“Ang Inyo Binuhatan Balusan”

SA UNAHAN sang iya hangaway, nagdalidali dulhog si Hari Asa halin sa kabukiran sang Judea pakadto sa baybayon. Sang ara na sia sa nalupyakan, nagpundo sia nga nagahapohapo. Sa ubos nayon, makita niya ang kampo sang kaaway, kag tuman sa ila kadamo! Ining hangaway sang mga Etiopianhon may kadamuon nga isa ka milyon. Apang ang hangaway ni Asa sulusobra lang katunga nila.

Samtang nagahilapit ang inaway, ano gid ang una nga napensaran ni Asa? Manduan ang iya mga heneral? Palig-unon ang iya hangaway? Masulat sa iya pamilya? Indi! Sa sining mabudlay nga tion, nangamuyo si Asa.

Antes naton usisaon ina nga pangamuyo kag hibaluon ang natabo, binagbinagon anay naton kon ano nga sahi sang tawo si Asa. Ano ang nagpahulag sa iya nga mangamuyo? Husto bala nga nangayo sia sing bulig sa Dios? Ano ang ginatudlo sa aton sang kasaysayan ni Asa parte sa kon paano ginapakamaayo ni Jehova ang hilikuton sang Iya mga alagad?

ANG KASAYSAYAN NI ASA

Beinte ka tuig sang ulihi, sa tapos matunga ang Israel sa duha ka ginharian, naimpluwensiahan ang Juda sang pagano nga mga buhat. Sang maghari si Asa sang 977 B.C.E., bisan ang palasyo nadagtaan sang pagsimba sa dios sang pertilidad sang mga Canaanhon. Apang ang inspirado nga sinulatan sang paggahom ni Asa nagsiling nga “ginhimo [niya] ang maayo kag matarung sa mga mata sang GINOO nga iya Dios. Ginkuha niya ang mga halaran nga dumuloong kag ang mataas nga mga duug, kag ginwagwag ang mga obelisco kag ginpulud ang mga Asherim.” (2 Cron. 14:2, 3) Gintabog man ni Asa gikan sa ginharian sang Juda ang “mga sodomanhon” ukon ang mga lalaki sa templo nga nagapakighilawas subong bahin sang ila pagsimba. Luwas sini, ginsugo man niya ang mga tawo nga ‘pangitaon ang GINOO, ang Dios sang ila mga ginikanan,’ kag tumanon ang ‘kasogoan kag sogo’ sang Dios.—1 Hari 15:12, 13; 2 Cron. 14:4.

Nahamuot gid si Jehova sa kakugi ni Asa para sa matuod nga pagsimba, gani ginpadyaan sia sing kalinong sa sulod sang mga tinuig. Ang hari nakasiling: “Ginpangita naton ang GINOO nga aton Dios; ginpangita naton sia, kag sia naghatag sa aton sing pahuway sa palibut.” Bangod sini nga kahimtangan, ginpabakod sang katawhan ang mga siudad sang ginharian sang Juda. “Nagpatindug sila kag nag-uswag,” siling sang Biblia.—2 Cron. 14:1, 6, 7.

SA PATAG-AWAYAN

Base sa rekord parte kay Asa, indi kita makibot nga nangamuyo sia antes makig-away sa pinakadaku nga hangaway nga ginsambit sa Kasulatan. Nahibaluan ni Asa nga ginapadyaan sang Dios ang katutom. Sa iya pangamuyo, nangabay sia sang bulig ni Jehova. Nahibaluan ni Asa nga kon magsalig sia sa bulig sang Dios, indi importante kon daw ano kadamo ukon ka gamhanan ang iya kaaway. Nadalahig diri ang ngalan ni Jehova, kag ini ang rason kon ngaa nangabay si Asa sa Dios. Ang hari nangamuyo: “Buligi kami, O GINOO nga Dios namon, kay sa imo nagasalig kami, kag sa imo ngalan nagakari kami batok sining kadam-an. O GINOO, ikaw ang amon Dios; dili pagpalandasa ang tawo batok sa imo.” (2 Cron. 14:11) Daw pareho lang nga nagsiling sia: ‘Salakayon ka na sang mga Etiopianhon, Jehova. Indi pagtuguti nga malutos ang mga nagadala  sang imo ngalan, para indi ka mapakahuy-an sang ahaw nga mga tawo.’ Gani, “ginsakit sang GINOO ang mga Etiopiahanon sa atubangan ni Asa kag sa atubangan sang Juda, kag nagpalagyo ang Etiopiahanon.”—2 Cron. 14:12.

