“Adunay Ganti Alang sa Inyong Kalihokan”

SI Haring Asa nanguna sa iyang kasundalohan ug nagdali sa paglugsong gikan sa kabukiran sa Juda paingon sa patag duol sa baybayon. Pag-abot nila sa lapad nga bahin sa walog, si Asa mihunong. Nakurat siya sa iyang nakita. Atua sa ubos ang dako kaayong kampo sa kasundalohan sa Etiopia! Mga usa ka milyon ang ilang gidaghanon, apan halos katunga lang niana ang kasundalohan ni Asa.

Unsay unang gihimo ni Asa? Gihatagan ba dayon niyag instruksiyon ang iyang mga heneral? Gidasig ang iyang kasundalohan? O gisulatan ang iyang pamilya? Wala! Ang una niyang gihimo mao ang pag-ampo.

Sa dili pa nato repasohon ang iyang pag-ampo ug susihon kon unsay sunod nga nahitabo, ato unang hisgotan kon kinsa si Asa. Nganong midangop man siya sa Diyos? Nagdahom ba siya nga tabangan siya sa Diyos? Sa unsang paagi panalanginan ni Jehova ang iyang mga alagad kon buhaton nila ang matarong, ug unsay atong makat-onan niini nga asoy?

KINSA SI ASA?

Sulod sa 20 ka tuig human nabahin ang Israel sa duha ka gingharian, ang Juda naimpluwensiyahan pag-ayo sa paganong pagsimba. Gani sa dihang si Asa nahimong hari sa 977 W.K.P., ang mga opisyal sa palasyo nagsimba sa Canaanhong mga diyos sa pertilidad. Apan ang Bibliya nag-ingon nga “gibuhat ni Asa kon unsay maayo ug matarong sa mga mata ni Jehova nga iyang Diyos.” Iyang “gikuha ang mga langyawng halaran ug ang hatag-as nga mga dapit ug gigun-ob ang sagradong mga haligi ug giputol ang sagradong mga poste.” (2 Cron. 14:2, 3) Gipalayas usab ni Asa sa gingharian sa Juda “ang mga lalaking pampam sa templo,” kinsa nakigsekso sa mga isigka-lalaki ingong bahin sa ilang bakak nga pagsimba. Giawhag usab ni Asa ang katawhan sa “pagpangita kang Jehova nga Diyos sa ilang mga katigulangan” ug sa pagtuman “sa balaod ug sa sugo” sa Diyos.—1 Hari 15:12, 13; 2 Cron. 14:4.

Kay nalipay sa kasibot ni Asa alang sa matuod nga pagsimba, gigantihan siya ni Jehova ug kalinaw sulod sa daghang tuig. Busa ang hari nakaingon: “Atong gipangita si Jehova nga atong Diyos. Kita nangita, ug siya naghatag kanato ug pahulay sa tibuok palibot.” Sulod niining malinawong panahon, gipalig-on sa katawhan ang mga siyudad sa gingharian sa Juda. “Sila nagtukod ug nagmalamposon.”—2 Cron. 14:1, 6, 7.

ANG PAGPAKIGGUBAT NI ASA

Nahibalo si Asa nga gantihan sa Diyos kadtong molihok pinasukad sa pagtuo. Kanay rason nga si Asa miampo kang Jehova sa dihang kinahanglan siyang makiggubat batok sa kasundalohan sa Etiopia. Kini ang kinadaghanang kasundalohan nga narekord sa Bibliya. Apan nahibalo si Asa nga kon mosalig siya sa tabang sa Diyos, wala ray sapayan kon unsa ka daghan o ka gamhanan ang kaaway. Ang ngalan ni Jehova nalangkit niini nga gubat. Busa ang hari miampo: “Tabangi kami, Oh Jehova nga among Diyos, kay kami nagasalig kanimo, ug sa imong ngalan kami mianhi batok niining panon sa katawhan. Oh Jehova, ikaw mao ang among Diyos. Ayaw tugoti nga ang may-kamatayong tawo makahupot ug kusog batok kanimo.” (2 Cron. 14:11) Sama rag siya miingon: ‘Oh Jehova, ikaw ang giatake sa mga Etiopianhon. Ayaw tugoti kining huyang nga mga tawo nga magpildi sa imong katawhan ug magpasipala sa  imong ngalan.’ Gidungog sa Diyos ang pag-ampo ni Asa. Ang Bibliya nag-ingon nga “gipildi ni Jehova ang mga Etiopianhon atubangan ni Asa ug atubangan sa Juda, ug ang mga Etiopianhon nangalagiw.”—2 Cron. 14:12.

