KING ASA bona ena tuari taudia be ororo kahana amo idia raka diho ela bona kone kahana. To, koura ena kahana badana ai idia ginidae neganai, Asa ia hoa bada. Henunai be Etiopia tuari taudia edia kamepa badana ia itaia, bona reana tuari taudia 1 milioni bamona idia noho! To, Asa ena tuari taudia be reana 580,000 bamona.

Asa be Etiopia taudia do ia tuari henia. Unai nega ai, dahaka ia karaia guna? Iena jeneral taudia ia hereva henidia, a? Ena tuari taudia ia hagoadaia, a? Ena famili dekenai revareva ia siaia, a? Lasi! Ia be Dirava ia guriguri henia guna.

Asa ena guriguri bona idia vara gaudia ita do herevalaia lasi neganai, ena kara haida do ita herevalaia guna. Dahaka dainai Dirava ena heduru ia tahua? Ia laloa Dirava ese ia do ia durua, a? Edena dala ai Asa ena sivarai amo ita diba, dala maorona idia badinaia taudia be Iehova ese ia hanamodia?

ASA IA KARAIA GAUDIA

Lagani 977 B.C.E. ai Asa be king ai ia lao neganai, Israela bona Iuda be lagani 20 lalodiai idia parara vadaeni. Iuda taudia momo be tomadiho koikoi idia badinaia. King ena ruma ai idia gaukara taudia be Kanana taudia edia dirava haida, natudia momo havaraia siahuna idia henia dirava hahinedia, idia tomadiho henia. To, Baibel ia gwau Asa be “kara namodia bona kara maoromaoro, Lohiabada, iena Dirava, ena vairana dekenai ia karaia.” Danu, Asa ese “idau dirava edia boubou patadia bona ataiai idia noho tomadiho gabudia ia kokia ore, bona nadi dekenai idia karaia du helagadia ia hamakohia, bona kaivakuku ia utua bona hadikaia.” (2 Siv. 14:2, 3) Asa ese “dirava koikoi edia tomadiho gabudia dekenai ariara tatau” ia luludia; edia tomadiho lalonai tatau be tatau ida idia mahuta hebou. Danu, Asa be taunimanima ia hagoadaia “Lohiabada, edia sene taudia edia Dirava do idia tahua, bona iena Taravatu bona oda do idia badinaia.”​—⁠1 Kin. 15:12, 13; 2 Siv. 14:4.

Asa be tomadiho momokani ia badinaia dainai, Iehova ese ia hanamoa bona lagani momo lalodiai Iuda basileia be maino ai ia noho. King Asa ia gwau: “Lohiabada, iseda Dirava ita tahua vadaeni. Iena ura ita tahua dainai ia ese tano kahana ibounai dekenai maino ita dekenai ia henia.” Iuda taudia ese unai maino negana idia gaukaralaia, edia siti idauidau edia magu goadadia idia haginia. Baibel ia gwau: “Idia ese hanua idia haginidia goada, bona edia noho be namo.”​—⁠2 Siv. 14:1, 6, 7.

ASA BE TUARI TOTONA IA LAO

Asa ia diba Iehova be ia idia abidadama henia taudia do ia hanamoa. Unai dainai, Asa be Etiopia edia tuari orea badana ia tuari henia gwauraia neganai, Iehova ena heduru totona ia guriguri. Asa ia diba ena be ena inai taudia edia tuari orea be bada, to ia halusidia diba bema Dirava ia tabekau henia. Danu, ia diba ia be Iehova ena ladana ai ia tuari. Unai dainai ia guriguri, ia gwau: “Lohiabada, aiemai Dirava e, mani ai do oi durua, badina oi dekenai ai abidadama henia noho inai, bona oiemu ladana dekenai inai tuari orea badana do ai tuari henia. Lohiabada e, oi be aiemai Dirava, inai orea do oi halusia, badina taunimanima be idia gini diba lasi oiemu vairana dekenai.” (2 Siv. 14:11) Unai be hegeregere Asa ia gwau, ‘Iehova e, Etiopia tuari taudia ese ai idia tuari henia neganai, idia be oi idia tuari henia unai. Namo lasi unai goada lasi taudia ese emu taunimanima idia hadarerea bona emu ladana idia hadikaia.’ Dirava ese Asa ena guriguri ia haerelaia. Baibel ia hahedinaraia  Iehova ese Etiopia taudia ia halusia, bona idia be Asa bona Iuda taudia amo idia heau.​—⁠2 Siv. 14:12.