Sa karon, ang katawhan ni Jehova madamo man sing gamhanan nga kaaway. Indi kita magapakig-away sa ila sa literal nga patag-awayan nga nagagamit sang mga armas. Pero makasalig kita nga padyaan ni Jehova sing kadalag-an ang tanan nga matutom nga nagapakig-away sa espirituwal para sa iya ngalan. Ang aton pagpakig-away nagalakip sa pagsikway sa impluwensia sang imoralidad, pagpakigbato sa aton kaugalingon nga mga kaluyahon, ukon pag-amlig sa aton pamilya gikan sa makahalalit nga mga impluwensia. Pero ano man nga kabudlayan ang aton ginaatubang, mapalig-on kita sang pangamuyo ni Asa. Ang iya kadalag-an, kadalag-an man ni Jehova. Ginapakita sini kon ano ang mapaabot sang mga nagasalig sa Dios. Ang ikasarang sang tawo indi makatindog batok kay Jehova.

PAGPALIG-ON KAG PAANDAM

Pagbalik ni Asa halin sa pagpakig-away, ginsugata sia ni Azarias. Ini nga manalagna nagpalig-on kag nagpaandam: “Pamatii ninyo ako, Asa, kag bug-os nga Juda kag Benjamin: Ang GINOO nagaupud sa inyo, samtang kamo nagaupud sa iya. Kon pangitaon ninyo sia, makita sia ninyo, apang kon bayaan ninyo sia, sia magabiya sa inyo. . . . Magpakabakud kamo! Dili magluya ang inyo mga kamut, kay ang inyo binuhatan balusan.”—2 Cron. 15:1, 2, 7.

Ini nga pinamulong makapabakod sang aton pagtuo. Ginapakita sini nga si Jehova kaupod naton kon mag-alagad kita sing matutom sa iya. Kon mangayo kita sing bulig, makasalig kita nga mamati sia sa aton. “Magpakabakud,” siling ni Azarias. Masami nga kinahanglan ang kaisog sa paghimo sing matarong, pero mahimo naton ini sa bulig ni Jehova.

Ang lola ni Asa nga si Maaca naghimo sing “kalangil-aran nga larawan nga Ashera.” Bisan pa indi mahapos para kay Asa, ginpahalin niya si Maaca sa “pagkahara” kag ginsunog ang iya idolo. (1 Hari 15:13) Ginpakamaayo si Asa bangod sa iya panindugan kag kaisog. Dapat man kita manindugan sa matarong nga mga talaksan ni Jehova bisan pa ang aton mga paryente indi matutom sa Dios. Kon himuon naton ini, padyaan ni Jehova ang aton katutom.

Ang isa sa mga padya ni Asa amo nga makita nga nagadugok sa Juda ang madamo nga Israelinhon gikan sa apostata nga naaminhan nga ginharian. Ginhimo nila ini bangod nakita nila nga si Jehova kaupod ni Asa. Ginpabaloran gid nila ang putli nga pagsimba kay ginbiyaan nila ang ila puluy-an para magpuyo kaupod sa mga alagad ni Jehova. Dayon, si Asa kag ang bug-os nga Juda ‘nagpakigkatipan sa pagpangita sa GINOO, sa bug-os nila nga tagiposoon kag kalag.’ Ano ang resulta? Gintugutan sang Dios nga ‘makita sia nila, kag ginhatagan sila sang GINOO sing kapahuwayan sa palibut.’ (2 Cron. 15:9-15) Nagakalipay man kita kon ang mga mahigugmaon sa pagkamatarong magbaton sang putli nga pagsimba kay Jehova!

Pero, may paandam man si manalagna Azarias. Sia nagsiling: “Kon bayaan ninyo [si Jehova], sia magabiya sa inyo.” Kabay nga indi ini matabo sa aton kay malain gid ang mangin resulta! (2 Ped. 2:20-22) Wala ginsugid sang Kasulatan kon ngaa amo sini ang  ginpaandam ni Jehova kay Asa, pero wala ini ginpamatian sang hari.