Ang katawhan ni Jehova karon nag-atubang ug daghang gamhanang kaaway. Kita dili literal nga makig-away kanila. Apan makaseguro kita nga ihatag ni Jehova ang kadaogan sa tanan niyang matinumanong alagad nga nakigsangka sa espirituwal nga gubat alang sa iyang ngalan. Kita tingali nakigbisog batok sa kalibotanong panghunahuna, sa atong mga kahuyangan, o sa daotang mga impluwensiya nga makadaot sa espirituwalidad sa atong pamilya. Apan bisag unsa pang mga pagsulay ang atong giatubang, madasig kita sa pag-ampo ni Asa. Si Jehova ang naghatag kang Asa ug kadaogan. Gipakita niini kon unsay madahom sa tanang mosalig sa Diyos. Si Jehova mas gamhanan kay kang bisan kinsa.

USA KA PAGDASIG UG PASIDAAN

Sa pagpauli ni Asa gikan sa gubat, gitagbo siya ni Azarias. Gidasig siya sa propeta ug gipasidan-an usab: “Paminaw kanako, Oh Asa ug tibuok Juda ug Benjamin! Si Jehova magauban kaninyo basta kamo magauban kaniya; ug kon kamo mangita kaniya, itugot niya nga siya hikaplagan ninyo, apan kon inyo siyang biyaan siya mobiya kaninyo. . . . Magmaisogon ug ayaw ihuyhoy ang inyong mga kamot, tungod kay adunay ganti alang sa inyong kalihokan.”—2 Cron. 15:1, 2, 7.

Makapalig-on gayod kini sa atong pagtuo. Kini nagpakita nga si Jehova magauban kanato kon kita matinumanong moalagad kaniya. Kon mangayo kitag tabang, iya kitang dunggon. “Magmaisogon,” matod ni Azarias. Nagkinahanglag dakong kaisog ang pagbuhat kon unsay matarong, apan mahimo nato kini sa tabang ni Jehova.

Ang apohan ni Asa nga si Maaca “naghimo ug usa ka makalilisang nga idolo alang sa sagradong poste,” maong gitangtang siya ni Asa ingong “mahal nga ginang,” bisag dili kadto sayon para kaniya. Gisunog usab ni Asa ang idolo sa iyang apohan. (1 Hari 15:13) Gipanalanginan si Asa tungod sa iyang kaisog ug determinasyon. Kita usab kinahanglang magmaunongon kang Jehova ug sa iyang matarong nga mga sukdanan, bisan pag dili magmaunongon ang mga membro sa atong pamilya. Kon ato kanang himoon, gantihan kita ni Jehova.

Lakip sa ganti ni Asa mao ang pagkakita sa daghang Israelinhon gikan sa apostatang amihanang gingharian nga mibalhin sa Juda. Ilang nakita nga si Jehova nagauban kaniya. Gipabilhan nila pag-ayo ang matuod nga pagsimba maong gibiyaan nila ang ilang mga balay aron mopuyo uban sa mga alagad ni Jehova. Si Asa ug ang tibuok Juda malipayong mihimog ‘pakigsaad sa pagpangita kang Jehova sa tibuok nilang kasingkasing ug kalag.’ Unsay resulta? Ang Diyos ‘nagtugot nga siya makaplagan nila; ug si Jehova nagpadayon sa paghatag kanila ug pahulay sa tibuok palibot.’ (2 Cron. 15:9-15) Makapalipay gayod sa dihang ang sinserong mga tawo mopili sa pagsimba kang Jehova!

Apan may gipasidaan usab si propeta Azarias kang Asa. Siya miingon: ‘Kon imong biyaan si Jehova, siya mobiya kanimo.’ Dili gayod nato kana buhaton kay alaot gayod kita! (2 Ped. 2:20-22) Wala ibutyag sa Bibliya kon nganong gipasidan-an ni Jehova si Asa bahin niini, apan nahibalo kita nga gibalewala kini sa hari.