Hari inai negai, Iehova ena taunimanima be tanobada ena lalohadai kereredia, sibona edia manoka gaudia, eiava edia famili ena hetura karana Iehova ida idia hadikaia diba gaudia ida idia tuari bamona. Unai tuari lalonai, ita be tuari kohu korikoridia ita gaukaralaia lasi, to ita diba Iehova ese iena ladana idia matauraia taudia do ia durua bona kwalimu do ia henidia. Herevana dahaka hekwakwanai ita davaria, to Asa ena guriguri ese ita ia hagoadaia. Oibe, Iehova ese Asa dekenai kwalimu ia henia. Ita danu, bema Iehova ita abidadama henia, ia ese ita do ia durua ita kwalimu totona. Oibe, Iehova ena siahu ese taunimanima o gau idauidau edia siahu ia hanaia.

HAGOADAIA BONA SISIBA HEREVANA

Asa be tuari amo ia giroa lou neganai, peroveta tauna Asaraia ida ia hedavari. Asaraia ese ia hagoadaia bona sisiba henia, ia gwau: “Asa e, bona Iuda bona Beniamina taudia ibounai e, lau dekenai do umui kamonai! Umui be Lohiabada dekenai umui noho neganai, ia ese umui dekenai danu ia noho. Bema Lohiabada umui tahua, umui ese do umui davaria. To bema umui rakatania, ia ese umui do ia rakatania.” Asaraia ma ia gwau: “Do umui gini goada, bona do umui laloa manoka lasi, badina davana namona do umui davaria Dirava dekena amo.”​—⁠2 Siv. 15:1, 2, 7.

Asaraia ena hereva ese eda abidadama ia hagoadaia diba, badina ia hahedinaraia bema mai abidadama ida Iehova ita hesiai henia, Ia ese ita do ia rakatania lasi. Ita diba Iehova ita guriguri henia neganai, ita do ia durua. Asaraia ia gwau: “Do umui gini goada.” Nega momo dala maorona ita badinaia be mai ena hekwarahi, to ita diba Iehova ena heduru amo ita gini goada diba.

Asa ena tubuna hahinena, Maka be “Asera ena kaivakuku, lebulebu gauna” ia haginia. Unai dainai, Asa ese ena tubuna be ena “kwini” dagina amo ia kokia, bona ena kaivakuku ia gabua. Asa ese unai bamona ia karaia ena be ia auka. (1 Kin. 15:13) Asa be dala maorona ia badinaia dainai Iehova ese ia hanamoa. Ita danu, herevana eda varavara be Dirava idia badinaia o lasi, to Iehova bona ena kara maoromaoro taravatudia ita badinaia be gau badana. Unai bamona ita karaia neganai, Iehova ese ita do ia hanamoa.

Asa ena badinaia karana dainai ia vara hahenamo ta be, Israela taudia momo ese aposteit karadia idia badinaia not basileia idia rakatania, bona Iuda dekenai idia lao. Unai bamona idia karaia, badina idia itaia Iehova be Asa ia durua. Idia be tomadiho momokani idia ura henia bada dainai, edia hanua idia rakatania bona Iehova ena hesiai taudia huanai idia noho. Gabeai, Asa bona Iuda taudia ibounai be “gwauhamata taravatuna idia gwauraia, Lohiabada, edia sene taudia edia Dirava do idia tahua momokani, mai edia kudoudia bona mai edia laumadia ibounai danu.” Dahaka ia vara? “Idia ese [Dirava] idia davaria. Bona Lohiabada ese idia dekenai maino ia henia.” (2 Siv. 15:9-15) Hari danu, kudou-maoro taudia be tomadiho momokani idia abia dae neganai ita moale.

Danu, Peroveta tauna Asaraia be Asa dekenai sisiba aukana ia henia. Ia hamaoroa bema ia be Iehova ia rakatania, Iehova ese ia do ia rakatania danu. Ita ura lasi ita dekenai unai ia vara. Ita diba bema Iehova ita rakatania, dika bada do ita davaria! (2 Pet. 2:20-22) Baibel ia hahedinaraia lasi dahaka dainai Iehova  ese Asa dekenai unai sisiba ia henia, to ita diba ia be unai sisiba ia abia dae lasi.