“NAKAHIMO KA SING BINUANG”

Sang ika-36 nga tuig sang paghari ni Asa, si Hari Baasa sang Israel nakig-away sa Juda. Ginpabakod ni Baasa ang dulunan nga siudad sang Rama, nga walo ka kilometro sa aminhan sang Jerusalem, ayhan agod punggan ang iya mga sakop nga magdampig kay Asa kag sa putli nga pagsimba. Sa baylo nga mangayo si Asa sing bulig sa Dios subong sang ginhimo niya sang nakig-away sila sa mga Etiopianhon, sa tawo sia nangayo sing bulig. Nagpadala sia sing regalo sa hari sang Siria, kag ginpangabay ini nga salakayon ang naaminhan nga ginharian sang Israel. Sang nagsalakay ang mga Sirianhon, naghalin si Baasa sa Rama.—2 Cron. 16:1-5.

Ginpadala ni Jehova si manalagna Hanani agod sugiran si Asa nga wala Sia nahamuot sa iya ginhimo. Bangod ginluwas sila sang Dios sang nakig-away sila sa mga Etiopianhon, dapat nahibaluan na ni Asa nga “ang mga mata sang GINOO nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.” Mahimo nga nakabaton si Asa sing sala nga laygay ukon wala niya ginkabig si Baasa kag ang hangaway sini nga makatalagam, gani malutos niya ini sa iya lang ikasarang. Ano man ang rason, si Asa nagsalig sa iya kaugalingon nga paghangop kag indi kay Jehova. “Sa sini nakahimo ka sing binuang,” siling ni Hanani, “kay kutub karon may mga inaway ka.”—2 Cron. 16:7-9.

Bangod sini, naakig gid si Asa, kag ginpabilanggo niya si Hanani. (2 Cron. 16:10) Mahimo naghunahuna sia, ‘Masaway ka pa sa akon nga madugay na ako nga matutom?’ Karon nga tigulang na si Asa, nangin malipaton na bala sia? Wala sing may ginsugid ang Biblia.

Sang ika-39 nga tuig sang paggahom ni Asa, gintubuan sia sing malubha nga balatian sa tiil. Apang bisan “sa iya balatian wala sia magdangup sa GINOO, kondi sa mga manugbolong,” siling sang Biblia. Sina nga tion, daw ginpabay-an na ni Asa ang iya espirituwalidad. Amo sini ang iya kahimtangan tubtob napatay sia sa ika-41 nga tuig sang iya paggahom.—2 Cron. 16:12-14.

Pero mahimo nga nalabawan sang maayo nga mga kinaiya ni Asa kag sang iya kakugi sa matuod nga pagsimba ang iya mga kasal-anan. Wala sia nag-untat sa pag-alagad kay Jehova. (1 Hari 15:14) Ano ang matun-an naton sa kasaysayan ni Asa? Ginatudlo sini nga dapat naton pamalandungan kon paano kita ginbuligan ni Jehova sang una kay magapahulag ini sa aton nga pangabayon ang iya bulig kon makaatubang kita sing bag-o nga mga pagtilaw. Pero indi naton paghunahunaon nga indi na naton kinahanglan ang laygay sang Kasulatan kay tinuig na kita nga nagaalagad sing matutom. Bisan pa madugay na kita nga nagaalagad, sabdungon kita ni Jehova kon makasayop kita. Dapat naton batunon sing mapainubuson ang pagtadlong kay para ini sa aton kaayuhan. Labaw sa tanan, ang aton Amay sa langit magaupod sa aton kon padayon kita nga magaupod sa iya. Ang mga mata ni Jehova nagapanuloktulok sa bug-os nga duta sa pagpangita sang mga matutom sa iya. Ginapadyaan niya sila paagi sa paggamit sang iya gahom sa pagbulig sa ila. Ginhimo niya ini kay Asa, kag himuon man niya ini sa aton.

[Blurb sa pahina 9]

Padyaan ni Jehova ang mga matutom nga nagapakig-away sa espirituwal

[Blurb sa pahina 10]

Kinahanglan ang kaisog para mahimo ang husto sa atubangan ni Jehova