 “IKAW MILIHOK NGA BINUANG”

Sa ika-36 ka tuig nga pagmando ni Asa, si Haring Baasa sa Israel mihimog daotang lakang batok sa Juda. Gipalig-on ni Baasa ang paril sa siyudad sa Rama, nga anaa sa utlanan sa Israel ug Juda. Kini maoy walo lang ka kilometros gikan sa Jerusalem. Lagmit gihimo kini ni Baasa aron ang iyang mga sakop dili makalahos sa Juda ug moalagad kang Jehova ug kang Asa. Imbes mangayog tabang si Asa sa Diyos sama sa iyang gihimo dihang miatake ang mga Etiopianhon, siya midangop ug tawo. Nagpadala siyag gasa ngadto sa hari sa Sirya ug gihangyo kini sa pag-atake sa Israel. Dihang miatake ang mga Siryanhon, si Baasa mipahawa sa Rama.—2 Cron. 16:1-5.

Si Jehova wala malipay sa gihimo ni Asa mao nga iyang gipadala si propeta Hanani sa pagbadlong kaniya. Kay gitabangan siya ni Jehova sa pagpildi sa mga Etiopianhon kaniadto, nahibalo na unta si Asa nga ang “mga mata [ni Jehova] nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.” Tingali si Asa naminaw sa sayop nga tambag. O kaha wala niya isipa nga dakong hulga si Baasa ug ang kasundalohan niini mao nga nagtuo siya nga masulbad ra niya kini sa iyang kaugalingon. Bisag unsa pay rason, si Asa misalig sa tawhanong panghunahuna ug dili kang Jehova. Busa si Hanani miingon: “Labot niini ikaw milihok nga binuang, kay sukad karon aduna unyay mga gubat batok kanimo.”—2 Cron. 16:7-9.

Nasuko pag-ayo si Asa sa pagkadungog niini ug iyang gipabilanggo si propeta Hanani. (2 Cron. 16:10) Tingali si Asa naghunahuna, ‘Dugay na kong nag-alagad nga matinumanon, unya sultihan kog sama niini?’ O tungod kaha sa katigulangon nga wala na siya makahunahunag tarong? Walay giingon ang Bibliya.

Sa iyang ika-39 ka tuig nga pagmando, nakaagom si Asa ug grabeng sakit sa tiil. “Bisan sa iyang pagkasakit siya wala mangita kang Jehova kondili sa mga mananambal,” matod sa Bibliya. Tingali napasagdan na ni Asa ang iyang espirituwalidad. Niana nga kahimtang sa panglawas ug panghunahuna, siya namatay sa ika-41 ka tuig niyang pagmando.—2 Cron. 16:12-14.

Bisan pa niana, mas mipatigbabaw ang maayong mga hiyas ug kasibot ni Asa sa putling pagsimba kay sa iyang mga kasaypanan. Siya wala moundang sa pag-alagad kang Jehova. (1 Hari 15:14) Busa, unsay atong makat-onan sa kinabuhi ni Asa? Kini makatabang kanato sa paghunahuna nga angay natong palandongon kon giunsa kita pagtabang ni Jehova sa miagi. Ang maong mga kasinatian magdasig kanato sa pag-ampo kaniya sa dihang makaatubang kitag bag-ong mga pagsulay. Dili usab nato angayng hunahunaon nga wala na kita magkinahanglan sa tambag sa Bibliya kay dugay na kitang nag-alagad sa Diyos nga matinumanon. Bisag unsa pay atong rekord sa pag-alagad, si Jehova mobadlong kanato kon kita masayop. Kinahanglang mapaubsanon natong dawaton ang maong pagbadlong aron makabenepisyo kita niana. Labaw sa tanan, ang atong langitnong Amahan magauban kanato kon dili kita mobiya kaniya. Si Jehova nagasusi sa tibuok yuta kon kinsa kadtong matinumanon kaniya. Gigamit niya ang iyang gahom sa pagtabang kanila. Kanay gihimo ni Jehova kang Asa, ug himoon usab Niya kana alang kanato.

[Blurb sa panid 9]

Gantihan ni Jehova ang mga matinumanon nga nakigsangka sa espirituwal nga gubat

[Blurb sa panid 10]

Gikinahanglan ang kaisog sa pagbuhat kon unsay matarong