“OI ESE KARA KAVAKAVANA OI KARAIA VADAENI”

Asa ena lohia lagani namba 36 ai, Israela ena King Basa ese Iuda taudia ia tuari henia. Basa ese Rama siti ena magu ia ha-aukadia. Unai siti be Israela bona Iuda edia hetoana ai ia noho, bona Ierusalema amo ena daudau be kilomita 8. Reana Basa be unai ia karaia, badina ia ura lasi ena taunimanima be Iuda dekenai idia lao bona Iehova bona King Asa idia hesiai henia. Unai negai Asa be Dirava ena heduru ia noia lasi, guna Etiopia taudia ia tuari henia neganai ia karaia bamona. To, taunimanima edia heduru ia noia. Asa ese Suria ena king dekenai harihari gauna ta ia siaia, bona ia noia Israela taudia ia tuari henia totona. Vadaeni, Suria taudia ese Israela taudia idia tuari henia neganai, Basa be Rama ena magu ha-aukaia gaukarana ia rakatania.​—⁠2 Siv. 16:1-5.

Iehova be Asa dekenai ia moale lasi dainai, peroveta tauna Hanani ia siaia Asa ia sisiba henia totona. Namona be Asa ia laloatao, guna Dirava ese ia durua dainai Etiopia taudia ia halusia. Bona Iehova ena matana be tanobada ena kahana ibounai ia itaia noho, ia ‘idia badinaia momokani taudia ia hagoadaia totona.’ Reana Asa be haida amo sisiba kererena ia abia. Eiava ia laloa Basa bona ena tuari taudia be goada lasi dainai, ia sibona ese ena ura dalanai ia tuari henidia diba. Asa ena kara ena badina ita diba lasi, to ia be Iehova ia abidadama henia lasi. Hanani ia gwau: “Oi ese kara kavakavana oi karaia vadaeni, bona unai dainai hari ia lao, tuari be nega ibounai do idia vara oi dekenai.”​—⁠2 Siv. 16:7-9.

Asa be unai hereva dekenai ia badu dikadika bona Hanani be dibura ruma ai ia atoa. (2 Siv. 16:10) Reana, Asa ia laloa: ‘Lau be lagani momo lalodiai Dirava lau hesiai henia vadaeni, to dahaka dainai lau dekenai sisiba aukana ia henia?’ Reana ia buruka dainai ia laloa namonamo lasi, a? Baibel ese unai ia gwauraia lasi.

Asa ena lohia lagani namba 39 lalonai, ena aena dekenai gorere ta ia vara. Baibel ia gwau “iena hisihisi lalonai danu Asa ese Lohiabada ia tahua lasi, to muramura taudia edia durua sibona ia tahua.” Toana be Asa ena hetura karana Iehova ida be ia manoka. Bona reana edia hetura karana ia goada lou lasi ela bona Asa be ena lohia lagani namba 41 ai ia mase.​—⁠2 Siv. 16:12-14.

Toana be Iehova ese Asa ena kara namodia bona tomadiho ura henia karana ia lalodia bada, bona ena kerere ia lalodia lasi. Asa be Iehova tomadiho henia karana ia rakatania lasi. (1 Kin. 15:14) Asa ena sivarai amo dahaka ita dibaia? Bema guna Iehova ese ita ia durua daladia ita laloa lou, unai ese ita do ia durua hekwakwanai idia vara neganai, Iehova ena heduru totona do ita noinoi. Danu, namo lasi ita laloa ita be lagani momo lalodiai Iehova ita hesiai henia dainai, Baibel amo ita idia sisiba henia be anina lasi. Herevana ita be nega daudau lalonai Iehova ita hesiai henia, to bema ita kerere, ia ese ita do ia sisiba henia. Bema ita manau bona Iehova ena sisiba ita abia dae, namo do ita davaria. Ita dibaia gauna badana be inai: Bema mai abidadama ida iseda guba Tamana Iehova ita hesiai henia, ia be ita ida do ia noho hanaihanai. Iehova ena matana be tanobada ena kahana ibounai ia itaia noho, ia idia badinaia momokani taudia ia hagoadaia totona. Ia ura ena siahu ia gaukaralaia idia ia durua totona. Oibe, Iehova be Asa ia durua bamona, ita do ia durua danu.

[Blurb on page 9]

Iehova ese ia idia badinaia taudia ia hanamoa

[Blurb on page 10]

Dala maorona badinaia totona ita gini goada be namo