisi